ಫ್ಲೋರಿಡಾ (ಅಮೇರಿಕ),ಆ.7- ಫ್ಲೋರಿಡಾ ಕೀಸ್ ಕರಾವಳಿ ಮೂಲಕ ಅಕ್ರಮವಾಗಿ ಅಮೇರಿಕಾ ಪ್ರವೇಶಿಸಲು ವಲಸಿಗರಿದ್ದ ದೋಣಿ ಸಮುದ್ರದಲ್ಲಿ ಮುಳುಗಿದ ಪರಿಣಾಮ ಇಬ್ಬರು ಸಾವನ್ನಪ್ಪಿ 5 ಜನರು ನಾಪತ್ತೆಯಾಗಿದ್ದಾರೆ.
ಕಡಲತೀರದ ಸಮೀಪವೇ ಈ ದುರಂತ ಸಂಭವಿಸಿದ್ದು, ಅಮೇರಿಕದ ಕರಾವಳಿ ಕಾವಲುಪಡೆ ತಕ್ಷಣ ಅವರನ್ನು ರಕ್ಷಿಸಲು ಮುಂದಾಗಿ ಹಲವರ ಜೀವ ಉಳಿಸಿದ್ದಾರೆ. ನಾಡದೋಣಿಯಲ್ಲಿ ಸುಮಾರು 15 ವಲಸಿಗರು ಅಕ್ರಮವಾಗಿ ಅಮೇರಿಕ ಪ್ರವೇಶಕ್ಕೆ ಬರುವಾಗ ಅಲೆಗಳ ಅಬ್ಬರಕ್ಕೆ ದೋಣಿ ಮುಗುಚಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಪ್ರಾಥಮಿಕ ಮಾಹಿತಿಯ ಪ್ರಕಾರ ಈ ವಲಸಿಗರು ಯಾವ ದೇಶಕ್ಕೆ ಸೇರಿದವರೆಂಬ ಮಾಹಿತಿ ತಿಳಿದು ಬಂದಿಲ್ಲ. ಮಾಹಿತಿ ಸಿಕ್ಕ ನಂತರ ರಾಯಲ್ ಕೆರೆಬಿಯನ್ ಕ್ರೂಸ್ ಮೂಲಕ ಸ್ಥಳಕ್ಕೆ ಬಂದ ಯೋಧರು ನೀರಿನಲ್ಲಿ ಮುಳುಗುತ್ತಿದ್ದ ಸುಮಾರು 4 ಜನರನ್ನು ರಕ್ಷಿಸಿ, ಅವರಿಗೆ ಪ್ರಾಥಮಿಕ ಚಿಕಿತ್ಸೆ ನೀಡಿ ಆಹಾರ, ಬಟ್ಟೆ ನೀಡಲಾಗಿದೆ ಎಂದು ಕೋಸ್ಟ್‍ಗಾರ್ಡ್‍ನ ಅಧಿಕಾರಿಗಳು ತಿಳಿಸಿದ್ದಾರೆ.
