ಫ್ಲೋರಿಡಾ, ಏ.2- ಐವತ್ತು ವರ್ಷಗಳ ಬಳಿಕ ಚಂದ್ರನ ಅನ್ವೇಷಣೆಗೆ ಹೊರಟಿರುವ ನಾಸಾದ ಐತಿಹಾಸಿಕ ಆರ್ಟೆಮಿಸ್-11 ಮಿಷನ್ ಉಡಾವಣೆ ಯಶಸ್ವಿಯಾಗಿದೆ. ಭಾರತೀಯ ಕಾಲಮಾನ ಪ್ರಕಾರ ಇಂದು ಬೆಳಗ್ಗೆ 4:05ಕ್ಕೆ ಕೆನಡಿ ಬಾಹ್ಯಾಕಾಶ ಕೇಂದ್ರದಿಂದ ನಾಲ್ವರು ಗಗನಯಾತ್ರಿಗಳಿದ್ದ ಒರಾಯನ್ ಬಾಹ್ಯಾಕಾಶ ನೌಕೆಯನ್ನು ಅತ್ಯಂತ ಶಕ್ತಿಶಾಲಿ ಸ್ಪೇಸ್ ಲಾಂಚ್ ಸಿಸ್ಟಮ್ (ಎಸ್ಎಲ್ಎಸ್) ರಾಕೆಟ್ ಮೂಲಕ ಬಾಹ್ಯಾಕಾಶಕ್ಕೆ ಕಳುಹಿಸಲಾಗಿದೆ.
ಉಡಾವಣೆಯಾದ ಸುಮಾರು 8.5 ನಿಮಿಷಗಳ ನಂತರ ರಾಕೆಟ್ನ ಕೋರ್ ಸ್ಟೇಜ್ (ದೊಡ್ಡ ಕೆಳಭಾಗ) ಬೇರ್ಪಟ್ಟಿತು. ಈ ಸಮಯದಲ್ಲಿ ಒರಾಯನ್ ನೌಕೆಯು ತನ್ನ ಮೇಲಿನ ಹಂತವಾದ ಐಸಿಪಿಎಸ್ನೊಂದಿಗೆ ಭೂಮಿಯ ಕೆಳ ಕಕ್ಷೆಯನ್ನು ತಲುಪಿತು.
ನೌಕೆಯು ಭೂಮಿಯ ಸುತ್ತ ತನ್ನ ಮೊದಲ ಕಕ್ಷೆಯಲ್ಲಿ ಸಂಚರಿಸಲಾರಂಭಿಸಿದ ಬಳಿಕ 10 ರಿಂದ 40 ನಿಮಿಷಗಳವರೆಗೆ ಗಗನಯಾತ್ರಿಗಳು ಮತ್ತು ನಾಸಾ ನಿಯಂತ್ರಣ ಕೇಂದ್ರವು ನೌಕೆಯ ಸೌರಫಲಕಗಳು ಸರಿಯಾಗಿ ತೆರೆದುಕೊಂಡಿವೆಯೇ ಎಂದು ಪರೀಕ್ಷಿಸಿದರು.
ಉಡಾವಣೆಯಾದ ನಂತರ ಸುಮಾರು ಒಂದೂವರೆ ಗಂಟೆಯ (90 ನಿಮಿಷಗಳು) ನಂತರ ಆರ್ಟೆಮಿಸ್ 11 ಮಿಷನ್ 74 ಸಾವಿರ ಕಿ.ಮೀ ಎತ್ತರದ ಎರಡನೇ ಹಂತದ ಕಕ್ಷೆಯನ್ನು ತಲುಪಿತು. ಗನಯಾತ್ರಿಗಳು ಈ ಕಕ್ಷೆಯಲ್ಲಿ 24 ಗಂಟೆಗಳ ಕಾಲ ಇದ್ದು ಪರೀಕ್ಷೆಗಳನ್ನು ನಡೆಸಿದ ನಂತರ ಭೂಮಿಯ ಕಕ್ಷೆಯನ್ನು ತೊರೆದು ಚಂದ್ರನತ್ತ ತನ್ನ ಪ್ರಯಾಣವನ್ನು ಆರಂಭಿಸಲಿದೆ.
1972ರ ಅಪೊಲೊ 17 ಮಿಷನ್ ನಂತರ, ಸುಮಾರು 50 ವರ್ಷಗಳ ಬಳಿಕ ಚಂದ್ರನ ಸಮೀಪಕ್ಕೆ ಮಾನವರು ಪ್ರಯಾಣಿಸುತ್ತಿರುವುದು ಇದೇ ಮೊದಲು. ಈ ಬಾರಿ ಗಗನಯಾತ್ರಿಗಳು ಚಂದ್ರನ ಮೇಲೆ ಇಳಿಯುವುದಿಲ್ಲ, ಬದಲಾಗಿ ಮುಂದಿನ ಆರ್ಟೆಮಿಸ್ ಮಿಷನ್ನಲ್ಲಿ ಚಂದ್ರನ ಮೇಲೆ ಇಳಿಯಲು ಅಗತ್ಯವಿರುವ ವ್ಯವಸ್ಥೆಗಳನ್ನು ಪರೀಕ್ಷಿಸಲಿದ್ದಾರೆ.
10 ದಿನಗಳ ಸುದೀರ್ಘ ಪ್ರಯಾಣದಲ್ಲಿ ಗಗನಯಾತ್ರಿಗಳು ಚಂದ್ರನನ್ನು ಸುತ್ತುಹಾಕಿ ಅಧ್ಯಯನ ನಡೆಸಿ ಭೂಮಿಗೆ ಮರಳಲಿದ್ದಾರೆ. ಭೂಮಿಯಿಂದ ಸುಮಾರು 4 ಲಕ್ಷ ಕಿಲೋಮೀಟರ್ ದೂರದವರೆಗೆ ಈ ನೌಕೆ ಪ್ರಯಾಣಿಸಲಿದೆ. ಇದು 1970ರಲ್ಲಿ ಅಪೊಲೊ 13 ಮಿಷನ್ ನಿರ್ಮಿಸಿದ್ದ ದಾಖಲೆಯನ್ನು (4,00,171 ಕಿ.ಮೀ) ಮೀರಿಸುವ ಸಾಧ್ಯತೆಯಿದೆ.
ಗಗನಯಾತ್ರಿಗಳು ಚಂದ್ರನ ಮೇಲ್ಮೈಯಿಂದ ಸುಮಾರು 6,400 ರಿಂದ 9,600 ಕಿಲೋಮೀಟರ್ ದೂರದಲ್ಲಿ ಚಂದ್ರನ ಹಿಂಬದಿಯ ಮೂಲಕ ಹಾದು ಹೋಗುತ್ತಿರುವುದು ಈ ಮಿಷನ್ನ ವಿಶೇಷತೆ. 10 ದಿನಗಳ ಇಡೀ ಮಿಷನ್ ಅವಧಿಯಲ್ಲಿ ಗಗನಯಾತ್ರಿಗಳು ಒಟ್ಟು 11,02,400 ಕಿಲೋಮೀಟರ್ಗಳಿಗಿಂತಲೂ ಹೆಚ್ಚು ದೂರವನ್ನು ಕ್ರಮಿಸಲಿದ್ದಾರೆ.
ರೀಡ್ ವೈಸ್ಮನ್ ಅವರು ಈ ಮಿಷನ್ ಕಮಾಂಡರ್ ಆಗಿದ್ದು, ವಿಕ್ಟರ್ ಗ್ಲೋವರ್ ಅವರು ಪೈಲಟ್ (ಚಂದ್ರನತ್ತ ಪ್ರಯಾಣಿಸುವ ಮೊದಲ ಕಪ್ಪು ವರ್ಣೀಯ ವ್ಯಕ್ತಿ) ಆಗಿದ್ದಾರೆ. ಮಿಷನ್ ಸ್ಪೆಷಲಿಸ್ಟ್ಗಳಾದ ಕ್ರಿಸ್ಟಿನಾ ಕೋಚ್ (ಚಂದ್ರನತ್ತ ಪ್ರಯಾಣಿಸುವ ಮೊದಲ ಮಹಿಳೆ), ಜೆರೆಮಿ ಹ್ಯಾನ್ಸನ್ ( ) ಇರಲಿದ್ದಾರೆ.
ಪ್ರಾಮುಖ್ಯತೆ ಯಾಕೆ? 1972ರಲ್ಲಿ ನಡೆದ ಅಪೊಲೊ 17 ಮಿಷನ್ ನಂತರ 54 ವರ್ಷಗಳ ಬಳಿಕ ಮಾನವಸಹಿತ ನೌಕೆ ಚಂದ್ರನತ್ತ ಪಯಣಸುತ್ತಿರುವುದರಿಂದ ಕುತೂಹಲ ಹೆಚ್ಚಾಗಿದೆ. ಚಂದ್ರನ ಮೇಲೆ ಸಂಶೋಧನೆ ನಡೆಸುವ ಮೂಲಕ ಮುಂದಿನ ದಿನಗಳಲ್ಲಿ ಮಂಗಳ ಗ್ರಹಕ್ಕೆ ಮಾನವರನ್ನು ಕಳುಹಿಸಲು ಬೇಕಾದ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುವ ಯೋಜನೆಯನ್ನು ನಾಸಾ ಹಾಕಿಕೊಂಡಿದೆ.
ಮುಖ್ಯ ಉದ್ದೇಶ ಏನು? ಗಗನಯಾತ್ರಿಗಳೊಂದಿಗೆ ಒರಾಯನ್ ನೌಕೆಯು ಬಾಹ್ಯಾಕಾಶದಲ್ಲಿ ಹೇಗೆ ಕಾರ್ಯನಿರ್ವಹಿಸುತ್ತದೆ ಮತ್ತು ಅಲ್ಲಿನ ಸೂರ್ಯನ ವಿಕಿರಣಗಳನ್ನು ಹೇಗೆ ತಡೆದುಕೊಳ್ಳುತ್ತದೆ ಎಂಬುದನ್ನು ಪರೀಕ್ಷಿಸುವುದು ಈ ಮಿಷನ್ನ ಗುರಿಯಾಗಿದೆ. ಇದು ಮುಂದಿನ ದಿನಗಳಲ್ಲಿ ಚಂದ್ರನ ಮೇಲೆ ಮಾನವರನ್ನು ಇಳಿಸುವ ಆರ್ಟೆಮಿಸ್-3 ( ) ಯೋಜನೆಗೆ ಸಹಾಯವಾಗಲಿದೆ.