ನವದೆಹಲಿ, ಮಾ.1- ಸಂಧಾನ ಮಾತುಕತೆ ಪ್ರಗತಿಯಲ್ಲಿರುವ ನಡುವೆಯೇ ಉಕ್ರೇನ್ ನ ರಾಜಧಾನಿ ಕ್ಯಿವ್ ಸೇರಿದಂತೆ ಪ್ರಮುಖ ನಗರಗಳನ್ನು ರಷ್ಯ ಪಡೆಗಳು ಸುತ್ತುವರೆದಿದ್ದು, ಯಾವ ಕ್ಷಣದಲ್ಲಾದರೂ ಯುದ್ಧ ನಿರ್ಣಾಯಕ ಹಂತ ತಲುಪಲಿದೆ. ಈ ನಡುವೆ ಉಕ್ರೇನ್ ಜನವಸತಿ ಪ್ರದೇಶಗಳ ಮೇಲೆ ಸೆಲ್ ದಾಳಿ ಮುಂದುವರೆದಿದೆ. ಒಂದೇ ಕಡೆ 70 ಉಕ್ರೇನ್ ಸೈನಿಕರು ಹತರಾಗಿದ್ದಾರೆ.
ರಷ್ಯಾ ಪಡೆಗಳು ಉಕ್ರೇನ್ ರಾಜಧಾನಿ ಕ್ವಿವ್, ಎರಡನೇ ಮಹಾನಗರ ಖರ್ಕಿವ್, ಲುಹನ್ಸಕ್, ಡೊನೆಟ್ಸಕ್, ಮರಿಯುಪೋಲ್, ಕ್ರಿಮೆನಿಯಾ ಸೇರಿದಂತೆ ಹಲವು ಭಾಗಗಳಲ್ಲಿ ಸುಮಾರು 200 ಕಿಲೋ ಮೀಟರ್ ಸೇನೆ ಸುತ್ತುವರೆದಿದೆ. ಉಕ್ರೇನ್‍ನ ಪೂರ್ವ, ದಕ್ಷಿಣ, ಪಶ್ಚಿಮ ಭಾಗದಲ್ಲಿ ಸೇನೇ ಜಮಾವಣೆಯಾಗಿದೆ. ಸಮುದ್ರ ( ಬ್ಲಾಕ್ ಸೀ ) ಮಾರ್ಗವೂ ರಷ್ಯಾದ ಹಿಡಿತದಲ್ಲಿದೆ. ವಾಯು ಸೇನೆಯ ಯುದ್ಧವಿಮಾನಗಳು ನಿರ್ಬೀಡೆಯಿಂದ ಸಂಚರಿಸುತ್ತಿದ್ದು, ನಿರಂತರವಾಗಿ ಸೆಲ್ ದಾಳಿ ಮುಂದುವರೆಸಿವೆ.
ಕ್ವಿವ್‍ನಿಂದ ಕೇವಲ ಆರು ಕಿಲೋ ಮೀಟರ್ ಅಂತರದಲ್ಲಿ ಸಾಲು ಗಟ್ಟಿ ನಿಂತಿರುವ ಉಪಗ್ರಹ ಆಧಾರಿತ ಚಿತ್ರಗಳನ್ನು ಮಾಧ್ಯಮಗಳಿಗೆ ಬಿಡುಗಡೆ ಮಾಡಲಾಗಿದೆ. ಮೂರು ಪಥದಲ್ಲಿ ವಾಹನಗಳು ದಟ್ಟವಾಗಿ ಜಮಾವಣೆಗೊಂಡಿವೆ. ರಷ್ಯಾ ಅಧ್ಯಕ್ಷರು ಯಾವುದೇ ಕ್ಷಣದಲ್ಲಿ ಸೂಚನೆ ನೀಡಿದರು ಉಕ್ರೇನ್‍ನ ರಾಜಧಾನಿಗೆ ನುಗ್ಗಿ ಅರಮನೆಯನ್ನು ತಮ್ಮ ವಶಕ್ಕೆ ತೆಗೆದುಕೊಂಡು ಅಲ್ಲಿನ ಸರ್ಕಾರವನ್ನು ಅಮಾನತಿನಲ್ಲಿಡುವ ಸಾಧ್ಯತೆ ಇದೆ.
ಯುದ್ಧ ಆರಂಭವಾಗಿ ಆರು ದಿನ ಕಳೆದಿದ್ದು, ನಿನ್ನೆಯಿಂದ ಸಂಧಾನ ಮಾತುಕತೆಗಳು ಆರಂಭವಾಗಿದ್ದವು. ಎರಡು ಸುತ್ತಿನ ಮಾತುಕತೆಗಳು ವಿಫಲವಾಗಿವೆ. ರಷ್ಯಾ ಯುದ್ಧ ನಿಲ್ಲಿಸದ ಹೊರತು ಮಾತುಕತೆ ಪ್ರಯೋಜನವಿಲ್ಲ ಎಂದು ಉಕ್ರೇನ್ ಆರಂಭದಲ್ಲೇ ಹೇಳಿತ್ತು.
ರಷ್ಯಾ ಇತ್ತ ಮಾತುಕತೆಯ ಸೋಗಿನಲ್ಲಿ ಸಮಯ ಕಳೆದಿದ್ದು, ಈ ಮಧ್ಯೆ ಸದ್ದಿಲ್ಲದೆ ತನ್ನ ಸೇನಾ ಜಮಾವಣೆಯನ್ನು ಹೆಚ್ಚಿಸಿದೆ. ಉಕ್ರೇನ್ ಅಧ್ಯಕ್ಷರು ಅಂತರರಾಷ್ಟ್ರೀಯ ಬೆಂಬಲಯಾಚನೆಯಲ್ಲಿ ತೊಡಗಿದ್ದಾರೆ. ಪೋಲೆಂಡ್, ಜೆಕ್, ಬ್ರಿಟನ್, ಗ್ರಿಸ್ ಸೇರಿದಂತೆ ಹಲವು ರಾಷ್ಟ್ರಗಳು ಉಕ್ರೇನ್‍ಗೆ ನೆರವು ನೀಡಿವೆ. ಆದರೆ ಜಗತ್ತಿನಲ್ಲಿ ಬಲಿಷ್ಠ ಸೇನೆ ಹೊಂದಿರುವ ರಷ್ಯಾ ಮುಂದೆ ಈ ಬಲ ಸಾಲದಾಗಿದೆ. ಅಮೆರಿಕಾ, ಪ್ರಾನ್ಸ್ ರಾಷ್ಟ್ರಗಳು ಉಕ್ರೇನ್ ಗೆ ನೈತಿಕ ಬೆಂಬಲ ವ್ಯಕ್ತ ಪಡಿಸಿವೆಯೇ ಹೊರತು ಭೌತಿಕವಾಗಿ ಬೆಂಬಲಕ್ಕೆ ನಿಂತಿಲ್ಲ.
ಉಕ್ರೇನ್ ಈವರೆಗೂ ಸ್ವಂತ ಬದಲ ಮೇಲೆ ಪ್ರತಿರೋಧ ವ್ಯಕ್ತ ಪಡಿಸುತ್ತಲೆ ಬಂದಿದೆ. ಆದರೆ ಅದು ಎಷ್ಟು ದಿನಗಳವರೆಗೂ ಮುಂದುವರೆಯಲಿದೆ ಎಂದು ಕಾದು ನೋಡಬೇಕಿದೆ.
