ನವದೆಹಲಿ,ಅ.10- ಭಾರತದ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್‌ಕುಮಾರ್‌ ರಾಜೀನಾಮೆಗೆ ಒತ್ತಾಯಿಸಿ ರಾಷ್ಟ್ರ ರಾಜಧಾನಿ ನವದೆಹಲಿಯ ಜಂತರ್‌ಮಂತರ್‌ನಲ್ಲಿ ಕ್ರಾಕೋಚ್‌ ಜನತಾ ಪಾರ್ಟಿ(ಸಿಜೆಪಿ) ಹಮಿಕೊಂಡಿದ್ದ ಪ್ರತಿಭಟನೆಯನ್ನು ಪೊಲೀಸರು ಬಹುತೇಕ ವಿಫಲಗೊಳಿಸಲಾಗಿದ್ದು, ಮುನ್ನೆಚ್ಚರಿಕಾ ಕ್ರಮವಾಗಿ ಹಲವರನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಸಿಜೆಪಿ ಸಂಸ್ಥಾಪಕ ಅಧ್ಯಕ್ಷ ಅಭಿಜಿತ್ ಧೀಪ್ಕೆ, ವಕ್ತಾರ ಅಶುತೋಶ್‌ ರಂಕಾ, ಸೌರವ್‌ ದಾಸ್‌, ಯೂಟಬರ್‌ ಧ್ರುವ್‌ ರಾಠಿ, ರತ್ನಾ ಸಿಂಗ್‌ ಸೇರಿಂದತೆ ಸುಮಾರು 1 ಸಾವಿರಕ್ಕೂ ಹೆಚ್ಚು ಜನರನ್ನು ದೆಹಲಿ ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ. ರಾಷ್ಟ್ರ ರಾಜಧಾನಿ ನವದೆಹಲಿ ಅಕ್ಷರಶಃ ಏಳು ಸುತ್ತಿನ ಕೋಟೆಯಂತೆ ಭದ್ರತೆಯನ್ನು ನಿಯೋಜಿಸಲಾಗಿದ್ದು, ಅಪರಾಧ ಹಿನ್ನೆಲೆಯುಳ್ಳವರ ಸುಮಾರು 500ಕ್ಕೂ ಹೆಚ್ಚು ಜನರನ್ನು ಪೊಲೀಸರು ಬಂಧಿಸಿದ್ದಾರೆ.
ಪುಣೆಯಿಂದ ನವದೆಹಲಿಗೆ ಬರುತ್ತಿದ್ದ ಅಭಿಜಿತ್ ಧೀಪ್ಕೆ ಮತ್ತು ಅಶುತೋಶ್‌ ರಂಕಾ ಅವರುಗಳನ್ನು ವಿಮಾನದಲ್ಲಿಯೇ ಪೊಲೀಸರು ವಶಕ್ಕೆ ಪಡೆದು ಗೃಹಬಂಧನಲ್ಲಿರಿಸಿದ್ದಾರೆ. ಯಾರೂ ಕೂಡ ಜಂತರ್‌ಮಂತರ್‌ ಕಡೆ ಬರದಂತೆ ತಡೆ ಹಿಡಿಯಲಾಗಿದೆ. ವಿಮಾನದಲ್ಲೇ ವಶಕ್ಕೆ ಪಡೆಯಲು ಮುಂದಾಗುತ್ತಿದ್ದಂತೆ ಭಾರೀ ಗದ್ದಲ, ತಳ್ಳಾಟ-ನೂಕಾಟ ಉಂಟಾಯಿತು. ಯಾವುದಕ್ಕೂ ಜಗ್ಗದ ದೆಹಲಿ ಪೊಲೀಸರು ಒಳಗಡೆಯೇ ಬೀಗ ಜಡಿದಿದ್ದರು.
ಪೊಲೀಸರ ಈ ಕ್ರಮಕ್ಕೆ ವಿಮಾನದಲ್ಲೇ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ ದೀಪ್ಕೆ, ನಾವು ಹೊರಗೆ ಬರುವವರೆಗಾದರೂ ಕಾಯಬಹುದಿತ್ತು. ನಮಗೆ ಬಂಧನಕ್ಕೆ ಭಯವಿಲ್ಲ ಎಂದು ವಾಗ್ವಾದ ನಡೆಸಿದರು. ಬಂಧನದ ದೃಶ್ಯಗಳನ್ನು ಅವರು ಇನ್‌ಸ್ಟಾಗ್ರಾಮ್‌ ಲೈವ್‌ ಮೂಲಕ ನೇರ ಪ್ರಸಾರ ಮಾಡಿದರು.
ಇದಕ್ಕೂ ಮುನ್ನ ಯೂಟ್ಯೂಬರ್‌ ಧ್ರುವ್‌ ರಾಠಿ ಅವರನ್ನು ಗುರುಗಾಂವ್‌ನ ಸೆಕ್ಟರ್‌ 56ರಲ್ಲಿರುವ ಅವರ ನಿವಾಸದಿಂದ ಸುಮಾರು 50 ಪೊಲೀಸರ ತಂಡ ವಶಕ್ಕೆ ಪಡೆದುಕೊಂಡಿತು. ಬೆಳಿಗ್ಗೆಯೇ ಮನೆ ಹಾಗೂ ಕಾರಿನಿಂದ ಹೊರಬರದಂತೆ ತಡೆದು ವಶಕ್ಕೆ ಪಡೆಯಲಾಯಿತು.
ಪ್ರತಿಭಟನಾಕಾರರು ಸಂಘಟಿತರಾಗುವುದನ್ನು ತಡೆಯಲು ದೆಹಲಿ ಪೊಲೀಸರು ರಾತ್ರಿಯಿಡೀ ಕಾರ್ಯಾಚರಣೆ ನಡೆಸಿ ಸುಮಾರು 400ಕ್ಕೂ ಹೆಚ್ಚು ಶಂಕಿತ ಪ್ರತಿಭಟನಾಕಾರರನ್ನು ಬಂಧಿಸಿದ್ದಾರೆ. ಇವರಲ್ಲಿ ಶಾಹೀನ್‌ ಬಾಗ್‌ ಸೇರಿದಂತೆ ಸೌತ್‌ ಈಸ್ಟ್‌ ದೆಹಲಿ ಪ್ರದೇಶದಿಂದಲೇ ಸುಮಾರು 250ಕ್ಕೂ ಹೆಚ್ಚು ಜನರನ್ನು ವಶಕ್ಕೆ ಪಡೆಯಲಾಗಿದೆ. ಮುನ್ನೆಚ್ಚರಿಕಾ ಕ್ರಮವಾಗಿ ಸಾರ್ವಜನಿಕ ಸಾರಿಗೆಯ ಮೇಲೆಯೂ ನಿರ್ಬಂಧ ಹೇರಲಾಗಿದ್ದು, 45ಕ್ಕೂ ಹೆಚ್ಚು ಮೆಟ್ರೋ ನಿಲ್ದಾಣಗಳನ್ನು ಮುಚ್ಚಲಾಗಿದೆ. ಡಜನ್‌ಗಟ್ಟಲೆ ರೈಲು ಸಂಚಾರಗಳನ್ನು ರದ್ದುಗೊಳಿಸಲಾಗಿದೆ.
ಕಣ್ಗಾವಲು:
ಯಾವುದೇ ಕಾರಣಕ್ಕೂ ಅನಧಿಕೃತ ಸಭೆಗಳಿಗೆ ಅವಕಾಶ ನೀಡದಿರಲು ದೆಹಲಿಯಾದ್ಯಂತ 35,000ಕ್ಕೂ ಹೆಚ್ಚು ದೆಹಲಿ ಪೊಲೀಸ್‌ ಹಾಗೂ ಕೇಂದ್ರ ಸಶಸ್ತ್ರ ಪೊಲೀಸ್‌ ಪಡೆ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ.ಜಂತರ್‌ ಮಂತರ್‌ ರಸ್ತೆಯುದ್ದಕ್ಕೂ ಏಳು ಹಂತಗಳ ಬ್ಯಾರಿಕೇಡ್‌ಗಳನ್ನು ಹಾಕಲಾಗಿದ್ದು, ಕೊನೆಯ ಹಂತದ ಬ್ಯಾರಿಕೇಡ್‌ಗಳನ್ನು ಪರಸ್ಪರ ವೆಲ್ಡಿಂಗ್‌ ಮಾಡಲಾಗಿದೆ. ಗಡಿ ಪ್ರದೇಶಗಳಲ್ಲಿ ಟೈರ್‌ ಒಡೆಯುವ ೞಸ್ಪೈಕ್‌ ಸ್ಟ್ರಿಪ್‌ಗಳನ್ನು ಅಳವಡಿಸಲಾಗಿತ್ತು.
ಪ್ರತಿಭಟನಾಕಾರರನ್ನು ಗುರುತಿಸಲು ಮುಖ ಗುರುತಿಸುವಿಕೆ ವ್ಯವಸ್ಥೆ , ಮೇಲ್ಛಾವಣಿ ಸ್ಪೋಟರ್‌ಗಳು, ಸಿಸಿಟಿವಿ ಹಾಗೂ ಡ್ರೋನ್‌ ಕಣ್ಗಾವಲು ಬಳಸಲಾಗಿತ್ತು.
ಸಿಬ್ಬಂದಿಗೂ ಪ್ರತಿಭಟನಾಕಾರರ ನಡುವಿನ ಪ್ರತಿಯೊಂದು ಸಂವಹನ ಮತ್ತು ಮೌಖಿಕ ಘರ್ಷಣೆಯನ್ನು ದಾಖಲಿಸಲು ರಾತ್ರಿ ವೇಳೆಯೂ ಕಾರ್ಯನಿರ್ವಹಿಸುವ ಬಾಡಿ ಕ್ಯಾಮೆರಾಗಳನ್ನು ಒದಗಿಸಲಾಗಿತ್ತು.
ಛತ್ರಸಾಲ್‌ ಕ್ರೀಡಾಂಗಣ, ರಾಜೀವ್‌ ಗಾಂಧಿ ಕ್ರೀಡಾಂಗಣ ಸೇರಿದಂತೆ ನಗರದ 6 ಪ್ರಮುಖ ಕ್ರೀಡಾಂಗಣ ಹಾಗೂ ಸಮುದಾಯ ಭವನಗಳನ್ನು ತಾತ್ಕಾಲಿಕ ಬಂಧನ ಕೇಂದ್ರಗಳನ್ನಾಗಿ ಮಾರ್ಪಡಿಸಲಾಗಿತ್ತು. ಪ್ರತಿಭಟನೆಯ ಹಿನ್ನೆಲೆಯಲ್ಲಿ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯ ಮೇಲೆಯೂ ನಿರ್ಬಂಧಗಳನ್ನು ವಿಧಿಸಲಾಗಿತ್ತು.
ಪ್ರತಿಭಟನೆಗೆ ಕಾರಣವೇನು?
ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ ಪ್ರಕ್ರಿಯೆಯಲ್ಲಿ ಪಾರದರ್ಶಕತೆ ಮತ್ತು ಉತ್ತರದಾಯಿತ್ವಕ್ಕೆ ಆಗ್ರಹಿಸಿ ಹಾಗೂ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್‌ಕುಮಾರ್‌ ಅವರ ವಿರುದ್ಧ ಸಿಜೆಪಿ ಈ ಜಂತರ್‌ ಮಂತರ್‌ 2.0 ಬೃಹತ್‌ ಜಾಗೃತಿಗೆ ಕರೆ ನೀಡಿತ್ತು. ಕಾನೂನು ಮತ್ತು ಸುವ್ಯವಸ್ಥೆ ಹಾಗೂ ಭದ್ರತಾ ಕಾರಣಗಳನ್ನು ನೀಡಿ ಪೊಲೀಸರು ಅನುಮತಿ ನಿರಾಕರಿಸಿದ್ದರೂ, ವಿದ್ಯಾರ್ಥಿ ಸಂಘಟನೆಗಳು ಹಾಗೂ ವಿವಿಧ ಗುಂಪುಗಳ ಬೆಂಬಲದೊಂದಿಗೆ ಪ್ರತಿಭಟನೆ ನಡೆಸಲು ಸಿಜೆಪಿ ಯತ್ನಿಸಿತ್ತು. ಪ್ರಸ್ತುತ ರಾಜಧಾನಿಯಾದ್ಯಂತ ಬಿಎನ್‌ಎಸ್‌‍ಎಸ್‌ ಸೆಕ್ಷನ್‌ 163ರಡಿ ನಿಷೇಧಾಜ್ಞೆ ಜಾರಿಯಲ್ಲಿದ್ದು, ಪರಿಸ್ಥಿತಿ ಬೂದಿ ಮುಚ್ಚಿದ ಕೆಂಡದಂತಿದೆ.
