ಅಬುಧಾಬಿ, ಅ.19 – ಇದೇ ಮೊದಲ ಬಾರಿಗೆ ಭಾರತೀಯ ಮೂಲದ ಕ್ಯಾಪ್ಟನ್‌ ಸಿತ್‌ ಮಚ್ಚರ್‌ ಅವರು ತಾವು ಸಹ ಪೈಲಟ್‌ನಿಂದ ಹಲ್ಲೆಗೊಳಗಾದ ಘಟನೆ ಬಗ್ಗೆ ಮಾತನಾಡಿದ್ದಾರೆ.
ಅಬುಧಾಬಿಯ ಜಾಯೆದ್‌ ಮಿಲಿಟರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಅವರು ಮಾಧ್ಯಮಗಳಿಗೆ ನೀಡಿದ ಸಂದರ್ಶನದಲ್ಲಿ, ಸಾವಿನಂಚಿನಿಂದ ತಾವೂ ಪಾರಾಗಿ, ವಿಮಾನದಲ್ಲಿದ್ದ 170ಕ್ಕೂ ಹೆಚ್ಚು ಪ್ರಯಾಣಿಕರನ್ನು ರಕ್ಷಿಸಿದ ರೋಚಕ ಕ್ಷಣಗಳನ್ನು ಹಂಚಿಕೊಂಡಿದ್ದಾರೆ.
ವಿಮಾನದಲ್ಲಿದ್ದ ಇನ್ನೊಬ್ಬ ಆಫ್‌-ಡ್ಯೂಟಿ ಕ್ಯಾಪ್ಟನ್‌ ಕಾಕ್‌ಪಿಟ್‌ನಿಂದ ಹೊರಹೋದ ನಂತರ, ಸಹ-ಪೈಲಟ್‌ ಪ್ರಾರ್ಥನೆ ಮಾಡುವುದಾಗಿ ಹೇಳಿ ನನ್ನ ಸೀಟಿನ ಹಿಂಭಾಗದಲ್ಲಿ ಕುಳಿತ. ನಾನು ಲ್ಯಾಂಡಿಂಗ್‌ ವಿವರಗಳನ್ನು ಕಂಪ್ಯೂಟರ್‌ನಲ್ಲಿ ಪರಿಶೀಲಿಸುತ್ತಿದ್ದಾಗ, ಏಕಾಏಕಿ ತಲೆಯ ಹಿಂಭಾಗಕ್ಕೆ ಕೊಡಲಿಯಂತಹ ಆಯುಧದಿಂದ ಬಲವಾದ ಹೊಡೆತ ಬಿದ್ದಿತು. ಮೊದಲಿಗೆ ವಿಮಾನದ ಮೇಲ್ಛಾವಣಿಯೇ ತಲೆಯ ಮೇಲೆ ಕುಸಿಯಿತೇನೋ ಎಂದು ಭಾವಿಸಿದೆ. ಆದರೆ ಹೊಡೆತಗಳು ನಿಲ್ಲದಿದ್ದಾಗ, ನನ್ನ ಸಹೋದ್ಯೋಗಿಯೇ ನನ್ನ ಮೇಲೆ ದಾಳಿ ಮಾಡುತ್ತಿರುವುದು ತಿಳಿಯಿತು ಎಂದಿದ್ದಾರೆ.
ಆತನ ಹೊಡೆತಗಳಿಂದಾಗಿ ತಲೆಗೆ ತೀವ್ರ ರಕ್ತಸ್ರಾವವಾಗಿ ಕಣ್ಣುಗಳು ಕತ್ತಲೆಯಾದವು. ತಕ್ಷಣವೇ ಸೀಟ್‌ಬೆಲ್ಟ್‌ ಕಳಚಿ, ಜೀವ ಉಳಿಸಿಕೊಳ್ಳಲು ಪ್ರತಿರೋಧ ತೋರಿದರು. ಪ್ರಜ್ಞೆ ತಪ್ಪುವ ಮುನ್ನವೇ ಹೇಗೋ ಮಾಡಿ ಕಾಕ್‌ಪಿಟ್‌ ಬಾಗಿಲು ತೆರೆಯುವ ಸ್ವಿಚ್‌ ಒತ್ತಿ ಹೊರಗಿದ್ದ ಸಿಬ್ಬಂದಿಗೆ ಕೂಗಿ ಕರೆದೆ ಎಂದಿದ್ದಾರೆ.
ವಿಮಾನದಾಳಿಕೋರ ಸಹ-ಪೈಲಟ್‌ ವಿಮಾನವನ್ನು ದಿಢೀರನೆ ಕೆಳಮುಖವಾಗಿ ತಿರುಗಿಸಿದ್ದರಿಂದ ಎಂಜಿನ್‌ ಸದ್ದು ಕಡಿಮೆಯಾಗಿ ವಿಮಾನವು ಕೇವಲ ಒಂದು ನಿಮಿಷದಲ್ಲಿ ಸುಮಾರು 17,000 ಅಡಿ ಪಾತಾಳಕ್ಕೆ ಕುಸಿಯಿತು. ಇನ್ನು ನಾವು ಬದುಕುಳಿಯುವುದಿಲ್ಲ ಎಂದು ಆ ಕ್ಷಣದಲ್ಲಿ ನನಗನ್ನಿಸಿತ್ತು. ಆದರೆ ನನ್ನ ಪುತ್ರ, ಪುತ್ರಿಯನ್ನು ನೆನಪಿಸಿಕೊಂಡು ಕೊನೆಯ ಉಸಿರಿರುವವರೆಗೂ ಹೋರಾಡಲು ನಿರ್ಧರಿಸಿದೆ ಎಂದು ಸ್ಮಿತ್‌ ನೆನಪಿಸಿಕೊಂಡಿದ್ದಾರೆ.
ಬಾಗಿಲು ತೆರೆದ ಕೂಡಲೇ ಕಾಕ್‌ಪಿಟ್‌ಗೆ ಧಾವಿಸಿದ ಪ್ರಯಾಣಿಕರು ಮತ್ತು ಕ್ಯಾಬಿನ್‌ ಸಿಬ್ಬಂದಿ ದಾಳಿಕೋರನನ್ನು ನಿಯಂತ್ರಿಸಿದರು. ವಿಮಾನದಲ್ಲಿದ್ದ ಮತ್ತೊಬ್ಬ ಆಫ್‌-ಡ್ಯೂಟಿ ಕ್ಯಾಪ್ಟನ್‌ ವಿಮಾನದ ನಿಯಂತ್ರಣವನ್ನು ತೆಗೆದುಕೊಂಡು ಸೌದಿ ಅರೇಬಿಯಾದ ತಬೂಕ್‌ ವಿಮಾನ ನಿಲ್ದಾಣದಲ್ಲಿ ಸುರಕ್ಷಿತವಾಗಿ ಲ್ಯಾಂಡಿಂಗ್‌ ಮಾಡಿದರು.
ಆಸ್ಪತ್ರೆಯ ಹಾಸಿಗೆಯಿಂದ ನಗುಮುಖದಿಂದಲೇ ಮಾತನಾಡಿದ ಕ್ಯಾಪ್ಟನ್‌ ಸಿತ್‌ ನನ್ನ ಪ್ರಾಣ ಉಳಿಸಿದ ಸಿಬ್ಬಂದಿ, ಪ್ರಯಾಣಿಕರು ಹಾಗೂ ಅತ್ಯುತ್ತಮ ಚಿಕಿತ್ಸೆ ನೀಡಿದ ಯುಎಇ ಸರ್ಕಾರಕ್ಕೆ ನಾನು ಸದಾ ಚಿರಋಣಿ. ಇಷ್ಟೆಲ್ಲಾ ಭೀಕರ ಅನುಭವವಾದರೂ ವಾಯುಯಾನದ ಮೇಲಿನ ನನ್ನ ಪ್ರೀತಿ ಸ್ವಲ್ಪವೂ ಕಡಿಮೆಯಾಗಿಲ್ಲ. ಆದಷ್ಟು ಬೇಗ ಸಂಪೂರ್ಣ ಗುಣಮುಖನಾಗಿ, ಮತ್ತೆ ಪೈಲಟ್‌ ಯೂನಿಫಾರ್ಮ್‌ ಧರಿಸಿ ಆಕಾಶಕ್ಕೆ ಹಾರಲು ಕಾತರನಾಗಿದ್ದೇನೆ ಎಂದು ಅವರು ಹೇಳಿಕೊಂಡಿದ್ದಾರೆ.
ತನಿಖಾ ಸಂಸ್ಥೆಗಳ ಪ್ರಕಾರ, ದಾಳಿ ನಡೆಸಿದ ಒಮಾನ್‌ ಮೂಲದ ಸಹ-ಪೈಲಟ್‌ ಹಮಾಮ್‌ ಅಲ್‌-ಹಮ್ಮಾಮಿ, ವಿಮಾನವನ್ನು ಅಪಹರಿಸಿ ಇಸ್ರೇಲ್‌ನ ಬೆನ್‌ ಗುರಿಯನ್‌ ವಿಮಾನ ನಿಲ್ದಾಣದ ಮೇಲೆ ಅಪ್ಪಳಿಸಿ 9/11 ಮಾದರಿಯ ಆತ್ಮಹತ್ಯಾ ದಾಳಿ ನಡೆಸಲು ಸಂಚು ರೂಪಿಸಿದ್ದ ಎನ್ನಲಾಗಿದೆ.
ಈ ಭಯೋತ್ಪಾದನಾ ಸಂಚಿಗೆ ಸಂಬಂಧಿಸಿದಂತೆ ಯುಎಇ ಪೊಲೀಸರು ಈಗಾಗಲೇ ತನಿಖೆ ತೀವ್ರಗೊಳಿಸಿದ್ದು, ಈ ಸಂಚಿನಲ್ಲಿ ಭಾಗಿಯಾಗಿರುವ ಶಂಕೆಯ ಮೇಲೆ ಇತರ ಇಬ್ಬರು ಪೈಲಟ್‌ಗಳನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸುತ್ತಿದ್ದಾರೆ.
