ಬೆಂಗಳೂರು, ಅ.22- ನಗರದ ಸಂಚಾರ ದಟ್ಟಣೆ ಕಡಿಮೆ ಮಾಡುವ ಉದ್ದೇಶದಿಂದ ಕೈಗೆತ್ತಿಕೊಳ್ಳಲು ಉದ್ದೇಶಿಸಿರುವ ಮೇಲ್ಸೇತುವೆ ಮತ್ತು ಎಲಿವೇಟೆಡ್‌ ಕಾರಿಡಾರ್‌ ಯೋಜನೆಗಳ ಟೆಂಡರ್‌ ಪ್ರಕ್ರಿಯೆಗೆ ಮತ್ತೆ ವಿಘ್ನ ಎದುರಾಗಿದೆ. ಪ್ರಮಾಣಿತ ಗುತ್ತಿಗೆ ನಿಯಮಗಳನ್ನು ಪಾಲಿಸದಿರುವುದನ್ನು ಉಲ್ಲೇಖಿಸಿ ಬಿಡ್‌ಗಳನ್ನು ಪರಿಷ್ಕರಿಸುವಂತೆ ನಗರಾಭಿವೃದ್ಧಿ ಇಲಾಖೆ (ಯುಡಿಡಿ) ಸೂಚನೆ ನೀಡಿದ ಹಿನ್ನೆಲೆಯಲ್ಲಿ, ಬೆಂಗಳೂರು ಸ್ಮಾರ್ಟ್‌ ಇನ್‌ಫ್ರಾಸ್ಟ್ರಕ್ಚರ್‌ ಲಿಮಿಟೆಡ್‌ (ಬಿ-ಸೈಲ್‌) ಆರು ಪ್ರಮುಖ ಯೋಜನೆಗಳಿಗೆ ಮರು ಟೆಂಡರ್‌ ಕರೆದಿದೆ.
ಕೊಣನಕುಂಟೆ ಕ್ರಾಸ್‌, ಎಂಇಐ ಜಂಕ್ಷನ್‌, ಪೈಪ್‌ಲೈನ್‌ ರಸ್ತೆ, ಕೋಗಿಲು ಕ್ರಾಸ್‌ ಸೇರಿದಂತೆ ಆರು ಯೋಜನೆಗಳಿಗೆ ಸಂಬಂಧಿಸಿದಂತೆ ಹೊಸದಾಗಿ ಟೆಂಡರ್‌ ಆಹ್ವಾನಿಸಲಾಗಿದೆ. ಈ ಯೋಜನೆಗಳ ಅಂದಾಜು ವೆಚ್ಚದ ಮೊತ್ತಗಳು ಒಟ್ಟಾರೆ ಸುಮಾರು 2,564 ಕೋಟಿ ಆಗುತ್ತವೆ. ಕೋಗಿಲು ಕ್ರಾಸ್‌‍ನ ಎಲಿವೇಟೆಡ್‌ ಕಾರಿಡಾರ್‌ ಯೋಜನೆಯೊಂದಕ್ಕೇ 1,026.66 ಕೋಟಿ ವೆಚ್ಚ ಎಂದು ಅಂದಾಜಿಸಲಾಗಿದೆ. ಉಳಿದಂತೆ ಶೂಳೇ ಸರ್ಕಲ್‌ನಿಂದ ಸೇಂಟ್‌ ಜಾನ್‌್ಸ ಆಸ್ಪತ್ರೆ ರಸ್ತೆ ಹಾಗೂ ಮಿನರ್ವ ಸರ್ಕಲ್‌ನಿಂದ ಹಡ್ಸನ್‌ ಸರ್ಕಲ್‌ವರೆಗಿನ ಕಾರಿಡಾರ್‌ಗಳೂ ಪ್ರಮುಖ ಯೋಜನೆಗಳಾಗಿವೆ.
ಆರು ಯೋಜನೆಗಳಿಗೆ ಮರು ಟೆಂಡರ್‌ :ಕನಕಪುರ ರಸ್ತೆಯ ಕೊಣನಕುಂಟೆ ಕ್ರಾಸ್‌‍ನಲ್ಲಿ 76.76 ಕೋಟಿ ವೆಚ್ಚದಲ್ಲಿ ಮೇಲ್ಸೇತುವೆ ನಿರ್ಮಾಣ, ತುಮಕೂರು ರಸ್ತೆಯ ಎಂಇಐ ಜಂಕ್ಷನ್‌ನಲ್ಲಿ 41.62 ಕೋಟಿ ವೆಚ್ಚದಲ್ಲಿ ವಿಭಜಿತ ಮೇಲ್ಸೇತುವೆ ನಿರ್ಮಾಣಕ್ಕೆ ಮರು ಟೆಂಡರ್‌ ಕರೆಯಲಾಗಿದೆ. ಪೈಪ್‌ಲೈನ್‌ ರಸ್ತೆಯಲ್ಲಿ 315.28 ಕೋಟಿ ವೆಚ್ಚದ ಗ್ರೇಡ್‌ ಸೆಪರೇಟರ್‌ ಹಾಗೂ ದೊಡ್ಡಬಳ್ಳಾಪುರ ರಸ್ತೆಯ ಕೋಗಿಲು ಕ್ರಾಸ್‌‍ನಲ್ಲಿ 1,026.66 ಕೋಟಿ ವೆಚ್ಚದ ಎಲಿವೇಟೆಡ್‌ ಕಾರಿಡಾರ್‌ ನಿರ್ಮಾಣವೂ ಈ ಪಟ್ಟಿಯಲ್ಲಿವೆ.
ಇದರ ಜತೆಗೆ ಶೂಳೇ ಸರ್ಕಲ್‌ನಿಂದ ಸೇಂಟ್‌ ಜಾನ್‌್ಸ ಆಸ್ಪತ್ರೆ ರಸ್ತೆಯವರೆಗೆ 564 ಕೋಟಿ ಹಾಗೂ ಮಿನರ್ವ ಸರ್ಕಲ್‌ನಿಂದ ಹಡ್ಸನ್‌ ಸರ್ಕಲ್‌ವರೆಗೆ 539.94 ಕೋಟಿ ವೆಚ್ಚದ ಕಾರಿಡಾರ್‌ಗಳಿಗೂ ಹೊಸದಾಗಿ ಟೆಂಡರ್‌ ಕರೆಯಲಾಗಿದೆ. ಟೆಂಡರ್‌ ಪ್ರಕ್ರಿಯೆಯಲ್ಲಿನ ನಿಯಮ ಪಾಲನೆಗೆ ಸಂಬಂಧಿಸಿದ ಇಲಾಖೆಯ ಆಕ್ಷೇಪಗಳ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
11 ಯೋಜನೆಗಳಿಗೆ ಸಂಪುಟ ಅನುಮೋದನೆ;ರಾಜಧಾನಿಯ ಪ್ರಮುಖ ರಸ್ತೆಗಳಲ್ಲಿ ವಾಹನ ದಟ್ಟಣೆ ಕಡಿಮೆ ಮಾಡುವ ಉದ್ದೇಶದಿಂದ ರಾಜ್ಯ ಸಚಿವ ಸಂಪುಟವು ಏಪ್ರಿಲ್‌ನಲ್ಲಿ ಒಟ್ಟು 11 ಫ್ಲೈ ಓವರ್‌ ಮತ್ತು ಎಲಿವೇಟೆಡ್‌ ಕಾರಿಡಾರ್‌ ಯೋಜನೆಗಳಿಗೆ ಅನುಮೋದನೆ ನೀಡಿತ್ತು. ಐದು ನಗರ ಪಾಲಿಕೆಗಳ ವ್ಯಾಪ್ತಿಯಲ್ಲಿ 75.60 ಕಿ.ಮೀ. ಉದ್ದದ ರಸ್ತೆ ಮತ್ತು ಎಲಿವೇಟೆಡ್‌ ಕಾರಿಡಾರ್‌ಗಳನ್ನು ಒಳಗೊಂಡ ಈ ಯೋಜನೆಗಳಿಗೆ ಒಟ್ಟು 13,262 ಕೋಟಿ ವೆಚ್ಚ ಅಂದಾಜಿಸಲಾಗಿದೆ.
ಆದರೆ, ಟೆಂಡರ್‌ ನಿಯಮಗಳ ಪಾಲನೆ ವಿಚಾರದಿಂದಾಗಿ ಕೆಲವು ಯೋಜನೆಗಳ ಪ್ರಕ್ರಿಯೆ ಮತ್ತೆ ಆರಂಭಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಇನ್ನೂ ಮೂರು ಯೋಜನೆಗಳಿಗೆ ಒಂದು ವಾರದೊಳಗೆ ಹೊಸದಾಗಿ ಬಿಡ್‌ಗಳನ್ನು ಆಹ್ವಾನಿಸುವ ನಿರೀಕ್ಷೆಯಿದೆ. ಇಂದಿರಾನಗರದ 100 ಅಡಿ ರಸ್ತೆಯಲ್ಲಿನ ಫ್ಲೈ ಓವರ್‌, ಸಿರ್ಸಿ ಸರ್ಕಲ್‌ನಿಂದ ನಾಯಂಡಹಳ್ಳಿವರೆಗೆ 5.2 ಕಿ.ಮೀ. ಉದ್ದದ ಕಾರಿಡಾರ್‌ ಹಾಗೂ ಕನಕಪುರ ರಸ್ತೆಯಲ್ಲಿನ ಕಿರು ಫ್ಲೈ ಓವರ್‌ ಈ ಪಟ್ಟಿಯಲ್ಲಿವೆ.
ಟೋಲ್‌ ಕಾರಿಡಾರ್‌ಗಳ ಟೆಂಡರ್‌ ಪ್ರಕ್ರಿಯೆ;
ಇನ್ನೊಂದೆಡೆ, ಟೋಲ್‌ ಸಂಗ್ರಹದ ಉದ್ದೇಶ ಹೊಂದಿರುವ ಎರಡು ಉದ್ದನೆಯ ಎಲಿವೇಟೆಡ್‌ ಕಾರಿಡಾರ್‌ಗಳ ಟೆಂಡರ್‌ ಪ್ರಕ್ರಿಯೆಯೂ ನಡೆಯುತ್ತಿದೆ. ಮೊದಲ ಕಾರಿಡಾರ್‌ ಮರೆನಹಳ್ಳಿ ಮುಖ್ಯ ರಸ್ತೆಯ ರಾಗಿಗುಡ್ಡ ಜಂಕ್ಷನ್‌ನಿಂದ ಬಿಡಬ್ಲ್ಯುಎಸ್‌‍ಎಸ್‌‍ಬಿ ಪೈಪ್‌ಲೈನ್‌ ರಸ್ತೆಯ ಮೂಲಕ ಕನಕಪುರ ಮುಖ್ಯ ರಸ್ತೆಯನ್ನು ಸಂಪರ್ಕಿಸುವ ಉದ್ದೇಶ ಹೊಂದಿದೆ. ಮತ್ತೊಂದು ಕಾರಿಡಾರ್‌ ಯಶವಂತಪುರದ ಮೆತಿಕೆರೆ ಕ್ರಾಸ್‌‍ನಿಂದ ಐಐಎಸ್‌‍ಸಿ, ಮೇಖ್ರಿ ಸರ್ಕಲ್‌, ಜಯಮಹಲ್‌, ಸೇಂಟ್‌ ಜಾನ್ಸ್ ಚರ್ಚ್‌ ರಸ್ತೆ ಹಾಗೂ ಉಲ್ಸೂರು ಕೆರೆಯ ಮೂಲಕ ಹಳೆ ಮದ್ರಾಸ್‌ ರಸ್ತೆಯನ್ನು ಸಂಪರ್ಕಿಸಲಿದೆ.
ಸ್ಥಳೀಯರ ವಿರೋಧವೂ ಸವಾಲು;
ನಗರದ ಸಂಚಾರ ಸಮಸ್ಯೆ ಪರಿಹರಿಸುವ ಉದ್ದೇಶ ಹೊಂದಿರುವ ಕೆಲವು ಯೋಜನೆಗಳಿಗೆ ಸ್ಥಳೀಯ ನಿವಾಸಿಗಳಿಂದಲೇ ವಿರೋಧ ವ್ಯಕ್ತವಾಗಿದೆ. ಇಂದಿರಾನಗರದ ಫ್ಲೈ ಓವರ್‌ ಹಾಗೂ ರಾಗಿಗುಡ್ಡದಿಂದ ಕನಕಪುರ ಮುಖ್ಯ ರಸ್ತೆಯನ್ನು ಸಂಪರ್ಕಿಸುವ ಕಾರಿಡಾರ್‌ ಯೋಜನೆಗಳನ್ನು ಕೈಬಿಡಬೇಕೆಂದು ನಿವಾಸಿಗಳು ಒತ್ತಾಯಿಸಿದ್ದಾರೆ.
ಇತ್ತೀಚೆಗೆ ಮಾನವ ಸರಪಳಿ ರಚಿಸಿ ಪ್ರತಿಭಟನೆಯನ್ನೂ ನಡೆಸಿದ್ದಾರೆ.ಒಂದೆಡೆ ಟೆಂಡರ್‌ ನಿಯಮಗಳ ಪಾಲನೆ ವಿಚಾರವಾಗಿ ಮರು ಟೆಂಡರ್‌ ಪ್ರಕ್ರಿಯೆ ನಡೆಯುತ್ತಿದ್ದರೆ, ಮತ್ತೊಂದೆಡೆ ಸ್ಥಳೀಯರ ಆಕ್ಷೇಪಗಳು ಯೋಜನೆಗಳ ಅನುಷ್ಠಾನಕ್ಕೆ ಸವಾಲಾಗಿವೆ. ಹೀಗಾಗಿ, ಸಂಚಾರ ದಟ್ಟಣೆ ನಿವಾರಣೆಯ ಮಹತ್ವಾಕಾಂಕ್ಷೆಯ ಯೋಜನೆಗಳು ಯಾವಾಗ ಕಾರ್ಯರೂಪಕ್ಕೆ ಬರಲಿವೆ ಎಂಬುದು ಈಗ ಕುತೂಹಲ ಮೂಡಿಸಿದೆ.
