ವಾರಣಾಸಿ, ನ.3 (ಪಿಟಿಐ)- ದೀಪಾವಳಿ ಮತ್ತು ಧನ್‌ತೇರಸ್‌ ಹಬ್ಬಗಳ ಸಂದರ್ಭದಲ್ಲಿ ಶ್ರೀ ಕಾಶಿ ವಿಶ್ವನಾಥ ದೇವಾಲಯದ ಬಾಗಿಲುಗಳು ಭಕ್ತರಿಗಾಗಿ ತೆರೆದಿರುತ್ತವೆ ಮತ್ತು ದರ್ಶನಕ್ಕಾಗಿ ಆನ್‌ಲೈನ್‌ ಟಿಕೆಟ್‌ ಬುಕಿಂಗ್‌ ಸೌಲಭ್ಯವೂ ಮುಂದುವರಿಯಲಿದೆ ಎಂದು ದೇವಾಲಯದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಆದಾಗ್ಯೂ, ನವೆಂಬರ್‌ 9ರ ಮಧ್ಯಾಹ್ನ ನಡೆಯುವ ಶೃಂಗಾರ ಭೋಗ ಆರತಿಯ ನಂತರದಿಂದ ನವೆಂಬರ್‌ 10ರ ಸಂಜೆ ನಡೆಯುವ ಸಪ್ತಋಷಿ ಆರತಿಯವರೆಗೆ ಎಲ್ಲಾ ವಿಭಾಗಗಳ ಟಿಕೆಟ್‌ ಬುಕಿಂಗ್‌ಗಳನ್ನು ಸ್ಥಗಿತಗೊಳಿಸಲಾಗುವುದು.
ಕಾಶಿ ವಿಶ್ವನಾಥ ದೇವಾಲಯದ ಎಸ್‌ಡಿಎಂ ಶಂಭು ಶರಣ್‌ ಅವರು ಮಾತನಾಡಿ, ದೀಪಾವಳಿ ಮತ್ತು ಧನ್‌ತೇರಸ್‌ ಹಬ್ಬಗಳ ಸಮಯದಲ್ಲಿ ಭಕ್ತರು ಎಂದಿನಂತೆ ದೇವಾಲಯಕ್ಕೆ ಭೇಟಿ ನೀಡಬಹುದು ಮತ್ತು ಆನ್‌ಲೈನ್‌ ಟಿಕೆಟ್‌ ಬುಕಿಂಗ್‌ ಮೂಲಕವೂ ದರ್ಶನ ಪಡೆಯಬಹುದು ಎಂದು ಹೇಳಿದರು.
ಅನ್ನಕೂಟ ಉತ್ಸವಕ್ಕೆ ಸಂಬಂಧಿಸಿದ ಸಿದ್ಧತೆಗಳನ್ನು ಕೈಗೊಳ್ಳಲು ಅನುಕೂಲವಾಗುವಂತೆ ನಿರ್ದಿಷ್ಟ ಅವಧಿಗೆ ಮಾತ್ರ ಟಿಕೆಟ್‌ ಬುಕಿಂಗ್‌ಗಳನ್ನು ಸ್ಥಗಿತಗೊಳಿಸಲಾಗುತ್ತಿದೆ ಎಂದು ಅವರು ಸ್ಪಷ್ಟಪಡಿಸಿದರು. ಉಳಿದ ದಿನಗಳಲ್ಲಿ ದೇವಾಲಯದ ಇತರ ಎಲ್ಲಾ ವ್ಯವಸ್ಥೆಗಳು ಮತ್ತು ಸೇವೆಗಳು ಎಂದಿನಂತೆ ಮುಂದುವರಿಯಲಿವೆ ಎಂದು ಅವರು ತಿಳಿಸಿದರು.