ಬೆಂಗಳೂರು,ಅ.16- ಕರ್ನಾಟಕದಲ್ಲಿ ಅಧಿಕಾರದಲ್ಲಿರುವವರಿಂದ ಸಾಂವಿಧಾನಿಕ ಉಲ್ಲಂಘನೆಯಾಗುತ್ತಿದ್ದು, ಹುಬ್ಬಳ್ಳಿ ಗಲಭೆ ಪ್ರಕರಣದ ಎಫ್‌ಐಆರ್‌ನ್ನು ಕ್ಯಾಬಿನೆಟ್‌ ನಿರ್ಧಾರದ ಮೂಲಕ ರದ್ದುಗೊಳಿಸಿರುವುದೇ ಇದಕ್ಕೆ ನಿದರ್ಶನವಾಗಿದೆ. ಈ ವಿಷಯದಲ್ಲಿ ಮಧ್ಯಸ್ಥಿಕೆ ವಹಿಸದ ರಾಜ್ಯ ಸರ್ಕಾರಕ್ಕೆ ಸೂಕ್ತ ನಿರ್ದೇಶನ ನೀಡುವಂತೆ ರಾಷ್ಟ್ರಪತಿ, ಪ್ರಧಾನಮಂತ್ರಿ, ರಾಜ್ಯಪಾಲರು ಮತ್ತು ಕೇಂದ್ರ ಸಚಿವರಿಗೆ ವಿಧಾನಪರಿಷತ್‌ ಪ್ರತಿಪಕ್ಷ ನಾಯಕ ಛಲವಾದಿ ನಾರಾಯಣಸ್ವಾಮಿ ಪತ್ರ ಬರೆದಿದ್ದಾರೆ.
ಪತ್ರದಲ್ಲಿ ಈ ಬಾರಿ ಒಂದು ನಿರ್ದಿಷ್ಟ ಪಂಗಡದ ಜನರನ್ನು ಸಮಾಧಾನಪಡಿಸುವ ಉಪಕ್ರಮಗಳ ಸರಣಿಯನ್ನು ಮುಂದುವರೆಸಿದ ಕರ್ನಾಟಕ ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್ ನಾಯಕರು ಸಂಘಟಿತ ದೇಶವಿರೋಧಿ ಅಪರಾಧದ ಪ್ರಕರಣಕ್ಕೆ ಪ್ರವೇಶಿಸಿದ್ದಾರೆ. 2022ರ ಏಪ್ರಿಲ್‌ 16ರಂದು ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ನಲ್ಲಿ ಅಲ್ಪಸಂಖ್ಯಾತ ಸಮುದಾಯದ ಬಗ್ಗೆ ಅವಹೇಳನಕಾರಿ ಕಾಮೆಂಟ್‌ಗಳನ್ನು ಮಾಡಿದ ದುಷ್ಕರ್ಮಿಯ ಪ್ರಕರಣದ ಬಗ್ಗೆ ಬೆಳಕು ಚೆಲ್ಲುತ್ತಿದ್ದೇನೆ ಎಂದು ಉಲ್ಲೇಖಿಸಿದ್ದಾರೆ.
ಆರೋಪಿಯನ್ನು ಬಂಧಿಸಲಾಯಿತು, ಆದರೂ ಜನರ ಗುಂಪೊಂದು ದುಷ್ಕರ್ಮಿಯನ್ನು ಅವರಿಗೆ ಹಸ್ತಾಂತರಿಸುವಂತೆ ಪೊಲೀಸರನ್ನು ಒತ್ತಾಯಿಸಿತು ಮತ್ತು ರಾಜ್ಯದ ಭದ್ರತಾ ವ್ಯವಸ್ಥೆಯ ಮೇಲೆ ದಾಳಿ ಮಾಡಿತು. ಇದರಲ್ಲಿ ಪೊಲೀಸ್‌ ಠಾಣೆ ಮತ್ತು ಪೊಲೀಸ್‌ ಸಿಬ್ಬಂದಿಯ ಮೇಲೆ ದಾಳಿ ಮಾಡಲಾಯಿತು. ಈ ಸಮಾಜಘಾತುಕ ಶಕ್ತಿಗಳಿಂದಾಗಿ ಹುಬ್ಬಳ್ಳಿ ನಗರದ ಶಾಂತಿಪ್ರಿಯ ಜನತೆ ನಗರವನ್ನು ಬಂದ್‌ ಮಾಡಬೇಕಾಯಿತು.
ಈಗ ಸರ್ಕಾರವು ಈ ಪ್ರಕರಣದ ಎಫ್‌ಐಆರ್‌ನ್ನು ಕ್ಯಾಬಿನೆಟ್‌ನಿರ್ಧಾರದ ಮೂಲಕ ರದ್ದುಗೊಳಿಸಿದೆ. ಇದು ಕರ್ನಾಟಕ ಕ್ಯಾಬಿನೆಟ್‌ ಸಂಘಟಿತ ಸಂವಿಧಾನ ವಿರೋಧಿ ಮತ್ತು ದೇಶ ವಿರೋಧಿ ಅಪರಾಧವಾಗಿದೆ. ಕರ್ನಾಟಕ ಸಚಿವ ಸಂಪುಟದ ಈ ನಿರ್ಧಾರ ಸಂಘಟಿತ ಅಪರಾಧ ಎಂದು ಪತ್ರದಲ್ಲಿ ಉಲ್ಲೇಖಿಸಿದ್ದಾರೆ.
ಕರ್ನಾಟಕ ಕ್ಯಾಬಿನೆಟ್‌ನ ಈ ಸಂವಿಧಾನ ವಿರೋಧಿ ನಿರ್ಧಾರದಿಂದ 158 ಜನರ ಗುಂಪು ಗಂಭೀರ ಆರೋಪಗಳಿಂದ ಮುಕ್ತವಾಗಿದೆ. ಈ ಸಮಾಜವಿರೋಧಿ ಶಕ್ತಿಗಳು ಮತ್ತೆ ಇಂತಹ ಘೋರ ಅಪರಾಧಗಳಿಗೆ ಪ್ರವೇಶಿಸುವ ಭಯವಿದೆ. ಏಕೆಂದರೆ ಈ ಸಮಾಜ ವಿರೋಧಿಗಳನ್ನು ಬಂಧ ಮುಕ್ತಗೊಳಿಸಿದರೆ ಮತ್ತೆ ಪುಟಿದೇಳಬಹುದು. ಹಾಗಾಗಿ ಈ ನಿರ್ಧಾರವನ್ನು ಮರುಪರಿಶೀಲಿಸುವಂತೆ ಕರ್ನಾಟಕ ಸರ್ಕಾರವನ್ನು ಒತ್ತಾಯಿಸಲು ಮನವಿ ಮಾಡುತ್ತೇನೆ ಎಂದಿದ್ದಾರೆ.
ರಾಜ್ಯ ಸರ್ಕಾರದ ಈ ಸಂವಿಧಾನ ವಿರೋಧಿ ನಿರ್ಧಾರವನ್ನು ಕರ್ನಾಟಕ ಕ್ಯಾಬಿನೆಟ್‌ ವಿರುದ್ಧ ಸಂಘಟಿತ ರಾಷ್ಟ್ರವಿರೋಧಿ ಅಪರಾಧಗಳ ಕಾಯ್ದೆಯಡಿ ದಾಖಲಿಸಲು ಸೂಕ್ತವಾದ ಪ್ರಕರಣ ಎಂದು ನಾವು ಬಲವಾಗಿ ಭಾವಿಸುತ್ತೇವೆ. ಮತ್ತು ಮುಂದಿನ ದಿನಗಳಲ್ಲಿ ನಾವು ಅದೇ ರೀತಿ ಕರೆ ನೀಡುತ್ತೇವೆ. ಹಾಗಾಗಿ ಈ ವಿಷಯದಲ್ಲಿ ನಿಮ ಮಧ್ಯಸ್ಥಿಕೆ ಎದುರು ನೋಡುತ್ತಿದ್ದೇನೆ ಎಂದು ರಾಷ್ಟ್ರಪತಿ ದ್ರೌಪದಿ ಮುರ್ಮು, ಪ್ರಧಾನಿ ನರೇಂದ್ರ ಮೋದಿ, ರಾಜ್ಯಪಾಲ ಥಾವರ್‌ ಚಂದ್‌ ಗೆಹ್ಲೋಟ್‌, ಕೇಂದ್ರ ಗೃಹಸಚಿವ ಅಮಿತ್‌ ಶಾ ಅವರಿಗೆ ಛಲವಾದಿ ನಾರಾಯಣಸ್ವಾಮಿ ಪತ್ರ ಬರೆದಿದ್ದಾರೆ.