ಬೆಂಗಳೂರು, ನ.14– ಬಿಗ್‌ ಬಾಸ್‌ ಸೀಸನ್‌ 8ರ ವಿಜೇತ ಮಂಜುಪಾವಗಡ ಅವರು ಇಂದು ನಂದಿನಿಯೊಂದಿಗೆ ಸಪ್ತಪದಿ ತುಳಿದಿದ್ದು, ಚಿತ್ರನಟಿ ಶುಭಾಪೂಂಜಾ ಸೇರಿದಂತೆ ಹಲವರು ಹಿರಿ- ಕಿರೆತೆರೆ ಸೆಲೆಬ್ರೆಟಿಗಳು ನೂತನ ಜೋಡಿಗೆ ಶುಭ ಹಾರೈಸಿದ್ದಾರೆ.
ಹುಟ್ಟೂರಾದ ಪಾವಗಡದಲ್ಲೇ ಮಂಜು ಅವರ ವಿವಾಹವೂ ಅದ್ಧೂರಿಯಾಗಿ ನಡೆದಿದ್ದು, ಚಿತ್ರನಟಿ ಶುಭಾಪೂಂಜಾ, ಬಿಗ್‌ಬಾಸ್‌ 8ರ ಕೆಲವು ಸ್ಪರ್ಧಿಗಳು, ಮಜಾ ಭಾರತ, ಗಿಚ್ಚಿಗಿಲಿಗಿಲಿ, ಅಂತರಪಟ ಧಾರಾವಾಹಿಯ ಕೆಲವು ಕಲಾವಿದರು ಶುಭ ಸಮಾರಂಭದಲ್ಲಿ ಪಾಲ್ಗೊಂಡು ನೂತನ ವಧು-ವರರನ್ನು ಹಾರೈಸಿದ್ದಾರೆ.
ಮಂಜು ಪಾವಗಡ ಹಾಗೂ ನಂದಿನಿ ಅವರು ಇತ್ತೀಚೆಗೆ ಗುರು-ಹಿರಿಯರು ಹಾಗೂ ಆಪ್ತೇಷ್ಟರ ಸಮುಖದಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದವು. ಈಗ ಅವರ ವಿವಾಹ ಫೋಟೋ ಹಾಗೂ ವಿಡಿಯೋವನ್ನು ವೀಕ್ಷಿಸಿರುವ ಮಂಜು ಪಾವಗಡ ಅವರ ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಶುಭ ಹಾರೈಸಿದ್ದಾರೆ.
ನಂದಿನಿ ಅವರು ಬೆಂಗಳೂರಿನ ಖಾಸಗಿ ಕಂಪೆನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದಾರೆ. ತಮ ಹಾಸ್ಯಪ್ರಜ್ಞೆ, ಸರಳತೆಯಿಂದಲೇ ಹೆಸರಾಗಿರುವ ಮಂಜುಪಾವಗಡ ಅವರು ಬಿಗ್‌ಬಾಸ್‌ 8ರ ವಿಜೇತರಾದ ನಂತರ ನೈಟ್‌ ಕರ್ಫ್ಯೂ, ಒಂದ್ಸಲ ಮೀಟ್‌ ಮಾಡೋಣ, ಉಸಿರೇ ಉಸಿರೇ, ದಾಸಪ್ಪ ಎಂಬ ಸಿನಿಮಾಗಳಲ್ಲಿ ನಟಿಸಿರುವುದಲ್ಲದೆ ಕೆಂಡಸಂಪಿಗೆ, ಭಾಗ್ಯಲಕ್ಷ್ಮೀ, ಅಂತರಪಟದಲ್ಲಿ ನಟಿಸಿ ಗಮನ ಸೆಳೆದಿದ್ದಾರೆ.