ನವದೆಹಲಿ, ಜೂ.24- ಹೆಚ್ಚುತ್ತಿರುವ ಉದ್ವಿಗ್ನತೆಯ ಮಧ್ಯೆ ಭಾರತ ಸರ್ಕಾರ ಇರಾನ್‌ ನಿಂದ 2,295 ನಾಗರಿಕರನ್ನು ಮತ್ತು ಇಸ್ರೇಲ್‌ನಿಂದ 366 ಪ್ರಜೆಗಳನ್ನು ಸ್ಥಳಾಂತರಿಸಿದೆ.ಇರಾನ್‌ ನಿಂದ ಸ್ಥಳಾಂತರಿಸಲ್ಪಟ್ಟ ಹೊಸ ಬ್ಯಾಚ್‌ನೊಂದಿಗೆ, ಭಾರತವು ಪರ್ಷಿಯನ್‌ ಕೊಲ್ಲಿ ರಾಷ್ಟ್ರದಿಂದ 2,295 ಭಾರತೀಯರನ್ನು ಮರಳಿ ಇಲ್ಲಿಗೆ ಕರೆತಂದಿದೆ.
ಬೆಳಿಗ್ಗೆ 8:20 ಕ್ಕೆ ಒಮನ್‌ ನಿಂದ ಬಂದಿಳಿದ ಚಾರ್ಟರ್ಡ್‌ ವಿಮಾನದಲ್ಲಿ ಭಾರತ 161 ಭಾರತೀಯರನ್ನು ಮರಳಿ ಕರೆತಂದಿತು,ಭಾರತೀಯರನ್ನು ಭೂ ಗಡಿ ದಾಟುವಿಕೆಗಳ ಮೂಲಕ ಇಸ್ರೇಲ್‌ ನಿಂದ ಜೋರ್ಡಾನ್‌ಗೆ ಸ್ಥಳಾಂತರಿಸಲಾಯಿತು.
165 ಭಾರತೀಯರ ಮತ್ತೊಂದು ಗುಂಪನ್ನು ಸಿ -17 ಮಿಲಿಟರಿ ಸಾರಿಗೆ ವಿಮಾನದಲ್ಲಿ ಒಮನ್‌ ನಿಂದ ನವದೆಹಲಿಗೆ ಹಿಂತಿರುಗಿದ್ದು ಅವರನ್ನು ಕೇಂದ್ರ ಸಚಿವ ಎಲ್‌ ಮುರುಗನ್‌ ವಿಮಾನ ನಿಲ್ದಾಣದಲ್ಲಿ ಬರಮಾಡಿಕೊಂಡರು.
ಇರಾನ್‌ನಿಂದ ಬೆಳಗಿನ ಜಾವ 3:30 ಕ್ಕೆ ಮಶಾದ್‌ನಿಂದ ನವದೆಹಲಿಗೆ ಬಂದಿಳಿದ ವಿಶೇಷ ವಿಮಾನದಲ್ಲಿ 292 ಭಾರತೀಯ ಪ್ರಜೆಗಳನ್ನು ಸ್ಥಳಾಂತರಿಸಲಾಗಿದೆ ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರ ರಣಧೀರ್‌ ಜೈಸ್ವಾಲ್‌ ತಿಳಿಸಿದ್ದಾರೆ.
ಇರಾನ್‌ ಮತ್ತು ಇಸ್ರೇಲ್‌ ನಡುವಿನ ಹೊಸ ಯುದ್ಧದ ಅಲೆಯ ನಂತರ ಪ್ರಾರಂಭಿಸಲಾದ ಭಾರತದ ಸ್ಥಳಾಂತರಿಸುವ ಕಾರ್ಯಾಚರಣೆ ಆಪರೇಷನ್‌ ಸಿಂಧು ಬಗ್ಗೆ ವಿವರಗಳನ್ನು ಹಂಚಿಕೊಂಡ ಅವರು, 2,295 ಭಾರತೀಯ ಪ್ರಜೆಗಳನ್ನು ಈಗ ಇರಾನ್‌ನಿಂದ ಮನೆಗೆ ಕರೆತರಲಾಗಿದೆ ಎಂದು ಹೇಳಿದರು.
ಇರಾನ್‌ ನಗರ ಮಶಾದ್‌ನಿಂದ ನಿನ್ನೆ ರಾತ್ರಿ ವಿಶೇಷ ವಿಮಾನದಲ್ಲಿ 290 ಭಾರತೀಯ ಪ್ರಜೆಗಳು ಮತ್ತು ಒಬ್ಬ ಶ್ರೀಲಂಕಾದವರನ್ನು ಸ್ಥಳಾಂತರಿಸಲಾಯಿತು.ಕಳೆದ ಬುಧವಾರದಿಂದ ಇರಾನಿನ ನಗರವಾದ ಮಶಾದ್‌ನಿಂದ ಅರ್ಮೇನಿಯಾದ ರಾಜಧಾನಿ ಯೆರೆವಾನ್‌ ಮತ್ತು ತುರ್ಕಮೆನಿಸ್ತಾನ್‌ ರಾಜಧಾನಿ ಅಶ್ಗಾಬತ್‌ನಿಂದ ಕಾರ್ಯನಿರ್ವಹಿಸುವ ಚಾರ್ಟರ್ಡ್‌ ವಿಮಾನಗಳಲ್ಲಿ ಭಾರತ ತನ್ನ ಪ್ರಜೆಗಳನ್ನು ಸ್ಥಳಾಂತರಿಸಿದೆ.