ನವದೆಹಲಿ,ಜೂ.27- ಗುಜರಾತ್‌ನ ಅಹದಾಬಾದ್‌ನ ಸರ್ದಾರ್‌ ವಲ್ಲಭಭಾಯಿ ಪಟೇಲ್‌ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಸಮೀಪ ಸಂಭವಿಸಿದ ಏರ್‌ ಇಂಡಿಯಾ ವಿಮಾನ ದುರಂತದ ತನಿಖೆಯಲ್ಲಿ ಪಾಲ್ಗೊಳ್ಳಲು ವಿಶ್ವಸಂಸ್ಥೆಯ ತನಿಖಾಧಿಕಾರಿಗೆ ಅವಕಾಶ ನೀಡಲು ಭಾರತ ನಿರಾಕರಿಸಿದೆ.
ಭಾರತದಲ್ಲಿದ್ದ ತನಿಖಾಧಿಕಾರಿಗೆ ವೀಕ್ಷಕ ಸ್ಥಾನಮಾನ ನೀಡುವಂತೆ ಅಂತರರಾಷ್ಟ್ರೀಯ ನಾಗರಿಕ ವಿಮಾನಯಾನ ಸಂಸ್ಥೆ (ಐಸಿಎಒ) ಕೇಳಿದ ನಂತರ ಭಾರತೀಯ ಅಧಿಕಾರಿಗಳು ಈ ಪ್ರಸ್ತಾಪವನ್ನು ನಿರಾಕರಣೆ ಮಾಡಿದ್ದಾರೆ.
ಈ ವಾರದ ಆರಂಭದಲ್ಲಿ, ಜೂನ್‌ 12 ರಂದು ಅಹಮದಾಬಾದ್‌ನಲ್ಲಿ 270 ಜನರ ಸಾವಿಗೆ ಕಾರಣವಾದ ಬೋಯಿಂಗ್‌ 787-8 ಡ್ರೀಮ್‌ಲೈನರ್‌ ಅಪಘಾತದ ನಂತರ ಸಹಾಯ ನೀಡಲು ವಿಶ್ವಸಂಸ್ಥೆಯ ವಾಯುಯಾನ ಸಂಸ್ಥೆ ತನ್ನ ತನಿಖಾಧಿಕಾರಿಗಳಲ್ಲಿ ಒಬ್ಬರನ್ನು ಭಾರತಕ್ಕೆ ನೀಡುವ ಅಸಾಮಾನ್ಯ ಕ್ರಮವನ್ನು ತೆಗೆದುಕೊಂಡಿದೆ ಎಂದು ಮೂಲಗಳು ತಿಳಿಸಿವೆ.
ಈ ಹಿಂದೆ, 2014 ರಲ್ಲಿ ಮಲೇಷಿಯಾದ ವಿಮಾನ ಪತನ ಮತ್ತು 2020 ರಲ್ಲಿ ಉಕ್ರೇನಿಯನ್‌ ಜೆಟ್‌ಲೈನರ್‌ ಪತನದಂತಹ ಕೆಲವು ತನಿಖೆಗಳಿಗೆ ಸಹಾಯ ಮಾಡಲು ಐಸಿಎಒ ತನಿಖಾಧಿಕಾರಿಗಳನ್ನು ನಿಯೋಜಿಸಿತ್ತು. ಗುರುವಾರ, ಸರ್ಕಾರವು ಕಪ್ಪು ಪೆಟ್ಟಿಗೆಗಳಿಂದ ಡೇಟಾವನ್ನು ಹೊರತೆಗೆಯಲಾಗುತ್ತಿದೆ ಮತ್ತು ಏರ್‌ ಇಂಡಿಯಾ ವಿಮಾನ ಅಪಘಾತಕ್ಕೆ ಕಾರಣವಾದ ಘಟನೆಗಳ ಅನುಕ್ರಮವನ್ನು ಪುನರ್ನಿರ್ಮಿಸಲು ಕಾಕ್ಪಿಟ್‌ ಧ್ವನಿ ರೆಕಾರ್ಡರ್‌ ಮತ್ತು ಫ್ಲೈಟ್‌ ಡೇಟಾ ರೆಕಾರ್ಡರ್‌ಗಳ ವಿಶ್ಲೇಷಣೆ ನಡೆಯುತ್ತಿದೆ ಎಂದು ಹೇಳಿದೆ.
ವಿಮಾನ ಪತನಗೊಂಡ ಹಾಸ್ಟೆಲ್‌ನ ಮೇಲ್ಛಾವಣಿಯಲ್ಲಿ ಒಂದು ಪೆಟ್ಟಿಗೆ ಮತ್ತು ಅವಶೇಷಗಳಿಂದ ಇನ್ನೊಂದು ಪೆಟ್ಟಿಗೆ ಪತ್ತೆಯಾಗಿದ್ದು, ಎರಡೂ ಪೆಟ್ಟಿಗೆಗಳನ್ನು ಮಂಗಳವಾರ ದೆಹಲಿಯ ಎಎಐಬಿ ಪ್ರಯೋಗಾಲಯಕ್ಕೆ ಸುರಕ್ಷಿತವಾಗಿ ಕಳುಹಿಸಲಾಗಿದೆ ಎಂದು ಸರ್ಕಾರ ತಿಳಿಸಿದೆ. ಮೊದಲ ಕಪ್ಪು ಪೆಟ್ಟಿಗೆ ಮಧ್ಯಾಹ್ನ 2 ಗಂಟೆಗೆ ಪ್ರಯೋಗಾಲಯವನ್ನು ತಲುಪಿತು. ಎರಡನೆಯದು ಸಂಜೆ 5.15 ಕ್ಕೆ ತಲುಪಿತು. ದತ್ತಾಂಶ ಹೊರತೆಗೆಯುವಿಕೆ ಅದೇ ದಿನ ಪ್ರಾರಂಭವಾಯಿತು ಮತ್ತು ಬುಧವಾರದ ವೇಳೆಗೆ ಪ್ರಕ್ರಿಯೆಯು ಪೂರ್ಣಗೊಂಡಿತು.
ದತ್ತಾಂಶವು ಕಾಕ್ಪಿಟ್‌ ಸಂಭಾಷಣೆಗಳು, ಸಿಬ್ಬಂದಿ ಪ್ರತಿಕ್ರಿಯೆಗಳು ಮತ್ತು ಸುತ್ತುವರಿದ ಶಬ್ದಗಳನ್ನು ಪರಿಶೀಲನೆ ಮಾಡಲಿದ್ದಾರೆ. ಸಿವಿಆರ್‌ ಮತ್ತು ಎಫ್‌ಡಿಆರ್‌ ದತ್ತಾಂಶಗಳ ವಿಶ್ಲೇಷಣೆ ನಡೆಯುತ್ತಿದೆ. ಹೆಚ್ಚುವರಿಯಾಗಿ, ಮುಂಭಾಗದ ಕಪ್ಪು ಪೆಟ್ಟಿಗೆಯಿಂದ ಕ್ರ್ಯಾಶ್‌ ಪೊಟೆಕ್ಷನ್‌ ಮಾಡ್ಯೂಲ್‌ ಅನ್ನು ಸುರಕ್ಷಿತವಾಗಿ ಹಿಂಪಡೆಯಲಾಯಿತು ಮತ್ತು ಜೂನ್‌ 25 ರಂದು ಮೆಮೊರಿ ಮಾಡ್ಯೂಲ್‌ ಅನ್ನು ಯಶಸ್ವಿಯಾಗಿ ಪರಿಶೀಲನೆ ಮಾಡಲಾಗಿದೆ.