ವಾಷಿಂಗ್ಟನ್, ಸೆ.20- ಒಂದು ಕಡೆ ಭಾರತದ ಮೇಲೆ ಸುಂಕ ಸಮರ ಸಾರಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇದೀಗ ಹೆಚ್ 1ಬಿ ವೀಸಾಗಳ ಮೇಲಿನ ವಾರ್ಷಿಕ ಶುಲ್ಕವನ್ನು 1 ಲಕ್ಷ ಡಾಲರ್‌ಗೆ ಏರಿಕೆ ಮಾಡಿದ್ದಾರೆ. ಈ ನಿಯಮವು ಭಾರತೀಯ ಉದ್ಯೋಗಿಗಳ ಮೇಲೆ ಭಾರೀ ಪರಿಣಾಮ ಬೀರಲಿದೆ.
ಅಲ್ಲದೇ ಕೌಶಲ್ಯ ಪೂರ್ಣ ವಿದೇಶಿ ಕಾರ್ಮಿಕರ ಅಮೆರಿಕ ಪ್ರವೇಶ ನೀತಿಗಳಲ್ಲೂ ಕೆಲವು ಮಹತ್ವದ ಬದಲಾವಣೆ ಮಾಡಲಾಗಿದೆ. ಇದು ಯುಎಸ್ ಟೆಕ್ ಕಂಪನಿಗಳು ಭಾರತೀಯ ಉದ್ಯೋಗಿಗಳಿಗೆ ಬಾಗಿಲು ಬಂದ್ ಮಾಡುವ ಆತಂಕವನ್ನು ಮತ್ತಷ್ಟು ಹೆಚ್ಚಿಸಿದೆ.
ವಿದೇಶಿ ಕೆಲಸಗಾರರಿಗೆ ವಾರ್ಷಿಕ 1,00,000 ಡಾಲರ್ ವೀಸಾ ಶುಲ್ಕವನ್ನು ವಿಧಿಸುವ ಘೋಷಣೆಗೆ ಟ್ರಂಪ್ ಸಹಿ ಹಾಕಿದ್ದಾರೆ. ಶ್ರೀಮಂತ ವ್ಯಕ್ತಿಗಳಿಗೆ ಪೌರತ್ವವನ್ನು ಪಡೆಯುವ ಮಾರ್ಗವಾಗಿ 1 ಮಿಲಿಯನ್ ಡಾಲರ್ ಗೋಲ್ಡ್ ಕಾರ್ಡ್ ವೀಸಾವನ್ನು ಜಾರಿಗೆ ತಂದಿದ್ದಾರೆ. ಹೆಚ್1ಬಿ ವೀಸಾ ಶುಲ್ಕ ಏರಿಕೆ ಮಾಡಿ ಭಾರತೀಯ ಉದ್ಯೋಗಿಗಳಿಗೆ ಟ್ರಂಪ್ ಶಾಕ್ ಕೊಟ್ಟಿದ್ದಾರೆ. ಅಮೆರಿಕ ಉದ್ಯೋಗಿಗಳ ರಕ್ಷಣೆಗೆ ಹೊಸ ಕ್ರಮಕ್ಕೆ ಅಮೆರಿಕ ಸರ್ಕಾರ ಬದ್ಧವಾಗಿದೆ ಎಂದು ಪ್ರತಿಪಾದಿಸಿದ್ದಾರೆ.
ಹೆಚ್-1ಬಿ ವೀಸಾಗಳು ವಿದೇಶಿಯರನ್ನು ಉನ್ನತ ಕೌಶಲ್ಯದ ಉದ್ಯೋಗಗಳಿಗೆ ಅಮೆರಿಕಗೆ ಕರೆತರಲು ಉದ್ದೇಶಿಸಿವೆ. ಅಮೆರಿಕ ಉದ್ಯೋಗಿಗಳಿಗೆ ಹೆಚ್ಚಿನ ಸಂಬಳ ಕೊಟ್ಟು ನೇಮಿಸಿಕೊಳ್ಳುವುದು ಟೆಕ್ ಕಂಪನಿಗಳಿಗೆ ಕಷ್ಟ. ಹೀಗಾಗಿ, ಕಡಿಮೆ ಸಂಬಳಕ್ಕೆ ನುರಿತ, ಕೌಶಲಪೂರ್ಣ ವಿದೇಶಿ ಉದ್ಯೋಗಿಗಳನ್ನು ಕರೆತಂದು ಕೆಲಸ ನೀಡುತ್ತಿವೆ. ಅದಕ್ಕಾಗಿ ಹೆಚ್ 1ಬಿ ವೀಸಾ ಕ್ರಮ ಅಮೆರಿಕದಲ್ಲಿ ಜಾರಿಯಲ್ಲಿದೆ. ಈಗ, ಈ ವೀಸಾ ಶುಲ್ಕದಲ್ಲಿ ಭಾರಿ ಏರಿಕೆ ಮಾಡಿರುವುದರಿಂದ ಇತರೆ ದೇಶಗಳಿಂದ ನುರಿತರನ್ನು ಕರೆತರಲು ಅರ್ಜಿ ಸಲ್ಲಿಸುವ ಕಂಪನಿಗಳು ವಾರ್ಷಿಕವಾಗಿ ಪ್ರತಿ ವೀಸಾಕ್ಕೆ 1,00,000 ಡಾಲರ್ ಪಾವತಿಸಬೇಕಾಗುತ್ತದೆ.
ಹೆಚ್-1ಬಿ ವೀಸಾಗಳು ಅತ್ಯುತ್ತಮ ಮತ್ತು ಪ್ರತಿಭಾನ್ವಿತ ವಿದೇಶಿಯರನ್ನು, ಉನ್ನತ ಕೌಶಲ್ಯಪೂರ್ಣ ಉದ್ಯೋಗಗಳಿಗೆ ಕರೆತರುವ ಉದ್ದೇಶವನ್ನು ಹೊಂದಿವೆ. ಇವುಗಳನ್ನು ಅತ್ಯಂತ ಪರಿಣಾಮಕಾರಿ ಬಳಸಿಕೊಳ್ಳುವ ಯುಎಸ್ ಟೆಕ್ ಕಂಪನಿಗಳು, ವಾರ್ಷಿಕವಾಗಿ 60,000 ಅಮೆರಿಕನ್ ಡಾಲರ್ಗಿಂತ ಕಡಿಮೆ ವೇತನಕ್ಕೆ ಕೆಲಸ ಮಾಡಲು ಸಿದ್ಧರಿರುವ ವಿದೇಶಿ ಕಾರ್ಮಿಕರನ್ನು ಅಮೆರಿಕಕ್ಕೆ ಕರೆತರುತ್ತವೆ.
ಹೆಚ್-1ಬಿ ಕಾರ್ಯಕ್ರಮವನ್ನು 1990ರಲ್ಲಿ ವಿಜ್ಞಾನ, ತಂತ್ರಜ್ಞಾನ, ಎಂಜಿನಿಯರಿಂಗ್ ಮತ್ತು ಗಣಿತ ಕ್ಷೇತ್ರಗಳಲ್ಲಿ ಪದವಿ ಅಥವಾ ಅದಕ್ಕಿಂತ ಹೆಚ್ಚಿನ ಶಿಕ್ಷಣ ಹೊಂದಿರುವ ವಿದೇಶಿ ಜನರನ್ನು ಅಮೆರಿಕಕ್ಕೆ ಕರೆತರುವ ಉದ್ದೇಶದಿಂದ ಜಾರಿ ಮಾಡಲಾಯಿತು. ಇದು ಕಡಿಮೆ ಕಾರ್ಮಿಕ ರಕ್ಷಣೆ ಜವಾಬ್ದಾರಿಯೊಂದಿಗೆ, ಕಂಪನಿಗಳಿಗೆ ಕಡಿಮೆ ವೇತನವನ್ನು ನೀಡಲು ಅವರು ಅವಕಾಶ ನೀಡುತ್ತದೆ ಎಂದು ವಿಮರ್ಶಕರು ಆರಂಭದಿಂದಲೂ ಟೀಕಿಸುತ್ತಿದ್ದಾರೆ.
ವಿಮರ್ಶಕರು ಹೇಳುವಂತೆ ಹೆಚ್-1ಬಿ ಹುದ್ದೆಗಳು ಸಾಮಾನ್ಯವಾಗಿ ವಿಶಿಷ್ಟ ಕೌಶಲ್ಯದ ಅವಶ್ಯಕತೆಗಳನ್ನು ಹೊಂದಿರುವ ಹಿರಿಯ ಹುದ್ದೆಗಳಿಗೆ ಬದಲಾಗಿ, ಆರಂಭಿಕ ಹಂತದ ಉದ್ಯೋಗಗಳಿಗೆ ಹೆಚ್ಚಿನ ಪ್ರಾಶಸ್ತ್ರ ನೀಡುತ್ತದೆ. ಈ ಕಾರ್ಯಕ್ರಮದಡಿ ಅಮೆರಿಕನ್ನರ ವೇತನವನ್ನು ಕಡಿಮೆ ಮಾಡಬಾರದು ಅಥವಾ ಅಮೆರಿಕದ ಕಾರ್ಮಿಕರನ್ನು ಸ್ಥಳಾಂತರಿಸಬಾರದು ಎಂಬ ನಿಯಮ ಇದ್ದರೂ, ಕಡಿಮೆ ವೇತನದ ವಿದೇಶಿ ಕಾರ್ಮಿಕರ ನೇಮಕಾತಿಗೆ ಕಂಪನಿಗಳು ಮುಂದಗುತ್ತವೆ ಎಂದು ಹೇಳಲಾಗುತ್ತದೆ.
ಅನೇಕ ಯುಎಸ್ ಕಂಪನಿಗಳು ಸಹಾಯ ಕೇಂದ್ರಗಳು, ಪ್ರೋಗ್ರಾಮಿಂಗ್ ಮತ್ತು ಇತರ ಮೂಲಭೂತ ಕಾರ್ಯಗಳನ್ನು, ಭಾರತದಲ್ಲಿ ವಿಪ್ರೋ, ಇನ್ಫೋಸಿಸ್, ಏಇಡಿ ಟೆಕ್ನಾಲಜೀಸ್ ಮತ್ತು ಟಾಟಾ ಮತ್ತು ಅಮೆರಿಕದಲ್ಲಿ ಐಬಿಎಂ ಮತ್ತು ಕಾಗ್ನಿಜೆಂಟ್‌ನಂತಹ ಸಲಹಾ ಕಂಪನಿಗಳಿಗೆ ಗುತ್ತಿಗೆ ನೀಡುತ್ತವೆ. ಈಗ ಹೆಚ್-1ಬಿ ನಿಯಮ ಬದಲಾವಣೆಯಿಂದ ಯುಎಸ್ ಟೆಕ್ ಕಂಪನಿಗಳು ಪರ್ಯಾಯ ಮಾರ್ಗದ ಹುಡುಕಾಟ ಪ್ರಕ್ರಿಯೆ ಆರಂಭಿಸಿದ್ದಾರೆ.
ಅಮೆರಿಕದ ಈ ಸಲಹಾ ಗುತ್ತಿಗೆ ಆಧಾರದಲ್ಲಿ ಕಂಪನಿಗಳು ವಿದೇಶಿ ಕಾರ್ಮಿಕರನ್ನು ನೇಮಿಸಿಕೊಳ್ಳುತ್ತವೆ. ಭಾರತದಿಂದಲೇ ಹೆಚ್ಚು ನೇಮಕಾತಿಗಳು ನಡೆಯುವುದು ವಿಶೇಷ. ಇದು ಅಮೆರಿಕನ್ ಟೆಕ್ ಕಂಪನಿಗಳಿಗೆ ಹಣವನ್ನು ಉಳಿಸುವ ಅತ್ಯಂತ ಪರಿಣಾಮಕಾರಿ ಮಾರ್ಗವಾಗಿದೆ.
ಈ ಎಲ್ಲಾ ಬೆಳವಣಿಗೆಗಳ ಕುರಿತು ಮಾತನಾಡಿದ ಶ್ವೇತಭವನದ ಸಿಬ್ಬಂದಿ ಕಾರ್ಯದರ್ಶಿ ವಿಲ್ ಸ್ಕಾರ್ಫ್, ಅತ್ಯಂತ ಹೆಚ್ಚು ಪ್ರಮಾಣದಲ್ಲಿ ದುರುಪಯೋಗಕ್ಕೆ ಗುರಿಯಾದ ವೀಸಾ ವ್ಯವಸ್ಥೆಗಳಲ್ಲಿ ಹೆಚ್-1ಬಿ ವಲಸೆಯೇತರ ವೀಸಾ ಕಾರ್ಯಕ್ರಮ ಒಂದಾಗಿದೆ. ಇದು ಅಮೆರಿಕನ್ನರ ಉದ್ಯೋಗದ ಅವಕಾಶಗಳನ್ನು ಕಸಿದುಕೊಳ್ಳುತ್ತಿದ್ದು, ಇದಕ್ಕೆ ಕಡಿವಾಣ ಹಾಖುವ ಉದ್ದೇಶದಿಂದ ಹೊಸ ನಿಯಮ ಜಾರಿಗೆ ತರಲಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. ಹೆಚ್-1ಬಿ ವೀಸಾದಾರರು ಕೆಲಸ ಕಳೆದುಕೊಂಡರೆ ನೋಟಿಸ್ ನೀಡುವ ನಿಯಮ ಕೂಡ ಈಗಾಗಲೇ ಜಾರಿಯಲ್ಲಿರುವುದನ್ನು ಇಲ್ಲಿ ಗಮನಿಸಬಹುದು.
ಹೊಸ ಘೋಷಣೆಯು ಹೆಚ್-1ಬಿ ಅರ್ಜಿದಾರರನ್ನು ಪ್ರಾಯೋಜಿಸಲು, ಕಂಪನಿಗಳು ಪಾವತಿಸುವ ಶುಲ್ಕವನ್ನು 100,000 ಡಾಲರ್‌ಗೆ ಹೆಚ್ಚಿಸುತ್ತದೆ. ಕಂಪನಿಗಳು ಈಗ ಸರ್ಕಾರಕ್ಕೆ ಒಂದು ಲಕ್ಷ ಡಾಲರ್ ಪಾವತಿಸಬೇಕು, ಆ ನಂತರ ವಿದೇಶಿ ಉದ್ಯೋಗಿಗೆ ವೇತನ ನೀಡಬೇಕು. ಇದರ ಬದಲು ಅವರು ಅಮರಿಕನ್ ಕಾರ್ಮಿಕರ ನೇಮಕಕ್ಕೆ ಹೆಚ್ಚಿನ ಗಮನ ಕೊಡುತ್ತಾರೆ ಎಂದು ವಿಲ್ ಸ್ಕಾರ್ಫ್ ಭರವಸೆ ವ್ಯಕ್ತಪಡಿಸಿದ್ದಾರೆ.