ವಾಷಿಂಗ್ಟನ್‌,ಸೆ.23- ಅಮೇರಿಕಾದಲ್ಲಿರುವ ವೈದ್ಯರಿಗೆ ಹೊಸ ಹೆಚ್‌- 1ಬಿ ವೀಸಾ ಶುಲ್ಕದಿಂದ ವಿನಾಯಿತಿ ನೀಡುವ ಸಾಧ್ಯತೆಯಿದೆ.ವಿನಾಯಿತಿ ಪಡೆದವರಲ್ಲಿ ವೈದ್ಯರು ಕೂಡ ಇರಬಹುದು ಎಂದು ಬ್ಲೂಮ್‌ಬರ್ಗ್‌ ಸುದ್ದಿ ವರದಿಗಾರರೊಬ್ಬರು ಶ್ವೇತಭವನದ ವಕ್ತಾರ ಟೇಲರ್‌ ರೋಜರ್ಸ್‌ ಅವರನ್ನು ಉಲ್ಲೇಖಿಸಿ ಎಕ್‌್ಸನಲ್ಲಿ ಪೋಸ್ಟ್‌ ಮಾಡಿದ್ದಾರೆ.
ಸೆಪ್ಟೆಂಬರ್‌ 21 ರಂದು ಅಧ್ಯಕ್ಷ ಡೊನಾಲ್‌್ಡ ಟ್ರಂಪ್‌ ಆಡಳಿತವು ಹೆಚ್‌- 1ಬಿ ವೀಸಾಗಳಿಗೆ ಹೊಸ ಯುಎಸ್‌ ಡಿ 100,000 ಶುಲ್ಕವು ಹೊಸ ಅರ್ಜಿಗಳಿಗೆ ಮಾತ್ರ ಅನ್ವಯವಾಗುವ ಒಂದು ಬಾರಿ ಪಾವತಿಯಾಗಿದೆ. ಪ್ರಸ್ತುತ ವೀಸಾ ಹೊಂದಿರುವವರಿಗೆ ಅನ್ವಯಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದು. ಇದು ಭಾರತದಿಂದ ಬಂದವರು ಸೇರಿದಂತೆ ಯುಎಸ್‌‍ನಲ್ಲಿ ಕೆಲಸ ಮಾಡುತ್ತಿರುವ ಸಾವಿರಾರು ವೃತ್ತಿಪರರಿಗೆ ಭಾರೀ ಪರಿಹಾರವನ್ನು ನೀಡುತ್ತದೆ.
ಟ್ರಂಪ್‌ ಅವರ ಹೊಸ ವೀಸಾ ಅವಶ್ಯಕತೆಯು ಇನ್ನೂ ಸಲ್ಲಿಸದ ಹೊಸ, ಸಂಭಾವ್ಯ ಅರ್ಜಿಗಳಿಗೆ ಮಾತ್ರ ಅನ್ವಯಿಸುತ್ತದೆ ಎಂದು ಅಮೆರಿಕದ ಪೌರತ್ವ ಮತ್ತು ವಲಸೆ ಸೇವೆಗಳು ಹೇಳಿಕೆಯಲ್ಲಿ ತಿಳಿಸಿದೆ.
ಸೆಪ್ಟೆಂಬರ್‌ 21ರ ಜಾರಿಗೆ ಬರುವ ಘೋಷಣೆ ದಿನಾಂಕದ ಮೊದಲು ಸಲ್ಲಿಸಲಾದ ಹೆಚ್‌- 1ಬಿ ಅರ್ಜಿಗಳ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ. ಪ್ರಸ್ತುತ ಯುಎಸ್‌ ಹೊರಗೆ ಇರುವ ವೀಸಾ ಹೊಂದಿರುವವರು ದೇಶಕ್ಕೆ ಮರುಪ್ರವೇಶಿಸಲು ಶುಲ್ಕವನ್ನು ಪಾವತಿಸಬೇಕಾಗಿಲ್ಲ.
ಟ್ರಂಪ್‌ ಶುಲ್ಕ ವಿಧಿಸುವ ಆದೇಶದ ನಂತರ ಅಮೆರಿಕದಲ್ಲಿರುವ ಭಾರತೀಯರಲ್ಲಿ ವ್ಯಾಪಕ ಭೀತಿ, ಗೊಂದಲ ಮತ್ತು ಕಳವಳ ಆವರಿಸಿತ್ತು, ಅನೇಕರು ತಾಯ್ನಾಡಿಗೆ ವಿಮಾನ ಹತ್ತಲು ಕಾಯುತ್ತಿರುವಾಗ ಕೊನೆಯ ಕ್ಷಣದಲ್ಲಿ ಪ್ರಯಾಣ ಯೋಜನೆಗಳನ್ನು ರದ್ದುಗೊಳಿಸಿದರು.
ಈಗಾಗಲೇ ಭಾರತದಲ್ಲಿರುವ ಇನ್ನೂ ಅನೇಕರು ಮರಳಲು ಪರದಾಡುತ್ತಿದ್ದರು. ವಲಸೆ ವಕೀಲರು ಮತ್ತು ಕಂಪನಿಗಳು ಎಚ್‌1-ಬಿ ವೀಸಾ ಹೊಂದಿರುವವರು ಅಥವಾ ಪ್ರಸ್ತುತ ಕೆಲಸ ಅಥವಾ ರಜೆಗಾಗಿ ಅಮೆರಿಕದ ಹೊರಗೆ ಇರುವ ಅವರ ಕುಟುಂಬ ಸದಸ್ಯರಿಗೆ ಎಚ್ಚರಿಕೆ ನೀಡಿ, ಸೆಪ್ಟೆಂಬರ್‌ 21ರಂದು ಘೋಷಣೆ ಪ್ರಾರಂಭವಾಗುವ ಮೊದಲು ಅಮೆರಿಕಕ್ಕೆ ಮರಳಲು ಕೇಳಿಕೊಂಡಿದ್ದರು.
ಹೆಚ್‌- 1ಬಿ ಎಂದರೇನು?
ಹೆಚ್‌1ಬಿ ವಲಸೆರಹಿತ ವೀಸಾವಾಗಿದ್ದು, ಇದು ಅಮೆರಿಕದ ಕಂಪನಿಗಳು ಸೈದ್ಧಾಂತಿಕ ಅಥವಾ ತಾಂತ್ರಿಕ ಪರಿಣತಿಯ ಅಗತ್ಯವಿರುವ ವಿಶೇಷ ಉದ್ಯೋಗಗಳಲ್ಲಿ ವಿದೇಶಿ ಕಾರ್ಮಿಕರನ್ನು ನೇಮಿಸಿಕೊಳ್ಳಲು ಅನುವು ಮಾಡಿಕೊಡುತ್ತದೆ. ಭಾರತ ಮತ್ತು ಚೀನಾದಂತಹ ದೇಶಗಳಿಂದ ಪ್ರತಿ ವರ್ಷ ಹತ್ತಾರು ಸಾವಿರ ಉದ್ಯೋಗಿಗಳನ್ನು ನೇಮಿಸಿಕೊಳ್ಳಲು ತಂತ್ರಜ್ಞಾನ ಕಂಪನಿಗಳು ಇದನ್ನು ಅವಲಂಬಿಸಿವೆ.
ಈ ವೀಸಾಗಳು ಭಾರತೀಯ ತಂತ್ರಜ್ಞಾನ ವೃತ್ತಿಪರರಲ್ಲಿ ಬಹಳ ಜನಪ್ರಿಯವಾಗಿದ್ದು, ಮೂರು ವರ್ಷಗಳವರೆಗೆ ಮಾನ್ಯವಾಗಿರುತ್ತವೆ ಮತ್ತು ಇನ್ನೂ ಮೂರು ವರ್ಷಗಳವರೆಗೆ ನವೀಕರಿಸಬಹುದು. ಕಾಂಗ್ರೆಸ್ಸಿನ ಕಡ್ಡಾಯ ಮಿತಿಯಡಿ, ಅಮೆರಿಕವು ಪ್ರತಿ ವರ್ಷ ಗರಿಷ್ಠ 65,000 ಎಚ್‌1ಬಿ ವೀಸಾಗಳನ್ನು ಮತ್ತು ಅಮೆರಿಕದಿಂದ ಸ್ನಾತಕೋತ್ತರ ಮತ್ತು ಉನ್ನತ ಪದವಿಗಳನ್ನು ಪಡೆದವರಿಗೆ ಇನ್ನೂ 20,000 ವೀಸಾಗಳನ್ನು ನೀಡಬಹುದು.
ಪ್ರಸ್ತುತ ಎಚ್‌1ಬಿ ವೀಸಾ ಶುಲ್ಕವು ಉದ್ಯೋಗದಾತರ ಗಾತ್ರ ಮತ್ತು ಇತರ ವೆಚ್ಚಗಳನ್ನು ಅವಲಂಬಿಸಿ ಸುಮಾರು ಯುಎಸ್‌ ಡಾಲರ್‌ 2,000ರಿಂದ 5,000ವರೆಗೆ ಇರುತ್ತದೆ.