ಹರಿದ್ವಾರ, ಅ. 9 (ಪಿಟಿಐ) ಉತ್ತರಾಖಂಡದ ಹರಿದ್ವಾರದ ರೂರ್ಕಿ ಮಿಲಿಟರಿ ಕಂಟೋನ್ಮೆಂಟ್‌ನಲ್ಲಿ ಮಿಲಿಟರಿ ಸಮವಸ್ತ್ರದಲ್ಲಿ ತಿರುಗಾಡುತ್ತಿದ್ದ ನಕಲಿ ಸೇನಾ ಸಿಬ್ಬಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ.
ಸೇನಾ ಗುಪ್ತಚರ, ಸ್ಥಳೀಯ ಗುಪ್ತಚರ ಸಂಸ್ಥೆಗಳು ಮತ್ತು ಪೊಲೀಸರ ಜಂಟಿ ಕಾರ್ಯಾಚರಣೆಯಲ್ಲಿ, ನಕಲಿ ಸೇನಾ ಸಿಬ್ಬಂದಿಯಿಂದ 18 ಬ್ಯಾಂಕ್‌ ಡೆಬಿಟ್‌ ಕಾರ್ಡ್‌ಗಳು, ಸೇನಾ ಸಮವಸ್ತ್ರ, ನಾಮಫಲಕ, ನಕಲಿ ಸೇನಾ ಗುರುತಿನ ಚೀಟಿ ಮತ್ತು ನಕಲಿ ಸೇರ್ಪಡೆ ಪತ್ರವನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸೇನಾ ಸಂಕೀರ್ಣಕ್ಕೆ ಅವರ ಭೇಟಿಯ ಹಿಂದಿನ ಉದ್ದೇಶವನ್ನು ಪೊಲೀಸರು ಮತ್ತು ಗುಪ್ತಚರ ಸಂಸ್ಥೆಗಳು ತನಿಖೆ ನಡೆಸುತ್ತಿವೆ.ರೂರ್ಕಿ ಮಿಲಿಟರಿ ಕಂಟೋನ್ಮೆಂಟ್‌ ಸಂಕೀರ್ಣದಲ್ಲಿ ಆರೋಪಿಗಳ ಚಟುವಟಿಕೆಗಳು ಅನುಮಾನಾಸ್ಪದವಾಗಿ ಕಂಡುಬಂದ ನಂತರ, ಸೇನಾ ಗುಪ್ತಚರ ಇಲಾಖೆ ರೂರ್ಕಿ ಪೊಲೀಸರಿಗೆ ಮಾಹಿತಿ ನೀಡಿದೆ ಎಂದು ಹರಿದ್ವಾರ ಹಿರಿಯ ಪೊಲೀಸ್‌ ವರಿಷ್ಠಾಧಿಕಾರಿ (ಎಸ್‌‍ಎಸ್‌‍ಪಿ) ಪ್ರಮೋದ್‌ ದೋಭಾಲ್‌ ತಿಳಿಸಿದ್ದಾರೆ.
ಸೇನಾ ಗುಪ್ತಚರ, ರೂರ್ಕಿ ಪೊಲೀಸರು, ರೂರ್ಕಿ ಕ್ರಿಮಿನಲ್‌ ಗುಪ್ತಚರ ಘಟಕ ಮತ್ತು ರೂರ್ಕಿ ಸ್ಥಳೀಯ ಗುಪ್ತಚರ ಘಟಕದ ಜಂಟಿ ತಂಡವು ಸೇನಾ ಕಂಟೋನ್ಮೆಂಟ್‌ನ ಎಂಇಎಸ್‌ ಗೇಟ್‌ ಬಳಿ ಅವರನ್ನು ಬಂಧಿಸಿದೆ ಎಂದು ಅವರು ಹೇಳಿದರು.ಆತನನ್ನು ರಾಜಸ್ಥಾನದ ಜುನ್ಜುನು ಜಿಲ್ಲೆಯ ನವಲ್‌ಗಢ ಪೊಲೀಸ್‌ ಠಾಣೆ ವ್ಯಾಪ್ತಿಯ ಕೊಲ್ಸಿಯಾ ಗ್ರಾಮದ ನಿವಾಸಿ ಸುರೇಂದ್ರ ಕುಮಾರ್‌ ಎಂದು ಗುರುತಿಸಲಾಗಿದೆ.