ವಿಜಯಪುರ,ನ.4- ವಿಜಯಪುರ ಜಿಲ್ಲೆಯಲ್ಲಿ ಇಂದು ರಿಕ್ಟರ್‌ ಮಾಪಕದಲ್ಲಿ 2.9 ತೀವ್ರತೆಯ ಲಘು ಭೂಕಂಪ ದಾಖಲಾಗಿದೆ ಎಂದು ಕರ್ನಾಟಕ ರಾಜ್ಯ ನೈಸರ್ಗಿಕ ವಿಕೋಪ ಮೇಲ್ವಿಚಾರಣಾ ಕೇಂದ್ರ (ಕೆಎಸ್‌‍ಎನ್‌ಡಿಎಂಸಿ) ತಿಳಿಸಿದೆ.
ವಿಜಯಪುರ ತಾಲ್ಲೂಕಿನ ಭೂಟ್ನಾಳ ತಾಂಡಾದಿಂದ ವಾಯುವ್‌ಯಕ್ಕೆ ಸುಮಾರು 3.6 ಕಿಲೋಮೀಟರ್‌ ದೂರದಲ್ಲಿ ಭೂಕಂಪದ ಕೇಂದ್ರಬಿಂದುವಿದ್ದು, ಬೆಳಿಗ್ಗೆ 7.49 ಕ್ಕೆ ಭೂಕಂಪ ಸಂಭವಿಸಿದೆ.
ಭೂಕಂಪನವು ಅಲ್ಪ ಪ್ರಮಾಣದಲ್ಲಿದ್ದು ಯಾವುದೇ ಹಾನಿಯಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.ಕೇಂದ್ರದ ವಿಶ್ಲೇಷಣೆಯ ಪ್ರಕಾರ, ಭೂಕಂಪದ ಕೇಂದ್ರಬಿಂದುವು ಇಂಗನಾಲ್‌ ಗ್ರಾಮದಿಂದ ಪಶ್ಚಿಮ-ನೈಋತ್ಯಕ್ಕೆ 4.3 ಕಿ.ಮೀ, ಹಂಚಿನಾಲ್‌ ಗ್ರಾಮದಿಂದ ಈಶಾನ್ಯಕ್ಕೆ 4.6 ಕಿ.ಮೀ, ವಿಜಯಪುರ ನಗರದಿಂದ ಈಶಾನ್ಯಕ್ಕೆ 9.3 ಕಿ.ಮೀ ಮತ್ತು ಆಲಮಟ್ಟಿ ಅಣೆಕಟ್ಟು ಭೂಕಂಪ ವೀಕ್ಷಣಾಲಯದಿಂದ ಸುಮಾರು 65 ಕಿ.ಮೀ ಉತ್ತರದಲ್ಲಿದೆ.ಭೂಮಿಯಿಂದ 5 ಕಿ.ಕಿಮಿ ಕಳೆಗೆ ಕಂಪನವಾಗಿದೆ.
ತೀವ್ರತೆ ಕಡಿಮೆಯಾಗಿದ್ದು, ಭೂಕಂಪದ ಕೇಂದ್ರಬಿಂದುದಿಂದ 50-60 ಕಿ.ಮೀ ರೇಡಿಯಲ್‌ ದೂರದವರೆಗೆ ಅನುಭವಿಸಬಹುದು ಎಂದು ಕೆಎಸ್‌‍ಎನ್‌ಡಿಎಂಸಿ ಸ್ಪಷ್ಟಪಡಿಸಿದೆ.
ಅಂತಹ ಭೂಕಂಪವು ಸ್ಥಳೀಯ ಸಮುದಾಯಕ್ಕೆ ಯಾವುದೇ ಹಾನಿ ಉಂಟುಮಾಡುವುದಿಲ್ಲ ಏಕೆಂದರೆ ಗಮನಿಸಿದ ತೀವ್ರತೆ ಕಡಿಮೆಯಾಗಿದೆ, ಆದರೂ ಸ್ಥಳೀಯ ಕಂಪನಗಳು ಅನುಭವಿಸಬಹುದು ಎಂದು ಅದು ಹೇಳಿದೆ.
ಜನರು ಮನೆಯಿಂದ ಹೊರಗೆ ಬಂದು ಆತಂಕ ವ್ಯಕ್ತಪಡಿಸಿದ ಘಟನೆಯೂ ನಡೆದಿದೆ.
ತಿಕೋಟ, ಕಳ್ಳಕವಟಗಿ, ತೊರವಿ, ಶಿವಗಿರಿ, ಹೊನ್ನೂಟಗಿ ಸೇರಿದಂತೆ ವಿಜಯಪುರ, ತಿಕೋಟ ತಾಲೂಕುಗಳಲ್ಲಿ ಭೂಕಂಪನದ ಅನುಭವ ಆಗಿದೆ. ಜಿಲ್ಲೆಯಲ್ಲಿ ಕಳೆದ 2 ತಿಂಗಳಲ್ಲಿ 13 ಬಾರಿ ಭೂಮಿ ಕಂಪಿಸಿದ ಅನುಭವ ಆಗಿದೆ ಸರಣಿ ಭೂಕಂಪನದಿಂದ ಜನರು ಭೀತಿಗೊಂಡಿದ್ದಾರೆ.