ನವದೆಹಲಿ,ಡಿ.13– ಭಾರತದ ಮೂವರು ಮಹಿಳೆಯರು ವಿಶ್ವದ ಅತ್ಯಂತ ಶಕ್ತಿಶಾಲಿ ಮಹಿಳೆಯರ ಸಾಲಿನಲ್ಲಿ ಸ್ಥಾನ ಪಡೆದಿದ್ದಾರೆ. ಫೋರ್ಬ್ಸ್‌ 2024 ರ ವಿಶ್ವದ 100 ಅತ್ಯಂತ ಶಕ್ತಿಶಾಲಿ ಮಹಿಳೆಯರ ಪಟ್ಟಿಯಲ್ಲಿ ಮೂವರು ಭಾರತೀಯರಾದ ನಿರ್ಮಲಾ ಸೀತಾರಾಮನ್‌, ರೋಶ್ನಿ ನಾಡರ್‌ ಮಲ್ಹೋತ್ರಾ ಮತ್ತು ಕಿರಣ್‌ ಮಜುಂದಾರ್‌-ಶಾ ಕಾಣಿಸಿಕೊಂಡಿದ್ದಾರೆ.
ಫೋರ್ಬ್ಸ್‌ ತನ್ನ ವಿಶ್ವದ 100 ಅತ್ಯಂತ ಶಕ್ತಿಶಾಲಿ ಮಹಿಳೆಯರ 21 ನೇ ವಾರ್ಷಿಕ ಪಟ್ಟಿಯನ್ನು ಅನಾವರಣಗೊಳಿಸಿದೆ, ವ್ಯಾಪಾರ, ಮನರಂಜನೆ, ರಾಜಕೀಯ, ಲೋಕೋಪಕಾರ ಮತ್ತು ನೀತಿ ನಿರೂಪಣೆಯಂತಹ ಉದ್ಯಮಗಳ ಪ್ರಭಾವಿ ವ್ಯಕ್ತಿಗಳ ಶ್ರೇಯಾಂಕ. ಈ ಜಾಗತಿಕ ಬದಲಾವಣೆ ಮಾಡುವವರಲ್ಲಿ ಮೂವರು ಭಾರತೀಯ ಮಹಿಳೆಯರು ತಮ ಕ್ಷೇತ್ರಗಳಲ್ಲಿ ಗಮನಾರ್ಹ ಪ್ರಗತಿಯನ್ನು ಸಾಧಿಸಿದ್ದಾರೆ.
ಈ ಪಟ್ಟಿಯಲ್ಲಿ ದೇಶದ ಹಣಕಾಸು ಮತ್ತು ಕಾರ್ಪೊರೇಟ್‌ ವ್ಯವಹಾರಗಳ ಸಚಿವೆ ನಿರ್ಮಲಾ ಸೀತಾರಾಮನ್‌ 28 ನೇ ಸ್ಥಾನದಲ್ಲಿದ್ದಾರೆ. ಮೇ 2019 ರಲ್ಲಿ ಸೀತಾರಾಮನ್‌ ಪೂರ್ಣ ಸಮಯ ಈ ಪಾತ್ರಗಳನ್ನು ನಿರ್ವಹಿಸಿದ ಮೊದಲ ಮಹಿಳೆಯಾಗಿದ್ದಾರೆ.
ಪಟ್ಟಿಯಲ್ಲಿ 81 ನೇ ಸ್ಥಾನದಲ್ಲಿರುವ ರೋಶ್ನಿ ನಾಡರ್‌ ಮಲ್ಹೋತ್ರಾ ಅವರು ಭಾರತದ ಪ್ರಮುಖ ಐಟಿ ಸೇವಾ ಸಂಸ್ಥೆಗಳಲ್ಲಿ ಒಂದಾದ ಎಚ್‌ಸಿಎಲ್‌ ಟೆಕ್ನಾಲಜೀಸ್‌‍ನ ಅಧ್ಯಕ್ಷರಾಗಿದ್ದಾರೆ ಮತ್ತು ಎಚ್‌ಸಿಎಲ್‌ ಕಾರ್ಪೊರೇಶನ್‌ನ ಸಿಇಒ ಆಗಿದ್ದಾರೆ. 1976 ರಲ್ಲಿ ತನ್ನ ತಂದೆ ಶಿವ ನಾಡಾರ್‌ ಸ್ಥಾಪಿಸಿದ 12 ಬಿಲಿಯನ್‌ ಉದ್ಯಮದ ಕಾರ್ಯತಂತ್ರದ ನಿರ್ಧಾರಗಳನ್ನು ಆಕೆ ನೋಡಿಕೊಳ್ಳುತ್ತಿದ್ದಾರೆ.
ಇನ್ನು ಬಯೋಕಾನ್‌ ಸಂಸ್ಥೆಯ ಮುಖ್ಯಸ್ಥರಾಗಿರುವ ಕಿರಣ್‌ ಮಜುಂದಾರ್‌ ಶಾ ಅವರು ವಿಶ್ವದ ಅತ್ಯಂತ ಪ್ರಭಾವಶಾಲಿ ಮಹಿಳೆಯರ ಸಾಲಿನಲ್ಲಿ 82 ನೇ ಸ್ಥಾನ ಪಡೆದುಕೊಂಡಿದ್ದಾರೆ.