ಲಕ್ನೋ, ನ. 29- ಕೆಮ್ಮಿನ ಸಿರಪ್‌ ಕಳ್ಳಸಾಗಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಉತ್ತರ ಪ್ರದೇಶ ಸರ್ಕಾರದ ಆಹಾರ ಮತ್ತು ಔಷಧ ಇಲಾಖೆ 12 ಫಾರ್ಮಾ ಕಂಪನಿಗಳ ವಿರುದ್ಧ ಪ್ರಕರಣ ದಾಖಲಿಸಿದೆ.
ಕಳೆದ ನವೆಂಬರ್‌ 15ರಂದು ಕಾರ್ಯಾಚರಣೆ ವೇಳೆ 26 ಕಂಪನಿಗಳ ವಿರುದ್ಧ ಪ್ರಕರಣ ದಾಖಲಿಸಲಾಗಿತ್ತು. ಅದರ ಭಾಗವಾಗಿ ಕಾರ್ಯಾಚರಣೆ ಮುಂದುವರಿಸಿದಾಗ 12 ಅನುಮಾನಾಸ್ಪದ ಕಂಪನಿಗಳು ಕಂಡುಬಂದಿದ್ದವು ಎಂದು ಇಲಾಖೆಯ ಇನ್‌್ಸಪೆಕ್ಟರ್‌ ಜನಬ್‌ ಅಲಿ ಹೇಳಿದ್ದಾರೆ.
ಈ 12 ಕಂಪನಿಗಳ ಕುರಿತು ತನಿಖೆ ಮಾಡಲು ತಂಡ ಹೋದಾಗ, ಕೆಲವು ಮುಚ್ಚಿರುವುದು, ಇನ್ನೂ ಕೆಲ ಕಂಪನಿಗಳ ವಿಳಾಸದಲ್ಲಿ ಬೇರೆ ಮಳಿಗೆಗಳಿರುವುದು ಕಂಡುಬಂದಿವೆ.
ಹೀಗಾಗಿ ಈ ಔಷಧ ಕಂಪನಿಗಳ ನಿರ್ವಾಹಕರಿಗೆ ಸ್ಪಷ್ಟೀಕರಣ ಕೋರಿ ನೋಟಿಸ್‌ ನೀಡಲಾಗಿತ್ತು ಎಂದು ಅಲಿ ತಿಳಿಸಿದ್ದಾರೆ. ಈ ಕಂಪನಿಗಳ ಮಾಲೀಕರು ತಮ್ಮ ಪ್ರತಿಕ್ರಿಯೆ ಸಲ್ಲಿಸದ ಹಿನ್ನೆಲೆ ಕೊತ್ವಾಲಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.