ಬೆಂಗಳೂರು, ನ.29- ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿಯವರು ಉಪಾಹಾರ ತೆಗೆದುಕೊಳ್ಳುತ್ತಾರೆ. ನಮಗೆ ಉಪಾಹಾರವೂ ಇಲ್ಲ, ಏನೂ ಇಲ್ಲ ಎಂದು ಗೃಹ ಸಚಿವ ಡಾ.ಜಿ.ಪರಮೇಶ್ವರ್‌ ಮಾರ್ಮಿಕವಾಗಿ ಹೇಳಿದ್ದಾರೆ.ಅಧಿಕಾರ ಹಂಚಿಕೆಯ ಬಗ್ಗೆ ಉಂಟಾಗಿದ್ದ ಗೊಂದಲಗಳನ್ನು ಬಗೆ ಹರಿಸಿಕೊಳ್ಳಲು ಮುಖ್ಯಮಂತ್ರಿ ಸಿದ್ದರಾಮಯ್ಯ, ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌ ಉಪಾಹಾರ ಕೂಟ ನಡೆಸಿದ ಬಗ್ಗೆ ಸುದ್ದಿಗಾರರು ಪ್ರತಿಕ್ರಿಯೆ ಕೇಳಿದಾಗ ಸಚಿವ ಪರಮೇಶ್ವರ್‌, ಅವರಿಬ್ಬರು ಬ್ರೇಕ್‌ಫಾಸ್ಟ್‌ ತೆಗೆದುಕೊಳ್ಳುತ್ತಾರೆ. ನೀವು ಏನೂ ಹೇಳುತ್ತೀರಾ? ಎಂದು ನಮನ್ನು ಕೇಳಿದರೆ, ನಮಗೆ ಬ್ರೇಕ್‌ಫಾಸ್ಟ್‌ ಇಲ್ಲ, ಏನೂ ಇಲ್ಲ. ಅವರು ನಮನ್ನು ಕರೆದಿಲ್ಲ ಎಂದರು.
ಪರಸ್ಪರ ಉಪಾಹಾರ ಮಾಡುವುದಕ್ಕೆ ಯಾವುದೇ ಮಹತ್ವ ಇಲ್ಲ. ಪ್ರತಿನಿತ್ಯ ಒಟ್ಟಾಗಿಯೇ ಇಬ್ಬರೂ ಕಾರ್ಯಕ್ರಮಗಳಲ್ಲಿ ಭಾಗವಹಿಸುತ್ತಿದ್ದಾರೆ. ಎಲ್ಲರೂ ಒಟ್ಟಿಗೆ ಇದ್ದೇವೆ ಎಂದರು. ಉಪಾಹಾರ ಕೂಟದಲ್ಲಿ ಖಾತೆ ಹಂಚಿಕೆ ಬಗ್ಗೆ ಚರ್ಚೆಯಾಗಲಿದೆ ಎಂಬುದು ಅನಗತ್ಯವಾದ ವದಂತಿ. ಅಂತಹ ಯಾವ ಬೆಳವಣಿಗೆಗಳೂ ನಮಗೆ ಕಾಣಿಸುತ್ತಿಲ್ಲ ಎಂದರು.
ಗೊಂದಲಗಳು ಇರಬಾರದು ಎಂಬುದು ಎಲ್ಲರ ಇಚ್ಛೆ. ಹೈಕಮಾಂಡ್‌ ಕೂಡ ಈ ಕಾರಣಕ್ಕಾಗಿಯೇ ಇಬ್ಬರಿಗೂ ಸೂಚನೆ ನೀಡಿದೆ. ಒಂದು ವೇಳೆ ಗೊಂದಲಗಳಿದ್ದರೆ ಉಪಾಹಾರ ಕೂಟದಲ್ಲಿ ಬಗೆ ಹರಿಸಿಕೊಳ್ಳುತ್ತಾರೆ ಎಂದರು.ನಾವು ಪದೇ ಪದೇ ಊಟ, ತಿಂಡಿಗೆ ಸಭೆ ಸೇರುತ್ತಿರುತ್ತೇವೆ ಎಂದು ಪ್ರಶ್ನೆಯೊಂದಕ್ಕೆ ಪ್ರತಿಕ್ರಿಯಿಸಿದರು.
ಎಲ್ಲದಕ್ಕೂ ತೆರೆಬೀಳುವುದು ಬಹಳ ಒಳ್ಳೆಯ ಬೆಳವಣಿಗೆ. ದೆಹಲಿಗೆ ಹೋಗುವುದಾಗಿ ನಾವ್ಯಾರು ಹೇಳಲಿಲ್ಲ. ಹೋಗುವ ಅವಶ್ಯಕತೆ ಬಂದರೆ ಹೋಗುತ್ತೇವೆ ಎಂದರು.ಅಧಿಕಾರ ಹಂಚಿಕೆಯ ಕಿತ್ತಾಟದಲ್ಲಿ ಪರಮೇಶ್ವರ್‌ ಅವರಿಗೆ ಅದೃಷ್ಟ ಒಲಿಯಲಿವೆ ಎಂಬ ವದಂತಿಗಳಿದ್ದವು. ಆದರೆ ಪರಮೇಶ್ವರ್‌ ಹೇಳಿಕೆ ಎಲ್ಲವೂ ಅವರಿಬ್ಬರ ನಡುವೆಯೇ ನಡೆಯುತ್ತಿದೆ. ನಾವು ಲೆಕ್ಕಕ್ಕಿಲ್ಲ ಎಂಬ ಅಸಹನೆಯನ್ನು ವ್ಯಕ್ತಪಡಿಸಿದಂತೆ ಕಂಡು ಬರುತ್ತಿದೆ.