ಬೆಂಗಳೂರು,ಅ.6- ನಿವೃತ್ತ ಶಾಲಾ ಶಿಕ್ಷಕಿಯೊಬ್ಬರು ವೈವಾಹಿಕ ವೆಬ್‌ಸೈಟ್‌ನಲ್ಲಿ ಪರಿಚಿತನಾದ ವ್ಯಕ್ತಿಯಿಂದ 2.3 ಕೋಟಿ ವಂಚನೆಗೊಳಗಾಗಿರುವ ಘಟನೆ ನಡೆದಿದೆ. ಸುಮಾರು 59 ವರ್ಷದ ನಿವೃತ್ತ ಶಾಲಾ ಶಿಕ್ಷಕಿಯೊಬ್ಬರು ಆನ್‌ಲೈನ್‌ ವಂಚನೆಗೆ ಒಳಗಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಹಲವು ವರ್ಷಗಳ ಹಿಂದೆ ಪತಿಯನ್ನು ಕಳೆದುಕೊಂಡು ಒಂಟಿಯಾಗಿ ವಾಸಿಸುತ್ತಿದ್ದ ಈ ಮಹಿಳೆ, 2019 ರಲ್ಲಿ ವೈವಾಹಿಕ ವೆಬ್‌ಸೈಟ್‌ನಲ್ಲಿ ಒಡನಾಟ ಪಡೆಯುವ ನಿಟ್ಟಿನಲ್ಲಿ ನೋಂದಾಯಿಸಿಕೊಂಡರು.
ಕಳೆದ 2019 ಡಿಸೆಂಬರ್‌ನಲ್ಲಿ ಆಹಾನ್‌ ಕುಮಾರ್‌ಎಂಬ ಹೆಸರಿನ ವ್ಯಕ್ತಿಯೊಬ್ಬರು ಆಕೆಯನ್ನುಸಂಪರ್ಕಿಸಿದ್ದ. ನಾನು ಅಟ್ಲಾಂಟಾದಲ್ಲಿ ವಾಸವಿದ್ದು,ಇಸ್ರೇಲಿ ತೈಲ ಕಂಪನಿಯೊಂದರಲ್ಲಿ ಡ್ರಿಲ್ಲಿಂಗ್‌ ಎಂಜಿನಿಯರ್‌ ಆಗಿ ಕೆಲಸ ಮಾಡುತ್ತಿದ್ದು,ಭಾರತೀಯ ಮೂಲದ ಅಮೆರಿಕ ಪ್ರಜೆ ಎಂದು ಹೇಳಿಕೊಂಡು, ಕಪ್ಪು ಸಮುದ್ರದಲ್ಲಿ ನೆಲೆಸಿರುವುದಾಗಿ ತಿಳಿಸಿ ಫೋಟೋ ಇಲ್ಲದ ಗುರುತಿನ ಚೀಟಿಯನ್ನು ಹಂಚಿಕೊಂಡಿದ್ದ. ಕಾಲಾನಂತರದಲ್ಲಿ, ಅವರ ವರ್ಚುವಲ್‌ ಸ್ನೇಹವು ನಿಜವಾದ ಭಾವನಾತ್ಮಕ ಬಂಧವೆಂದು ಮದುವೆಯಾಗುವುದಾಗಿ ಆತ ನಂಬಿಸಿದ್ದಾನೆ. ಆಗಾಗ್ಗೆ ಅವಳನ್ನು ತನ್ನ ಹೆಂಡತಿ ಎಂದು ಕರೆಯುತ್ತಿದ್ದನು ಎಂದು ದೂರಿನಲ್ಲಿ ಮಹಿಳೆ ತಿಳಿಸಿದ್ದಾರೆ.
ನಿಯಮಿತ ಸಂಭಾಷಣೆಗಳು ಅಮೆರಿಕದ ಸಂಖ್ಯೆಯಿಂದ ವಾಟ್ಸಾಪ್‌ ಕರೆಗಳ ಮೂಲಕ ನಡೆಯುತ್ತಿದ್ದವು ಮತ್ತು ತನ್ನ ಯೋಜನೆಯನ್ನು ಮುಗಿಸಿದ ನಂತರ ಶೀಘ್ರದಲ್ಲೇ ಭಾರತಕ್ಕೆ ಹಿಂತಿರುಗುವುದಾಗಿ ಪದೇ ಪದೇ ಹೇಳಿಕೊಂಡನು.
2020 ರ ಆರಂಭದಲ್ಲಿ, ಆಹಾನ್‌ಕುಮಾರ್‌ ತನ್ನ ಒಪ್ಪಂದದ ಪಾವತಿಗಾಗಿ ಕಾಯುತ್ತಿದ್ದು ಸಂಕಷ್ಟದಲ್ಲಿರುವುದಾಗಿ ಹೇಳಿದ್ದ. ನಂತರ ಆರ್ಥಿಕ ಸಹಾಯವನ್ನು ಕೋರಿದಾಗ ಅವನ ಕಥೆಯನ್ನು ನಂಬಿದ ಮಹಿಳೆ ಮೊದಲು ಮಾಧವಿ ಎಂಬ ಹೆಸರಿನ ಖಾತೆಗೆ ಹಣವನ್ನು ವರ್ಗಾಯಿಸಲಾಗಿತ್ತು ಕಳೆದ ನಾಲ್ಕು ವರ್ಷಗಳಲ್ಲಿ ವೈದ್ಯಕೀಯ ಸಮಸ್ಯೆಗಳು ಮತ್ತು ಕೆಲಸದ ವೇಳೆ ದಂಡದಂತಹ ನೆಪ ಹೇಳಿ ಹಣ ಪಡೆದಿದ್ದಾನೆ .
ನವೆಂಬರ್‌ 2024 ರ ಹೊತ್ತಿಗೆ, ಮಹಿಳೆ ತನ್ನ ಉಳಿತಾಯದ ಹಣ ಖಾಲಿ ಮಾಡಿ ಅವನಿಗೆ ಸಹಾಯ ಮಾಡುವುದನ್ನು ಮುಂದುವರಿಸಲು ಇತರರಿಂದ ಹಣವನ್ನು ಸಾಲ ಪಡೆದಿದ್ದರು .
ನಂತರ ಮಹಿಳೆ ಇನ್ನು ಹೆಚ್ಚಿನ ಹಣವನ್ನು ಪಾವತಿಸಲು ನಿರಾಕರಿಸಿದಾಗ, ಆಹಾನ್‌ ಸಂಪರ್ಕವನ್ನು ಕಡಿತಗೊಳಿಸಲು ಪ್ರಾರಂಭಿಸಿದ್ದಾನೆ. ಇದರಿಂದ ತಾನು ಮೋಸ ಹೋಗಿರುವುದು ಅರಿತು ಕೊನೆಗೆ ಮಹಿಳೆ ಪೊಲೀಸರನ್ನು ಸಂಪರ್ಕಿಸಿ ದೂರು ನೀಡಿದ್ದಾರೆ. ಪೂರ್ವ ವಿಭಾಗ ಸಿಇಎನ್‌ ಪೊಲೀಸರು ಪ್ರಕರಣ ದಾಖಲಿಸಿ ಮುಂದಿನ ತನಿಖೆ ಕೈಗೊಂಡಿದ್ದಾರೆ.