ಮುಂಬೈ, ಜು. 10- ಊಟ ಸರಿ ಇಲ್ಲ ಎಂದು ಶಾಸಕರ ಕ್ಯಾಂಟೀನ್‌ ಗುತ್ತಿಗೆದಾರನಿಗೆ ಥಳಿಸಿದ್ದ ಶಿವಸೇನೆ ಶಾಸಕ ಸಂಜಯ್‌ ಗಾಯಕ್ವಾಡ್ ಇಂದು ದಕ್ಷಿಣ ಭಾರತೀಯರು ಬರೀ ಡ್ಯಾನ್ಸ್ ಬಾರ್‌ ಮತ್ತು ಲೇಡೀಸ್‌ ಬಾರ್‌ಗಳನ್ನು ನಡೆಸಲು ಮಾತ್ರ ಯೋಗ್ಯರು ಅವರಿಗೆ ಮಹಾರಾಷ್ಟ್ರದಲ್ಲಿ ಆಹಾರ ಪೂರೈಕೆ ಒಪ್ಪಂದಗಳನ್ನು ನೀಡಬಾರದು ಎನ್ನುವ ಮೂಲಕ ಹೊಸ ವಿವಾದ ಮೈಮೇಲೆ ಎಳೆದುಕೊಂಡಿದ್ದಾರೆ.
ಶೆಟ್ಟಿ ಎಂಬ ಗುತ್ತಿಗೆದಾರನಿಗೆ ಗುತ್ತಿಗೆಯನ್ನು ಏಕೆ ನೀಡಲಾಯಿತು? ಅದನ್ನು ಮರಾಠಿ ವ್ಯಕ್ತಿಗೆ ನೀಡಿ. ನಾವು ಏನು ತಿನ್ನುತ್ತೇವೆ ಎಂದು ಅವರಿಗೆ ತಿಳಿದಿದೆ ಮತ್ತು ನಮಗೆ ಉತ್ತಮ ಗುಣಮಟ್ಟದ ಆಹಾರವನ್ನು ನೀಡುತ್ತಾರೆ.
ದಕ್ಷಿಣ ಭಾರತೀಯರು ಡ್ಯಾನ್‌್ಸ ಬಾರ್‌, ಲೇಡೀಸ್‌ ಬಾರ್‌ಗಳನ್ನು ನಡೆಸುತ್ತಾರೆ ಮತ್ತು ಮಹಾರಾಷ್ಟ್ರದ ಸಂಸ್ಕೃತಿಯನ್ನು ಹಾಳು ಮಾಡುತ್ತಾರೆ. ಅವರು ನಮ್ಮ ಮಕ್ಕಳನ್ನು ಭ್ರಷ್ಟಗೊಳಿಸಿದ್ದಾರೆ. ಅವರು ಉತ್ತಮ ಆಹಾರವನ್ನು ಹೇಗೆ ನೀಡುತ್ತಾರೆ? ಎಂದು ಗಾಯಕ್ವಾಡ್ ಪ್ರಶ್ನಿಸಿದ್ದಾರೆ.
ಶಾಸಕರ ನಿವಾಸದಲ್ಲಿ ಹಳಸಿದ ಆಹಾರವನ್ನು ಬಡಿಸಿದ ಆರೋಪದ ಮೇಲೆ ಕ್ಯಾಂಟೀನ್‌ ಗುತ್ತಿಗೆದಾರನನ್ನು ಹೊಡೆದ ಒಂದು ದಿನದ ನಂತರ ಬುಲ್ದಾನದ ಎರಡು ಅವಧಿಯ ಶಾಸಕರು ಈ ಹೇಳಿಕೆ ನೀಡಿದ್ದಾರೆ.
ನಾನು ಮಾಣಿಗೆ ಹೊಡೆದಿಲ್ಲ. ನಾನು ಮ್ಯಾನೇಜರ್‌ಗೆ ಹೊಡೆದಿದ್ದೇನೆ. ನನ್ನ ವಿಧಾನವು ತಪ್ಪಾಗಿರಬಹುದು ಆದರೆ ಗುರಿ ಸರಿಯಾಗಿತ್ತು. ಯಾರಾದರೂ ಅಂತಹ ಕೃತ್ಯವನ್ನು ಪುನರಾವರ್ತಿಸಿದರೆ ನಾನು ಮತ್ತೆ ಹೊಡೆಯುತ್ತೇನೆ.
ಆಡಳಿತವು ಕೊಡು-ಕೊಳ್ಳುವಿಕೆಯಲ್ಲಿ ತೊಡಗುತ್ತದೆ, ಇದು ಕ್ರಮದಲ್ಲಿ ವಿಳಂಬಕ್ಕೆ ಕಾರಣವಾಗುತ್ತದೆ. ಶೆಟ್ಟಿ ಎಂಬ ಗುತ್ತಿಗೆದಾರನಿಗೆ ಒಪ್ಪಂದವನ್ನು ಏಕೆ ನೀಡಲಾಯಿತು? ಬದಲಿಗೆ ಮರಾಠಿ ವ್ಯಕ್ತಿಗೆ ನೀಡಿ, ಗಾಯಕವಾಡ್‌ ಪುನರುಚ್ಚರಿಸಿದ್ದಾರೆ.
ಅವರ ಹಲ್ಲೆಯ ವೀಡಿಯೊ ವೈರಲ್‌ ಆಗಿ ವ್ಯಾಪಕ ಖಂಡನೆಗೆ ಗುರಿಯಾದ ಕೂಡಲೇ, ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್‌ ಈ ಕೃತ್ಯವನ್ನು ಖಂಡಿಸಿದರು, ಅಂತಹ ನಡವಳಿಕೆಯು ಶಾಸಕರು ತಮ್ಮ ಅಧಿಕಾರವನ್ನು ದುರುಪಯೋಗಪಡಿಸಿಕೊಳ್ಳುತ್ತಾರೆ ಎಂಬ ತಪ್ಪು ಸಂದೇಶವನ್ನು ರವಾನಿಸುತ್ತದೆ ಎಂದು ಹೇಳಿದರು.ಇಂತಹ ನಡವಳಿಕೆ ಯಾರಿಗೂ ಯೋಗ್ಯವಲ್ಲ. ಇದು ರಾಜ್ಯ ವಿಧಾನಸಭೆಯ ವರ್ಚಸ್ಸಿನ ಮೇಲೆ ಪರಿಣಾಮ ಬೀರುತ್ತದೆ ಮತ್ತು ಶಾಸಕರಾಗಿ… ಎಲ್ಲಾ ಶಾಸಕರ ಬಗ್ಗೆ ಜನರಲ್ಲಿ ಅಧಿಕಾರ ದುರುಪಯೋಗವಿದೆ ಎಂಬ ತಪ್ಪು ಸಂದೇಶ ಹೋಗುತ್ತದೆ ಎಂದು ಫಡ್ನವೀಸ್‌ ಹೇಳಿದರು.
ಶಿವಸೇನಾ ಮುಖ್ಯಸ್ಥ ಮತ್ತು ಮಹಾರಾಷ್ಟ್ರ ಉಪಮುಖ್ಯಮಂತ್ರಿ ಏಕನಾಥ್‌ ಶಿಂಧೆ ಕೂಡ ಗಾಯಕ್ವಾಡ್ ಅವರ ಕ್ರಮಗಳಿಂದ ದೂರ ಉಳಿದಿದ್ದಾರೆ. ಸಂಜಯ್‌ ಗಾಯಕ್ವಾಡ್ ಅವರ ಕ್ರಮಗಳು ಅನುಚಿತ ಎಂದು ನಾನು ಹೇಳಿದ್ದೇನೆ. ನಾನು ಅವರ ಕ್ರಮಗಳನ್ನು ಅನುಮೋದಿಸುವುದಿಲ್ಲ. ಏನಾದರೂ ತಪ್ಪು ನಡೆಯುತ್ತಿದ್ದರೆ, ಕಾನೂನು ಕ್ರಮ ಕೈಗೊಳ್ಳಬಹುದು ಆದರೆ ಜನರನ್ನು ಹೊಡೆಯುವುದು ಅನುಚಿತ ಎಂದು ಶಿಂಧೆ ಹೇಳಿದರು.