ಚಿಕ್ಕಮಗಳೂರು, ನ.29– ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ಸಿಎಂ ಆಗಿ ಅಧಿಕಾರ ಮುಂದುವರೆಸಲಿ ಎಂದು ಆಶಿಸಿ, ಜಿಲ್ಲಾ ಕಾಂಗ್ರೆಸ್‌ ಮುಖಂಡರು ಹಾಗೂ ಅಭಿಮಾನಿ ಬಳಗದವರು ನಗರದ ತಾಲ್ಲೂಕು ಕಚೇರಿ ಸಮೀಪದ ಗಣಪತಿ ದೇವಾಲಯದಲ್ಲಿ ವಿಶೇಷ ಪೂಜೆ ಸಲ್ಲಿಸಿ, ಪ್ರಾರ್ಥಿಸಿದರು.
ದೇವಾಲಯದಲ್ಲಿ ಮುಖಂಡರುಗಳು ಜಸ್ಟೀಸ್‌ ಫಾರ್‌ ಸಿದ್ದರಾಮಯ್ಯ ಎಂಬ ಭಾವಚಿತ್ರ ಹಿಡಿದು ಕೊಂಡು, ಸಿದ್ದರಾಮಯ್ಯ ಅವರಿಗೆ ಅಧಿಕಾರ ಉಳಿಯಲಿ ಎಂದು ಘೋಷಣೆ ಕೂಗಿದರು. ಪ್ರಾರ್ಥನೆ ಬಳಿಕ ದೇವಸ್ಥಾನ ಮುಂಭಾಗದಲ್ಲಿ ತೆಂಗಿನಕಾಯಿ ಒಡೆದು ಸಿಎಂ ಸ್ಥಾನ ಬದಲಿಸದಂತೆ ಆಗ್ರಹಿಸಿದರು.
ಬಳಿಕ ಮಾತನಾಡಿದ ಗ್ಯಾರಂಟಿ ಸದಸ್ಯ ಕೆಂಪನಹಳ್ಳಿ ಪುನೀತ್‌ ರಾಜ್ಯದ ಮುಖ್ಯಮಂತ್ರಿಗಳು ಕಳೆದ ನಾಲ್ಕು ದಶಕಗಳಿಂದ ಒಂದು ಕಪ್ಪುಚುಕ್ಕೆಯಿಂದ, ಭ್ರಷ್ಟರಹಿತ ಆಡಳಿತ ನಡೆಸಿದವರು. ಅಹಿಂದ, ಶೋಷಿತರ ವರ್ಗದ ಆಸರೆಯಾಗಿ ಸರ್ವರಿಗೂ ಸಮಬಾಳು ಎಂಬ ಧ್ಯೇಯದಡಿ ಆಡಳಿತ ನಡೆಸಿದ ದೇಶದ ಅಪರೂಪದ ವ್ಯಕ್ತಿ ಎಂದು ಹೇಳಿದರು.
ಜಿಲ್ಲೆಯಲ್ಲಿ ಐದು ಕ್ಷೇತ್ರಗಳು ಕಾಂಗ್ರೆಸ್‌ ಗೆಲುವು ಸಾಧಿಸಲು ಸಿದ್ದರಾಮಯ್ಯನವರ ಅಹಿಂದ ನಿಲುವುಗಳೇ ಕಾರಣ. ಅದರಲ್ಲೂ ಕೆಲವು ಶಾಸಕರು ಮೊಟ್ಟಮೊದಲು ವಿಧಾನಸಭೆ ಮೆಟ್ಟಿಲೇರಿದ್ದೀರಿ. ಹೀಗಾಗಿ ಸಿದ್ದು ವಿರುದ್ಧವಾಗಿ ಯಾವುದೇ ತಂತ್ರ ನಡೆಸದೇ ಸಂಪೂರ್ಣವಾಗಿ ಬೆಂಬಲ ಸೂಚಿಸಬೇಕು ಎಂದು ಆಗ್ರಹಿಸಿದರು.
ಕುರುಬ ಸಮಾಜದ ನಿರ್ದೇಶಕ ಎನ್‌.ಡಿ.ಚಂದ್ರಪ್ಪ ಮಾತನಾಡಿ, ರಾಜ್ಯದಲ್ಲಿ ಎರಡು ಭಾರಿ ಮುಖ್ಯಮಂತ್ರಿಯಾಗಿ ಕಾರ್ಯನಿರ್ವಹಿಸಿದ ಸಿದ್ದರಾಮಯ್ಯ ಅವರನ್ನು ರಾಷ್ಟ್ರ ನಾಯಕರು ಸಂದಿಗ್ದ ಪರಿಸ್ಥಿತಿ ಉಂಟು ಮಾಡದೇ, ಸಿಎಂ ಸ್ಥಾನ ಮುಂದುವರೆಸಲು ಅನುಮತಿಸಬೇಕು ಎಂದು ಒತ್ತಾಯಿಸಿದರು.
ಮುಂದೆ ಚುನಾವಣಾ ಸಮಯವಾದ ಕಾರಣ ಅಹಿಂದ ನಾಯಕನನ್ನು ಕಳೆದುಕೊಂಡರೆ, ಅಹಿಂದ ಬಂಧುಗಳು ಛಿದ್ರವಾಗುವ ಜೊತೆಗೆ ಪಕ್ಷಕ್ಕೆ ದೊಡ್ಡ ಘಾಸಿಯಾಗಲಿದೆ. ಈಗಾಗಲೇ ರಾಷ್ಟ್ರದಲ್ಲಿ ಕೇವಲ ಮೂರೇ ರಾಜ್ಯದಲ್ಲಿ ಕಾಂಗ್ರೆಸ್‌ ಅಧಿಕಾರದಲ್ಲಿದ್ದು. ಕರ್ನಾಟಕದಲ್ಲಿ ಮಾತ್ರ ಹಿಂದುಳಿದ ವರ್ಗದ ಮುಖ್ಯ ಮಂತ್ರಿಯಾಗಿ ಸಿದ್ದರಾಮಯ್ಯ ಅಧಿಕಾರದಲ್ಲಿದ್ದಾರೆ. ಅವರನ್ನು ಮುಂದುವರೆಸಬೇಕು ಎಂದರು.
ಈ ಸಂದರ್ಭದಲ್ಲಿ ಕರ್ತಿಕೆರೆ ಗ್ರಾ.ಪಂ. ಸದಸ್ಯ ಸಿದ್ದರಾಮೇಗೌಡ, ಮುಖಂಡರುಗಳಾದ ಅಡವೇ ಮೂರ್ತಿಗೌಡ, ದಂಟರಮಕ್ಕಿ ಶಿವಣ್ಣ, ಕೆಂಪನಹಳ್ಳಿ ಗೋಪಾಲಕೃಷ್ಣ, ಶಿವರಾಮಗೌಡ, ಅನ್ಸರ್‌ ಆಲಿ, ಗುರು ಮೂರ್ತಿ ಹಾಗೂ ಅಹಿಂದ ವರ್ಗದವರು ಹಾಜರಿದ್ದರು.