ನವದೆಹಲಿ,ಜೂ.23-ಇರಾನ್‌ ಮತ್ತು ಇಸ್ರೇಲ್‌ ಮಧ್ಯೆ ನಡೆಯುತ್ತಿದ್ದ ಸಂಘರ್ಷಕ್ಕೆ ಅಮೆರಿಕ ಪ್ರವೇಶಿಸಿದ ಬೆನ್ನಲ್ಲೇ ಜಾಗತಿಕ ಮಾರುಕಟ್ಟೆಯಲ್ಲಿ ತಲ್ಲಣ ಉಂಟಾಗಿದೆ. ಇರಾನ್‌ ಮೇಲೆ ಅಮೆರಿಕ ದಾಳಿ ಮಾಡಿದ ನಂತರ, ಜಾಗತಿಕ ಮಾರುಕಟ್ಟೆಗಳಲ್ಲಿ ಸಾಕಷ್ಟು ಅಚ್ಚರಿಯ ಬೆಳವಣಿಗೆಗಳು ನಡೆದಿದ್ದು, ಅಮೆರಿಕದ ಷೇರು ವಿನಿಮಯ ಕೇಂದ್ರದ ಭವಿಷ್ಯ ಕುಸಿದು ಕಚ್ಚಾತೈಲ ಬೆಲೆಗಳು ತೀವ್ರವಾಗಿ ಏರಿತು. ಆರಂಭಿಕ ವಹಿವಾಟಿನಲ್ಲಿ ಬ್ರೆಂಟ್‌ ಕಚ್ಚಾ ತೈಲ ಬೆಲೆಗಳು ಶೇ.5.7ರಷ್ಟು ಏರಿಕೆಯಾದವು.
ಆದರೆ ನಂತರ ಅದು ತಣ್ಣಗಾಗಿ ಬೆಳಿಗ್ಗೆ ಸುಮಾರು ಶೇ.2.6ರಷ್ಟು ಲಾಭದೊಂದಿಗೆ ವಹಿವಾಟು ಪ್ರಾರಂಭಿಸಿತು. ಈ ಅಸ್ಥಿರತೆಯು ಚಿನ್ನದ ಬೆಲೆಗಳ ಮೇಲೂ ಆತಂಕ ಹೆಚ್ಚಿಸಿದ್ದು, ಇದೇ ಸಮಯದಲ್ಲಿ ಡಾಲರ್‌ ಕೂಡ ಬಲಗೊಂಡಿದೆ.
ಅಮೆರಿಕ ಇರಾನ್‌ ವಿರುದ್ಧ ನೇರ ದಾಳಿ ನಡೆಸಿದ ನಂತರದ ಮೊದಲ ವಹಿವಾಟಿನ ಆರಂಭದಲ್ಲಿ ತೈಲ ಭವಿಷ್ಯವು 2% ಕ್ಕಿಂತ ಹೆಚ್ಚು ಏರಿಕೆಯಾಗಿದ್ದು, ತೈಲ-ಸಮೃದ್ಧ ಮಧ್ಯಪ್ರಾಚ್ಯ ಪ್ರದೇಶದಲ್ಲಿ ಪೂರೈಕೆಯ ಭವಿಷ್ಯದ ಮೇಲೆ ಕರಿನೆರಳು ಬೀರಿದೆ. ಯುಎಸ್‌ ಕಚ್ಚಾ ತೈಲ ಭಾನುವಾರ ಸಂಜೆ ಪ್ರತಿ ಬ್ಯಾರೆಲ್‌ಗೆ 1.76 ಅಥವಾ ಶೇ.2.38 ಏರಿಕೆಯಾಗಿ 75.60ಕ್ಕೆ ತಲುಪಿದೆ. ಆದರೆ ಜಾಗತಿಕ ಮಾನದಂಡ ಬ್ರೆಂಟ್‌ ಬ್ಯಾರೆಲ್‌ಗೆ 1.80 ಅಥವಾ ಶೇ.2.34 ಏರಿಕೆಯಾಗಿ 78.81 ಕ್ಕೆ ತಲುಪಿತ್ತು. ಬ್ರೆಂಟ್‌ ಶೇ.5.7 ಏರಿಕೆಯಾಗಿ 81 ಕ್ಕೆ ತಲುಪಿತ್ತು, ನಂತರ ಸಡಿಲಗೊಳಿಸಿತು.
ಅಮೆರಿಕದ ಷೇರು ಮಾರುಕಟ್ಟೆಯ ಪ್ರಮುಖ ಸೂಚ್ಯಂಕವಾದ ಎಸ್‌‍ಪಿ 500 ರ ಭವಿಷ್ಯವು ಸುಮಾರು ಶೇ.0.3ರಷ್ಟು ಕುಸಿದಿದೆ. ಜಪಾನ್‌ ಮತ್ತು ಆಸ್ಟ್ರೇಲಿಯಾದ ಷೇರು ಮಾರುಕಟ್ಟೆಗಳು ಸಹ ಇಂದು ಶೇ. 1 ರಷ್ಟು ಕುಸಿದವು. ಅಮೆರಿಕ ಮತ್ತು ಇರಾನ್‌ ನಡುವಿನ ಈ ಸಂಘರ್ಷ ಯಾವ ದಿಕ್ಕಿನಲ್ಲಿ ಹೋಗುತ್ತದೆ ಎಂದು ಹೂಡಿಕೆದಾರರಿಗೆ ತಿಳಿದಿಲ್ಲ. ಈ ಗೊಂದಲದ ಸ್ಥಿತಿ ಅವರನ್ನು ಮತ್ತಷ್ಟು ಆತಂಕಕ್ಕೆ ದೂಡಿದೆ.
ಬ್ಲೂಮ್‌ಬರ್ಗ್‌ ವರದಿಯ ಪ್ರಕಾರ, ಎಟಿ ಗ್ಲೋಬಲ್‌ ಮಾರ್ಕೆಟ್‌್ಸನ ಮುಖ್ಯ ವಿಶ್ಲೇಷಕ ನಿಕ್‌ ಟ್ವಿಡೇಲ್‌ ಅವರ ಪ್ರಕಾರ, ಪ್ರಸ್ತುತ ಪರಿಸ್ಥಿತಿಯಲ್ಲಿ ಅಸ್ಥಿರತೆಯು ಪ್ರಮುಖ ಸಮಸ್ಯೆಯಾಗಿದೆ. ದಾಳಿಗಳು ಈಗ ಮುಗಿದಿವೆ ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ ಸೂಚಿಸಿದರೆ, ಷೇರು ಮಾರುಕಟ್ಟೆಯಲ್ಲಿನ ಕುಸಿತ ನಿಂತು ಸ್ಥಿರತೆ ಬರಬಹುದು. ಅಮೆರಿಕ ಅಧ್ಯಕ್ಷರ ಮುಂದಿನ ಹೆಜ್ಜೆ ಮಾರುಕಟ್ಟೆಯ ದಿಕ್ಕನ್ನು ನಿರ್ಧರಿಸುತ್ತದೆ ಎಂದು ಹೇಳಿದರು.
ಪಿಕೇಟ್‌ ಅಸೆಟ್‌ ಮ್ಯಾನೇಜ್‌ಮೆಂಟ್‌ನ ಹಿರಿಯ ಹೂಡಿಕೆ ವ್ಯವಸ್ಥಾಪಕಿ ಎವ್ಜೆನಿಯಾ ಮೊಲೊಟೊವಾ ಹೇಳುವಂತೆ, ಇಲ್ಲಿಯವರೆಗೆ ಹೂಡಿಕೆದಾರರು ಈ ಸಂಘರ್ಷವನ್ನು ಸೀಮಿತವೆಂದು ಪರಿಗಣಿಸುತ್ತಿದ್ದರು. ಆದರೆ ಈಗ ಪರಿಸ್ಥಿತಿ ಪ್ರತಿ ಗಂಟೆಗೂ ಬದಲಾಗುತ್ತಿದೆ.
ಇರಾನ್‌ ಹಾರ್ಮುಜ್‌ ಜಲಸಂಧಿಯನ್ನು ಮುಚ್ಚಿದರೆ, ಪರಿಸ್ಥಿತಿ ಗಂಭೀರವಾಗಬಹುದು. ಏಕೆಂದರೆ ಇದು ತೈಲ ಪೂರೈಕೆಯ ಮೇಲೆ ಕೆಟ್ಟ ಪರಿಣಾಮ ಬೀರುತ್ತದೆ. ಜಾಗತಿಕ ಷೇರು ಮಾರುಕಟ್ಟೆಗಳು ನಿರ್ಣಾಯಕ ತಿರುವಿನಲ್ಲಿ ನಿಂತಿವೆ ಎಂದು ಸ್ಯಾಕ್ಸೋ ಮಾರ್ಕೆಟ್‌್ಸನ ಮುಖ್ಯ ತಂತ್ರಜ್ಞ ಚಾರು ಚನಾನ ಹೇಳುತ್ತಾರೆ. ಈ ಸಂಘರ್ಷ ಮತ್ತಷ್ಟು ಆಳವಾಗುತ್ತಿರುವುದರಿಂದ ದೊಡ್ಡ ಹೂಡಿಕೆದಾರರು ಈಗಾಗಲೇ ಸಿದ್ಧತೆಗಳನ್ನು ಮಾಡಿಕೊಂಡಿದ್ದಾರೆ. ಇದರಿಂದಾಗಿ ಷೇರು ಮಾರುಕಟ್ಟೆಗಳಲ್ಲಿ ದೊಡ್ಡ ಕುಸಿತದ ಸಾಧ್ಯತೆ ಕಡಿಮೆಯಾಗಿದೆ.
ಇಸ್ರೇಲ್‌ ಜೊತೆ ಸೇರಿಕೊಂಡು ಇರಾನ್‌ನ ಪರಮಾಣು ಸೌಲಭ್ಯಗಳ ಮೇಲೆ ಅಮೆರಿಕ ದಾಳಿ ಮಾಡಿದ ಇಂಧನ ಮಾರುಕಟ್ಟೆಗಳಲ್ಲಿ ಅಡ್ಡಿ ಉಂಟಾಗುವ ಆತಂಕದ ನಡುವೆ ಸೋಮವಾರ ಏಷ್ಯಾದ ಮಾರುಕಟ್ಟೆಗಳು ಕುಸಿದರೆ, ತೈಲ ಬೆಲೆಗಳು ಐದು ತಿಂಗಳ ಗರಿಷ್ಠ ಮಟ್ಟವನ್ನು ತಲುಪಿವೆ. ಇದು ಮಧ್ಯಪ್ರಾಚ್ಯ ಬಿಕ್ಕಟ್ಟನ್ನು ಹೆಚ್ಚಿಸಿದೆ. ಇರಾನ್‌ ವಿಶ್ವದ ಒಂಬತ್ತನೇ ಅತಿದೊಡ್ಡ ತೈಲ ಉತ್ಪಾದಕ ರಾಷ್ಟ್ರವಾಗಿದ್ದು, ದಿನಕ್ಕೆ ಸುಮಾರು 3.3 ಮಿಲಿಯನ್‌ ಬ್ಯಾರೆಲ್‌ಗಳನ್ನು ಉತ್ಪಾದಿಸುತ್ತಿದೆ.
ಟೆಹ್ರಾನ್‌ ಆ ಮೊತ್ತದ ಅರ್ಧದಷ್ಟು ರಫ್ತು ಮಾಡುತ್ತದೆ ಮತ್ತು ಉಳಿದದ್ದನ್ನು ದೇಶೀಯ ಬಳಕೆಗಾಗಿ ಇಟ್ಟುಕೊಳ್ಳುತ್ತದೆ. ಮತ್ತು ಟೆಹ್ರಾನ್‌ ಪ್ರತೀಕಾರ ತೀರಿಸಿಕೊಳ್ಳಲು ನಿರ್ಧರಿಸಿದರೆ, ಜಾಗತಿಕ ತೈಲ ಉತ್ಪಾದನೆಯ 5ನೇ ಒಂದು ಭಾಗವನ್ನು ಹೊಂದಿರುವ ಕಾರ್ಯತಂತ್ರದ ಹಾರ್ಮುಜ್‌ ಜಲಸಂಧಿಯನ್ನು ಮುಚ್ಚುವುದು ಅದರ ಆಯ್ಕೆಗಳಲ್ಲಿ ಒಂದಾಗಿದೆ.
- ಬಂಜೆತನ ಸಮಸ್ಯೆಗಳಿಗೆ ಉಚಿತ ಮಾರ್ಗದರ್ಶನ ನೀಡಲು ಬಂತು ಟೋಲ್-ಫ್ರೀ ಸಂಖ್ಯೆ
- ರಾಜ್ಯದಲ್ಲಿ ಶೀಘ್ರವೇ ಜಲಾಶಯಗಳು ಭರ್ತಿ.!
- ಇರಾನ್‌-ಇಸ್ರೇಲ್‌ ಯುದ್ಧಕ್ಕೆ ಅಮೆರಿಕ ರಂಗಪ್ರವೇಶ ಬೆನ್ನಲ್ಲೇ ಜಾಗತಿಕ ಷೇರು ಮಾರುಕಟ್ಟೆ ತಲ್ಲಣ
- ಶಾಸಕರ ಅಸಮಾಧಾನ ಬಗೆಹರಿಸುವೆ:ಸಿಎಂ
- ಗುಜರಾತ್‌ ವಿಧಾನಸಭೆಉಪಚುನಾವಣೆ ಫಲಿತಾಂಶ : ಬಿಜೆಪಿ,ಎಎಪಿ ಸಮಬಲ