ರಾಂಚಿ,ಸೆ.10- ಮಹತ್ವದ ಬೆಳವಣಿಗೆಯಲ್ಲಿ ಶಂಕಿತ ಐಸಿಸ್‌ ಭಯೋತ್ಪಾದಕ ಆಶರ್‌ ಡ್ಯಾನಿಶ್‌ನನ್ನು ಭದ್ರತಾ ಪಡೆಗಳು ಬಂಧಿಸಿವೆ. ಜಾರ್ಖಂಡ್‌ ರಾಜಧಾನಿ ರಾಂಚಿಯಲ್ಲಿ ಬಂಧಿಸಲಾಗಿದೆ. ಆಶರ್‌ ಡ್ಯಾನಿಶ್‌ ಬೊಕಾರೊ ಜಿಲ್ಲೆಯ ಪೆಟ್ವಾರ್‌ ಮೂಲದವನು.ದೆಹಲಿಯ ವಿಶೇಷ ಘಟಕ, ಜಾರ್ಖಂಡ್‌ ಎಟಿಎಸ್‌ ಮತ್ತು ರಾಂಚಿ ಪೊಲೀಸರು ನಡೆಸಿದ ಜಂಟಿ ಕಾರ್ಯಾಚರಣೆಯಲ್ಲಿ ರಾಂಚಿಯ ಇಸ್ಲಾಂ ನಗರದಲ್ಲಿ ಆತನನ್ನು ಬಂಧಿಸಲಾಗಿದೆ.
ದೆಹಲಿಯಲ್ಲಿ ದಾಖಲಾದ ಪ್ರಕರಣದ ಆಧಾರದ ಮೇಲೆ, ದೆಹಲಿ ವಿಶೇಷ ದಳದ ತಂಡವು ಬಹಳ ಸಮಯದಿಂದ ಆತನನ್ನು ಹುಡುಕುತ್ತಿತ್ತು. ಬಂಧಿತ ಶಂಕಿತ ಭಯೋತ್ಪಾದಕನನ್ನು ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ.
ಇದೇ ರೀತಿ, ಇಂದು ದೆಹಲಿಯಲ್ಲಿ ಮತ್ತೊಬ್ಬ ಐಸಿಸ್‌ ಶಂಕಿತ ಭಯೋತ್ಪಾದಕ ಅಫ್ತಾಬ್‌ನನ್ನು ಬಂಧಿಸಲಾಗಿತ್ತು. ದೇಶದ ವಿವಿಧ ರಾಜ್ಯಗಳಲ್ಲಿ 12 ಕ್ಕೂ ಹೆಚ್ಚು ಸ್ಥಳಗಳಲ್ಲಿ ವಿಶೇಷ ಘಟಕಗಳು ಮತ್ತು ಕೇಂದ್ರ ಸಂಸ್ಥೆಗಳು ಬೃಹತ್‌ ದಾಳಿ ಮತ್ತು ಶೋಧ ಕಾರ್ಯಾಚರಣೆಗಳನ್ನು ನಡೆಸುತ್ತಿರುವಾಗ ಈ ಬಂಧನ ಮಾಡಲಾಗಿದೆ. ಈ ಸಮಯದಲ್ಲಿ, 8 ಕ್ಕೂ ಹೆಚ್ಚು ಶಂಕಿತರನ್ನು ವಶಕ್ಕೆ ತೆಗೆದುಕೊಳ್ಳಲಾಗಿದೆ.