ಅಟ್ಲಾಂಟಾ (ಜಾರ್ಜಿಯಾ),ಜು.12- ಅಮೆರಿಕದ ಜಾರ್ಜಿಯಾದಲ್ಲಿ ಭಾರತೀಯ ಮೂಲದ ಅತ್ಯುನ್ನತ ತಂತ್ರಜ್ಞಾನ ಕಾರ್ಯನಿರ್ವಾಹಕಿಯೊಬ್ಬರು ಕೌಟುಂಬಿಕ ಹಿಂಸಾಚಾರಕ್ಕೆ ಬಲಿಯಾಗಿದ್ದಾರೆ. ಗೂಗಲ್ ಸಂಸ್ಥೆಯಲ್ಲಿ ಎಂಜಿನಿಯರಿಂಗ್ ನಾಯಕಿಯಾಗಿದ್ದ 57 ವರ್ಷದ ಶೀತಲ್ ವ್ರ್ಜೆಸಿಯನ್ ಅವರನ್ನು ಅವರ ಪತಿಯೇ ಗುಂಡಿಕ್ಕಿ ಭೀಕರವಾಗಿ ಕೊಂದಿರುವ ಘಟನೆ ಜಾರ್ಜಿಯಾದ ಸಿರ್ನಾ ನಗರದಲ್ಲಿ ನಡೆದಿದೆ. ಈ ಘಟನೆಯಲ್ಲಿ ದಂಪತಿಯ 23 ವರ್ಷದ ಮಗನಿಗೂ ಗಂಭೀರ ಗಾಯಗಳಾಗಿವೆ.
ಸ್ಥಳೀಯ ಪೊಲೀಸರು ನೀಡಿರುವ ಮಾಹಿತಿಯ ಪ್ರಕಾರ, ಸಿರ್ನಾ ನಗರದ ನಿವಾಸವೊಂದರಲ್ಲಿ ರಾತ್ರಿ ಸುಮಾರು 8:00 ಗಂಟೆಗೆ ಗುಂಡಿನ ದಾಳಿ ನಡೆದಿರುವ ಕುರಿತು ಕರೆ ಬಂದ ತಕ್ಷಣ ಅಧಿಕಾರಿಗಳು ಸ್ಥಳಕ್ಕೆ ಧಾವಿಸಿದ್ದಾರೆ.ಪೊಲೀಸರು ಮನೆಗೆ ತಲುಪಿದಾಗ ಶೀತಲ್ ವ್ರ್ಜೆಸಿಯನ್ ಅವರು ಮನೆಯೊಳಗೆ ತೀವ್ರವಾದ ಗುಂಡೇಟಿನ ಗಾಯಗಳಿಂದ ಪತ್ತೆಯಾಗಿದ್ದಾರೆ. ದುರದೃಷ್ಟವಶಾತ್, ಅವರು ಸ್ಥಳದಲ್ಲೇ ಕೊನೆಯುಸಿರೆಳೆದಿದ್ದಾರೆ.
ದಂಪತಿಯ 23 ವರ್ಷದ ಮಗ ಜೇಸನ್ ವ್ರ್ಜೆಸಿಯನ್ ಕೂಡ ಗುಂಡೇಟಿನ ಗಾಯಗಳೊಂದಿಗೆ ಮನೆಯ ಹೊರಗೆ ಪತ್ತೆಯಾಗಿದ್ದಾನೆ. ತಕ್ಷಣ ಆತನನ್ನು ತುರ್ತು ಚಿಕಿತ್ಸೆಗಾಗಿ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ.ಕೊಲೆ ಕೃತ್ಯ ಎಸಗಿದ ಶೀತಲ್ ಅವರ ಪತಿ, 56 ವರ್ಷದ ಕಿರ್ಕ್ ಬಿ ವ್ರ್ಜೆಸಿಯನ್ ಎಂಬಾತನನ್ನು ಮಂಗಳವಾರ ರಾತ್ರಿ ಅಟ್ಲಾಂಟಾ ಬಳಿಯ ಕಾಬ್ ಕೌಂಟಿಯ ನಿವಾಸದಲ್ಲೇ ಪೊಲೀಸರು ಬಂಧಿಸಿದ್ದಾರೆ.
ಕಾಬ್ ಕೌಂಟಿ ಪೊಲೀಸ್ ಇಲಾಖೆಯ ವರದಿಯ ಪ್ರಕಾರ, ಆರೋಪಿ ಕಿರ್ಕ್ ವಿರುದ್ಧ ಕೊಲೆ ಪ್ರಕರಣ, ತೀವ್ರ ಹಲ್ಲೆ ಪ್ರಕರಣಗಳು,ಅಪರಾಧದ ಸಮಯದಲ್ಲಿ ಬಂದೂಕು ಹೊಂದಿದ್ದಕ್ಕಾಗಿ 2 ಆರೋಪಗಳು ಸೇರಿದಂತೆ ಮತ್ತಿತರರ ಗಂಭೀರ ಸೆಕ್ಷನ್ಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಪ್ರಸ್ತುತ ಆರೋಪಿಯನ್ನು ಕಾಬ್ ಕೌಂಟಿ ವಯಸ್ಕರ ಬಂಧನ ಕೇಂದ್ರದಲ್ಲಿ ಯಾವುದೇ ಜಾಮೀನು ಇಲ್ಲದೆ ವಶದಲ್ಲಿಡಲಾಗಿದೆ. ಪೊಲೀಸರು ಇದೊಂದು ಸಂಪೂರ್ಣ ಕೌಟುಂಬಿಕ ಹಿಂಸಾಚಾರದ ಪ್ರಕರಣವಾಗಿದ್ದು, ಸಾರ್ವಜನಿಕರಿಗೆ ಇದರಿಂದ ಯಾವುದೇ ಬೆದರಿಕೆ ಇಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಆದರೆ, ಗುಂಡಿನ ದಾಳಿಗೆ ನಿಖರವಾದ ಕಾರಣವೇನು ಎಂಬುದು ಇನ್ನು ತನಿಖೆಯಿಂದ ಹೊರಬರಬೇಕಿದೆ.
ತಂತ್ರಜ್ಞಾನ ಲೋಕದ ಧ್ರುವತಾರೆ
ಕೊಲೆಯಾದ ಶೀತಲ್ ವ್ರ್ಜೆಸಿಯನ್ ಅವರು ಜಾಗತಿಕ ತಂತ್ರಜ್ಞಾನ ಕ್ಷೇತ್ರದಲ್ಲಿ ಎರಡು ದಶಕಗಳಿಗೂ (20 ವರ್ಷ) ಹೆಚ್ಚಿನ ಸುದೀರ್ಘ ಅನುಭವ ಹೊಂದಿದ್ದ ಅಪರೂಪದ ಪ್ರತಿಭೆಯಾಗಿದ್ದರು.
ಸಾಧನೆಗಳು:
ಗೂಗಲ್ ಸಂಸ್ಥೆಯಲ್ಲಿ ಹಿರಿಯ ತಂತ್ರಜ್ಞಾನ ಕಾರ್ಯನಿರ್ವಾಹಕಿಯಾಗಿ ಮತ್ತು ಎಂಜಿನಿಯರಿಂಗ್ ನಾಯಕಿಯಾಗಿ ಅವರು ಸೇವೆ ಸಲ್ಲಿಸುತ್ತಿದ್ದರು.ಗೂಗಲ್ಗೆ ಸೇರುವ ಮುನ್ನ ಅವರು ಏ ಮೊಬೈಲ್ ಮತ್ತು ಡಿಜಿಟಲ್ ರೂಪಾಂತರದ ಮುಖ್ಯಸ್ಥರಾಗಿದ್ದರು. ಕಂಪನಿಯ ಡಿಜಿಟಲ್ ಹೋಮ್ ಡೆಕೋರ್ ಮತ್ತು ಪೀಠೋಪಕರಣಗಳ ವ್ಯವಹಾರವನ್ನು ಜಾಗತಿಕ ಮಟ್ಟಕ್ಕೆ ವಿಸ್ತರಿಸಿದ ಕೀರ್ತಿ ಅವರಿಗೆ ಸಲ್ಲುತ್ತದೆ.
ವಿವಿಧ ಕ್ಷೇತ್ರಗಳಲ್ಲಿ ಸೇವೆ:
ಹವಾಮಾನ ಮತ್ತು ಹಣಕಾಸು ತಂತ್ರಜ್ಞಾನ ಕ್ಷೇತ್ರಗಳಲ್ಲೂ ಅವರು ಹಿರಿಯ ತಾಂತ್ರಿಕ ನಾಯಕತ್ವದ ಹುದ್ದೆಗಳನ್ನು ನಿಭಾಯಿಸಿದ್ದರು.ಪೇಟೆಂಟ್ ಮತ್ತು ಗೌರವ: ಶೀತಲ್ ಅವರು ಎರಡು ಪ್ರಮುಖ ಸಾಫ್್ಟವೇರ್ ಪೇಟೆಂಟ್ಗಳನ್ನು ಹೊಂದಿದ್ದ ಸಂಶೋಧಕಿಯಾಗಿದ್ದರು. ಜಾರ್ಜಿಯಾ ಟೆಕ್ ಕಾಲೇಜ್ ಆಫ್ ಕಂಪ್ಯೂಟಿಂಗ್ನ ಸಲಹಾ ಮಂಡಳಿ ಹಾಗೂ ಜಾರ್ಜಿಯಾ ಟೆಕ್ ಹಳೆಯ ವಿದ್ಯಾರ್ಥಿಗಳ ಸಂಘದ ಟ್ರಸ್ಟಿಗಳ ಮಂಡಳಿಯ ಸದಸ್ಯರಾಗಿ ಸಕ್ರಿಯರಾಗಿದ್ದರು.