ಹಾಸನ,ಅ.27- ಇತ್ತೀಚಿನ ಮಳೆಯಿಂದಾಗಿ ಹಾಸನಾಂಬೆ ಜಾತ್ರೆಯ ಸಿದ್ಧತೆಗಳಿಗೆ ಅಡಚಣೆಯಾಗಿದ್ದರೂ, ಇದೀಗ ಮಳೆ ಕಡಿಮೆಯಾಗಿರುವ ಹಿನ್ನೆಲೆಯಲ್ಲಿ ಸಿದ್ಧತೆಗಳನ್ನು ಚುರುಕುಗೊಳಿಸಲಾಗಿದೆ. ನಿಗದಿತ ಅವಧಿಯಲ್ಲಿ ಎಲ್ಲಾ ವ್ಯವಸ್ಥೆಗಳನ್ನು ಪೂರ್ಣಗೊಳಿಸಲಾಗುವುದು ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಎಂ.ಶಿವಲಿಂಗೇಗೌಡ ತಿಳಿಸಿದರು.
ನಗರದಲ್ಲಿ ಮಹರ್ಷಿ ವಾಲೀಕಿ ಜಯಂತಿ ಕಾರ್ಯಕ್ರಮದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಈ ಬಾರಿಯ ಹಾಸನಾಂಬೆ ಉತ್ಸವಕ್ಕೆ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರನ್ನು ಆಹ್ವಾನಿಸಲಾಗಿದ್ದು, ನ.6ರಂದು ಹಾಸನಕ್ಕೆ ಭೇಟಿ ನೀಡಲು ದಿನಾಂಕ ನಿಗದಿಯಾಗಿದೆ ಎಂದರು.
ಹಾಸನಾಂಬೆ ಉತ್ಸವದ ಅಂಗವಾಗಿ ನಗರದಲ್ಲಿ ಮೈಸೂರು ಮಾದರಿಯ ವಿದ್ಯುತ್‌ ದೀಪಾಲಂಕಾರ ಮಾಡಲು ಕ್ರಮ ಕೈಗೊಳ್ಳಲಾಗುವುದು. ಉತ್ಸವದ ಸಿದ್ಧತೆಗಳನ್ನು ಖುದ್ದಾಗಿ ಪರಿಶೀಲಿಸಿ, ಯಾವುದೇ ಲೋಪದೋಷಗಳಿದ್ದರೆ ಅವುಗಳನ್ನು ತಕ್ಷಣ ಸರಿಪಡಿಸಲಾಗುವುದು. ಕಳೆದ ವರ್ಷದ ಅನುಭವದ ಆಧಾರದಲ್ಲಿ ಈ ಬಾರಿಯೂ ಅಗತ್ಯ ವ್ಯವಸ್ಥೆಗಳನ್ನು ರೂಪಿಸಲಾಗಿದ್ದು, ಉತ್ಸವವನ್ನು ಯಶಸ್ವಿಯಾಗಿ ನಡೆಸಲು ಜಿಲ್ಲಾಡಳಿತ ಸಜ್ಜಾಗಿದೆ ಎಂದು ಹೇಳಿದರು.
ಸ್ಥಳೀಯರಿಗೆ ದರ್ಶನಕ್ಕೆ ಹಿಂದಿನ ವ್ಯವಸ್ಥೆಯೇ ಮುಂದುವರಿಕೆ :
ಹಾಸನಾಂಬೆ ದರ್ಶನಕ್ಕೆ ಸ್ಥಳೀಯರಿಗೆ ಪ್ರತ್ಯೇಕ ವ್ಯವಸ್ಥೆ ಕಲ್ಪಿಸುವ ಕುರಿತು ಪ್ರತಿಕ್ರಿಯಿಸಿದ ಸಚಿವರು, ಕಳೆದ ವರ್ಷ ಅನುಸರಿಸಿದ ವ್ಯವಸ್ಥೆಯನ್ನೇ ಈ ಬಾರಿಯೂ ಮುಂದುವರಿಸಲಾಗುವುದು ಎಂದು ಸ್ಪಷ್ಟಪಡಿಸಿದರು.ಕಳೆದ ವರ್ಷದ ವ್ಯವಸ್ಥೆ ಯಶಸ್ವಿಯಾಗಿದ್ದು, ರಾಜ್ಯದಾದ್ಯಂತ ಉತ್ತಮ ಪ್ರತಿಕ್ರಿಯೆ ಮತ್ತು ಮೆಚ್ಚುಗೆ ವ್ಯಕ್ತವಾಗಿತ್ತು. ಈ ಹಿನ್ನೆಲೆಯಲ್ಲಿ ಅದೇ ಮಾದರಿಯನ್ನು ಮುಂದುವರಿಸಲು ನಿರ್ಧರಿಸಲಾಗಿದೆ ಎಂದರು.ಜಾತ್ರೆಗೆ ಆಗಮಿಸುವ ಭಕ್ತರಿಗೆ ಅಗತ್ಯ ಸೌಲಭ್ಯಗಳನ್ನು ಕಲ್ಪಿಸುವುದು ಹಾಗೂ ಉತ್ಸವದ ವ್ಯವಸ್ಥೆಗಳನ್ನು ಸಕಾಲದಲ್ಲಿ ಪೂರ್ಣಗೊಳಿಸುವುದು ಜಿಲ್ಲಾಡಳಿತದ ಆದ್ಯತೆಯಾಗಿದೆ ಎಂದು ತಿಳಿಸಿದರು.
ಹಾಸನಾಂಬೆ ಜಾತ್ರಾ ಮಹೋತ್ಸವ ಕೆಎಸ್‌‍ಆರ್‌ಟಿಸಿಯಿಂದ ಟೂರ್‌ ಪ್ಯಾಕೇಜ್‌ :
ಬೆಂಗಳೂರು,ಅ.27-ವರ್ಷಕ್ಕೊಮೆ ಭಕ್ತರಿಗೆ ದರ್ಶನ ಭಾಗ್ಯ ನೀಡುವ ಐತಿಹಾಸಿಕ ಹಾಸನಾಂಬ ದೇವಿಯ ದರ್ಶನಕ್ಕೆ ತೆರಳುವ ಭಕ್ತರ ಅನುಕೂಲಕ್ಕಾಗಿ ಕೆಎಸ್‌‍ಆರ್‌ಟಿಸಿ ವತಿಯಿಂದ ವಿಶೇಷ ಪ್ರವಾಸ ಪ್ಯಾಕೇಜ್‌ಗಳನ್ನು ಪರಿಚಯಿಸಿದೆ.ಅ.30 ರಿಂದ ನ.10 ರವರೆಗೆ ಬೆಂಗಳೂರು ಮತ್ತು ಮೈಸೂರಿನಿಂದ ಐರಾವತ ಹಾಗೂ ಅಶ್ವಮೇಧ ಬಸ್‌‍ಗಳಲ್ಲಿ ಒಂದು ದಿನದ ಪ್ರವಾಸ ಸೌಲಭ್ಯ ಕಲ್ಪಿಸಲಾಗಿದೆ.
ಹಾಸನಾಂಬ ದೇವಿಯ ದರ್ಶನದ ಜೊತೆಗೆ ಸಿದ್ದೇಶ್ವರ ದೇವಾಲಯ ಮತ್ತು ದೇವಿಗೆರೆ ಕಲ್ಯಾಣಿ ದೇವಾಲಯವನ್ನೂ ವೀಕ್ಷಿಸಲು ಅವಕಾಶವಿದೆ. ಮೈಸೂರಿನಿಂದ ಹೊರಡುವ ಪ್ಯಾಕೇಜ್‌ನಲ್ಲಿ ಹೊಳೆನರಸೀಪುರದ ಲಕ್ಷ್ಮೀ ನರಸಿಂಹಸ್ವಾಮಿ ದೇವಾಲಯಕ್ಕೂ ಭೇಟಿ ನೀಡಬಹುದು.
ಪ್ರತಿ ಪ್ರಯಾಣಿಕರ ಟಿಕೆಟ್‌ ದರದಲ್ಲಿ 1 ಸಾವಿರ ರೂ. ಮೌಲ್ಯದ ದೇವಿಯ ಅಧಿಕೃತ ವಿಶೇಷ ಪ್ರವೇಶ ದರ್ಶನದ ಟಿಕೆಟ್‌ ಸೇರಿಸಲಾಗಿದೆ.
ನಗರದಿಂದ ಎರಡು ಬಗೆಯ ಪ್ಯಾಕೇಜ್‌:
ಮೆಜೆಸ್ಟಿಕ್‌ನ ಕೆಂಪೇಗೌಡ ಬಸ್‌ ನಿಲ್ದಾಣದಿಂದ ಬೆಳಗ್ಗೆ 6 ಗಂಟೆಗೆ ಎರಡೂ ಮಾದರಿಯ ಬಸ್‌‍ಗಳು ಹೊರಡಲಿವೆ.ಐರಾವತ ವೋಲ್ವೊ ಬಸ್‌‍ನಲ್ಲಿ ತೆರಳಿ ಸಂಜೆ 7 ಗಂಟೆಗೆ ಹಿಂದಿರುಗುವ ಪ್ಯಾಕೇಜ್‌ನ ದರ ಪ್ರತಿ ವ್ಯಕ್ತಿಗೆ 2500 ರೂ. ಅಶ್ವಮೇಧ ಬಸ್‌‍ನಲ್ಲಿ ತೆರಳುವವರಿಗೆ ಪ್ರತಿ ವ್ಯಕ್ತಿಗೆ 2 ಸಾವಿರ ರೂ.ದರ ನಿಗಧಿಪಡಿಸಲಾಗಿದ್ದು, ಸಂಜೆ 8 ಗಂಟೆಗೆ ಬೆಂಗಳೂರು ತಲುಪುವ ವೇಳಾಪಟ್ಟಿ ರೂಪಿಸಲಾಗಿದೆ.
ಈ ಎರಡು ಪ್ಯಾಕೇಜ್‌ಗಳಲ್ಲಿ ಒಟ್ಟು ಪ್ರಯಾಣದ ದೂರ 380 ಕಿ.ಮೀ ಆಗಿದೆ.ಪ್ಯಾಕೇಜ್‌ ದರದಲ್ಲಿ ಹಾಸನಾಂಬ ದೇವಿಯ 1 ಸಾವಿರ ರೂ. ಮೌಲ್ಯದ ವಿಶೇಷ ದರ್ಶನದ ಟಿಕೆಟ್‌ ಸೇರಿದ್ದರೂ, ಊಟ,ಉಪಹಾರ ಮತ್ತು ದೇವಾಲಯಗಳಲ್ಲಿ ವಿಧಿಸುವ ಇತರ ಪ್ರವೇಶ ಶುಲ್ಕಗಳನ್ನು ಪ್ರಯಾಣಿಕರೇ ಪ್ರತ್ಯೇಕವಾಗಿ ಭರಿಸಬೇಕು. ಮಕ್ಕಳಿಗೆ ಪ್ರತ್ಯೇಕ ದರ ನಿಗಧಿಪಡಿಸಲಾಗಿದೆ.
ವಿಶೇಷ ಪ್ರವಾಸ ಪ್ಯಾಕೆಜ್‌ಗಳ ಕುರಿತು ಮಾಹಿತಿಗೆ, ಟಿಕೆಟ್‌ ಕಯ್ದಿರಿಸಲು ದೂ. ಸಂ.7760990518,7760990519 ಅನ್ನು ಸಂಪರ್ಕಿಸಬಹುದು.
ಆನ್‌ಲೈನ್‌ ಬುಕ್ಕಿಂಗ್‌ ಮತ್ತು ಹೆಚ್ಚಿನ ವಿವರಗಳಿಗೆ ನಿಗಮದ ಅಧಿಕೃತ ವೆಬ್‌ಸೈಟ್‌ www.ksrtc.in ಭೇಟಿ ನೀಡಬಹುದು ಎಂದು ಕೆಎಸ್‌‍ಆರ್‌ಟಿಸಿ ಪ್ರಕಟಣೆಯಲ್ಲಿ ತಿಳಿಸಿದೆ.