ನವದೆಹಲಿ, ಅ. 28 (ಪಿಟಿಐ)- ಬರುವ ನವೆಂಬರ್‌ 1ರಂದು ಇಲ್ಲಿನ ರಾಮಲೀಲಾ ಮೈದಾನದಲ್ಲಿ ನಡೆಯಲಿರುವ ಇಂಡಿಯಾ ಒಕ್ಕೂಟದ ರ್ಯಾಲಿಯಿಂದ ವ್ಯಾಪಾರ ಚಟುವಟಿಕೆಗಳಿಗೆ ಅಡಚಣೆ ಉಂಟಾಗುವ ಸಾಧ್ಯತೆಯಿದೆ. ಈ ಕುರಿತು ವ್ಯಾಪಾರಿಗಳ ಆತಂಕವನ್ನು ತಿಳಿಸಲು ಮತ್ತು ರ್ಯಾಲಿಯನ್ನು ಮುಂದೂಡುವಂತೆ ಕೋರಲು ಚೇಂಬರ್‌ ಆಫ್‌ ಟ್ರೇಡ್‌ ಅಂಡ್‌ ಇಂಡಸ್ಟ್ರಿಯವರು ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಅವರೊಂದಿಗೆ 20 ನಿಮಿಷಗಳ ಸಭೆಗೆ ಮನವಿ ಮಾಡಿಕೊಂಡಿದ್ದಾರೆ.
ರಾಹುಲ್‌ ಗಾಂಧಿಯವರಿಗೆ ಬರೆದ ಪತ್ರದಲ್ಲಿ, ಚೇಂಬರ್‌ ಅಧ್ಯಕ್ಷ ಬ್ರಿಜೇಶ್‌ ಗೋಯಲ್‌ ಅವರು, 20 ಮಾರುಕಟ್ಟೆಗಳ ಪ್ರತಿನಿಧಿಗಳು ರಾಹುಲ್‌ ಗಾಂಧಿಯವರನ್ನು ಭೇಟಿಯಾಗಿ, ದೀಪಾವಳಿ ಹಬ್ಬದ ಸನಿಹದಲ್ಲಿ ನಡೆಯಲಿರುವ ಈ ರ್ಯಾಲಿಯಿಂದ ವ್ಯಾಪಾರ ಚಟುವಟಿಕೆಗಳಿಗೆ ಹೇಗೆ ತೊಂದರೆಯಾಗಲಿದೆ ಎಂಬುದನ್ನು ವಿವರಿಸಲು ಬಯಸುತ್ತಿದ್ದಾರೆ ಎಂದು ತಿಳಿಸಿದ್ದಾರೆ.
ದೀಪಾವಳಿಯ ನಂತರ ರ್ಯಾಲಿಯನ್ನು ನಡೆಸುವಂತೆ ಕೋರಿ ಕಳೆದ ನಾಲ್ಕು ದಿನಗಳಲ್ಲಿ ರಾಹುಲ್‌ ಗಾಂಧಿಯವರಿಗೆ ಪತ್ರ ಬರೆದಿರುವುದು ಇದು ಎರಡನೇ ಬಾರಿಯಾಗಿದೆ. ಅಕ್ಟೋಬರ್‌ 24ರಂದು ಲೋಕಸಭೆಯ ವಿರೋಧ ಪಕ್ಷದ ನಾಯಕರಿಗೆ ಬರೆದ ಮೊದಲ ಪತ್ರದಲ್ಲಿ, ರ್ಯಾಲಿಯನ್ನು ಮುಂದೂಡುವುದರಿಂದ ವರ್ಷದ ಅತ್ಯಂತ ಜನನಿಬಿಡ ಅವಧಿಗಳಲ್ಲಿ ಒಂದಾದ ಈ ಸಮಯದಲ್ಲಿ ವ್ಯಾಪಾರ ಚಟುವಟಿಕೆಗಳನ್ನು ರಕ್ಷಿಸಲು ಸಹಾಯವಾಗುತ್ತದೆ ಎಂದು ತಿಳಿಸಲಾಗಿತ್ತು.
ಇಂದಿನ ಪತ್ರದಲ್ಲಿ ಗೋಯಲ್‌ ಹೀಗೆ ಹೇಳಿದ್ದಾರೆ: “ನಮಗೆ ಸಂಘರ್ಷ ಬೇಕಿಲ್ಲ, ಸಂವಾದ ಬೇಕಿದೆ. ರಾಹುಲ್‌ ಜಿ ಅವರೇ ತಾವು ಎಲ್ಲರ ಮಾತುಗಳನ್ನು ಆಲಿಸುವುದಾಗಿಯೂ, ಸಣ್ಣ ವ್ಯಾಪಾರಿಗಳ ಧ್ವನಿಯನ್ನು ಕೇಳಿಸಿಕೊಳ್ಳುವುದಾಗಿಯೂ ಹೇಳುತ್ತಾರೆ. ಹೀಗಾಗಿ, 20 ಮಾರುಕಟ್ಟೆಗಳ ವ್ಯಾಪಾರಿಗಳಾದ ನಾವು ಅವರಿಂದ 20 ನಿಮಿಷಗಳ ಸಮಯವನ್ನು ಕೇಳುತ್ತಿದ್ದೇವೆ. ಇದೇ ಪ್ರಜಾಪ್ರಭುತ್ವದ ಸೌಂದರ್ಯವಾಗಿದೆ.
ರ್ಯಾಲಿಯಿಂದ ವ್ಯಾಪಾರ ಹೆಚ್ಚಾಗುತ್ತದೆ ಮತ್ತು ಹೆಚ್ಚಿನ ಗ್ರಾಹಕರು ಬರುತ್ತಾರೆ ಎಂದು ರಾಹುಲ್‌ ಗಾಂಧಿ ಅವರು ವ್ಯಾಪಾರಿಗಳಿಗೆ ಮನವರಿಕೆ ಮಾಡಿದರೆ, ಅವರು ತಮ್ಮ ಪ್ರತಿಭಟನೆಯನ್ನು ಹಿಂಪಡೆಯಲಿದ್ದಾರೆ. ಆದರೆ, ರ್ಯಾಲಿಯಿಂದ ನಷ್ಟವಾಗುತ್ತದೆ ಎಂದು ವ್ಯಾಪಾರಿಗಳು ರಾಹುಲ್‌ ಗಾಂಧಿಯವರಿಗೆ ಮನವರಿಕೆ ಮಾಡಿದರೆ, ಅವರು ರ್ಯಾಲಿಯನ್ನು ದೀಪಾವಳಿಯ ನಂತರಕ್ಕೆ ಮುಂದೂಡಬೇಕು” ಎಂದು ಅವರು ತಿಳಿಸಿದ್ದಾರೆ.