ತಿರುವನಂತಪುರಂ, ನ.4 (ಪಿಟಿಐ): ಸುಮಾರು ಎರಡು ದಶಕಗಳ ಹಿಂದೆ ಕೇರಳದಲ್ಲಿ ರಸ್ತೆ ನಿರ್ಮಾಣ ಯೋಜನೆಗೆ ಸಂಬಂಧಿಸಿದಂತೆ, ಆಗ ಅಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಜ್ಞಾನೇಶ್‌ ಕುಮಾರ್‌ (ಪ್ರಸ್ತುತ ಮುಖ್ಯ ಚುನಾವಣಾ ಆಯುಕ್ತರು) ವಿರುದ್ಧ ಮಾಜಿ ಗುತ್ತಿಗೆದಾರರೊಬ್ಬರು ಹೊಸದಾಗಿ ಲಂಚದ ಆರೋಪಗಳನ್ನು ಮಾಡಿದ್ದಾರೆ.ಈ ಆರೋಪಗಳ ಬಗ್ಗೆ ತನಿಖೆ ನಡೆಸುವಂತೆ ಕೇರಳ ಗೃಹ ಸಚಿವ ರಮೇಶ್‌ ಚೆನ್ನಿತಾಲ ಅವರು ವಿಜಿಲೆನ್ಸ್‌ ಮತ್ತು ಭ್ರಷ್ಟಾಚಾರ ನಿಗ್ರಹ ದಳಕ್ಕೆ ನಿರ್ದೇಶನ ನೀಡಿದ್ದಾರೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.
ದೇಶಾದ್ಯಂತ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (ಎಸ್‌ಐಆರ್‌) ಪ್ರಕ್ರಿಯೆಯ ವಿರುದ್ಧ ಕಾಂಗ್ರೆಸ್‌ ಮತ್ತು ಇತರ ವಿರೋಧ ಪಕ್ಷಗಳು ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್‌ ಕುಮಾರ್‌ ಅವರ ವಿರುದ್ಧ ಪ್ರತಿಭಟನೆ ನಡೆಸುತ್ತಿರುವ ಸಂದರ್ಭದಲ್ಲೇ ಈ ಬೆಳವಣಿಗೆ ನಡೆದಿದೆ.
ಕೊಲ್ಲಂ ಜಿಲ್ಲೆಯ ಚಡಯಮಂಗಲಂ ಮೂಲದ ಗುತ್ತಿಗೆದಾರ ಸಾಜನ್‌ ಅವರು, ವಿಜಿಲೆನ್ಸ್‌ ಮತ್ತು ಭ್ರಷ್ಟಾಚಾರ ನಿಗ್ರಹ ದಳದ ನಿರ್ದೇಶಕರಿಗೆ ದೂರು ನೀಡಿದ್ದಾರೆ. ಕೇರಳ ರಾಜ್ಯ ಸಾರಿಗೆ ಯೋಜನೆಯ ಅಡಿಯಲ್ಲಿ ಪೂರ್ಣಗೊಂಡ ಕಾಮಗಾರಿಗಳಿಗೆ ಹಣ ಪಾವತಿಸಲು, ಆಗ ಸಾರ್ವಜನಿಕ ನಿರ್ಮಾಣ ಇಲಾಖೆಯ ಕಾರ್ಯದರ್ಶಿಯಾಗಿದ್ದ ಕುಮಾರ್‌ ಅವರು 2 ಕೋಟಿ ರೂಪಾಯಿ ಲಂಚಕ್ಕೆ ಬೇಡಿಕೆ ಇಟ್ಟಿದ್ದರು ಎಂದು ಸಾಜನ್‌ ಆರೋಪಿಸಿದ್ದಾರೆ.
ಸುಮಾರು 17 ಕೋಟಿ ರೂಪಾಯಿ ಮೌಲ್ಯದ ಬಿಲ್‌ಗಳಿಗೆ ಸಂಬಂಧಿಸಿದ ಚೆಕ್‌ಗಳನ್ನು ಕುಮಾರ್‌ ಉದ್ದೇಶಪೂರ್ವಕವಾಗಿ ತಡೆಹಿಡಿದಿದ್ದರು ಎಂದು ಸಾಜನ್‌ ಆರೋಪಿಸಿದ್ದಾರೆ. ಈ ಬಿಲ್‌ಗಳನ್ನು ಎಂಜಿನಿಯರ್‌ಗಳು ಈಗಾಗಲೇ ಅನುಮೋದಿಸಿದ್ದರು. ಕುಮಾರ್‌ ಅವರ ಈ ಕ್ರಮದಿಂದಾಗಿ ಮಲೇಷ್ಯಾದ ಕಂಪನಿ ಹಾಗೂ ಅದರ ಗುತ್ತಿಗೆದಾರರು ಮತ್ತು ಕಾರ್ಮಿಕರು ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದರು ಎಂದು ಅವರು ಹೇಳಿದ್ದಾರೆ.
ದೂರಿನ ಪ್ರಕಾರ, ಕಂಪನಿಯ ಯೋಜನಾ ಎಂಜಿನಿಯರ್‌ ಆಗಿದ್ದ ಮಲೇಷ್ಯಾ ಪ್ರಜೆ ಲೀ ಸೀ ಬೀನ್‌ ಅವರು, ತಾವು ಕೇಳಿದ ಲಂಚವನ್ನು ನೀಡದ ಹೊರತು ಚೆಕ್‌ಗಳನ್ನು ಬಿಡುಗಡೆ ಮಾಡುವುದಿಲ್ಲ ಎಂದು ಕುಮಾರ್‌ ಪಟ್ಟು ಹಿಡಿದಿದ್ದರು ಎಂದು ಸಾಜನ್‌ ಬಳಿ ಹೇಳಿಕೊಂಡಿದ್ದರು.
ನಾನು ಅವರಿಗೆ ಸ್ವಲ್ಪ ಹಣ ನೀಡಿ ಸಮಸ್ಯೆಯನ್ನು ಬಗೆಹರಿಸಿಕೊಳ್ಳಿ ಎಂದು ಸಲಹೆ ನೀಡಿದಾಗ, ಪಿಟಿ-ಬಿಇಎಲ್‌ ಕಂಪನಿಯ ಆಡಳಿತ ಮಂಡಳಿಯು ಲಂಚ ನೀಡಿ ಚೆಕ್‌ಗಳನ್ನು ಪಡೆಯಲು ಅನುಮತಿ ನೀಡುತ್ತಿಲ್ಲ ಎಂದು ಅವರು ನನಗೆ ತಿಳಿಸಿದರು ಎಂದು ಸಾಜನ್‌ ತಮ್ಮ ದೂರಿನಲ್ಲಿ ಆರೋಪಿಸಿದ್ದಾರೆ.
ಗುತ್ತಿಗೆದಾರರು ಮತ್ತು ಕಾರ್ಮಿಕರಿಗೆ ನೀಡಬೇಕಿದ್ದ ಬಾಕಿ ಹಣದ ಒಂದು ಭಾಗವನ್ನು ಪಾವತಿಸಲು, ಬೆಂಗಳೂರಿನಲ್ಲಿನ ಕಂಪನಿಯ ಮತ್ತೊಂದು ಯೋಜನೆಯ ನಿಧಿಯನ್ನು ಲೀ ಬಳಸಿಕೊಂಡಿದ್ದರು ಎಂದು ಸಾಜನ್‌ ಹೇಳಿದ್ದಾರೆ. ಅನುಮೋದಿತ ಬಿಲ್‌ಗಳನ್ನು ಬಿಡುಗಡೆ ಮಾಡಲು ವಿಳಂಬ ಮಾಡಿದ್ದು ಮತ್ತು ಲಂಚಕ್ಕೆ ಬೇಡಿಕೆ ಇಟ್ಟಿದ್ದು, 2006ರಲ್ಲಿ ಲೀ ಅವರ ಆತ್ಮಹತ್ಯೆಗೆ ಕಾರಣವಾಯಿತು ಎಂದು ಅವರು ಆರೋಪಿಸಿದ್ದಾರೆ.
ಲೀ ಅವರು ತಮ್ಮ ಆತ್ಮಹತ್ಯಾ ಟಿಪ್ಪಣಿಯಲ್ಲಿ ಕುಮಾರ್‌ ಅವರ ಪಾತ್ರದ ಬಗ್ಗೆ ಉಲ್ಲೇಖಿಸಿದ್ದರು ಮತ್ತು ಮಲೇಷ್ಯಾದಲ್ಲಿರುವ ಅವರ ಕುಟುಂಬದವರು ಈ ವಿಷಯವನ್ನು ಕಂಪನಿಯ ಉದ್ಯೋಗಿಗಳಿಗೆ ತಿಳಿಸಿದ್ದರು ಎಂದು ದೂರುದಾರರು ಹೇಳಿದ್ದಾರೆ.
ಈ ಘಟನೆಗೆ ಸಂಬಂಧಿಸಿದಂತೆ ಈ ಹಿಂದೆ ನಡೆದ ವಿಜಿಲೆನ್ಸ್‌ ತನಿಖೆಯಲ್ಲಿ, ತಮ್ಮನ್ನು ಅಥವಾ ಲಂಚದ ಬೇಡಿಕೆಯ ಬಗ್ಗೆ ನೇರ ಮಾಹಿತಿ ಹೊಂದಿದ್ದ ಇತರ ವ್ಯಕ್ತಿಗಳನ್ನು ವಿಚಾರಣೆಗೆ ಒಳಪಡಿಸಲಾಗಿರಲಿಲ್ಲ ಎಂದು ಸಾಜನ್‌ ತಿಳಿಸಿದ್ದಾರೆ. ಸಾಕ್ಷ್ಯ ಒದಗಿಸಲು ಲೀ ಅವರ ಕುಟುಂಬ ಸದಸ್ಯರು, ಕಂಪನಿಯ ಮಾಜಿ ಉದ್ಯೋಗಿಗಳು ಮತ್ತು ಇತರ ಸಾಕ್ಷಿದಾರರನ್ನು ಹಾಜರುಪಡಿಸುವುದಾಗಿ ಅವರು ತಿಳಿಸಿದರು.
ದೂರಿನ ಆಧಾರದ ಮೇಲೆ, ಪ್ರಾಥಮಿಕ ತನಿಖೆಯನ್ನು ನಡೆಸಿದ ನಂತರ ಪ್ರಕರಣ ದಾಖಲಿಸಲು ವಿಜಿಲೆನ್ಸ್‌ (ನಿಗಾ) ಇಲಾಖೆಯು ಗೃಹ ಇಲಾಖೆಯ ಅನುಮತಿಯನ್ನು ಕೋರಿತು. ಕಾನೂನು ಅಭಿಪ್ರಾಯವನ್ನು ಪಡೆದ ನಂತರ, ಚೆನ್ನಿತಾಲಾ ಅವರು ಈ ವಿಷಯದ ಕುರಿತು ಪ್ರಾಥಮಿಕ ತನಿಖೆಗೆ ಆದೇಶಿಸಿದರು ಎಂದು ಮೂಲಗಳು ತಿಳಿಸಿವೆ.
ಚೆನ್ನಿತಾಲಾ ಅವರ ನಿರ್ದೇಶನದ ಮೇರೆಗೆ, ಕೆಎಸ್‌ಟಿಪಿ ಆರೋಪಗಳ ಕುರಿತು ಈಗಾಗಲೇ ಪ್ರಾಥಮಿಕ ತನಿಖೆ ನಡೆಸುತ್ತಿರುವ ವಿಜಿಲೆನ್ಸ್‌ ತಂಡವೇ, ಈ ಹೊಸ ದೂರಿನ ಬಗ್ಗೆಯೂ ಪರಿಶೀಲನೆ ನಡೆಸುವ ನಿರೀಕ್ಷೆಯಿದೆ.ಕೆಪಿಸಿಸಿ ನಾಯಕ ಮಲಯಿನ್‌ಕೀಳು ವೇಣುಗೋಪಾಲ್‌ ಅವರು ನೀಡಿದ ದೂರಿನ ಮೇರೆಗೆ, ಸಚಿವರು ಅಕ್ಟೋಬರ್‌ 4ರಂದು ವಿಜಿಲೆನ್ಸ್‌ ತನಿಖೆಗೆ ಆದೇಶಿಸಿದ ನಂತರ ಈ ಹೊಸ ದೂರು ದಾಖಲಾಗಿದೆ.