ಕರ್ನಾಟಕದಲ್ಲಿ ಮದ್ಯ ಸೇವನೆ ಇಳಿಕೆಯಾದರೂ ಅಬಕಾರಿ ಆದಾಯದಲ್ಲಿ ಏರಿಕೆ

ಬೆಂಗಳೂರು,ನ.13- ಕರ್ನಾಟಕದಲ್ಲಿ ಮದ್ಯ ಮಾರಾಟದ ಪ್ರಮಾಣ ಹೆಚ್ಚಾಗಿದ್ದರೂ, ಮದ್ಯದಲ್ಲಿರುವ ಶುದ್ಧ ಮದ್ಯದ ಸೇವನೆ ಪ್ರಮಾಣ ಇಳಿಕೆಯಾಗಿದೆ. 2026ರ ಮೇ-ಸೆಪ್ಟೆಂಬರ್‌ ಅವಧಿಯಲ್ಲಿ ರಾಜ್ಯದಲ್ಲಿ ತಲಾ ಶುದ್ಧ ಮದ್ಯ ಸೇವನೆ ಶೇ.2.4ರಷ್ಟು ಕಡಿಮೆಯಾಗಿದ್ದು, ಇದೇ ವೇಳೆ ಸರ್ಕಾರದ ಅಬಕಾರಿ ಆದಾಯದಲ್ಲಿ ಗಣನೀಯ ಏರಿಕೆ ದಾಖಲಾಗಿದೆ.

ಬ್ರೂವರ್ಸ್‌ ಅಸೋಸಿಯೇಷನ್‌ ಆಫ್‌ ಇಂಡಿಯಾ (ಬಿಎಐ) ನೀಡಿರುವ ಮಾಹಿತಿಯ ಪ್ರಕಾರ, 2026ರ ಮೇ ಮತ್ತು ಸೆಪ್ಟೆಂಬರ್‌ ನಡುವಿನ ಅವಧಿಯಲ್ಲಿ ಕರ್ನಾಟಕದಲ್ಲಿ ತಲಾ ಶುದ್ಧ ಮದ್ಯ ಸೇವನೆ 1.59 ಲೀಟರ್‌ಗೆ ಇಳಿದಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಈ ಪ್ರಮಾಣ 1.63 ಲೀಟರ್‌ ಆಗಿತ್ತು.

ಇದಕ್ಕೆ ವಿರುದ್ಧವಾಗಿ, ಏಪ್ರಿಲ್‌-ಸೆಪ್ಟೆಂಬರ್‌ ಅವಧಿಯಲ್ಲಿ ರಾಜ್ಯದ ಅಬಕಾರಿ ಆದಾಯ ಶೇ.13.4ರಷ್ಟು ಹೆಚ್ಚಾಗಿ 22,191.63 ಕೋಟಿಗೆ ತಲುಪಿದೆ. ಅಂದರೆ, ಮದ್ಯದ ಒಟ್ಟು ಮಾರಾಟ ಮತ್ತು ಸರ್ಕಾರದ ಆದಾಯ ಹೆಚ್ಚಾಗಿದ್ದರೂ, ಪಾನೀಯಗಳಲ್ಲಿರುವ ಶುದ್ಧ ಮದ್ಯದ ಪ್ರಮಾಣ ಕಡಿಮೆಯಾಗಿರುವುದು ಗಮನಾರ್ಹ ಬೆಳವಣಿಗೆಯಾಗಿದೆ.

ಮದ್ಯದ ಪ್ರಮಾಣ ಆಧಾರಿತ ತೆರಿಗೆ ಪದ್ಧತಿ :
ಕರ್ನಾಟಕ ಸರ್ಕಾರ ಮೇ 11ರಿಂದ ಆಲ್ಕೋಹಾಲ್‌-ಇನ್‌-ಬೆವರೇಜ್‌(ಬಿಐಎ) ತೆರಿಗೆ ಪದ್ಧತಿಯನ್ನು ಜಾರಿಗೆ ತಂದಿದೆ. ಈ ವ್ಯವಸ್ಥೆಯಲ್ಲಿ ಪಾನೀಯದ ಒಟ್ಟು ಪ್ರಮಾಣಕ್ಕಿಂತ ಅದರಲ್ಲಿ ಇರುವ ಮದ್ಯದ ಪ್ರಮಾಣವನ್ನು ಆಧರಿಸಿ ತೆರಿಗೆ ವಿಧಿಸಲಾಗುತ್ತದೆ.ಈ ತೆರಿಗೆ ವ್ಯವಸ್ಥೆಯಿಂದ ಗ್ರಾಹಕರು ಮಾತ್ರವಲ್ಲದೆ ಮದ್ಯ ತಯಾರಿಕಾ ಕಂಪನಿಗಳೂ ಕಡಿಮೆ ಆಲ್ಕೋಹಾಲ್‌ ಅಂಶ ಹೊಂದಿರುವ ಉತ್ಪನ್ನಗಳತ್ತ ಸಾಗುವ ಪ್ರವೃತ್ತಿ ಕಂಡುಬಂದಿದೆ ಎಂದು ಬಿಎಐ ಹೇಳಿದೆ.

ರಾಜ್ಯದಲ್ಲಿ ಒಟ್ಟು ಮದ್ಯ ಮಾರಾಟದಲ್ಲಿ ಬಿಯರ್‌ ಮತ್ತು ವೈನ್‌ನ ಪಾಲು ಶೇ.36ರಿಂದ ಶೇ.45ಕ್ಕೆ ಏರಿಕೆಯಾಗಿದೆ. ಮತ್ತೊಂದೆಡೆ, ಹಲವು ಐಎಂಎಫ್‌ಎಲ್‌ ತಯಾರಿಕಾ ಕಂಪನಿಗಳು ತಮ ಉತ್ಪನ್ನಗಳಲ್ಲಿನ ಮದ್ಯದ ಸಾಂದ್ರತೆಯನ್ನು 42.8%ರಿಂದ 40%ಕ್ಕೆ ಇಳಿಸಿವೆ. ಇದರ ಪರಿಣಾಮವಾಗಿ ಕರ್ನಾಟಕದಲ್ಲಿ ಮಾರಾಟವಾಗುತ್ತಿರುವ ಐಎಂಎಫ್‌ ಎಲ್‌ ಸರಾಸರಿ ಆಲ್ಕೋಹಾಲ್‌ ಸಾಂದ್ರತೆ 40.5%ಕ್ಕೆ ಇಳಿಕೆಯಾಗಿದೆ ಎಂದು ಸಂಘಟನೆ ತಿಳಿಸಿದೆ.

ಮಾರಾಟ ಶೇ.16ರಷ್ಟು ಹೆಚ್ಚಾದರೂ ಶುದ್ಧ ಮದ್ಯ ಬಳಕೆ ಇಳಿಕೆ :
ಆಸಕ್ತಿದಾಯಕವಾಗಿ, ರಾಜ್ಯದಲ್ಲಿ ಮದ್ಯಪಾನೀಯಗಳ ಒಟ್ಟು ಮಾರಾಟ ಪ್ರಮಾಣ ಶೇ.16ರಷ್ಟು ಹೆಚ್ಚಾಗಿದೆ. ಆದರೆ ಈ ಪಾನೀಯಗಳಲ್ಲಿರುವ ಶುದ್ಧ ಮದ್ಯದ ಪ್ರಮಾಣ ಮಾತ್ರ ಶೇ.2.4ರಷ್ಟು ಕಡಿಮೆಯಾಗಿದೆ.ಏಪ್ರಿಲ್‌-ಸೆಪ್ಟೆಂಬರ್‌ ಅವಧಿಯಲ್ಲಿ ಐಎಂಎಫ್‌ಎಲ್‌ ಪ್ರಕರಣಗಳ ಮಾರಾಟವೂ ಶೇ.1.1ರಷ್ಟು ಹೆಚ್ಚಾಗಿದೆ. ಹಿಂದಿನ ವರ್ಷದ ಇದೇ ಅವಧಿಯಲ್ಲಿ ಐಎಂಎಫ್‌ಎಲ್‌ ಮಾರಾಟದಲ್ಲಿ ಶೇ.1ರಷ್ಟು ಕುಸಿತ ದಾಖಲಾಗಿತ್ತು.

ಬಿಎಐ ಮಹಾನಿರ್ದೇಶಕ ವಿನೋದ್‌ ಗಿರಿ ಅವರ ಪ್ರಕಾರ, ಮದ್ಯದ ಪ್ರಮಾಣಕ್ಕೆ ಅನುಗುಣವಾಗಿ ತೆರಿಗೆ ವಿಧಿಸುವುದರಿಂದ ಬಳಕೆಯಲ್ಲಿನ ಇಳಿಕೆಗೆ ಕಾರಣವಾಗಿರುವ ಜಾಗತಿಕ ಉದಾಹರಣೆಗಳಿವೆ. ಕರ್ನಾಟಕದಲ್ಲಿ ಈ ರೀತಿಯ ಬದಲಾವಣೆ ಕಡಿಮೆ ಅವಧಿಯಲ್ಲೇ ಗಮನಾರ್ಹವಾಗಿ ಕಂಡುಬಂದಿರುವುದು ವಿಶೇಷ ಎಂದು ಅವರು ಹೇಳಿದ್ದಾರೆ.

ಒಟ್ಟಿನಲ್ಲಿ, ಕರ್ನಾಟಕದಲ್ಲಿ ಮದ್ಯದ ಮಾರಾಟದಿಂದ ಸರ್ಕಾರದ ಆದಾಯ ಹೆಚ್ಚಾಗುತ್ತಿದ್ದರೂ, ಗ್ರಾಹಕರು ಮತ್ತು ಉತ್ಪಾದಕರು ಕಡಿಮೆ ಆಲ್ಕೋಹಾಲ್‌ ಅಂಶದ ಪಾನೀಯಗಳತ್ತ ಸಾಗುತ್ತಿರುವ ಚಿತ್ರಣ ಕಂಡುಬರುತ್ತಿದೆ. ಬಿಐಎ ತೆರಿಗೆ ವ್ಯವಸ್ಥೆಯ ಪರಿಣಾಮವಾಗಿ ಮುಂದಿನ ತಿಂಗಳುಗಳಲ್ಲಿ ಮದ್ಯ ಸೇವನೆಯ ಪ್ರಮಾಣ ಮತ್ತು ರಾಜ್ಯದ ಅಬಕಾರಿ ಆದಾಯದ ಮೇಲೆ ಯಾವ ರೀತಿಯ ಪರಿಣಾಮ ಬೀರುತ್ತದೆ ಎಂಬುದು ಗಮನಾರ್ಹವಾಗಲಿದೆ.