ನವದೆಹಲಿ,ಆ.13- ರಾಜ್‌ಘಾಟ್‌ನ ಕೆಂಪುಕೋಟೆಯಲ್ಲಿ ನಡೆಯಲಿರುವ 78ನೇ ಸ್ವಾತಂತ್ರ್ಯೋತ್ಸವ ದಿನಾಚರಣೆ ಹಿನ್ನಲೆಯಲ್ಲಿ ಯಾವುದೇ ಅಹಿತಕ ಘಟನೆ ನಡೆಯದಂತೆ ಮುನ್ನೆಚ್ಚರಿಕೆ ವಹಿಸಿರುವ ದೆಹಲಿ ಪೊಲೀಸರು ಹೆಚ್ಚಿನ ಬಿಗಿಭದ್ರತೆಯನ್ನು ಕೈಗೊಂಡಿದ್ದಾರೆ.
3,000 ಟ್ರಾಫಿಕ್‌ ಪೊಲೀಸ್‌ ಅಧಿಕಾರಿಗಳು, 10,000ಕ್ಕೂ ಹೆಚ್ಚು ಪೊಲೀಸ್‌ ಸಿಬ್ಬಂದಿಗಳ ನಿಯೋಜನೆ, 700 ಎಐ ಆಧಾರಿತ ಮುಖ ಗುರುತಿಸುವಿಕೆ ಕ್ಯಾಮೆರಾಗಳನ್ನು ಅಳವಡಿಸುವ ಮೂಲಕ ಭದ್ರತಾ ವ್ಯವಸ್ಥೆಯನ್ನು ಹೆಚ್ಚಿಸಲಾಗಿದೆ.
ಐಜಿಐ ವಿಮಾನ ನಿಲ್ದಾಣ, ರೈಲು ನಿಲ್ದಾಣಗಳು, ಬಸ್‌ ನಿಲ್ದಾಣಗಳು, ಮಾಲ್‌ಗಳು ಮತ್ತು ಮಾರುಕಟ್ಟೆಗಳು ಸೇರಿದಂತೆ ವಿವಿಧ ಸ್ಥಳಗಳಲ್ಲಿ ಹೆಚ್ಚುವರಿ ಪೊಲೀಸ್‌ ತಂಡಗಳು ಮತ್ತು ಅರೆಸೇನಾ ಪಡೆಗಳನ್ನು ನಿಯೋಜಿಸಲಾಗಿದೆ.
ಸಮಾರಂಭ ಮುಗಿಯುವವರೆಗೆ ಕೆಂಪು ಕೋಟೆಯ ಸುತ್ತಲಿನ ಪ್ರದೇಶಗಳನ್ನು ಗಾಳಿಪಟ ಹಾರಿಸದ ವಲಯ ಎಂದು ಗೊತ್ತುಪಡಿಸಲಾಗಿದೆ. ಇದಕ್ಕಾಗಿ ಅಗತ್ಯ ಸಾಧನಗಳೊಂದಿಗೆ ಸಿಬ್ಬಂದಿಯನ್ನು ಪ್ರಮುಖ ಸ್ಥಳಗಳಲ್ಲಿ ನಿಯೋಜಿಸಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.
ಭದ್ರತಾ ಕಾರಣಗಳಿಗಾಗಿ ಆಗಸ್ಟ್‌ 2-16ರಿಂದ ರಾಷ್ಟ್ರ ರಾಜಧಾನಿಯಲ್ಲಿ ಪ್ಯಾರಾಗ್ಲೈಡರ್‌ಗಳು, ಹ್ಯಾಂಗ್‌-ಗ್ಲೈಡರ್‌ಗಳು ಮತ್ತು ಬಿಸಿ ಗಾಳಿಯ ಬಲೂನ್‌ಗಳಂತಹ ಉಪ-ಸಾಂಪ್ರದಾಯಿಕ ವೈಮಾನಿಕ ವೇದಿಕೆಗಳನ್ನು ಹಾರಿಸುವುದನ್ನು ದೆಹಲಿ ಪೊಲೀಸರು ನಿಷೇಧಿಸಿದ್ದಾರೆ.
ಕೆಂಪು ಕೋಟೆಯ ಸುತ್ತ ಮುಂಜಾನೆ 4ರಿಂದ 10ರವರೆಗೆ ಸಂಚಾರ ನಿರ್ಬಂಧಗಳು ಜಾರಿಯಲ್ಲಿರುತ್ತವೆ ಮತ್ತು ಲೇಬಲ್‌ ಮಾಡಿದ ವಾಹನಗಳಿಗೆ ಮಾತ್ರ ಪ್ರವೇಶವನ್ನು ಅನುಮತಿಸಲಾಗುತ್ತಿದೆ.
ನೇತಾಜಿ ಸುಭಾಷ್‌ ಮಾರ್ಗ ದೆಹಲಿ ಗೇಟ್‌ನಿಂದ ಚಟ್ಟಾ ರೈಲು, ಲೋಥಿಯನ್‌ ರಸ್ತೆ ಜಿಪಿಒ ದೆಹಲಿಯಿಂದ ಚಟ್ಟಾ ರೈಲು, ಎಸ್‌‍ಪಿ ಮುಖರ್ಜಿ ಮಾರ್ಗ ಹೆಚ್‌ಸಿ ಸೇನ್‌ ಮಾರ್ಗದಿಂದ ಯಮುನಾ ಬಜಾರ್‌ ಚೌಕ್‌, ಚಾಂದಿನಿ ಚೌಕ್‌ ರಸ್ತೆ ಫೌಂಟೇನ್‌ ಚೌಕ್‌ನಿಂದ ಕೆಂಪು ಕೋಟೆ, ನಿಶಾದ್‌ ರಾಜ್‌ ಮಾರ್ಗ ರಿಂಗ್‌ ರಸ್ತೆಯಿಂದ ನೇತಾಜಿ ಸುಭಾಷ್‌ ಮಾರ್ಗ, ಎಸ್ಪ್ಲನೇಡ್‌ ರಸ್ತೆ ಮತ್ತು ಅದರ ಲಿಂಕ್‌ ರಸ್ತೆ ನೇತಾಜಿ ಸುಭಾಷ್‌ ಮಾರ್ಗ, ರಿಂಗ್‌ ರಸ್ತೆ ರಾಜ್‌ಘಾಟ್‌ನಿಂದ ಎಸ್‌‍ಬಿಟಿವರೆಗೆ ಸಂಚಾರವನ್ನು ನಿರ್ಬಂಧಿಸುವ ಮಾರ್ಗಗಳೆಂದು ಪಟ್ಟಿ ಮಾಡಲಾಗಿದೆ.