ವಾಷಿಂಗ್ಟನ್‌, ಅ. 17- ಅಮೆರಿಕದಲ್ಲಿ ಟ್ರಿಲಿಯನ್‌ಗಟ್ಟಲೆ ಡಾಲರ್‌ ಮೌಲ್ಯದ ಹೂಡಿಕೆಗಳ ಪಟ್ಟಿಯನ್ನು ಶ್ವೇತಭವನ ಪ್ರಕಟಿಸಿದ್ದು, ಇದರಲ್ಲಿ ಭಾರತದಿಂದ 330 ಬಿಲಿಯನ್‌ ಡಾಲರ್‌ಗೂ ಅಧಿಕ ಹೂಡಿಕೆಗಳು ಸೇರಿವೆ. ಈ ಮೂಲಕ ಅಮೆರಿಕದಲ್ಲಿ ಪ್ರಮುಖ ಹೂಡಿಕೆದಾರ ರಾಷ್ಟ್ರಗಳ ಪೈಕಿ ಭಾರತವೂ ಸ್ಥಾನ ಪಡೆದಿದೆ.
ಶ್ವೇತಭವನದ ಯೂಟ್ಯೂಬ್‌ ಚಾನೆಲ್‌ನಲ್ಲಿ ನಿರಂತರವಾಗಿ ಪ್ರಸಾರವಾಗುವ ಹೂಡಿಕೆಗಳ ಪಟ್ಟಿಯಲ್ಲಿ, ಅಯೋವಾದಲ್ಲಿ ಎಸ್ಸಾರ್‌ ಗ್ರೂಪ್‌ನ ಮೆಸಾಬಿ ಮೆಟಾಲಿಕ್ಸ್‌ ಘೋಷಿಸಿರುವ 15 ಬಿಲಿಯನ್‌ ಡಾಲರ್‌ ಮೌಲ್ಯದ ಉಕ್ಕಿನ ಸ್ಥಾವರದ ಯೋಜನೆಯೂ ಸೇರಿದೆ. ಅಮೆರಿಕದಲ್ಲಿ ಹೂಡಿಕೆ ಮಾಡುವ ದೇಶಗಳ ಪಟ್ಟಿಯಲ್ಲಿ ಭಾರತಕ್ಕೆ ಎರಡು ನಮೂದುಗಳಿವೆ. ಒಂದು 310 ಬಿಲಿಯನ್‌ ಡಾಲರ್‌ ಮತ್ತು ಮತ್ತೊಂದು 20.5 ಬಿಲಿಯನ್‌ ಡಾಲರ್‌ ಹೂಡಿಕೆಯನ್ನು ಒಳಗೊಂಡಿದೆ.
“ಈ ಶುಕ್ರವಾರ ಅಮೆರಿಕಕ್ಕೆ ಹರಿದುಬರುತ್ತಿರುವ ಟ್ರಿಲಿಯನ್‌ಗಟ್ಟಲೆ ಡಾಲರ್‌ಗಳ ಹೂಡಿಕೆಯ ಸಿಹಿ ಸುದ್ದಿಯನ್ನು ಆನಂದಿಸುತ್ತಾ ಕುಳಿತುಕೊಳ್ಳಿ, ವಿಶ್ರಾಂತಿ ಪಡೆಯಿರಿ” ಎಂದು ಶ್ವೇತಭವನವು ಎಕ್ಸ್‌ (X) ಪೋಸ್ಟ್‌ನಲ್ಲಿ ತಿಳಿಸಿದೆ. ಈ ಕುರಿತು ಕೇಳಲಾದ ಪ್ರಶ್ನೆಗಳಿಗೆ ಶ್ವೇತಭವನದಿಂದ ತಕ್ಷಣದ ಪ್ರತಿಕ್ರಿಯೆ ಬಂದಿಲ್ಲ.
ಮಾರ್ಚ್‌ನಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್, ರಿಲಯನ್ಸ್‌ ಇಂಡಸ್ಟ್ರೀಸ್‌ ತೈಲ ಸಂಸ್ಕರಣಾಗಾರ ಸ್ಥಾಪಿಸಲು 300 ಬಿಲಿಯನ್‌ ಡಾಲರ್‌ ಹೂಡಿಕೆ ಮಾಡುತ್ತಿದೆ ಎಂದು ಘೋಷಿಸಿದ್ದರು. ಮೇ ತಿಂಗಳಲ್ಲಿ ನಡೆದ ಸೆಲೆಕ್ಟ್‌ಯುಎಸ್‌ಎ ಹೂಡಿಕೆ ಶೃಂಗಸಭೆಯ ಸಂದರ್ಭದಲ್ಲಿ ಭಾರತೀಯ ಉದ್ಯಮ ವಲಯವು ಅಮೆರಿಕದಲ್ಲಿ 20.5 ಬಿಲಿಯನ್‌ ಡಾಲರ್‌ ಹೂಡಿಕೆ ಮಾಡುವ ಯೋಜನೆಯನ್ನು ಪ್ರಕಟಿಸಿತ್ತು.
ಅಮೆರಿಕದ ಹಾಗೂ ವಿದೇಶಿ ರಾಷ್ಟ್ರಗಳ ಖಾಸಗಿ ಉದ್ಯಮಗಳಿಂದ ಒಟ್ಟು 10.871 ಟ್ರಿಲಿಯನ್‌ ಡಾಲರ್‌ ಹೂಡಿಕೆಗಳು ದಾಖಲಾಗಿವೆ. ಮಧ್ಯಂತರ ಚುನಾವಣೆಗಳ ಹಿನ್ನೆಲೆಯಲ್ಲಿ ನಡೆಯುತ್ತಿರುವ ಸಾರ್ವಜನಿಕ ರ್ಯಾಲಿಗಳಲ್ಲಿ ಟ್ರಂಪ್ ತಮ್ಮ ಆಡಳಿತವು ಅಮೆರಿಕದ ಆರ್ಥಿಕತೆಗೆ 20 ಟ್ರಿಲಿಯನ್‌ ಡಾಲರ್‌ಗೂ ಅಧಿಕ ಮೌಲ್ಯದ ಹೂಡಿಕೆಗಳು ಮತ್ತು ಹೂಡಿಕೆ ಬದ್ಧತೆಗಳನ್ನು ಆಕರ್ಷಿಸಿದೆ ಎಂದು ಹೇಳಿಕೊಂಡಿದ್ದಾರೆ.
