ಸೂರತ್, ಜು.22- 11ನೇ ತರಗತಿಯಲ್ಲಿಯೇ ಶಿಕ್ಷಣವನ್ನು ಅರ್ಧಕ್ಕೆ ನಿಲ್ಲಿಸಿದ್ದ 18 ವರ್ಷದ ಯುವಕನೊಬ್ಬ, ಕೃತಕ ಬುದ್ಧಿಮತ್ತೆ (ಎಐ) ಮತ್ತು ಟೆಲಿಗ್ರಾಮ್ ಬಳಸಿ ಕೋಟ್ಯಂತರ ರೂ. ವಂಚನೆ ಎಸಗುತ್ತಿದ್ದ ಬೃಹತ್ ಸೈಬರ್ ಅಪರಾಧ ಜಾಲದ ಪ್ರಮುಖ ರೂವಾರಿಯನ್ನು ನಗರದ ಸೈಬರ್ ಅಪರಾಧ ವಿಭಾಗದ ಪೊಲೀಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಉತ್ತರ ಪ್ರದೇಶದ ಕಾನ್ಪುರದ ಹೋಟೆಲ್ ಒಂದರಲ್ಲಿ ಸೆರೆಸಿಕ್ಕ ಆರೋಪಿಯನ್ನು ರೋಹಿತ್ ವೀರೇಂದ್ರಸಿಂಹ ಶಾಕ್ಯ ಎಂದು ಗುರುತಿಸಲಾಗಿದೆ.ಈ ಯುವಕ ಕೇವಲ 16ನೇ ವಯಸ್ಸಿನಲ್ಲೇ ಪರಿಣಿತ ಕೋಡರ್ ಆಗಿ ರೂಪುಗೊಂಡಿದ್ದು, ದೇಶಾದ್ಯಂತ ಸೈಬರ್ ವಂಚಕರಿಗೆ ಹಾನಿಕಾರಕ ಎಪಿಕೆ ಫೈಲ್ಗಳನ್ನು ಸರಬರಾಜು ಮಾಡುತ್ತಿದ್ದನು.
ಆರೋಪಿ ರೋಹಿತ್ ಶಾಕ್ಯ ಅತ್ಯಂತ ವ್ಯವಸ್ಥಿತವಾಗಿ ಚಂದಾದಾರಿಕೆ ಮಾದರಿಯಲ್ಲಿ ಈ ಕೃತ್ಯ ಎಸಗುತ್ತಿದ್ದನು.ಸೈಬರ್ ಅಪರಾಧಿಗಳಿಗೆ ಕಸ್ಟಮೈಸ್ ಮಾಡಿದ ಮಾಲ್ವೇರ್ ಹಾಗೂ ನಕಲಿ ಆ್ಯಪ್ಗಳನ್ನು ತಿಂಗಳಿಗೆ 15 ಸಾವಿರ ರೂ. ನಂತೆ ಮಾರಾಟ ಮಾಡುತ್ತಿದ್ದನು. ಜಾರ್ಖಂಡ್ನ ಜಮತಾರಾ, ಹರಿಯಾಣ ಹಾಗೂ ರಾಜಸ್ಥಾನದ ಕುಖ್ಯಾತ ಸೈಬರ್ ಕಳ್ಳರ ಜಾಲಗಳಿಗೆ ಈ ಸಾಫ್್ಟವೇರ್ ಪೂರೈಕೆಯಾಗುತ್ತಿತ್ತು.
ಶಾಕ್ಯ ಎರಡು ರೀತಿಯ ಆ್ಯಪ್ಗಳನ್ನು ಸಿದ್ಧಪಡಿಸಿದ್ದನು. ವಂಚನೆಗೆ ಒಳಗಾಗುವವರ ಮೊಬೈಲ್ನಲ್ಲಿ ಇನ್ಸ್ಟಾಲ್ ಆಗುವ ವಿಕ್ಟಿಮ್ ಆ್ಯಪ್ ಮತ್ತು ವಂಚಕರಿಗೆ ರಿಯಲ್-ಟೈಮ್ನಲ್ಲಿ ಒಟಿಪಿ ಹಾಗೂ ಬ್ಯಾಂಕಿಂಗ್ ವಿವರಗಳನ್ನು ರವಾನಿಸುವ ಅಡಿನಿಸ್ಟ್ರೇಟರ್ ಆ್ಯಪ್.
ಎಸ್ಬಿಐ, ಪಿಎನ್ಬಿ, ಆ್ಯಕ್ಸಿಸ್ ಬ್ಯಾಂಕ್, ಐಸಿಐಸಿಐ ಬ್ಯಾಂಕ್, ಯೂನಿಯನ್ ಬ್ಯಾಂಕ್, ಆಧಾರ್ ಸೇವೆಗಳು, ಪಿಎಂ ಕಿಸಾನ್ ಮತ್ತು ಆರ್ಟಿಒ ಚಲನ್ ಪಾವತಿ ಪೋರ್ಟಲ್ಗಳಂತಹ ಜನಪ್ರಿಯ ಹಾಗೂ ಅಧಿಕೃತ ಆ್ಯಪ್ಗಳನ್ನೇ ಹೋಲುವ ನಕಲಿ ಆ್ಯಪ್ಗಳನ್ನು ಈತ ನಿರ್ಮಿಸುತ್ತಿದ್ದನು.
ಪ್ರಕರಣ ಬೆಳಕಿಗೆ ಬಂದದ್ದು ಹೇಗೆ?
ಈ ವರ್ಷದ ಮೇ ತಿಂಗಳಲ್ಲಿ ಸೂರತ್ನ ನಿವಾಸಿಯೊಬ್ಬರು ಸೈಬರ್ ವಂಚನೆಗೆ ಒಳಗಾಗಿ 5 ಲಕ್ಷ ರೂ. ಕಳೆದುಕೊಂಡಿರುವುದಾಗಿ ನೀಡಿದ ದೂರಿನ ಮೇರೆಗೆ ಈ ಜಾಲದ ಬೇರು ಬಯಲಾಗಿದೆ.
ಸಂತ್ರಸ್ತರಿಗೆ ವಾಟ್ಸಾಪ್ ಮೂಲಕ ನಕಲಿ ಫೈಲ್ ಬಂದಿದ್ದು, ಅದನ್ನು ಪಂಜಾಬ್ ನ್ಯಾಷನಲ್ ಬ್ಯಾಂಕ್ನ ಅಧಿಕೃತ ಆ್ಯಪ್ ಎಂದು ನಂಬಿ ಇನ್ಸ್ಟಾಲ್ ಮಾಡಿಕೊಳ್ಳಲಾಗಿತ್ತು. ತಕ್ಷಣವೇ ಮೊಬೈಲ್ನ ನಿಯಂತ್ರಣ ಪಡೆದ ವಂಚಕರು, ಸಂತ್ರಸ್ತರ ಖಾತೆಯಿಂದ ಹಣವನ್ನು ಬೇರೆ ಖಾತೆಗೆ ವರ್ಗಾಯಿಸಿಕೊಂಡಿದ್ದರು.
ಕೂಡಲೇ ಸಂತ್ರಸ್ತರು ಸೈಬರ್ ಸಹಾಯವಾಣಿ (1930) ಸಂಪರ್ಕಿಸಿದ ಹಿನ್ನೆಲೆಯಲ್ಲಿ ಸೂರತ್ ಪೊಲೀಸರು ಎಫ್ಐಆರ್ ದಾಖಲಿಸಿ ತನಿಖೆ ಚುರುಕುಗೊಳಿಸಿದ್ದರು.ಪೊಲೀಸರು ನಡೆಸಿದ ತನಿಖೆ ಮತ್ತು ಡಿಜಿಟಲ್ ಫೋರೆನ್ಸಿಕ್ ವಿಶ್ಲೇಷಣೆಯಿಂದ ಆಘಾತಕಾರಿ ಸಂಗತಿಗಳು ಹೊರಬಂದಿವೆ.
ಆರೋಪಿ ಶಾಕ್ಯ ಒಟ್ಟು 121 ದುರುದ್ದೇಶ ಪೂರಿತ ಅಪ್ಲಿಕೇಶನ್ಗಳನ್ನು ಅಭಿವೃದ್ಧಿ ಪಡಿಸಿದ್ದನು. ಈ ನಕಲಿ ಆ್ಯಪ್ಗಳು ದೇಶಾದ್ಯಂತ ಒಟ್ಟು 21,672 ಮೊಬೈಲ್ ಫೋನ್ಗಳಲ್ಲಿ ಇನ್ಸ್ಟಾಲ್ ಆಗಿರುವುದು ಪತ್ತೆಯಾಗಿದೆ.
ಇವುಗಳಲ್ಲಿ 2,928 ಸಾಧನಗಳು ಸಂಪೂರ್ಣವಾಗಿ ದುರುಪಯೋಗಗೊಂಡಿದ್ದು, ಬರೋಬ್ಬರಿ 64.38 ಕೋಟಿ ರೂ. ಮೌಲ್ಯದ 54,094 ವಂಚನೆಯ ಬ್ಯಾಂಕಿಂಗ್ ವಹಿವಾಟುಗಳು ನಡೆದಿರುವುದು ದೃಢಪಟ್ಟಿದೆ. ಈ ಪೈಕಿ ನಕಲಿ ಆರ್ಟಿಒ ಚಲನ್ ಆ್ಯಪ್ಗಳು ಅತಿ ಹೆಚ್ಚು ವಂಚನೆಗಳಿಗೆ ಕಾರಣವಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸೂರತ್ ಪೊಲೀಸರು ಆರೋಪಿಯಿಂದ ಎರಡು ಮೊಬೈಲ್ ಫೋನ್ಗಳು ಮತ್ತು ಒಂದು ಲ್ಯಾಪ್ಟಾಪ್ ಅನ್ನು ವಶಪಡಿಸಿಕೊಂಡಿದ್ದು, ಈ ಜಾಲದಲ್ಲಿ ಇನ್ನೂ ಯಾರ್ಯಾರು ಭಾಗಿಯಾಗಿದ್ದಾ ೆ ಮತ್ತು ದೇಶದ ಇಂತಹಇತರ ಸೈಬರ್ ದಂಧೆಗಳಿಗೆ ಈ ಸಾಫ್್ಟವೇರ್ ಬಳಕೆಯಾಗಿದೆಯೇ ಎಂಬ ಪ್ರಕರಣದ ತನಿಖೆ ಮುಂದುವರೆಸಿದ್ದಾರೆ.