ಥಾಣೆ, ಅ 3-ತನ್ನ ಗೆಳತಿಯನ್ನು ಕೊಂದು ಸುಮಾರು ಆರು ತಿಂಗಳಿನಿಂದ ತಲೆಮರೆಸಿಕೊಂಡಿದ್ದ ಯುವಕನನ್ನು ಪೊಲೀಸರು ಬಂಧಿಸಿದ್ದಾರೆ. ಪನ್ವೇಲ್‍ನ ಮಲ್ಧಕ್ಕಾ ಸ್ಲಂ ಕಾಲೋನಿಯ ಪಾಂಡವ್ ಗೋರಖ್ ಜಾಧವ್ ಪಾಂಡ(21) ಬಂಧಿತ ಆರೋಪಿ.
ನವಿ ಮುಂಬೈ ಟೌನ್‍ಶಿಪ್‍ನ ಮಹಿಳೆಯನ್ನು ಪ್ರೀತಿಸಿ ಆಕೆಯೊಂದೆಗೆ ಆತ ನೆಲೆಸಿದ್ದ. ಕಳೆದ 2023,ಅಕ್ಟೋಬರ್ 10, ರಂದು, ನವಿ ಮುಂಬೈನ ಪನ್ವೆಲ್ ಪ್ರದೇಶದ ಭಿಂಗ್ರಿ ಗ್ರಾಮದ ಬಳಿ ಮಹಿಳೆ ಶವ ಕಂಡುಬಂದಿತ್ತು ಕೊಲೆ ಪ್ರಕರಣ ದಾಖಲಿಸಿಕೊಂಡು ತನಿಖೆಯ ನಡೆಸಿದಾಗ ಪೊಲೀಸರು ಮಹಿಳೆ ಗುರುತು ಪತ್ತೆಹಚ್ಚಿ ಆಕೆಯೊಂದಿಗೆ ಇದ್ದ ಯುವಕ ನಾಪತ್ತೆಯಾಗಿರುವುದು ಗೊತ್ತಾಗಿತ್ತು ಎಂದು ಹಿರಿಯ ಪೊಲೀಸ್ ಇನ್ಸ್ ಪೆಕ್ಟರ್ ಸುನಿಲ್ ಶಿಂಧೆ ತಿಳಿಸಿದ್ದಾರೆ.
ಆಕೆಯ ಕತ್ತು ಹಿಸುಕಿ ಆತನೇ ಕೊಲೆ ಮಾಡಿ ನಂತರ ಪರಾರಿಯಾಗಿದ್ದಾನೆ ಎಂದು ಖಚಿತ ಪಡಿಸಿಕೊಂಡು ಆತನ ಪತ್ತೆಗೆ ಬಲೆ ಬೀಸಲಾಗಿತ್ತು.ಇತ್ತೀಚೆಗೆ ಆರೋಪಿ ಪನ್ವೇಲ್‍ನ ಮಾಲ್‍ವೊಂದಕ್ಕೆ ಬರುತ್ತಾನೆ ಎಂದು ಪೊಲೀಸರಿಗೆ ಸುಳಿವು ಸಿಕ್ಕಿತ್ತು ಇದರ ಆಧಾರದ ಮೇಲೆ ಕಾರ್ಯಾಚರಣೆ ನಡೆಸಿ ಬಂಧಿಸಲಾಗಿದೆ.
ಇಬ್ಬರು ಮದ್ಯ ಸೇವಿಸಿ ಸಣ್ಣ ವಿಚಾರಕ್ಕೆ ಜಗಳ ನಡೆದು ಅದು ವಿಕೋಪಕ್ಕೆ ತಿರುಗಿ ಮಹಿಳೆಯನ್ನು ಕತ್ತು ಹಿಸುಕಿ ಕೊಲೆ ಮಾಡಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.