ನವದೆಹಲಿ,ಆ.28- ದೇಶದ ರಾಜಕೀಯ ವಲಯದಲ್ಲಿ ತೀವ್ರ ಕುತೂಹಲ ಮೂಡಿಸಿರುವ ಇಂಡಿಯಾ ಟುಡೇ-ಸಿವೋಟರ್ ಮೂಡ್ ಆಫ್ ದಿ ನೇಷನ್ ಸಮೀಕ್ಷೆ (ಎಂಒಟಿಎನ್)ಯ ವರದಿ ಹೊರಬಂದಿದ್ದು, ಪ್ರಸ್ತುತ ರಾಜಕೀಯ ಪರಿಸ್ಥಿತಿ ಹಾಗೂ ಇಂದಿನ ವಾಸ್ತವಿಕತೆಯ ಸಮಗ್ರ ಚಿತ್ರಣವನ್ನು ಇದು ನೀಡಿದೆ.
ಎನ್ಡಿಎಗೆ ಮುನ್ನಡೆ:
ಈಗ ಲೋಕಸಭಾ ಚುನಾವಣೆ ನಡೆದರೆ ಬಿಜೆಪಿ ನೇತೃತ್ವದ ಎನ್ಡಿಎ ಮೈತ್ರಿಕೂಟವು 326 ಸ್ಥಾನಗಳನ್ನು ಗಳಿಸುವ ಮೂಲಕ ಆರಾಮದಾಯಕ ಬಹುಮತದೊಂದಿಗೆ ಅಧಿಕಾರವನ್ನು ಉಳಿಸಿಕೊಳ್ಳಲಿದೆ ಎಂದು ಸಮೀಕ್ಷೆ ಭವಿಷ್ಯ ನುಡಿದಿದೆ.
ಜನವರಿಯಲ್ಲಿ ನಡೆದ ಹಿಂದಿನ ಸಮೀಕ್ಷೆಯಲ್ಲಿ ಎನ್ಡಿಎ 352 ಸ್ಥಾನಗಳನ್ನು ಪಡೆಯಲಿದೆ ಎಂದು ಅಂದಾಜಿಸಲಾಗಿತ್ತು. ಪ್ರಸ್ತುತ ಸಮೀಕ್ಷೆಯಲ್ಲಿ ಈ ಸಂಖ್ಯೆ 326ಕ್ಕೆ ಇಳಿದಿದ್ದು, ಆಡಳಿತಾರೂಢ ಮೈತ್ರಿಕೂಟದ ಸ್ಥಾನಗಳಲ್ಲಿ 26ರಷ್ಟು ಕುಸಿತ ಕಂಡುಬಂದಿದೆ.
ಬಿಜೆಪಿ-ಕಾಂಗ್ರೆಸ್ ಸ್ಥಾನಗಳು
ಪ್ರಸ್ತುತ ಸಮೀಕ್ಷೆಯ ಪ್ರಕಾರ ಬಿಜೆಪಿಗೆ ಪ್ರತ್ಯೇಕವಾಗಿ 261 ಸ್ಥಾನಗಳು ಸಿಗುವ ನಿರೀಕ್ಷೆಯಿದೆ (ಜನವರಿಯಲ್ಲಿ ಇದು 287 ಇತ್ತು). ಮತ್ತೊಂದೆಡೆ, ಕಾಂಗ್ರೆಸ್ ಪಕ್ಷಕ್ಕೆ ಗಮನಾರ್ಹ ಲಾಭವಾಗಿದ್ದು, ಹಿಂದಿನ ಸಮೀಕ್ಷೆಯಲ್ಲಿದ್ದ 80 ಸ್ಥಾನಗಳಿಂದ ಈ ಬಾರಿ 106 ಸ್ಥಾನಗಳಿಗೆ ಏರಿಕೆಯಾಗುವ ಸಾಧ್ಯತೆಯಿದೆ.
ಇಂಡಿಯಾ ಬ್ಲಾಕ್ ಸ್ಥಿತಿ:
ಕಾಂಗ್ರೆಸ್ ನೇತೃತ್ವದ ಇಂಡಿಯಾ ಮೈತ್ರಿಕೂಟಕ್ಕೆ ಒಟ್ಟಾರೆ 185 ಸ್ಥಾನಗಳು ಸಿಗಬಹುದು ಎಂದು ಅಂದಾಜಿಸಲಾಗಿದೆ. ಇದು 2024ರ ಚುನಾವಣೆಯಲ್ಲಿ ಗಳಿಸಿದ್ದ 234 ಸ್ಥಾನಗಳಿಗೆ ಹೋಲಿಸಿದರೆ ಕಡಿಮೆ.
ಮತ ಹಂಚಿಕೆ ವಿವರ:
ಎನ್ಡಿಎ ಮೈತ್ರಿಕೂಟದ ಮತ ಹಂಚಿಕೆಯು ಜನವರಿಯ ಶೇ. 47 ರಿಂದ ಶೇ. 45.1ಕ್ಕೆ ಕುಸಿದಿದೆ. ಅದೇ ಸಮಯದಲ್ಲಿ, ಇಂಡಿಯಾ ಮೈತ್ರಿಕೂಟದ ಮತ ಹಂಚಿಕೆಯು ಶೇ. 39.1ರಷ್ಟು ಇರಲಿದೆ ಎಂದು ಸಮೀಕ್ಷೆ ತಿಳಿಸಿದೆ.
ಬದಲಾವಣೆಗಳಿಗೆ ಪ್ರಮುಖ ಕಾರಣಗಳು:
ಶಿಕ್ಷಣ ವ್ಯವಸ್ಥೆಯಲ್ಲಿನ ಅಕ್ರಮಗಳು, ಪರೀಕ್ಷಾ ಪ್ರಶ್ನೆಪತ್ರಿಕೆ ಸೋರಿಕೆ ಪ್ರಕರಣಗಳು ಹಾಗೂ ಯುವ ಮತದಾರರ (ಜನರೇಷನ್ ಝಡ್) ಅಸಮಾಧಾನದಂತಹ ಇತ್ತೀಚಿನ ವಿದ್ಯಮಾನಗಳು ಬಿಜೆಪಿಯ ಬೆಂಬಲದಲ್ಲಿ ಸ್ವಲ್ಪ ಮಟ್ಟಿನ ಸವೆತ ಉಂಟುಮಾಡಿದೆ. ಜುಲೈ ತಿಂಗಳಲ್ಲಿ ದೆಹಲಿಯಲ್ಲಿ ನಡೆದ ವಿದ್ಯಾರ್ಥಿಗಳ ನಿರಂತರ ಪ್ರತಿಭಟನೆ ಹಾಗೂ ಪ್ರಮುಖ ಬೆಳವಣಿಗೆಗಳು ರಾಜಕೀಯ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದ್ದವು.
ಮತ್ತೊಂದೆಡೆ, ಮಹಿಳಾ ಮೀಸಲಾತಿ ಹಾಗೂ ವಿದ್ಯಾರ್ಥಿ ಸಮಸ್ಯೆಗಳಂತಹ ಪ್ರಮುಖ ವಿಷಯಗಳನ್ನು ಮುನ್ನೆಲೆಗೆ ತರುವ ಮೂಲಕ ಕಾಂಗ್ರೆಸ್ ಮತ್ತು ವಿರೋಧ ಪಕ್ಷಗಳು ತಮ ಜನಪ್ರಿಯತೆಯನ್ನು ಹೆಚ್ಚಿಸಿಕೊಳ್ಳಲು ಯಶಸ್ವಿಯಾಗಿರುವುದು ಸಮೀಕ್ಷೆಯಿಂದ ವ್ಯಕ್ತವಾಗಿದೆ. ಜುಲೈ 1 ರಿಂದ ಆಗಸ್ಟ್ 25ರವರೆಗೆ ನೇರವಾಗಿ ಸಮೀಕ್ಷೆ ನಡೆಸಲಾದ 25,184 ಜನರ ಮಾದರಿ ಹಾಗೂ ಕಳೆದ ಆರು ತಿಂಗಳುಗಳಲ್ಲಿ ನಡೆಸಲಾದ ಒಟ್ಟು 91,795 ಸಂದರ್ಶನಗಳ ಆಧಾರದ ಮೇಲೆ ಈ ದ್ವೈವಾರ್ಷಿಕ ಸಮೀಕ್ಷೆಯನ್ನು ಸಿದ್ಧಪಡಿಸಲಾಗಿದೆ.
ಉತ್ತರಪ್ರದೇಶದಲ್ಲಿ ಬದಲಾದ ಚಿತ್ರಣ:
ದೇಶದ ಅತಿ ಹೆಚ್ಚು ಲೋಕಸಭಾ ಸ್ಥಾನಗಳನ್ನು ಹೊಂದಿರುವ ಉತ್ತರ ಪ್ರದೇಶದಲ್ಲಿ ಸಮೀಕ್ಷೆ ಇನ್ನಷ್ಟು ಕುತೂಹಲಕಾರಿ ಚಿತ್ರಣ ನೀಡಿದೆ. ಇಲ್ಲಿ ಇಂಡಿಯಾ ಮೈತ್ರಿಕೂಟಕ್ಕೆ 41 ಸ್ಥಾನಗಳು, ಎನ್ಡಿಗೆ 38 ಸ್ಥಾನಗಳು ಸಿಗುವ ಸಾಧ್ಯತೆಯನ್ನು ಸಮೀಕ್ಷೆ ಸೂಚಿಸಿದೆ. ಯುವಕರ ನಿರುದ್ಯೋಗ, ಪರೀಕ್ಷಾ ಪಾರದರ್ಶಕತೆ ಮತ್ತು ಉಅಗೆ ಸಂಬಂಧಿಸಿದ ವಿಚಾರಗಳು ಮತದಾರರ ಮನಃಸ್ಥಿತಿಯ ಮೇಲೆ ಪರಿಣಾಮ ಬೀರುತ್ತಿವೆ ಎಂದು ಸಮೀಕ್ಷೆಯ ವಿಶ್ಲೇಷಣೆ ಸೂಚಿಸುತ್ತದೆ. ಆದರೆ ಇದನ್ನು ಅಂತಿಮ ಚುನಾವಣಾ ಫಲಿತಾಂಶವೆಂದು ಪರಿಗಣಿಸುವಂತಿಲ್ಲ; ರಾಜ್ಯದ ರಾಜಕೀಯ ಸಮೀಕರಣಗಳು ಮುಂದಿನ ಮೂರು ವರ್ಷಗಳಲ್ಲಿ ಹಲವು ಬಾರಿ ಬದಲಾಗುವ ಸಾಧ್ಯತೆ ಇದೆ.
ನರೇಂದ್ರಮೋದಿ ಪ್ರಭಾವ
ಬಿಜೆಪಿಯ ಸ್ಥಾನಗಳಲ್ಲಿ ಕುಸಿತ ಕಂಡುಬಂದರೂ ಪ್ರಧಾನಿ ನರೇಂದ್ರ ಮೋದಿ ಅವರ ವೈಯಕ್ತಿಕ ಜನಪ್ರಿಯತೆ ಎನ್ಡಿಗೆ ಪ್ರಮುಖ ಬಲವಾಗಿ ಮುಂದುವರಿದಿದೆ. ಇತ್ತೀಚಿನ ಎಂಒಟಿಎನ್ನಲ್ಲಿ ಮೋದಿ ಅವರು ಮುಂದಿನ ಪ್ರಧಾನಿಯಾಗಿ ಅತ್ಯಂತ ಆದ್ಯತೆಯ ಆಯ್ಕೆಯಾಗಿದ್ದು, ಅವರ ನಾಯಕತ್ವಕ್ಕೆ ಸಂಬಂಧಿಸಿದ ಬೆಂಬಲದಲ್ಲಿ ದೊಡ್ಡ ಕುಸಿತ ಕಂಡುಬಂದಿಲ್ಲ. ಇದು ಒಂದು ಪ್ರಮುಖ ರಾಜಕೀಯ ವ್ಯತ್ಯಾಸವನ್ನು ತೋರಿಸುತ್ತದೆ:ಬಿಜೆಪಿಯ ಸ್ಥಾನಗಳು ಕುಸಿಯಬಹುದು. ಆದರೆ ಮೋದಿಯವರ ವೈಯಕ್ತಿಕ ನಾಯಕತ್ವದ ಮೇಲಿನ ಬೆಂಬಲ ಅದೇ ಪ್ರಮಾಣದಲ್ಲಿ ಕುಸಿಯಬೇಕೆಂದಿಲ್ಲ. ಇದೇ ಎನ್ಡಿಗೆ 326 ಸ್ಥಾನಗಳಂತಹ ಬಲಿಷ್ಠ ಅಂದಾಜಿನಲ್ಲಿರಿಸುವ ಪ್ರಮುಖ ಅಂಶಗಳಲ್ಲಿ ಒಂದಾಗಿದೆ.
