ಬೆಂಗಳೂರು, ಅ. 1- ಬಹುಕೋಟಿ ಚಿನ್ನ ಕಳ್ಳಸಾಗಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸ್ಯಾಂಡಲ್‌ವುಡ್‌ ನಟಿ ರನ್ಯಾ ರಾವ್‌ಗೆ ಕಸ್ಟಮ್ಸ್‌ ಇಲಾಖೆಯು ₹89.91 ಕೋಟಿ ದಂಡ ವಿಧಿಸಿ ಆದೇಶ ಹೊರಡಿಸಿದೆ.ಕಸ್ಟಮ್ಸ್‌ ಜಂಟಿ ನಿರ್ದೇಶಕ ಸಂದೀಪ್‌ ಅವರು ಹೊರಡಿಸಿರುವ 399 ಪುಟಗಳ ಸುದೀರ್ಘ ಆದೇಶದಲ್ಲಿ, ರನ್ಯಾ ರಾವ್‌ ಅಂತರರಾಷ್ಟ್ರೀಯ ಮಟ್ಟದ ಚಿನ್ನ ಕಳ್ಳಸಾಗಣೆ ಜಾಲದಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದರು ಎಂಬ ಆರೋಪಕ್ಕೆ ಸಂಬಂಧಿಸಿದ ಸಾಕ್ಷ್ಯಗಳನ್ನು ದಾಖಲಿಸಲಾಗಿದೆ.
ಕಂದಾಯ ಗುಪ್ತಚರ ನಿರ್ದೇಶನಾಲಯ (ಡಿಆರ್‌ಐ) ನಡೆಸಿದ ತನಿಖೆಯ ವೇಳೆ, ಒಂದು ವರ್ಷದ ಅವಧಿಯಲ್ಲಿ (ಮಾರ್ಚ್‌ 7, 2024ರಿಂದ ಫೆಬ್ರವರಿ 2, 2025ರ ನಡುವೆ) ದುಬೈನಿಂದ ಭಾರತಕ್ಕೆ ಸುಮಾರು 113 ಕೆ.ಜಿ. ಚಿನ್ನವನ್ನು ಅಕ್ರಮವಾಗಿ ಸಾಗಾಟ ಮಾಡಲಾಗಿದೆ ಎಂಬುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ನಟಿ ರನ್ಯಾ ರಾವ್‌ ಅವರು ಸಹ ಆರೋಪಿ ತರುಣ್‌ ಹಾಗೂ ಇತರ ಮೂವರೊಂದಿಗೆ ಸೇರಿ ಈ ಜಾಲದಲ್ಲಿ ಭಾಗಿಯಾಗಿದ್ದರು ಎಂಬ ಆರೋಪವಿದೆ.
2025ರ ಮಾರ್ಚ್‌ 2ರಂದು ಬೆಂಗಳೂರಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ‘ಮಾಣಿಕ್ಯ’ ಸಿನಿಮಾ ಖ್ಯಾತಿಯ ನಟಿ ರನ್ಯಾ ರಾವ್‌ ಅವರನ್ನು ಅಧಿಕಾರಿಗಳು ಬಂಧಿಸಿದ್ದರು. ಆ ವೇಳೆ ಅವರ ಬಳಿ ಸುಮಾರು ₹12 ಕೋಟಿ ಮೌಲ್ಯದ 14.8 ಕೆ.ಜಿ. ವಿದೇಶಿ ಚಿನ್ನದ ಬಿಸ್ಕತ್ತುಗಳು ಪತ್ತೆಯಾಗಿದ್ದವು.
ತದನಂತರ ಅವರ ನಿವಾಸದ ಮೇಲೆ ದಾಳಿ ನಡೆಸಿದಾಗ ₹2.5 ಕೋಟಿ ನಗದು ಹಾಗೂ ವಿವಿಧ ವಜ್ರ, ಪಚ್ಚೆ, ಕುಂದನ್‌ ಮತ್ತು ಮುತ್ತಿನ ಆಭರಣಗಳು ಸೇರಿದಂತೆ ₹2.06 ಕೋಟಿ ಮೌಲ್ಯದ ಚಿನ್ನಾಭರಣಗಳನ್ನು ಜಪ್ತಿ ಮಾಡಲಾಗಿತ್ತು.
ಮೇ 2025ರಲ್ಲಿ ಆರ್ಥಿಕ ಅಪರಾಧಗಳ ನ್ಯಾಯಾಲಯವು ರನ್ಯಾ ಅವರಿಗೆ ಡೀಫಾಲ್ಟ್‌ ಜಾಮೀನು ಮಂಜೂರು ಮಾಡಿದ್ದರೂ, ಕೇಂದ್ರ ಸರ್ಕಾರವು ಅವರ ವಿರುದ್ಧ ಕಾಫಿಪೋಸಾ ಕಾಯ್ದೆಯಡಿ ಬಂಧನ ಕ್ರಮ ಕೈಗೊಂಡಿತ್ತು. ಪರಿಣಾಮವಾಗಿ ಅವರು ಜೈಲುವಾಸ ಅನುಭವಿಸಬೇಕಾಯಿತು.ಇದೀಗ ಕಸ್ಟಮ್ಸ್‌ ಇಲಾಖೆಯು ಪ್ರಕರಣದ ತನಿಖೆಯನ್ನು ಪೂರ್ಣಗೊಳಿಸಿ, ₹89.91 ಕೋಟಿ ದಂಡ ವಿಧಿಸಿ ಆದೇಶ ಹೊರಡಿಸಿದೆ.
ರನ್ಯಾ ರಾವ್‌, ತರುಣ್‌ ಸೇರಿದಂತೆ ಇತರ ಮೂವರು ಆರೋಪಿಗಳೊಂದಿಗೆ ಈ ವಹಿವಾಟಿನಲ್ಲಿ ಭಾಗಿಯಾಗಿದ್ದರು ಎಂಬ ಆರೋಪವೂ ಇದೆ. ಪ್ರಕರಣದ ತನಿಖೆಯ ಸಂದರ್ಭದಲ್ಲಿ ಡಿಆರ್‌ಐ ಅಧಿಕಾರಿಗಳು ರನ್ಯಾ ರಾವ್‌ ಅವರ ನಿವಾಸದ ಮೇಲೆ ದಾಳಿ ನಡೆಸಿದಾಗ ₹2.5 ಕೋಟಿ ನಗದು ಹಾಗೂ ಸುಮಾರು ₹2.06 ಕೋಟಿ ಮೌಲ್ಯದ ಆಭರಣಗಳು ಪತ್ತೆಯಾಗಿದ್ದವು. ಅವುಗಳಲ್ಲಿ ಕುಂದನ್‌ ನೆಕ್ಲೆಸ್‌, ವಜ್ರ ಹಾಗೂ ಪಚ್ಚೆ ಕಿವಿಯೋಲೆಗಳು, ಪೋಲ್ಕಿ ಜುಮುಕಿ, ಮುತ್ತಿನ ಆಭರಣಗಳು, ಹಸಿರು ಹರಳಿನ ಬಳೆ, ಕುಂದನ್‌ ಹಾರ, ಪೆಂಡೆಂಟ್‌ ಹಾಗೂ ಕರಿಮಣಿ ಸರ ಸೇರಿದಂತೆ ಹಲವು ವಸ್ತುಗಳಿದ್ದವು ಎಂದು ದಾಖಲೆಗಳಲ್ಲಿ ಉಲ್ಲೇಖಿಸಲಾಗಿದೆ.
ಪ್ರಕರಣದಲ್ಲಿ ವಶಪಡಿಸಿಕೊಳ್ಳಲಾದ ಚಿನ್ನ, ನಗದು ಮತ್ತು ಇತರ ಆಸ್ತಿಗಳ ವಿವರಗಳ ಜೊತೆಗೆ, ಆರೋಪಿತ ಕಳ್ಳಸಾಗಣೆ ಜಾಲದ ಕಾರ್ಯವಿಧಾನವನ್ನೂ 399 ಪುಟಗಳ ಆದೇಶದಲ್ಲಿ ದಾಖಲಿಸಲಾಗಿದೆ. ಆದಾಗ್ಯೂ, ದಂಡ ವಿಧಿಸಿರುವುದು ಕಸ್ಟಮ್ಸ್‌ ಇಲಾಖೆಯ ತೀರ್ಪು ಪ್ರಕ್ರಿಯೆಯ ಭಾಗವಾಗಿದ್ದು, ಪ್ರಕರಣದ ಮುಂದಿನ ಕಾನೂನು ಪ್ರಕ್ರಿಯೆಗಳು ಮತ್ತು ಮೇಲ್ಮನವಿ ಅವಕಾಶಗಳು ಪ್ರತ್ಯೇಕವಾಗಿರುತ್ತವೆ.
