ನವದೆಹಲಿ, ಅ. 8- ನವರಾತ್ರಿ, ದಸರಾ ಹಾಗೂ ದೀಪಾವಳಿ ಸಾಲು ಸಾಲು ಹಬ್ಬಗಳ ಹಿನ್ನೆಲೆಯಲ್ಲಿ ದೇಶಾದ್ಯಂತ ಸಿಹಿತಿಂಡಿ ಮತ್ತು ಖಾದ್ಯಗಳ ಬೇಡಿಕೆ ಗಣನೀಯವಾಗಿ ಹೆಚ್ಚಾಗುತ್ತಿದ್ದು, ಇದನ್ನೇ ಬಂಡವಾಳ ಮಾಡಿಕೊಂಡು ಅಕ್ರಮವಾಗಿ ಆಹಾರ ಕಲಬೆರಕೆ ನಡೆಸುವ ವ್ಯಾಪಾರಿಗಳಿಗೆ ಬ್ರೇಕ್‌ ಹಾಕಲು ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (ಎಫ್‌ಎಸ್‌ಎಸ್‌ಎಐ) ಮುಂದಾಗಿದೆ.
ಸಾರ್ವಜನಿಕರ ಆರೋಗ್ಯದ ಹಿತದೃಷ್ಟಿಯಿಂದ ಪ್ರತಿಯೊಂದು ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಆಹಾರ ಸುರಕ್ಷತಾ ಅಧಿಕಾರಿಗಳು ಕಟ್ಟುನಿಟ್ಟಿನ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಳ್ಳುವಂತೆ ಎಫ್‌ಎಸ್‌ಎಸ್‌ಎಐ ಸೂಚಿಸಿದೆ.
ಹಬ್ಬದ ಅವಧಿಯಲ್ಲಿ ಹೆಚ್ಚಾಗಿ ಮಾರಾಟವಾಗುವ ಸಿಹಿತಿಂಡಿಗಳು, ಹಾಲು ಮತ್ತು ಹಾಲಿನ ಉತ್ಪನ್ನಗಳಾದ ಖೋವಾ, ಪನೀರ್‌, ತುಪ್ಪ, ಸಸ್ಯಜನ್ಯ ಎಣ್ಣೆ ಹಾಗೂ ವಿವಿಧ ಪಾನೀಯಗಳ ಗುಣಮಟ್ಟದ ಮೇಲೆ ಸೂಕ್ಷ್ಮ ನಿಗಾ ವಹಿಸಬೇಕು. ಮಾರುಕಟ್ಟೆಯಲ್ಲಿ ಮಾರಾಟವಾಗುವ ಉತ್ಪನ್ನಗಳಲ್ಲಿ ಸಿಂಥೆಟಿಕ್‌ ಬಣ್ಣಗಳು, ರಾಸಾಯನಿಕಗಳು ಅಥವಾ ಕಳಪೆ ಗುಣಮಟ್ಟದ ಪದಾರ್ಥಗಳನ್ನು ಬಳಸಲಾಗುತ್ತಿದೆಯೇ ಎಂಬುದನ್ನು ಪತ್ತೆಹಚ್ಚಲು ಮಾದರಿ ಸಂಗ್ರಹಣೆಯನ್ನು ತೀವ್ರಗೊಳಿಸಬೇಕು ಎಂದು ಪ್ರಾಧಿಕಾರ ತಿಳಿಸಿದೆ.
ಸ್ಥಳೀಯವಾಗಿ ಪರಿಶೀಲನೆ ಚುರುಕುಗೊಳಿಸಲು ‘ಫುಡ್‌ ಸೇಫ್ಟಿ ಆನ್‌ ವೀಲ್ಸ್‌’ (ಸಂಚಾರಿ ಆಹಾರ ಪರೀಕ್ಷಾ ಪ್ರಯೋಗಾಲಯ) ವಾಹನಗಳನ್ನು ವ್ಯಾಪಕವಾಗಿ ನಿಯೋಜಿಸಬೇಕು. ರಸ್ತೆ ಬದಿಯ ಡೈರಿಗಳು, ಸಿಹಿತಿಂಡಿ ತಯಾರಿಕಾ ಘಟಕಗಳು ಹಾಗೂ ಮಾರುಕಟ್ಟೆಗಳಲ್ಲಿ ಸ್ಥಳದಲ್ಲೇ ಮಾದರಿಗಳನ್ನು ಪರೀಕ್ಷಿಸಿ, ಕಲಬೆರಕೆ ಕಂಡುಬಂದರೆ ತಕ್ಷಣ ಕಾನೂನು ಕ್ರಮ ಜರುಗಿಸಬೇಕು ಎಂದು ಸೂಚಿಸಲಾಗಿದೆ.
ಹಿಂದಿನ ವರ್ಷಗಳಲ್ಲಿಯೂ ಹಬ್ಬಗಳ ಸಂದರ್ಭದಲ್ಲಿ ಕೃತಕ ಖೋವಾ, ಕಲಬೆರಕೆ ತುಪ್ಪ ಹಾಗೂ ರಾಸಾಯನಿಕ ಮಿಶ್ರಿತ ಸಿಹಿತಿಂಡಿಗಳು ಪತ್ತೆಯಾದ ಹಲವು ಪ್ರಕರಣಗಳು ದೇಶಾದ್ಯಂತ ವರದಿಯಾಗಿದ್ದವು. ಹಬ್ಬದ ತುರ್ತು ಬೇಡಿಕೆಯನ್ನು ಪೂರೈಸಲು ಕೆಲ ವ್ಯಾಪಾರಿಗಳು ಸಾರ್ವಜನಿಕರ ಆರೋಗ್ಯದೊಂದಿಗೆ ಚೆಲ್ಲಾಟವಾಡುವುದನ್ನು ತಡೆಯಲು ಈ ಬಾರಿಯೂ ಇಲಾಖೆ ಕಾರ್ಯಪ್ರವೃತ್ತವಾಗಿದೆ.
ಇದರೊಂದಿಗೆ, ಸಾರ್ವಜನಿಕರು ಅಂಗಡಿಗಳಿಂದ ಸಿಹಿತಿಂಡಿಗಳನ್ನು ಖರೀದಿಸುವಾಗ ಎಫ್‌ಎಸ್‌ಎಸ್‌ಎಐ ನೋಂದಣಿ ಸಂಖ್ಯೆ ಹಾಗೂ ‘ಬೆಸ್ಟ್‌ ಬಿಫೋರ್‌’ ದಿನಾಂಕವನ್ನು ಗಮನಿಸಬೇಕು. ಶಂಕಾಸ್ಪದ ಉತ್ಪನ್ನಗಳ ಕುರಿತು ದೂರು ನೀಡುವಂತೆ ಸಾರ್ವಜನಿಕರಲ್ಲಿ ಅರಿವು ಮೂಡಿಸಬೇಕು ಎಂದು ಪ್ರಾಧಿಕಾರ ರಾಜ್ಯಗಳ ಆಹಾರ ಮತ್ತು ಔಷಧ ಆಡಳಿತ (ಎಫ್‌ಡಿಎ) ಅಧಿಕಾರಿಗಳಿಗೆ ನಿರ್ದೇಶನ ನೀಡಿದೆ.
ಹಬ್ಬದ ಸಂದರ್ಭದಲ್ಲಿ ಆಹಾರ ಕಲಬೆರಕೆ ತಡೆಗೆ ವಿಶೇಷ ಅಭಿಯಾನ ನಡೆಸುತ್ತಿರುವುದು ಇದೇ ಮೊದಲಲ್ಲ. 2024ರ ಸೆಪ್ಟೆಂಬರ್‌ನಲ್ಲೂ ಹಬ್ಬದ ಋತುವಿನಲ್ಲಿ ಸಿಹಿತಿಂಡಿ, ಖಾರದ ತಿಂಡಿ, ಹಾಲು ಮತ್ತು ಹಾಲಿನ ಉತ್ಪನ್ನಗಳು, ತುಪ್ಪ, ಖೋವಾ ಹಾಗೂ ಪನೀರ್‌ಗಳ ಮೇಲೆ ವಿಶೇಷ ನಿಗಾ ವಹಿಸುವಂತೆ ರಾಜ್ಯಗಳಿಗೆ ಸೂಚಿಸಲಾಗಿತ್ತು. ಪ್ರಮುಖ ಮಾರುಕಟ್ಟೆಗಳಲ್ಲಿ ‘ಫುಡ್‌ ಸೇಫ್ಟಿ ಆನ್‌ ವೀಲ್ಸ್‌’ ವಾಹನಗಳನ್ನು ನಿಯೋಜಿಸಿ ಪರೀಕ್ಷೆ ನಡೆಸುವಂತೆಯೂ ಆಗ ಸೂಚಿಸಲಾಗಿತ್ತು.
ಅದೇ ರೀತಿ, 2025ರ ಹೋಳಿ ಹಬ್ಬಕ್ಕೂ ಮುನ್ನ ಎಫ್‌ಎಸ್‌ಎಸ್‌ಎಐ ‘ಹೋಳಿ ಆ್ಯಂಟಿ ಅಡಲ್ಟರೇಷನ್‌ ಡ್ರೈವ್‌’ ನಡೆಸುವಂತೆ ರಾಜ್ಯಗಳಿಗೆ ಸೂಚಿಸಿತ್ತು. ಆ ಸಂದರ್ಭದಲ್ಲೂ ಸಿಹಿತಿಂಡಿ, ಹಾಲಿನ ಉತ್ಪನ್ನಗಳು, ಖಾದ್ಯ ತೈಲ, ಖಾರದ ತಿಂಡಿ ಸೇರಿದಂತೆ ವಿವಿಧ ಆಹಾರ ಪದಾರ್ಥಗಳ ತಪಾಸಣೆ ಹಾಗೂ ಮಾದರಿ ಸಂಗ್ರಹಕ್ಕೆ ಒತ್ತು ನೀಡಲಾಗಿತ್ತು.
