ಬೆಂಗಳೂರು,ನ.11-ವೃದ್ಧಾಶ್ರಮ ನಡೆಸುವ ಹೆಸರಿನಲ್ಲಿ ಸಾರ್ವಜನಿಕರಿಂದ ಕಾರುಗಳನ್ನು ಬಾಡಿಗೆಗೆ ಪಡೆದು ಬೇರೆಡೆ ಅಡಮಾನವಿಟ್ಟಿದ್ದ ವಂಚಕನೊಬ್ಬನನ್ನು ಹುಳಿಮಾವು ಠಾಣೆ ಪೊಲೀಸರು ಬಂಧಿಸಿ 1.20 ಕೋಟಿ ಮೌಲ್ಯದ 12 ಕಾರುಗಳನ್ನು ವಶಕ್ಕೆ ಪಡೆದಿದ್ದಾರೆ.ಉಡುಪಿ ಮೂಲದ ಕುಂದಾಪುರ ನಿವಾಸಿ ಸುನಿಲ್‌ನಾಯಕ್‌ (48) ಬಂಧಿತ ಆರೋಪಿ. ಈ ಹಿಂದೆ ಈತ ಟ್ರಾವೆಲ್ಸ್ ನಡೆಸುತ್ತಿದ್ದನು.
ಜೆಪಿ ನಗರ 8ನೇ ಹಂತದ ಬಿಡಿಎ ಲೇಔಟ್‌ನ ಸಾರಥಿ ನಗರದಲ್ಲಿ ವಾಸವಾಗಿರುವ ಈತ ಕನಕಪುರ ಮುಖ್ಯರಸ್ತೆಯ ತಲಘಟ್ಟಪುರದ ಬಳಿ ವೃದ್ಧಾಶ್ರಮ ನಡೆಸುತ್ತಿರುವುದಾಗಿ, ವೃದ್ಧರನ್ನು ಆಸ್ಪತ್ರೆಗೆ ಹಾಗೂ ಇತರೆ ಪ್ರದೇಶಗಳಿಗೆ ಕರೆದುಕೊಂಡು ಹೋಗಲು ಕಾರಿನ ಅವಶ್ಯಕತೆ ಇದೆ ಎಂದು ಮಾಲೀಕರಿಂದ ದಿನಕ್ಕೆ 1 ಸಾವಿರದಂತೆ ವೈಟ್‌ ಬೋರ್ಡ್‌ ಕಾರುಗಳನ್ನು ಬಾಡಿಗೆಗೆ ಪಡೆಯುತ್ತಿದ್ದನು.
ಸ್ವಲ್ಪ ದಿನ ಬಾಡಿಗೆಗೆ ಕೊಟ್ಟು, ನಂತರ ಈ ಕಾರುಗಳನ್ನು ಬೇರೆಯವರ ಬಳಿ ಅಡಮಾನವಿಟ್ಟು ಲಕ್ಷಾಂತರ ಹಣವನ್ನು ಪಡೆದುಕೊಂಡು ಸಾರ್ವಜನಿಕರಿಗೆ ವಂಚಿಸುತ್ತಿದ್ದನು. ಈತನಿಗೆ ಬಾಡಿಗೆಗೆ ನೀಡಿದ್ದ ವಿಜಯ ಬ್ಯಾಂಕ್‌ ಲೇಔಟ್‌ನ ಕಾರಿನ ಮಾಲೀಕರೊಬ್ಬರು ದೂರು ನೀಡಿದ್ದರು. ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡ ಪೊಲೀಸರು ವಿವಿಧ ಆಯಾಮಗಳಲ್ಲಿ ಮಾಹಿತಿಗಳನ್ನು ಕಲೆಹಾಕಿ ಖಚಿತ ಮಾಹಿತಿ ಮೇರೆಗೆ ಆರೋಪಿಯನ್ನು ಆತನ ಮನೆಯಿಂದ ವಶಕ್ಕೆ ಪಡೆದು ವಿಚಾರಣೆಗೆ ಒಳಪಡಿಸಿದಾಗ ಈ ಪ್ರಕರಣದಲ್ಲಿ ಭಾಗಿಯಾಗಿರುವುದಾಗಿ ಹೇಳಿದ್ದಾನೆ.
ಆರೋಪಿಯನ್ನು ಠಾಣೆಗೆ ಕರೆದೊಯ್ದು ಸುದೀರ್ಘ ವಿಚಾರಣೆ ನಡೆಸಿ, ಸಾರ್ವಜನಿಕರಿಂದ ಬಾಡಿಗೆಗೆಂದು ಪಡೆದುಕೊಂಡಿದ್ದ ಕಾರುಗಳನ್ನು ಕನಕಪುರ, ಮಂಡ್ಯ ಹಾಗೂ ನಗರದ ವಿವಿಧಕಡೆಗಳಲ್ಲಿ ಅಡಮಾನವಿಟ್ಟು ಹಣವನ್ನು ಪಡೆದುಕೊಂಡಿರುವುದಾಗಿ ತಿಳಿಸಿದ್ದಾನೆ. ಈತನ ಮಾಹಿತಿಯಂತೆ ಪೊಲೀಸರು ಕಾರ್ಯಾಚರಣೆ ಮುಂದುವರೆಸಿ ಇನೋವಾ, ಎರ್ಟಿಗಾ, ಸಿಯಾಜ್‌, ಕ್ರೆಟಾ, ಎಕ್ಸ್ ಯುವಿ, ಬುಲೆರೋ ಸೇರಿದಂತೆ ವಿವಿಧ ಕಂಪನಿಯ ಒಟ್ಟು 12 ಕಾರುಗಳನ್ನು ವಶಪಡಿಸಿ ಕೊಂಡಿದ್ದು, ಇವುಗಳ ಒಟ್ಟು ಮೌಲ್ಯ 1.20 ಕೋಟಿ ರೂ.ಗಳೆಂದು ಅಂದಾಜಿಸಲಾಗಿದೆ. ಈ ಕಾರ್ಯಾಚರಣೆಯನ್ನು ಎಲೆಕ್ಟ್ರಾನಿಕ್‌ ಸಿಟಿ ಉಪವಿಭಾಗದ ಸಹಾಯಕ ಪೊಲೀಸ್‌ ಆಯುಕ್ತರಾದ ಸತೀಶ್‌ ಅವರ ನೇತೃತ್ವದಲ್ಲಿ ಇನ್‌್ಸಪೆಕ್ಟರ್‌ ಜಗದೀಶ್‌ ಹಾಗೂ ಸಿಬ್ಬಂದಿ ತಂಡ ಬೇಧಿಸುವಲ್ಲಿ ಯಶಸ್ವಿಯಾಗಿದೆ.