ವಾಷಿಂಗ್ಟನ್/ಕ್ಯಾಲಿಫೋರ್ನಿಯಾ, ಏ.26- ವೈಟ್ ಹೌಸ್ನಲ್ಲಿ ಪತ್ರಕರ್ತರಿಗಾಗಿ ಆಯೋಜಿಸಿದ್ದ ಭೋಜನ ಕೂಟದ ವೇಳೆ ಗುಂಡಿನ ದಾಳಿ ನಡೆಸಲು ಯತ್ನಿಸಿದ್ದ ಆರೋಪಿ ಕೋಲ್ ಆಲೆನ್ (31) ವಿವರಗಳನ್ನುತನಿಖಾ ಸಂಸ್ಥೆಗಳು ವೇಗವಾಗಿ ಸಂಗ್ರಹಿಸುತ್ತಿವೆ.
ಕ್ಯಾಲಿಫೋರ್ನಿಯಾದಲ್ಲಿರುವ ಆರೋಪಿಯ ನಿವಾಸವನ್ನು ಅಮೆರಿಕದ ಎಫ್ಬಿಐ ಸೇರಿದಂತೆ ಫೆಡರಲ್ ಏಜೆಂಟ್ಗಳು ಸುತ್ತುವರೆದು ಪರಿಶೀಲನೆ ಆರಂಭಿಸಿವೆ. ಮನೆ ಸುತ್ತ ಭದ್ರತಾ ವಲಯ ನಿರ್ಮಿಸಿ, ವಾರಂಟ್ ಪಡೆಯುವ ಪ್ರಕ್ರಿಯೆ ಮುಂದುವರಿದಿದೆ.
ನಿವೃತ್ತ ಎಫ್ಬಿಐ ಅಧಿಕಾರಿ ಜೇಸನ್ ಪ್ಯಾಕ್ ಅವರ ಪ್ರಕಾರ, ಆರೋಪಿಯ ಹೆಸರು ತಿಳಿದ ತಕ್ಷಣವೇ ಸರ್ಕಾರದ ಎಲ್ಲಾ ಡೇಟಾಬೇಸ್ಗಳಲ್ಲಿ ಮಾಹಿತಿ ಪರಿಶೀಲನೆ ಆರಂಭವಾಗುತ್ತದೆ. ಇದರಲ್ಲಿ ಅಪರಾಧ ಇತಿಹಾಸ, ಸೈನಿಕ ಸೇವೆ, ಮಾನಸಿಕ ಆರೋಗ್ಯ ಮಾಹಿತಿ, ಪ್ರವಾಸ ವಿವರಗಳು, ಸಂಪರ್ಕಗಳು ಮತ್ತು ಹಿಂದಿನ ಕಾನೂನು ಸಂಪರ್ಕಗಳ ವಿವರಗಳು ಒಳಗೊಂಡಿರುತ್ತವೆ.
ಈ ಪ್ರಕ್ರಿಯೆ ದಿನಗಳಲ್ಲ, ನಿಮಿಷಗಳಲ್ಲಿ ಪೂರ್ಣಗೊಳ್ಳುತ್ತದೆ. ಒಂದೇ ಗಂಟೆಯೊಳಗೆ ಫೋನ್, ಇ-ಮೇಲ್, ಸಾಮಾಜಿಕ ಜಾಲತಾಣ ಖಾತೆಗಳು ಮತ್ತು ಸರ್ಚ್ ಇತಿಹಾಸಕ್ಕೆ ಸಂಬಂಧಿಸಿದ ಡಿಜಿಟಲ್ ವಾರಂಟ್ಗಳು, ಹಾಗೆಯೇ ವಿಳಾಸಗಳಿಗೆ ಸಂಬಂಧಿಸಿದ ಭೌತಿಕ ಶೋಧ ವಾರಂಟ್ಗಳನ್ನು ಪಡೆಯಲಾಗುತ್ತವೆ ಎಂದು ಅವರು ಹೇಳಿದ್ದಾರೆ.
ತನಿಖಾಧಿಕಾರಿಗಳ ಪ್ರಕಾರ, ಆರೋಪಿಯ ಮನೆಯಲ್ಲಿ ದೊರೆಯಬಹುದಾದ ದಾಖಲೆಗಳು, ನೋಟ್್ಸ, ಶಸ್ತ್ರಾಸ್ತ್ರಗಳು ಅಥವಾ ಇತರ ವಸ್ತುಗಳು ದಾಳಿಯ ಉದ್ದೇಶವನ್ನು ತಿಳಿಯಲು ಪ್ರಮುಖವಾಗಬಹುದು.
ಇದಲ್ಲದೆ, ದಾಳಿಗೆ ಮುನ್ನ ಆರೋಪಿಯ ಚಲನವಲನಗಳ ಕುರಿತು ಟೈಮ್ಲೈನ್ ಮರುರಚನೆ ಕಾರ್ಯವೂ ಆರಂಭವಾಗಿದೆ. ವಾಷಿಂಗ್ಟನ್ ಹಿಲ್ಟನ್ ಹೋಟೆಲ್ ಲಾಬಿಯಿಂದ ಆರಂಭಿಸಿ, ಈ ಘಟನೆಗೆ ಕಾರಣವಾದ ಕ್ಷಣದವರೆಗೆ ತನಿಖೆ ನಡೆಯುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
