ಬೆಂಗಳೂರು,ಮಾ.7- ಅಂತೂ ಇಂತೂ ವಾಟರ್ ಟ್ಯಾಂಕರ್ ಮಾಫಿಯಾಗೆ ಕಡಿವಾಣ ಹಾಕುವಲ್ಲಿ ಸರ್ಕಾರ ಯಶಸ್ವಿಯಾಗಿದೆ. ನಗರದಲ್ಲಿ ಉದ್ಬವಿಸಿರುವ ಕುಡಿಯುವ ನೀರಿನ ಸಮಸ್ಯೆಯನ್ನೆ ಬಂಡವಾಳ ಮಾಡಿಕೊಂಡಿದ್ದ ಕೆಲವರು ಸಾರ್ವಜನಿಕರಿಂದ ತಮ್ಮಗಿಷ್ಟ ಬಂದ ದರ ನಿಗದಿ ಮಾಡಿ ಹಣ ವಸೂಲಿ ಮಾಡುತ್ತಿದ್ದರು. ಈ ಕುರಿತಂತೆ ಸಾರ್ವಜನಿಕರು ಮಾಡಿಕೊಂಡ ಮನವಿಗೆ ಸ್ಪಂದಿಸಿರುವ ಸರ್ಕಾರ ವಾಟರ್ ಟ್ಯಾಂಕರ್ ಕಳ್ಳಾಟಕ್ಕೆ ಬ್ರೇಕ್ ಹಾಕಿ ಟ್ಯಾಂಕರ್ ನೀರಿನ ದರ ಫಿಕ್ಸ್ ಮಾಡಿ ಆದೇಶ ಹೊರಡಿಸಿದೆ.
ಸತತವಾಗಿ ಮೂರು ನಾಲ್ಕು ಬಾರಿ ಟ್ಯಾಂಕರ್ ಮಾಲೀಕರ ಜೊತೆ ಸಭೆ ನಡೆಸಿ ಈ ಆದೇಶ ಹೊರಡಿಸಲಾಗಿದೆ.
ದರ ಹೀಗಿದೆ ಐದು ಕಿ.ಮೀ ಒಳಗಿನ ವ್ಯಾಪ್ತಿಯಲ್ಲಿ 6 ಸಾವಿರ ಲೀಟರ್ ಟ್ಯಾಂಕರ್ಗೆ 600 ರೂ ಹಾಗೂ 10 ಕಿ.ಮೀ ಒಳಗಿನ ಆರು ಸಾವಿರ ಲೀಟರ್‍ಗೆ 750 ರೂ. ನಿಗದಿಪಡಿಸಲಾಗಿದೆ. ಐದು ಕಿ.ಮೀ ಒಳಗಿನ ಎಂಟು ಸಾವಿರ ಲೀಟರ್ ನೀರಿನ ಟ್ಯಾಂಕರ್ಗೆ 700 ರೂ ಹಾಗೂ 10 ಕಿ.ಮೀ ಒಳಗಿನ ಎಂಟು ಸಾವಿರ ಲೀಟರ್ ನೀರಿಗೆ 850 ರೂ ಹಾಗೂ 10 ಕಿ.ಮೀ ಒಳಗಿನ ಎಂಟು ಸಾವಿರ ಲೀಟರ್ 850 ರೂ ನಿಗದಿಪಡಿಸಲಾಗಿದೆ.
ಐದು ಕಿ.ಮೀ ಒಳಗಿನ 1200 ಲೀಟರ್ ನೀರಿನ ಟ್ಯಾಂಕರ್ಗೆ 1000 ರೂ ಹಾಗೂ 10 ಕಿ.ಮೀ ಒಳಗಿನ 1200 ಲೀಟರ್ ಟ್ಯಾಂಕರ್ 1200 ರೂ ಗೊತ್ತುಪಡಿಸಲಾಗಿದೆ. ಈ ದರಗಳು ಜಿಎಸ್‍ಟಿ ಒಳಗೊಂಡಿರುವುದು ವಿಶೇಷವಾಗಿದೆ. ತಿಂಗಳ ಬಾಡಿಗೆ ಒಪ್ಪಿಕೊಳ್ಳುವವರಿಗೆ ಐದು ಕಿ.ಮೀ ಒಳಗಿನವರಿಗೆ 510 ಹಾಗೂ 10 ಕಿ.ಮೀ ಹೋದರೆ 650 ದರ ಫಿಕ್ಸ್ ಮಾಡಲಾಗಿದೆ.
ಕುಡಿಯುವ ನೀರು ಸರಬರಾಜಿಗೆ ಖಾಸಗಿ ನೀರಿನ ಟ್ಯಾಂಕರ್‍ಗಳ ದರ ನಿಗಪಡಿಸಿರುವ ನಗರ ಜಿಲ್ಲಾಡಳಿತ ಆದೇಶ ಪ್ರತಿಗಳನ್ನು ಬಿಬಿಎಂಪಿ ಮುಖ್ಯ ಆಯುಕ್ತರು, ಕಂದಾಯ ಇಲಾಖೆ, ಬೆಂಗಳೂರು ಜಲ ಮಂಡಳಿ ಅಧ್ಯಕ್ಷರು ಮತ್ತು ಪ್ರಧಾನ ಅಭಿಯಂತರರು ಹಾಗೂ ಬಿಬಿಎಂಪಿ ಪ್ರಧಾನ ಅಭಿಯಂತರ ಕಚೇರಿಗೆ ರವಾನಿಸಿದೆ.
ಈ ವಿಷಯಕ್ಕೆ ಸಂಬಂಧಿಸಿದಂತೆ, ಸರ್ಕಾರವು 2023-24ನೇ ಸಾಲಿನ ಮುಂಗಾರು ಹಂಗಾಮಿನಲ್ಲಿ ಬೆಂಗಳೂರು ನಗರ ಜಿಲ್ಲೆಯ ಎಲ್ಲಾ ತಾಲ್ಲೂಕುಗಳನ್ನು ಬರಪೀಡಿತ ತಾಲ್ಲೂಕುಗಳೆಂದು ಘೋಷಿಸಲಾಗಿದ್ದು, ಉಲ್ಲೇಖ(1)ರ ಪತ್ರದಲ್ಲಿ ಬೆಂಗಳೂರು ನಗರ ಜಿಲ್ಲೆಯ ನೀರು ಸರಬರಾಜಿಗೆ ಖಾಸಗಿ ಕುಡಿಯುವ ನೀರು ಸರಬರಾಜಿಗೆ ಖಾಸಗಿ ನೀರಿನ ಟ್ಯಾಂಕರ್‍ಗಳ ದರಗಳನ್ನು ತಾಂತ್ರಿಕ ಸಮಿತಿಯ ವರದಿಯಂತೆ ತಯಾರಿಸಿದೆ.
ನಿಟ್ಟುಸಿರುಬಿಟ್ಟ ಜನ: ವಾಟರ್ ಟ್ಯಾಂಕರ್ ಮಾಫಿಯಾದವರು ಮನಸೋ ಇಚ್ಚೆ ದರ ನಿಗದಿ ಮಾಡಿಕೊಂಡು ಬೇಕಾಬಿಟ್ಟಿ ಹಣ ವಸೂಲಿ ಮಾಡುತ್ತಿರುವುದನ್ನು ಕಂಡು ಕಂಗಲಾಗಿದ್ದ ಸಾರ್ವಜನಿಕರು ಸರ್ಕಾರದ ಈ ಆದೇಶದ ನಂತರ ನೆಮ್ಮದಿಯ ನಿಟ್ಟುಸಿರು ಬಿಟ್ಟಿದ್ದಾರೆ. ಕೆಲವು ಪ್ರದೇಶಗಳಲ್ಲಿ ಟ್ಯಾಂಕರ್ ಮಾಫಿಯಾದವರು ನೀರಿನ ಟ್ಯಾಂಕರ್ಗೆ 2500 ರೂ.ಗಳಿಂದ 3000 ರೂ.ಗಳವರೆಗೆ ಹಣ ವಸೂಲಿ ಮಾಡುತ್ತಿದ್ದರು ಎಂಬ ಆರೋಪಗಳು ಕೇಳಿ ಬಂದಿದ್ದವು.