ಗಾಂಧಿನಗರ, ಅ. 17 (ಪಿಟಿಐ) – ಜಿಎಸ್‌ಟಿ ವಂಚನೆಗೆ ಸಂಬಂಧಿಸಿದ ಹಣ ವರ್ಗಾವಣೆ ಪ್ರಕರಣಕ್ಕೆ ಸಂಬಧಿಸಿದಂತೆ ಜಾರಿ ನಿರ್ದೇಶನಾಲಯವು ಗುಜರಾತ್‌ನಲ್ಲಿ ಹಲವು ಪ್ರದೇಶಗಳಲ್ಲಿ ಇಂದು ಶೋಧಗಳನ್ನು ನಡೆಸಿದೆ. ಇದರಲ್ಲಿ ಪತ್ರಕರ್ತ ಸೇರಿದಂತೆ ಎಂಟು ಜನರನ್ನು ರಾಜ್ಯ ಪೊಲೀಸರು ಇತ್ತೀಚೆಗೆ ಬಂಧಿಸಿದ್ದಾರೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.
ರಾಜ್‌ಕೋಟ್, ಜುನಾಗಢ್, ಅಹಮದಾಬಾದ್, ಭಾವನಗರ ಮತ್ತು ವೆರಾವಲ್ ನಗರಗಳಲ್ಲಿನ ಸುಮಾರು 23 ನಿವೇಶನಗಳ ಮೇಲೆ ಇಡಿ ದಾಳಿ ನಡೆಸಿದ್ದು, ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆ (ಪಿಎಂಎಲ್‌ಎ) ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ. ದಿ ಹಿಂದೂ ಪತ್ರಿಕೆಯಲ್ಲಿ ಕೆಲಸ ಮಾಡುತ್ತಿರುವ ಬಂಧಿತ ಪತ್ರಕರ್ತ ಮಹೇಶ್ ಲಂಗಾಗೆ ಸಂಬಂಧಿಸಿದ ಆವರಣವನ್ನು ಸಹ ಶೋಧ ಮಾಡಲಾಗುತ್ತಿದೆ.
ಮನಿ ಲಾಂಡರಿಂಗ್ ಪ್ರಕರಣವು ಅಹಮದಾಬಾದ್ ಪೊಲೀಸ್ ಕ್ರೈಂ ಬ್ರಾಂಚ್‌ನ ಎಫ್ ಐಆರ್‌ನಿಂದ ಹುಟ್ಟಿಕೊಂಡಿದೆ. ಬೋಗಸ್ ಇನ್‌ಪುಟ್ ಟ್ಯಾಕ್ಸ್ ಕ್ರೆಡಿಟ್‌ಗಳು ಮತ್ತು ಮೋಸದ ವಹಿವಾಟುಗಳ ಮೂಲಕ ಸರ್ಕಾರವನ್ನು ವಂಚಿಸಲು ಸ್ಥಾಪಿಸಲಾದ ಶೆಲ್ ಸಂಸ್ಥೆಗಳನ್ನು ಒಳಗೊಂಡ ಆಪಾದಿತ ಹಗರಣದ ಕುರಿತು ಕೇಂದ್ರ ಜಿಎಸ್‌ಟಿಯಿಂದ ದೂರನ್ನು ಪಡೆದ ನಂತರ ನಗರ ಅಪರಾಧ ವಿಭಾಗವು ಹಲವಾರು ವ್ಯಕ್ತಿಗಳು ಮತ್ತು ಘಟಕಗಳ ವಿರುದ್ಧ ಎಫ್ ಐ ಆರ್ ದಾಖಲಿಸಿದೆ.
ಸೆಂಟ್ರಲ್ ಜಿಎಸ್‌ಟಿಯಲ್ಲಿ ಲಂಗಾ ಅವರ ಪತ್ನಿ ಮತ್ತು ತಂದೆಯ ಹೆಸರಿನಲ್ಲಿ ನಕಲಿ ದಾಖಲೆಗಳನ್ನು ಬಳಸಿ ನಕಲಿ ಸಂಸ್ಥೆಗಳಲ್ಲಿ ಕೆಲವು ಅನುಮಾನಾಸ್ಪದ ವಹಿವಾಟುಗಳು ನಡೆದಿರುವುದನ್ನು ಪತ್ತೆ ಹಚ್ಚಿದ ನಂತರ ಏಳು ಮಂದಿಯೊಂದಿಗೆ ಲಂಗಾ ಅವರನ್ನು ಬಂಧಿಸಲಾಗಿದೆ.
ಎಫ್ ಐಆರ್ ದಾಖಲಾದ ನಂತರ, ಕ್ರೈಂ ಬ್ರಾಂಚ್ ಮತ್ತು ಗುಜರಾತ್‌ನ ಆರ್ಥಿಕ ಅಪರಾಧಗಳ ವಿಭಾಗವು ಅಹಮದಾಬಾದ್ ಜುನಾಗಢ್, ಸೂರತ್, ಖೇಡಾ ಮತ್ತು ಭಾವನಗರ ಸೇರಿದಂತೆ ರಾಜ್ಯದ 14 ಸ್ಥಳಗಳಲ್ಲಿ ದಾಳಿ ನಡೆಸಿದೆ.
ಕ್ರೈಂ ಬ್ರಾಂಚ್ ಪ್ರಕಾರ, ನಕಲಿ ಇನ್‌ಪುಟ್ ತೆರಿಗೆ ಕ್ರೆಡಿಟ್‌ಗಳನ್ನು ಪಡೆಯುವ ಮೂಲಕ ಸರ್ಕಾರದ ಬೊಕ್ಕಸವನ್ನು ವಂಚಿಸಲು 200 ಕ್ಕೂ ಹೆಚ್ಚು ವಂಚನೆಯಿಂದ ರಚಿಸಲಾದ ಸಂಸ್ಥೆಗಳು ಸಂಘಟಿತ ರೀತಿಯಲ್ಲಿ ಕೆಲಸ ಮಾಡುತ್ತಿದ್ದವು ಮತ್ತು ತೆರಿಗೆ ವಂಚನೆಗಾಗಿ ಈ ಸಂಸ್ಥೆಗಳನ್ನು ರಚಿಸಲು ನಕಲಿ ದಾಖಲೆಗಳು ಮತ್ತು ಗುರುತುಗಳನ್ನು ಬಳಸಲಾಗಿದೆ.