ನವದೆಹಲಿ, ನವೆಂಬರ್‌ 9 (ಪಿಟಿಐ): ದೀಪಾವಳಿಯನ್ನು ಖುಷಿಯ ಈದ್‌ ಎಂದು ಕರೆದಿದ್ದಕ್ಕಾಗಿ ಕಾಂಗ್ರೆಸ್‌ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರ ವಿರುದ್ಧ ಬಿಜೆಪಿ ತೀವ್ರ ವಾಗ್ದಾಳಿ ನಡೆಸಿದೆ. ಅಲ್ಲದೆ, ಈದ್‌ ಅನ್ನು ಸಂತೋಷದ ದೀಪಾವಳಿ ಎಂದು ಕರೆಯುವ ಧೈರ್ಯವಿದೆಯೇ ಎಂದು ಖರ್ಗೆ ಮತ್ತು ಹಿರಿಯ ವಿರೋಧ ಪಕ್ಷದ ನಾಯಕ ರಾಹುಲ್‌ ಗಾಂಧಿ ಅವರಿಗೆ ಬಿಜೆಪಿ ಸವಾಲು ಹಾಕಿದೆ.
ಕಾಂಗ್ರೆಸ್‌ ಪಕ್ಷವು ಸನಾತನ ವಿರೋಧಿ ಪಕ್ಷವಾಗಿದೆ ಎಂದೂ ಬಿಜೆಪಿ ಟೀಕಿಸಿದೆ. ವಾರಾಂತ್ಯದಲ್ಲಿ ದೀಪಾವಳಿ ಶುಭಾಶಯ ಕೋರುವ ಸಂದರ್ಭದಲ್ಲಿ, ದೀಪಾವಳಿಯು ಭಾರತದಲ್ಲಿ ಎಲ್ಲರೂ ಆಚರಿಸುವ ಪ್ರಮುಖ ಹಬ್ಬ ಎಂದು ಹೇಳಿದ್ದ ಖರ್ಗೆ, ಅದನ್ನು ಖುಷಿಯ ಈದ್‌ ಎಂದು ಬಣ್ಣಿಸಿದ್ದರು.
ಇದಕ್ಕೆ ಪ್ರತಿಕ್ರಿಯಿಸಿದ ಬಿಜೆಪಿ ರಾಷ್ಟ್ರೀಯ ಮಾಧ್ಯಮ ಸಹ-ಉಸ್ತುವಾರಿ ಮತ್ತು ವಕ್ತಾರ ಪ್ರದೀಪ್‌ ಭಂಡಾರಿ, ಕಾಂಗ್ರೆಸ್‌ ಅಧ್ಯಕ್ಷರು ದೀಪಾವಳಿಯನ್ನು ಸಂತೋಷದ ಈದ್‌ ಎಂದು ಕರೆಯುವ ಮೂಲಕ, ದೀಪಾವಳಿಯ ಸಂದರ್ಭದಲ್ಲೂ ವೋಟ್‌ ಬ್ಯಾಂಕ್‌ ರಾಜಕೀಯವನ್ನು ಆರಿಸಿಕೊಂಡಿದ್ದಾರೆ ಎಂದು ಆರೋಪಿಸಿದರು.
ಸೋನಿಯಾ ಗಾಂಧಿ ಅವರು ಬಾಬರಿೞಗಾಗಿ ಕಣ್ಣೀರಿಟ್ಟಿದ್ದನ್ನು ನೆನಪಿಸಿಕೊಳ್ಳಿ. ಹಿಂದೆ ಸನಾತನವನ್ನು ಡೆಂಗ್ಯೂ, ಮಲೇರಿಯಾ ಎಂದು ಕರೆದಾಗ ಕಾಂಗ್ರೆಸ್‌ ಮೌನವಾಗಿತ್ತು! ಗಾಂಧಿ-ವಾಧ್ರಾ ಕುಟುಂಬದ ನೇತೃತ್ವದಲ್ಲಿ ಕಾಂಗ್ರೆಸ್‌‍ನ ನೀತಿಯು ಸನಾತನ ವಿರೋಧಿ ಮತ್ತು ಹಿಂದೂ ವಿರೋಧಿಯಾಗಿದೆ, ಎಂದು ಭಂಡಾರಿ ಹೇಳಿದರು.
ಬಿಜೆಪಿ ರಾಷ್ಟ್ರೀಯ ವಕ್ತಾರ ಗೌರವ್‌ ಭಾಟಿಯಾ ಅವರು ಎಕ್ಸ್ ನಲ್ಲಿ ಖರ್ಗೆ ಅವರೇ, ಹಿಂದೂಗಳ ಅತಿದೊಡ್ಡ ಹಬ್ಬವಾದ ದೀಪಾವಳಿಯನ್ನು ಅದರ ಸ್ವಂತ ಹೆಸರಿನಿಂದಲೇ ಕರೆಯುವುದರಲ್ಲಿ ನಿಮಗೇನು ಸಮಸ್ಯೆ? ಎಂದು ಪ್ರಶ್ನಿಸಿದ್ದಾರೆ.
ಈದ್‌ಗೆ ಅದರದೇ ಆದ ಮಹತ್ವವಿದ್ದರೆ, ದೀಪಾವಳಿಗೂ ತನ್ನದೇ ಆದ ಪಾವಿತ್ರ್ಯತೆ, ಸಂಪ್ರದಾಯಗಳು ಮತ್ತು ಅಸ್ತಿತ್ವವಿದೆ ಎಂದು ಭಾಟಿಯಾ ಹೇಳಿದರು. ಕಾಂಗ್ರೆಸ್‌‍ನ ಜಾತ್ಯತೀತತೆಯಲ್ಲಿ ಹಿಂದೂ ಹಬ್ಬಗಳ ಅಸ್ತಿತ್ವವನ್ನು ಬದಲಾಯಿಸುವುದು ರಾಜಕೀಯ ಶಿಷ್ಟಾಚಾರವಾಗಿದೆಯೇ? ರಾಹುಲ್‌ ಗಾಂಧಿ ಮತ್ತು ಖರ್ಗೆ ಅವರೇ, ಉತ್ತರಿಸಿ: ಈದ್‌ ಅನ್ನು ಸಂತೋಷದ ದೀಪಾವಳಿ ಎಂದು ಕರೆಯುವ ಧೈರ್ಯ ನಿಮಗಿದೆಯೇ? ಎಂದು ಅವರು ಕೇಳಿದರು.
ಹಿಂದೂಗಳ ನಂಬಿಕೆಯನ್ನು ಗೌರವಿಸಿ; ಅವರ ಹಬ್ಬಗಳ ಅಸ್ತಿತ್ವವನ್ನು ಬದಲಾಯಿಸಬೇಡಿ. ದೀಪಾವಳಿ ದೀಪಾವಳಿಯಾಗಿಯೇ ಇತ್ತು, ದೀಪಾವಳಿಯಾಗಿಯೇ ಇದೆ ಮತ್ತು ಮುಂದೆಯೂ ದೀಪಾವಳಿಯಾಗಿಯೇ ಉಳಿಯುತ್ತದೆ, ಎಂದು ಭಾಟಿಯಾ ಹೇಳಿದರು.
ಬಿಜೆಪಿಯ ಮತ್ತೊಬ್ಬ ವಕ್ತಾರ ತುಹಿನ್‌ ಸಿನ್ಹಾ ಮಾತನಾಡಿ, ಮುಸ್ಲಿಮರು ವರ್ಷಕ್ಕೆ ಎರಡು ಬಾರಿ ಮಾತ್ರ ಈದ್‌ ಆಚರಿಸುತ್ತಾರೆ, ಆದರೆ ಕಾಂಗ್ರೆಸ್‌ ಪಕ್ಷವು ಪ್ರತಿಯೊಂದು ಹಿಂದೂ ಹಬ್ಬವನ್ನೂ ಖುಷಿಯೋಂ ಕಿ ಈದ್‌ (ಸಂತೋಷದ ಈದ್‌) ಆಗಿ ಆಚರಿಸಲು ಬಯಸುತ್ತದೆ ಎಂದು ಹೇಳಿದರು.
ಅಂದರೆ, ಕಾಂಗ್ರೆಸ್‌ ಪಕ್ಷವು ವರ್ಷಕ್ಕೆ 10-12 ಬಾರಿ ಈದ್‌ ಆಚರಿಸಲು ಬಯಸುತ್ತಿದೆ ಎಂದರ್ಥ. ಪ್ರಧಾನಿ ನರೇಂದ್ರ ಮೋದಿ ಅವರು ಈ ಕಾಂಗ್ರೆಸ್‌ ಪಕ್ಷವನ್ನು ಎಂಎಂಸಿ (ಮಾವೋವಾದಿ ಮುಸ್ಲಿಂ ಲೀಗ್‌ ಕಾಂಗ್ರೆಸ್‌) ಎಂದು ಕರೆಯಲು ಇದೇ ಕಾರಣ, ಎಂದು ಅವರು ಸೇರಿಸಿದರು.
ಮತ್ತೊಂದು ಪೋಸ್ಟ್‌ನಲ್ಲಿ, ದೀಪಾವಳಿಯಂತಹ ಸಂದರ್ಭಗಳಲ್ಲಿಯೂ ಕಾಂಗ್ರೆಸ್‌ ಪಕ್ಷವು ಓಲೈಕೆ ರಾಜಕಾರಣ ಮತ್ತು ಮತಬ್ಯಾಂಕ್‌ ಬಗ್ಗೆಯೇ ಯೋಚಿಸುತ್ತದೆ ಎಂದು ಭಂಡಾರಿ ಹೇಳಿದ್ದಾರೆ. ಇದು ಕಾಂಗ್ರೆಸ್‌ ಪಕ್ಷದ ಸನಾತನ ವಿರೋಧಿ ಮನಸ್ಥಿತಿಯನ್ನು ತೋರಿಸುತ್ತದೆ ಎಂದಿದ್ದಾರೆ.