Homeರಾಷ್ಟ್ರೀಯನ.22ರಿಂದ ನೇಪಾಳ ಪ್ರಧಾನಿ ಬಾಲೆನ್‌ ಶಾ ಮೊದಲ ಭಾರತ ಭೇಟಿ

ನ.22ರಿಂದ ನೇಪಾಳ ಪ್ರಧಾನಿ ಬಾಲೆನ್‌ ಶಾ ಮೊದಲ ಭಾರತ ಭೇಟಿ

ನವದೆಹಲಿ,ನ.20- ನೇಪಾಳದ ನೂತನ ಪ್ರಧಾನಿ ಬಲೇಂದ್ರ ಶಾ (ಬಾಲೆನ್‌ ಶಾ) ಅವರು ನವೆಂಬರ್‌ 22 ಮತ್ತು 23ರಂದು ಭಾರತಕ್ಕೆ ಮೊದಲ ದ್ವಿಪಕ್ಷೀಯ ಭೇಟಿ ನೀಡಲಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಅವರ ಆಹ್ವಾನದ ಮೇರೆಗೆ ಭಾರತಕ್ಕೆ ಆಗಮಿಸುತ್ತಿರುವ ಅವರು, ಈ ಸಂದರ್ಭದಲ್ಲಿ ಮೋದಿ ಅವರೊಂದಿಗೆ ಮಹತ್ವದ ಮಾತುಕತೆ ನಡೆಸಲಿದ್ದಾರೆ. ಉಭಯ ದೇಶಗಳ ನಡುವಿನ ದ್ವಿಪಕ್ಷೀಯ ಸಂಬಂಧಗಳಿಗೆ ಹೊಸ ವೇಗ ನೀಡುವ ನಿಟ್ಟಿನಲ್ಲಿ ಈ ಭೇಟಿ ಮಹತ್ವ ಪಡೆದುಕೊಂಡಿದೆ.

ಈ ವರ್ಷದ ಮಾರ್ಚ್‌ 27ರಂದು ನೇಪಾಳದ ಪ್ರಧಾನಿಯಾಗಿ ಅಧಿಕಾರ ವಹಿಸಿಕೊಂಡ ಬಳಿಕ ಬಾಲೆನ್‌ ಶಾ ಅವರು ಕೈಗೊಳ್ಳುತ್ತಿರುವ ಮೊದಲ ದ್ವಿಪಕ್ಷೀಯ ಭಾರತ ಪ್ರವಾಸ ಇದಾಗಿದೆ. ವಿದೇಶಾಂಗ ಸಚಿವಾಲಯ ಈ ಭೇಟಿಯನ್ನು ಅಧಿಕೃತವಾಗಿ ಪ್ರಕಟಿಸಿದ್ದು, ವ್ಯಾಪಾರ, ಸಂಪರ್ಕ, ಇಂಧನ ಸಹಕಾರ, ಜಲವಿದ್ಯುತ್‌, ಮೂಲಸೌಕರ್ಯ ಅಭಿವೃದ್ಧಿ ಮತ್ತು ಪ್ರಾದೇಶಿಕ ವಿಚಾರಗಳು ಮಾತುಕತೆಯ ಪ್ರಮುಖ ವಿಷಯಗಳಾಗುವ ನಿರೀಕ್ಷೆಯಿದೆ.

25 ಗಂಟೆಗಳಿಗೆ ಸೀಮಿತವಾದ ಪ್ರವಾಸ
ಆರಂಭದಲ್ಲಿ ಬಾಲೆನ್‌ ಶಾ ಅವರ ಭಾರತ ಪ್ರವಾಸ ಮೂರು ದಿನಗಳ ಕಾಲ ನಡೆಯಲಿದೆ ಎಂಬ ನಿರೀಕ್ಷೆಯಿತ್ತು. ಆದರೆ ಇದೀಗ ಪ್ರವಾಸದ ಅವಧಿಯನ್ನು ಸುಮಾರು 25 ಗಂಟೆಗಳಿಗೆ ಸೀಮಿತಗೊಳಿಸಲಾಗಿದೆ. ನ.22ರಂದು ನವದೆಹಲಿಗೆ ಆಗಮಿಸಲಿರುವ ಅವರು, ನ.23ರಂದು ನೇಪಾಳಕ್ಕೆ ವಾಪಸಾಗಲಿದ್ದಾರೆ.

ಭಾರತದ ಅಭಿವೃದ್ಧಿ ಯೋಜನೆಗಳನ್ನು ವೀಕ್ಷಿಸಲು ಅವರನ್ನು ಬೆಂಗಳೂರು ಅಥವಾ ಅಹಮದಾಬಾದ್‌ಗೆ ಕರೆದೊಯ್ಯುವ ಪ್ರಸ್ತಾಪವಿತ್ತು ಎನ್ನಲಾಗಿದೆ. ಆದರೆ ನೇಪಾಳ ಪ್ರಧಾನಿ ದೆಹಲಿಯಲ್ಲೇ ಅಧಿಕೃತ ಕಾರ್ಯಕ್ರಮಗಳನ್ನು ಪೂರ್ಣಗೊಳಿಸಲು ಆದ್ಯತೆ ನೀಡಿದ್ದಾರೆ ಎಂದು ವರದಿಗಳು ತಿಳಿಸಿವೆ.

ವಾಯುಮಾರ್ಗ, ಆರ್ಥಿಕ ನೆರವಿನ ಬಗ್ಗೆ ಚರ್ಚೆ
ಭಾರತದ ವಾಯುಪ್ರದೇಶದ ಮೂಲಕ ಅಂತರರಾಷ್ಟ್ರೀಯ ವಿಮಾನಗಳಿಗೆ ಹೆಚ್ಚುವರಿ ಮಾರ್ಗಗಳ ಪ್ರವೇಶ ನೀಡಬೇಕೆಂಬ ನೇಪಾಳದ ಬೇಡಿಕೆ ಮಾತುಕತೆಯಲ್ಲಿ ಪ್ರಮುಖವಾಗುವ ಸಾಧ್ಯತೆಯಿದೆ. ಪೋಖರಾ ಮತ್ತು ಭೈರಹವಾ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಗಳಿಗೆ ವಿಮಾನ ಸಂಪರ್ಕ ಸುಧಾರಿಸುವ ಉದ್ದೇಶದಿಂದ ನೇಪಾಳ ಹಲವು ವರ್ಷಗಳಿಂದ ಈ ಬೇಡಿಕೆ ಮುಂದಿಟ್ಟಿದೆ.

ಇದಲ್ಲದೆ, ಆಗಸ್ಟ್‌ನಲ್ಲಿ ಸಂಭವಿಸಿದ ಭೀಕರ ಪ್ರವಾಹದಿಂದ ಉಂಟಾದ ಹಾನಿಯ ಹಿನ್ನೆಲೆಯಲ್ಲಿ ನೇಪಾಳ ಭಾರತದಿಂದ ಸುಮಾರು 2 ಬಿಲಿಯನ್‌ ಡಾಲರ್‌ ಆರ್ಥಿಕ ನೆರವು ಕೋರಿದೆ. ಇದರಲ್ಲಿ ಅನುದಾನ ಮತ್ತು ರಿಯಾಯಿತಿ ಸಾಲಗಳು ಸೇರಿವೆ. ಈ ನೆರವು ಹಾಗೂ ವಿಪತ್ತು ನಂತರದ ಪುನರ್‌ನಿರ್ಮಾಣದ ಬಗ್ಗೆಯೂ ಚರ್ಚೆ ನಡೆಯುವ ನಿರೀಕ್ಷೆಯಿದೆ.

ಜಲವಿದ್ಯುತ್‌, ರೈಲ್ವೆ ಸಂಪರ್ಕಕ್ಕೆ ಆದ್ಯತೆ
ಉಭಯ ದೇಶಗಳ ನಡುವಿನ ಜಲವಿದ್ಯುತ್‌ ಸಹಕಾರ, ಗಡಿಯಾಚೆಗಿನ ವಿದ್ಯುತ್‌ ವ್ಯಾಪಾರ, ರೈಲ್ವೆ ಸಂಪರ್ಕ ಮತ್ತು ಮೂಲಸೌಕರ್ಯ ಅಭಿವೃದ್ಧಿ ವಿಚಾರಗಳೂ ಕಾರ್ಯಸೂಚಿಯಲ್ಲಿವೆ. ಪನೌಟಿಯಲ್ಲಿರುವ ನೇಪಾಳ ಪೊಲೀಸ್‌‍ ಅಕಾಡೆಮಿ ಹಾಗೂ ಭೈರಹವಾದಲ್ಲಿನ ಸಮಗ್ರ ಚೆಕ್‌ಪೋಸ್ಟ್‌ ಸೇರಿದಂತೆ ಭಾರತ ನೆರವಿನ ಯೋಜನೆಗಳಿಗೆ ಸಂಬಂಧಿಸಿದ ಪ್ರಕಟಣೆಗಳು ಮತ್ತು ಉದ್ಘಾಟನೆಗಳು ಈ ಭೇಟಿಯ ಸಂದರ್ಭದಲ್ಲಿ ನಡೆಯುವ ಸಾಧ್ಯತೆಯಿದೆ.

ಸಂಬಂಧ ಸುಧಾರಣೆಗೆ ಮಹತ್ವದ ಭೇಟಿ
ಇತ್ತೀಚಿನ ವರ್ಷಗಳಲ್ಲಿ ಗಡಿ ವಿವಾದ, ವ್ಯಾಪಾರ ಮತ್ತು ಸಂಪರ್ಕ ವಿಚಾರಗಳಲ್ಲಿ ಭಾರತ-ನೇಪಾಳ ನಡುವೆ ಕೆಲವು ಭಿನ್ನಾಭಿಪ್ರಾಯಗಳು ಕಾಣಿಸಿಕೊಂಡಿವೆ. ಈ ನಡುವೆ ನೇಪಾಳದ ನೂತನ ಸರ್ಕಾರ ಹೆಚ್ಚು ಸ್ವತಂತ್ರ ಹಾಗೂ ದೃಢವಾದ ವಿದೇಶಾಂಗ ನೀತಿಯನ್ನು ಅನುಸರಿಸುವ ಸೂಚನೆ ನೀಡಿದೆ.

ಐತಿಹಾಸಿಕ, ಸಾಂಸ್ಕೃತಿಕ, ಆರ್ಥಿಕ ಮತ್ತು ಜನರ ನಡುವಿನ ಬಲವಾದ ಸಂಬಂಧಗಳನ್ನು ಹೊಂದಿರುವ ಭಾರತ ಮತ್ತು ನೇಪಾಳಕ್ಕೆ ಈ ಭೇಟಿ ಮಹತ್ವದ್ದಾಗಿದೆ. ಪ್ರಧಾನಿ ಮೋದಿ ಮತ್ತು ಬಾಲೆನ್‌ ಶಾ ನಡುವಿನ ಮಾತುಕತೆಗಳು ದ್ವಿಪಕ್ಷೀಯ ಸಂಬಂಧಗಳಲ್ಲಿನ ಅನಿಶ್ಚಿತತೆಗಳನ್ನು ನಿವಾರಿಸಿ, ಮುಂದಿನ ದಿನಗಳಲ್ಲಿ ಸಹಕಾರಕ್ಕೆ ಹೊಸ ದಿಕ್ಕು ನೀಡಲಿವೆಯೇ ಎಂಬ ಕುತೂಹಲ ಮೂಡಿದೆ.

RELATED ARTICLES

Latest News