ನವದೆಹಲಿ, ಆ.15- ಯುಪಿಎಸ್ಸಿ, ಎಸ್ಎಸ್ಸಿ, ಬ್ಯಾಂಕಿಂಗ್ ಸೇರಿದಂತೆ ವಿವಿಧ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಸಿದ್ಧತೆ ನಡೆಸುವ ವಿದ್ಯಾರ್ಥಿಗಳ ಮೇಲಿನ ಕೋಚಿಂಗ್ ಶುಲ್ಕದ ಆರ್ಥಿಕ ಒತ್ತಡವನ್ನು ಕಡಿಮೆ ಮಾಡುವ ಉದ್ದೇಶದಿಂದ ದೇಶವ್ಯಾಪಿ ಉಚಿತ ಆನ್ಲೈನ್ ಕೋಚಿಂಗ್ ಜಾಲ ನಿರ್ಮಿಸುವುದಾಗಿ ಪ್ರಧಾನಿ ನರೇಂದ್ರ ಮೋದಿ ಘೋಷಿಸಿದ್ದಾರೆ.
ಭಾರತದ 80ನೇ ಸ್ವಾತಂತ್ರ್ಯ ದಿನಾಚರಣೆಯ ಸಂದರ್ಭದಲ್ಲಿ ಕೆಂಪುಕೋಟೆಯಿಂದ ರಾಷ್ಟ್ರವನ್ನುದ್ದೇಶಿಸಿ ಮಾತನಾಡಿದ ಪ್ರಧಾನಿ, ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯ, ಪರಿಣತ ಶಿಕ್ಷಕರು ಮತ್ತು ಆನ್ಲೈನ್ ಸಂಪನ್ಮೂಲಗಳನ್ನು ಒಟ್ಟುಗೂಡಿಸಿ ಈ ವ್ಯವಸ್ಥೆಯನ್ನು ರೂಪಿಸುವ ಉದ್ದೇಶವನ್ನು ವಿವರಿಸಿದರು.
ಯುವಜನರ ಕೌಶಲ್ಯಾಭಿವೃದ್ಧಿ, ಸ್ಪರ್ಧಾತ್ಮಕ ಪರೀಕ್ಷೆಗಳ ಸಿದ್ಧತೆ, ಕ್ರೀಡಾ ಪ್ರತಿಭೆ, ನಾಗರಿಕ ರಕ್ಷಣೆ, ಸೆಮಿಕಂಡಕ್ಟರ್ ಉತ್ಪಾದನೆ ಮತ್ತು ಅಣುಶಕ್ತಿ ವಿಸ್ತರಣೆಗೆ ಸಂಬಂಧಿಸಿದ ಹಲವು ಮಹತ್ವದ ಗುರಿಗಳನ್ನು ಪ್ರಕಟಿಸಿದರು.
ಈ ಘೋಷಣೆಗಳು ಕೇವಲ ಹೊಸ ಯೋಜನೆಗಳ ಪಟ್ಟಿಯಲ್ಲದೆ, ಕಳೆದ ಕೆಲವು ವರ್ಷಗಳಿಂದ ಸರ್ಕಾರ ಕೈಗೊಂಡಿರುವ ಎಐ, ಕೌಶಲ್ಯ, ಕ್ರೀಡೆ, ಸೆಮಿಕಂಡಕ್ಟರ್ ಮತ್ತು ಪರಮಾಣು ಕ್ಷೇತ್ರದ ಕ್ರಮಗಳ ಮುಂದಿನ ಹಂತದ ವಿಸ್ತರಣೆಯಾಗಿ ಕಾಣಿಸುತ್ತಿವೆ.
ಇದು ಸಂಪೂರ್ಣ ಹೊಸ ಕಲ್ಪನೆಯಲ್ಲ ಎಂಬುದೂ ಗಮನಾರ್ಹ. 2025ರ ನವೆಂಬರ್ನಲ್ಲಿ ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಇಲಾಖೆಯು ಪಿಡಬ್ಲ್ಯು ಫೌಂಡೇಷನ್ ಜೊತೆ ಒಪ್ಪಂದ ಮಾಡಿಕೊಂಡು ಎಸ್ಸಿ, ಒಬಿಸಿ ಮತ್ತು ಪಿಎಂ ಕೇರ್ಸ್ ಫಾರ್ ಚಿಲ್ಡ್ರನ್ ಯೋಜನೆಯ ಫಲಾನುಭವಿಗಳಿಗೆ ಉಚಿತ ಡಿಜಿಟಲ್ ಕೋಚಿಂಗ್ ಒದಗಿಸುವ ಕ್ರಮ ಕೈಗೊಂಡಿತ್ತು. 2026ರ ಫೆಬ್ರವರಿಯಲ್ಲಿಯೂ ಇದೇ ರೀತಿಯ ಯೋಜನೆಯಡಿ ವರ್ಷಕ್ಕೆ 5,000 ಅಭ್ಯರ್ಥಿಗಳಿಗೆ ಉಚಿತ ಆನ್ಲೈನ್ ತರಬೇತಿ ನೀಡುವ ಮಾಹಿತಿ ಸರ್ಕಾರ ನೀಡಿತ್ತು.
ಆದ್ದರಿಂದ, ಇಂದಿನ ಘೋಷಣೆಯ ಮಹತ್ವವೆಂದರೆ ಇಂತಹ ನಿರ್ದಿಷ್ಟ ವರ್ಗಗಳಿಗೆ ಸೀಮಿತವಾಗಿದ್ದ ಉಚಿತ ತರಬೇತಿ ಮಾದರಿಯನ್ನು ಇನ್ನಷ್ಟು ವ್ಯಾಪಕವಾದ ರಾಷ್ಟ್ರೀಯ ಡಿಜಿಟಲ್ ಕೋಚಿಂಗ್ ವ್ಯವಸ್ಥೆಯಾಗಿ ವಿಸ್ತರಿಸುವ ಉದ್ದೇಶ ಹೊಂದಿರುವುದು.
ಒಂದು ಕೋಟಿ ಯುವಕರಿಗೆ ಎಐ ಕೌಶಲ್ಯ
ಪ್ರಧಾನಿ ಮೋದಿ ಅವರು ಮುಂದಿನ ಒಂದು ವರ್ಷದಲ್ಲಿ ಒಂದು ಕೋಟಿ ಯುವಕರಿಗೆ ಕೃತಕ ಬುದ್ಧಿಮತ್ತೆ ಕೌಶಲ್ಯ ತರಬೇತಿ ನೀಡುವ ಗುರಿಯನ್ನು ಘೋಷಿಸಿದ್ದಾರೆ. ಭಾರತದ ಯುವಜನರನ್ನು ಜಾಗತಿಕ ಎಐ ಉದ್ಯೋಗ ಮತ್ತು ನವೋದ್ಯಮ ಪರಿಸರಕ್ಕೆ ಸಜ್ಜುಗೊಳಿಸುವುದು ಇದರ ಪ್ರಮುಖ ಉದ್ದೇಶವಾಗಿದೆ.
ಈ ಘೋಷಣೆಗೆ 2026ರ ಫೆಬ್ರವರಿಯಲ್ಲಿ ನಡೆದ ಇಂಡಿಯಾ ಎಐ ಇಂಪ್ಯಾಕ್ಟ್ ಸಮಿಟ್ ಹಿನ್ನೆಲೆಯಾಗಿದೆ. ಶೃಂಗಸಭೆಯಲ್ಲಿ ‘ಎಐ ಫಾರ್ ಆಲ್’, ‘ಎಐ ಬೈ ಹರ್’ ಮತ್ತು ‘ಯುವಎಐ’ ಮುಂತಾದ ಕಾರ್ಯಕ್ರಮಗಳ ಮೂಲಕ ಯುವಕರು ಮತ್ತು ಮಹಿಳಾ ನವೋದ್ಯಮಿಗಳಿಗೆ ಅವಕಾಶ ಕಲ್ಪಿಸುವ ಪ್ರಯತ್ನ ನಡೆದಿತ್ತು. ಹೀಗಾಗಿ ಸ್ವಾತಂತ್ರ್ಯ ದಿನದಂದು ಒಂದು ಕೋಟಿ ಯುವಕರಿಗೆ ಎಐ ತರಬೇತಿ ನೀಡುವ ಘೋಷಣೆಯನ್ನು ಹಿಂದಿನ ಪ್ರಯತ್ನಗಳ ಬೃಹತ್ ವಿಸ್ತರಣೆಯ ಹಂತ ಎಂದು ಪರಿಗಣಿಸಬಹುದು.
5ರಿಂದ 15 ವರ್ಷದ ಮಕ್ಕಳಿಗೆ ರಾಷ್ಟ್ರವ್ಯಾಪಿ ಕ್ರೀಡಾ ಪ್ರತಿಭಾ ಶೋಧ
ಭಾರತವನ್ನು ಕ್ರೀಡಾ ಶಕ್ತಿಯಾಗಿ ರೂಪಿಸುವ ಉದ್ದೇಶದ ಭಾಗವಾಗಿ 5ರಿಂದ 15 ವರ್ಷದ ಮಕ್ಕಳಿಗಾಗಿ ರಾಷ್ಟ್ರವ್ಯಾಪಿ ಕ್ರೀಡಾ ಪ್ರತಿಭಾನ್ವೇಷಣೆ ಆರಂಭಿಸುವುದಾಗಿ ಪ್ರಧಾನಿ ಘೋಷಿಸಿದ್ದಾರೆ. ಗುರುತಿಸಲ್ಪಟ್ಟ ಪ್ರತಿಭೆಗಳಿಗೆ ವಿಶ್ವಮಟ್ಟದ ತರಬೇತಿ ನೀಡುವುದು ಯೋಜನೆಯ ಗುರಿಯಾಗಿದೆ.
ಇದರ ಜತೆಗೆ ಟಾರ್ಗೆಟ್ ಒಲಿಂಪಿಕ್ ಪೊಡಿಯಂ ಸ್ಕೀಮ್ (ಟಾಪ್ಸ್) ಈಗಾಗಲೇ ಉನ್ನತ ಮಟ್ಟದ ಕ್ರೀಡಾಪಟುಗಳಿಗೆ ತರಬೇತಿ, ವಿದೇಶಿ ಸ್ಪರ್ಧಾ ಅನುಭವ, ಉಪಕರಣ ಮತ್ತು ಕ್ರೀಡಾ ವಿಜ್ಞಾನ ಬೆಂಬಲ ನೀಡುತ್ತಿದೆ. ಹೀಗಾಗಿ ಹೊಸ ಪ್ರತಿಭಾ ಶೋಧನೆಯ ಉದ್ದೇಶ ತಳಮಟ್ಟದಿಂದಲೇ ಮುಂದಿನ ಪೀಳಿಗೆಯ ಒಲಿಂಪಿಕ್ ಕ್ರೀಡಾಪಟುಗಳನ್ನು ಗುರುತಿಸುವುದಾಗಿದೆ.
ಭಾರತಕ್ಕೆ 2030ರ ಕಾಮನ್ವೆಲ್ತ್ ಗೇಮ್ಸ್ ಆತಿಥ್ಯದ ಹಕ್ಕು ಈಗಾಗಲೇ ದೊರೆತಿದ್ದು, 2036ರ ಒಲಿಂಪಿಕ್ಸ್ ಆತಿಥ್ಯಕ್ಕಾಗಿ ಭಾರತ ಪ್ರಕ್ರಿಯೆಯಲ್ಲಿ ಮುಂದುವರಿಯುತ್ತಿದೆ. 2036ರ ಒಲಿಂಪಿಕ್ಸ್ ವಿಚಾರದಲ್ಲಿ ಭಾರತ ಐಒಸಿಯ ‘ಕಂಟಿನ್ಯೂಯಸ್ ಡೈಲಾಗ್’ ಹಂತದಲ್ಲಿದೆ. ಆದ್ದರಿಂದ 5ರಿಂದ 15 ವರ್ಷದ ಮಕ್ಕಳ ಪ್ರತಿಭಾ ಶೋಧನೆ ಮುಂದಿನ ದಶಕದ ಕ್ರೀಡಾ ಗುರಿಗಳಿಗೆ ಮಾನವ ಸಂಪನ್ಮೂಲ ಸಿದ್ಧಪಡಿಸುವ ದೀರ್ಘಕಾಲೀನ ಹೆಜ್ಜೆಯಾಗಿದೆ.
ಆಧುನಿಕ ನಾಗರಿಕ ರಕ್ಷಣಾ ಜಾಲ
ಪ್ರಧಾನಿ ಅವರು ದೇಶದಲ್ಲಿ ಆಧುನಿಕ ನಾಗರಿಕ ರಕ್ಷಣಾ ಜಾಲ ಮತ್ತು ಬೃಹತ್ ಸ್ವಯಂಸೇವಕ ಪಡೆ ರೂಪಿಸುವ ಘೋಷಣೆಯನ್ನೂ ಮಾಡಿದ್ದಾರೆ. ಆಧುನಿಕ ಬಿಕ್ಕಟ್ಟುಗಳು, ತುರ್ತು ಪರಿಸ್ಥಿತಿಗಳು ಮತ್ತು ನಾಗರಿಕರ ಸುರಕ್ಷತೆಗೆ ಅಗತ್ಯವಿರುವ ತಂತ್ರಜ್ಞಾನ ಹಾಗೂ ತರಬೇತಿಯನ್ನು ಸ್ವಯಂಸೇವಕರಿಗೆ ಒದಗಿಸುವ ಉದ್ದೇಶವನ್ನು ಅವರು ವಿವರಿಸಿದ್ದಾರೆ.
