ಇರ್ಕುಟ್‌ಸ್ಕ್‌ (ರಷ್ಯಾ), ಅ.5- ರಷ್ಯಾದ ದೂರದ ಸೈಬೀರಿಯನ್‌ ಪ್ರದೇಶವಾದ ಇರ್ಕುಟ್‌ಸ್ಕ್‌ನ ಶೆಲೆಖೋವ್‌ನಲ್ಲಿರುವ ಪ್ಲೇಗ್ ವಿರೋಧಿ ಸಂಶೋಧನಾ ಸಂಸ್ಥೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ 28 ವರ್ಷದ ಪ್ರಯೋಗಾಲಯ ತಂತ್ರಜ್ಞೆ ದರ್ಯಾ ಶಿಪಿಲೋವಾ ನ್ಯುಮೋನಿಕ್‌ ಪ್ಲೇಗ್ ಸೋಂಕಿನಿಂದ ಮೃತಪಟ್ಟಿದ್ದಾರೆ. ಘಟನೆಯ ಬೆನ್ನಲ್ಲೇ ಮುನ್ನೆಚ್ಚರಿಕಾ ಕ್ರಮವಾಗಿ ಕನಿಷ್ಠ 5 ಆಸ್ಪತ್ರೆಗಳನ್ನು ಮುಚ್ಚಲಾಗಿದ್ದು, ನೂರಕ್ಕೂ ಹೆಚ್ಚು ಜನರನ್ನು ಕ್ವಾರಂಟೈನ್‌ನಲ್ಲಿ ಇರಿಸಲಾಗಿದೆ.
ಪ್ರಯೋಗಾಲಯದಲ್ಲಿ ಪರೀಕ್ಷೆಗಾಗಿ ಮಾದರಿಗಳನ್ನು ಸಂಗ್ರಹಿಸುತ್ತಿದ್ದಾಗ ಜೀವಂತ ಬ್ಯಾಕ್ಟೀರಿಯಾವನ್ನು ಹೊಂದಿದ್ದ ಪರೀಕ್ಷಾ ಟ್ಯೂಬ್‌ ಆಕಸ್ಮಿಕವಾಗಿ ಒಡೆದು ಹೋಗಿ ಶಿಪಿಲೋವಾ ಅವರಿಗೆ ಸೋಂಕು ತಗುಲಿತ್ತು. ತೀವ್ರವಾದ ನ್ಯುಮೋನಿಯಾ ಲಕ್ಷಣಗಳಿಂದ ಬಳಲುತ್ತಿದ್ದ ಅವರನ್ನು ಸೆಪ್ಟೆಂಬರ್‌ 29ರಂದು ಆಸ್ಪತ್ರೆಗೆ ದಾಖಲಿಸಿ ವೆಂಟಿಲೇಟರ್‌ನಲ್ಲಿ ಇರಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಅಕ್ಟೋಬರ್‌ 1ರಂದು ಅವರು ನಿಧನರಾದರು.
ಮೃತ ಸಂಶೋಧಕಿಯೊಂದಿಗೆ ಸಂಪರ್ಕ ಹೊಂದಿದ್ದ 200ಕ್ಕೂ ಹೆಚ್ಚು ಜನರನ್ನು ಗುರುತಿಸಿ ಕ್ವಾರಂಟೈನ್‌ನಲ್ಲಿ ಇರಿಸಲಾಗಿದ್ದು, ವೈದ್ಯಕೀಯ ತಪಾಸಣೆಗೆ ಒಳಪಡಿಸಲಾಗಿದೆ. ಇರ್ಕುಟ್‌ಸ್ಕ್‌ನಲ್ಲಿ ಸಾರ್ವಜನಿಕ ಕಾರ್ಯಕ್ರಮಗಳನ್ನು ರದ್ದುಗೊಳಿಸಲಾಗಿದೆ.
ಇರ್ಕುಟ್‌ಸ್ಕ್‌ ಪ್ರದೇಶದ ಗವರ್ನರ್‌ ಇಗೊರ್‌ ಕೊಬ್ಜೆವ್‌ ತುರ್ತು ನಿಯಂತ್ರಣ ಕ್ರಮಗಳನ್ನು ಕೈಗೊಂಡಿದ್ದು, ಪರಿಸ್ಥಿತಿ ಹತೋಟಿಯಲ್ಲಿದೆ, ಸಾರ್ವಜನಿಕರು ಆತಂಕಪಡುವ ಅಗತ್ಯವಿಲ್ಲ ಎಂದು ಮನವಿ ಮಾಡಿದ್ದಾರೆ. ಗ್ರಾಹಕ ಸುರಕ್ಷತಾ ಕಾವಲು ಸಂಸ್ಥೆಯಾದ ‘ರೋಸ್ಪೊಟ್ರೆಬ್ನಾಡ್ಜೋರ್‌’ ಸಾಂಕ್ರಾಮಿಕ ತಡೆ ಕ್ರಮಗಳನ್ನು ಪೂರ್ಣ ಪ್ರಮಾಣದಲ್ಲಿ ಅನುಷ್ಠಾನಗೊಳಿಸುತ್ತಿದೆ.
ನ್ಯುಮೋನಿಕ್‌ ಪ್ಲೇಗ್ ಎಂದರೇನು?
ವಿಶ್ವ ಆರೋಗ್ಯ ಸಂಸ್ಥೆ ಪ್ರಕಾರ, ಯೆರ್ಸಿನಿಯಾ ಪೆಸ್ಟಿಸ್‌ ಎಂಬ ಬ್ಯಾಕ್ಟೀರಿಯಾದಿಂದ ಉಂಟಾಗುವ ನ್ಯುಮೋನಿಕ್‌ ಪ್ಲೇಗ್ ಅತ್ಯಂತ ಅಪಾಯಕಾರಿ ಮತ್ತು ವೇಗವಾಗಿ ಹರಡುವ ಸೋಂಕಾಗಿದೆ.
ರೋಗಲಕ್ಷಣಗಳು:
ಸೋಂಕು ತಗುಲಿ 24 ಗಂಟೆಗಳ ಒಳಗೆ ತೀವ್ರ ಉಸಿರಾಟದ ತೊಂದರೆ, ಕೆಮ್ಮು ಮತ್ತು ರಕ್ತ ಮಿಶ್ರಿತ ಕಫ ಕಾಣಿಸಿಕೊಳ್ಳುತ್ತದೆ.
ಹರಡುವಿಕೆ:
ಸೋಂಕಿತ ವ್ಯಕ್ತಿಯ ಉಸಿರಾಟದ ಹನಿಗಳ ಮೂಲಕ ಇತರರಿಗೆ ಸುಲಭವಾಗಿ ಹರಡುತ್ತದೆ.
ಚಿಕಿತ್ಸೆ:
ರೋಗಲಕ್ಷಣಗಳು ಪ್ರಾರಂಭವಾದ 24 ಗಂಟೆಗಳ ಒಳಗೆ ಸೂಕ್ತ ಚಿಕಿತ್ಸೆ ನೀಡದಿದ್ದರೆ ಇದು ಮಾರಕವಾಗಬಹುದು. ಆದರೆ ಆರಂಭಿಕ ಹಂತದಲ್ಲೇ ಪತ್ತೆಹಚ್ಚಿ ಚಿಕಿತ್ಸೆ ನೀಡಿದರೆ ಗುಣಮುಖರಾಗುವ ಸಾಧ್ಯತೆ ಹೆಚ್ಚಿರುತ್ತದೆ.
ಪ್ಲೇಗ್ ಎಷ್ಟು ಅಪಾಯಕಾರಿ?
ಯೆರ್ಸಿನಿಯಾ ಪೆಸ್ಟಿಸ್‌ ಎಂಬ ಬ್ಯಾಕ್ಟೀರಿಯಾದಿಂದ ಪ್ಲೇಗ್ ಉಂಟಾಗುತ್ತದೆ. ಸಾಮಾನ್ಯವಾಗಿ ಸಣ್ಣ ಸಸ್ತನಿಗಳು ಮತ್ತು ಅವುಗಳ ಚಿಗಟಗಳ ಮೂಲಕ ಇದು ಹರಡುತ್ತದೆ. ಪ್ಲೇಗ್‌ನ ವಿವಿಧ ರೂಪಗಳಲ್ಲಿ ನ್ಯುಮೋನಿಕ್‌ ಪ್ಲೇಗ್ ಅತ್ಯಂತ ಗಂಭೀರ ರೂಪವಾಗಿದ್ದು, ಶ್ವಾಸಕೋಶದ ಮೇಲೆ ಪರಿಣಾಮ ಬೀರುತ್ತದೆ.
ಸೋಂಕಿನ ನಂತರ ಕೆಲವೊಮ್ಮೆ ಕೇವಲ 24 ಗಂಟೆಗಳಲ್ಲೇ ಲಕ್ಷಣಗಳು ಕಾಣಿಸಿಕೊಳ್ಳಬಹುದು. ತೀವ್ರ ಜ್ವರ, ಕೆಮ್ಮು, ಉಸಿರಾಟದ ತೊಂದರೆ ಮತ್ತು ಕೆಲ ಸಂದರ್ಭಗಳಲ್ಲಿ ರಕ್ತ ಮಿಶ್ರಿತ ಕಫ ಇದರ ಪ್ರಮುಖ ಲಕ್ಷಣಗಳಾಗಿವೆ. ವಿಶೇಷವಾಗಿ ಚಿಕಿತ್ಸೆ ಪಡೆಯದ ನ್ಯುಮೋನಿಕ್‌ ಪ್ಲೇಗ್ ವೇಗವಾಗಿ ಗಂಭೀರವಾಗಿ ಪರಿಣಮಿಸಬಹುದು. ಸೋಂಕಿತ ವ್ಯಕ್ತಿಯಿಂದ ಉಸಿರಾಟದ ಕಣಗಳ ಮೂಲಕ ಮತ್ತೊಬ್ಬರಿಗೆ ಸೋಂಕು ಹರಡುವ ಸಾಧ್ಯತೆಯೂ ಇದೆ.
ಆದಾಗ್ಯೂ, ಸಮಯಕ್ಕೆ ಸರಿಯಾಗಿ ಸೋಂಕನ್ನು ಪತ್ತೆಹಚ್ಚಿ ಸೂಕ್ತ ಆ್ಯಂಟಿಬಯಾಟಿಕ್‌ ಚಿಕಿತ್ಸೆ ನೀಡಿದರೆ ಚೇತರಿಕೆಯ ಸಾಧ್ಯತೆ ಹೆಚ್ಚಿರುತ್ತದೆ. ಹೀಗಾಗಿ ಇರ್ಕುಟ್‌ಸ್ಕ್‌ನಲ್ಲಿ ಅಧಿಕಾರಿಗಳು ಸಂಪರ್ಕಿತರನ್ನು ಗುರುತಿಸಿ ಕ್ವಾರಂಟೈನ್‌ಗೆ ಒಳಪಡಿಸಿರುವುದು ಸೋಂಕಿನ ಸಂಭವನೀಯ ಹರಡುವಿಕೆಯನ್ನು ತಡೆಯುವ ಪ್ರಮುಖ ಮುನ್ನೆಚ್ಚರಿಕೆ ಕ್ರಮವಾಗಿದೆ.
