ಜಿನೀವಾ, ಅ. 7 (ಎಪಿ)- ಸೈಬೀರಿಯಾದ ಪ್ರಯೋಗಾಲಯದ ಉದ್ಯೋಗಿಯೊಬ್ಬರು ಹೇಗೆ ಮೃತಪಟ್ಟರು ಎಂಬುದು ತಮಗೆ ತಿಳಿದಿಲ್ಲ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ (WHO) ಉನ್ನತ ಅಧಿಕಾರಿಯೊಬ್ಬರು ಸ್ಪಷ್ಟಪಡಿಸಿದ್ದಾರೆ.ಶ್ವಾಸಕೋಶದ ಪ್ಲೇಗ್‌ (ನ್ಯುಮೋನಿಕ್‌ ಪ್ಲೇಗ್‌) ಕುರಿತ ಆತಂಕವನ್ನು ಜಾಗತಿಕ ಮಟ್ಟದಲ್ಲಿ ಹುಟ್ಟುಹಾಕಿರುವ ಈ ಪ್ರಕರಣದ ಬಗ್ಗೆ ಹೆಚ್ಚಿನ ಮಾಹಿತಿ ಒದಗಿಸುವಂತೆ ಅವರು ರಷ್ಯಾವನ್ನು ಒತ್ತಾಯಿಸಿದ್ದಾರೆ.
ಸಾಂಕ್ರಾಮಿಕ ರೋಗ ನಿರ್ವಹಣಾ ವಿಭಾಗದ ನಿರ್ದೇಶಕಿ ಮಾರಿಯಾ ವ್ಯಾನ್‌ ಕೆರ್ಖೋವ್‌ ಅವರು ಈ ವಿಷಯ ತಿಳಿಸಿದ್ದಾರೆ. ಅಕ್ಟೋಬರ್‌ 2ರಂದು ಮೃತಪಟ್ಟ ಮಹಿಳೆಯ ಸಾವಿಗೆ ಕಾರಣವೇನು ಎಂಬುದು ವಿಶ್ವಸಂಸ್ಥೆಯ ಆರೋಗ್ಯ ಸಂಸ್ಥೆಗೆ ತಿಳಿದಿಲ್ಲ. ರಷ್ಯಾದಲ್ಲಿನ ದೃಢೀಕರಿಸದ ವರದಿಗಳು ಈ ಸಾವಿಗೆ ಶ್ವಾಸಕೋಶದ ಪ್ಲೇಗ್‌ ಕಾರಣವೆಂದು ಹೇಳಿವೆ. ಇದು ಪ್ಲೇಗ್‌ನ ಅಪರೂಪದ ಆದರೆ ತೀವ್ರ ಸ್ವರೂಪವಾಗಿದ್ದು, ಒಬ್ಬ ವ್ಯಕ್ತಿಯಿಂದ ಮತ್ತೊಬ್ಬರಿಗೆ ಹರಡಬಲ್ಲದು.
ರಷ್ಯಾದ ಸಾರ್ವಜನಿಕ ಆರೋಗ್ಯ ಮೇಲ್ವಿಚಾರಣಾ ಸಂಸ್ಥೆಯಾದ ರೋಸ್ಪೊಟ್ರೆಬ್ನಾಡ್ಜೋರ್‌ ತನ್ನ ಸಂಕ್ಷಿಪ್ತ ಹೇಳಿಕೆಗಳಲ್ಲಿ ಈ ಪ್ರಕರಣವನ್ನು ಶ್ವಾಸಕೋಶದ ಪ್ಲೇಗ್‌ಗೆ ಜೋಡಿಸಿಲ್ಲ. ಬದಲಾಗಿ, ಪ್ರಯೋಗಾಲಯದ ಉದ್ಯೋಗಿಗೆ ಅಜ್ಞಾತ ಮೂಲದ ನ್ಯುಮೋನಿಯಾ (ಶ್ವಾಸಕೋಶದ ಸೋಂಕು) ಕಾಣಿಸಿಕೊಂಡಿತ್ತು ಎಂದು ತಿಳಿಸಿದೆ.
ಅಲ್ಲದೆ, ಸೈಬೀರಿಯಾ ಮತ್ತು ದೂರದ ಪೂರ್ವ ಭಾಗದಲ್ಲಿರುವ ಇರ್ಕುಟ್ಸ್ಕ್‌ ಆಂಟಿ-ಪ್ಲೇಗ್‌ ರಿಸರ್ಚ್‌ ಇನ್‌ಸ್ಟಿಟ್ಯೂಟ್‌ನಲ್ಲಿ ಅವರು ಕೆಲಸ ಮಾಡುತ್ತಿದ್ದ ರೋಗಕಾರಕಗಳಲ್ಲಿ ಯಾವುದರಿಂದಲೂ ಈ ಕಾಯಿಲೆ ತಗುಲಿರುವುದಕ್ಕೆ ವ್ಯಾಪಕ ಪರೀಕ್ಷೆಗಳಲ್ಲಿ ಯಾವುದೇ ಪುರಾವೆಗಳು ಕಂಡುಬಂದಿಲ್ಲ ಎಂದು ಸಂಸ್ಥೆ ತಿಳಿಸಿದೆ.
“ಅವರಿಗೆ ಸೋಂಕು ಹೇಗೆ ತಗುಲಿತು ಎಂಬುದು ನಮಗೆ ಅರ್ಥವಾಗುತ್ತಿಲ್ಲ. ನಮಗೆ ಸಮಯೋಚಿತ ಮಾಹಿತಿ ಬೇಕು. ನಿಯಮಿತ ಮಾಹಿತಿ ಅಗತ್ಯವಿದೆ. ನಾವು ಕೇಳಿರುವ ಪ್ರಶ್ನೆಗಳಿಗೆ ಮುಂದಿನ ಹಂತದ ಉತ್ತರಗಳು ಬೇಕಾಗಿವೆ. ರಷ್ಯಾದ ಒಕ್ಕೂಟದಲ್ಲಿರುವ ನಮ್ಮ ಸಹೋದ್ಯೋಗಿಗಳಿಗೆ ಈ ಪ್ರಶ್ನೆಗಳನ್ನು ಕೇಳಿದ್ದೇವೆ. ಅವರು ಪ್ರತಿಕ್ರಿಯಿಸಿದ್ದಾರೆ. ನಾವು ಹೆಚ್ಚಿನ ಪ್ರಶ್ನೆಗಳೊಂದಿಗೆ ಮತ್ತೆ ಸಂಪರ್ಕಿಸಿದ್ದೇವೆ” ಎಂದು ವ್ಯಾನ್‌ ಕೆರ್ಖೋವ್‌ ಹೇಳಿದರು.ಈ ಹೇಳಿಕೆಗಳು ಪ್ರಯೋಗಾಲಯದಲ್ಲಿನ ಪರಿಸ್ಥಿತಿಯ ಕುರಿತು ವಿಶ್ವ ಆರೋಗ್ಯ ಸಂಸ್ಥೆಯ ಬಳಿ ಉತ್ತರಗಳಿಗಿಂತ ಹೆಚ್ಚಿನ ಪ್ರಶ್ನೆಗಳಿವೆ ಎಂಬುದನ್ನು ಸೂಚಿಸುತ್ತವೆ.
ಸೈಬೀರಿಯಾದಲ್ಲಿ ವನ್ಯಜೀವಿಗಳಲ್ಲಿ ನೈಸರ್ಗಿಕವಾಗಿ ಕಂಡುಬರುವ ಪ್ಲೇಗ್‌ ರೋಗವನ್ನು ಅಧ್ಯಯನ ಮಾಡಲು ಸುಮಾರು ಒಂದು ಶತಮಾನದ ಹಿಂದೆ ಸ್ಥಾಪಿಸಲಾದ ಈ ಪ್ರಯೋಗಾಲಯವು ಮುಖ್ಯವಾಗಿ ಪ್ಲೇಗ್‌ ಕುರಿತ ಸಂಶೋಧನೆಯಲ್ಲಿ ತೊಡಗಿಸಿಕೊಂಡಿದೆ.
