Homeರಾಜ್ಯಕಾಲೇಜಿಗೆ ಚಕ್ಕರ್ ಹಾಕಿ ಕೊಲೆಗಡುಕ ಅಪ್ಪ ಇಂದುಶೇಖರ್‌ಗೆ ಸಾಥ್ ನೀಡಿದ್ದ ಮಗಳು

ಕಾಲೇಜಿಗೆ ಚಕ್ಕರ್ ಹಾಕಿ ಕೊಲೆಗಡುಕ ಅಪ್ಪ ಇಂದುಶೇಖರ್‌ಗೆ ಸಾಥ್ ನೀಡಿದ್ದ ಮಗಳು

ಬೆಂಗಳೂರು,ನ.17- ತಾಯಿ ಸೇರಿದಂತೆ ಏಳು ಮಂದಿ ಸಂಬಂಧಿಕರನ್ನು ಕೊಲೆ ಮಾಡಿದ ಅವಧಿಯಲ್ಲಿ ಹಂತಕ ಇಂದುಶೇಖರ್‌ನ ಮಗಳು ಕಾಲೇಜಿಗೆ ಹೋಗಿರಲಿಲ್ಲ ಎಂಬುದು ಪೊಲೀಸರ ತನಿಖೆಯಿಂದ ಬಯಲಾಗಿದೆ.

ಪಿಯುಸಿ ವ್ಯಾಸಂಗ ಮಾಡುತ್ತಿರುವ ಬಾಲಕಿ ಅ.16 ರಿಂದ 31 ರವರೆಗೆ 15 ದಿನಗಳ ಅವಧಿಯಲ್ಲಿ ಕಾಲೇಜಿಗೆ ಗೈರು ಹಾಜರಾಗಿ ಮನೆಯಲ್ಲಿಯೇ ಇದ್ದು ತಂದೆಯ ಕೃತ್ಯಕ್ಕೆ ಸಹಕರಿಸಿರುವುದು ಗೊತ್ತಾಗಿದೆ.

ಕುಟುಂಬದ ಏಳು ಮಂದಿಯ ಕೊಲೆಗೆ ಕೋಟ್ಯಂತರ ಆಸ್ತಿಯ ಮೇಲೆ ಆರೋಪಿ ಕಣ್ಣಿಟ್ಟಿದ್ದ. ಆಸ್ತಿಯನ್ನು ನಿನಗೆ ಕೊಡುವುದಾಗಿ ಮಗಳಿಗೆ ಆಮಿಷವೊಡ್ಡಿ ತನ್ನ ಕೃತ್ಯಕ್ಕೆ ಆಕೆಯನ್ನು ಬಳಸಿಕೊಂಡಿರುವುದು ಪೊಲೀಸರ ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ. ಈ ಏಳು ಮಂದಿಯ ಕೊಲೆ ಪ್ರಕರಣದ ಪ್ರಮುಖ ಆರೋಪಿ ಇಂದುಶೇಖರನ ಅಪ್ರಾಪ್ತ ಮಗಳನ್ನು ಇದೀಗ ವಯಸ್ಕಳೆಂದು ಪರಿಗಣಿಸಿ ಪೊಲೀಸರು ವಿಚಾರಣೆ ನಡೆಸುವ ಸಾಧ್ಯತೆಯಿದೆ.

ಪ್ರತೀ ದಿನ ತನಿಖೆ ವೇಳೆಯೂ ರಾಜಾಜಿನಗರ ಪೊಲೀಸರಿಗೆ ಹೊಸ ಸಾಕ್ಷ್ಯಗಳು ಲಭ್ಯವಾಗುತ್ತಿವೆ. ಆರೋಪಿಯ ಹೇಳಿಕೆಯ ದಾಖಲು ಪ್ರಕ್ರಿಯೆ ಪೂರ್ಣಗೊಂಡಿದ್ದು, ಆರೋಪಿಯ ಪೊಲೀಸ್‌‍ ಕಸ್ಟಡಿ ಅವಧಿ ನಾಳೆಗೆ ಅಂತ್ಯವಾಗಲಿದೆ. ಈ ಹಿನ್ನೆಲೆಯಲ್ಲಿ ಪೊಲೀಸರ ತನಿಖೆ ಮತ್ತಷ್ಟು ಚುರುಕುಗೊಂಡಿದ್ದು, ನಾಳೆ ಆರೋಪಿಯನ್ನು ನ್ಯಾಯಾಲಯದ ಮುಂದೆ ಹಾಜರುಪಡಿಸಲಿದ್ದಾರೆ.

ರಾಜಾಜಿನಗರದ ಬಾಷ್ಯಂ ಸರ್ಕಲ್‌ನ ಬಾಡಿಗೆ ಮನೆಯಲ್ಲಿ ಒಬ್ಬೊಬ್ಬರಂತೆ ಏಳು ಮಂದಿಯನ್ನು ಕೊಲೆ ಮಾಡಿ ಶವಗಳನ್ನು ಆಗಿಂದಾಗ್ಗೆ ತನ್ನ ಕಾರಿನಲ್ಲಿ ಸಾಗಿಸಿ ಏನೂ ಆಗೇ ಇಲ್ಲ ಎಂಬಂತೆ ಮಗಳೊಂದಿಗೆ ಇದ್ದ ಆರೋಪಿ ಇಂದುಶೇಖರ್‌ನ ವಿಚಾರಣೆ ವೇಳೆ ಬಗೆದಷ್ಟೂ ಒಂದೊಂದೇ ವಿಚಾರಗಳು ಬೆಳಕಿಗೆ ಬರುತ್ತಿವೆ.

ನಗರದಲ್ಲಿ ಎರಡು ದಿನಗಳ ಕಾಲ ಮಹಜರು ನಡೆಸಿದ ಪೊಲೀಸರು ನಂತರ ಸೇಲಂ, ಮೈಸೂರಿನ ಚಾಮುಂಡಿಬೆಟ್ಟದ ತಪ್ಪಲು ಹಾಗೂ ಸಕಲೇಶಪುರದ ಶಿರಾಡಿಘಾಟ್‌ನಲ್ಲೂ ಆರೋಪಿಯನ್ನು ಕರೆದೊಯ್ದು ಸ್ಥಳ ಮಹಜರು ಮಾಡಿ ಹೇಳಿಕೆಗಳನ್ನು ದಾಖಲಿಸಿಕೊಂಡಿದ್ದಾರೆ.

ನಗರದಲ್ಲಿರುವ ಆರೋಪಿ ವಾಸದ ಮನೆ, ಕೃತ್ಯಕ್ಕೆ ಬೇಕಾದಂತಹ ವಸ್ತುಗಳನ್ನು ಖರೀದಿಸಿದ ಸ್ಥಳಗಳಲ್ಲೂ ಶೋಧ ನಡೆಸಿರುವ ಪೊಲೀಸರು ಕಳೆದ ನಾಲ್ಕು ದಿನಗಳಿಂದ ಶವಗಳು ಪತ್ತೆಯಾದ ಸ್ಥಳಗಳಲ್ಲಿ ಸಾಕ್ಷ್ಯಗಳ ಹುಡುಕಾಟ ನಡೆಸಿದ್ದಾರೆ. ಒಟ್ಟಾರೆ ಪ್ರಕರಣದ ಆರೋಪಿ ಒಬ್ಬೊಬ್ಬರನ್ನೇ ಕೊಲೆ ಮಾಡಿ ಏನೆಲ್ಲಾ ನಾಟಕವಾಡಿದ್ದಾನೆ ಎಂಬ ವಿಚಾರ ಒಂದೊಂದೇ ಬೆಳಕಿಗೆ ಬರುತ್ತಿವೆ.

RELATED ARTICLES

Latest News