ಲಕ್ನೋ,ಅ.3- ಬ್ರಿಟಿಷ್‌ ಪೌರತ್ವ ಪಡೆದ ನಂತರವೂ ವಿಷಯವನ್ನು ಮುಚ್ಚಿಟ್ಟು ಉತ್ತರ ಪ್ರದೇಶ ಸರ್ಕಾರದಿಂದ ಅಕ್ರಮವಾಗಿ ಸಂಬಳ, ಪಿಂಚಣಿ ಹಾಗೂ ಇತರ ಭತ್ಯೆಗಳನ್ನು ಪಡೆಯುತ್ತಿದ್ದ ಮದರಸಾ ಶಿಕ್ಷಕ ಮೌಲಾನಾ ಶಂಸುಲ್‌ ಹುದಾ ಖಾನ್‌ ಅವರ 53.46 ಲಕ್ಷ ರೂ. ಮೌಲ್ಯದ ಜಮೀನನ್ನು ಜಾರಿ ನಿರ್ದೇಶನಾಲಯ (ಇಡಿ) ತಾತ್ಕಾಲಿಕವಾಗಿ ಮುಟ್ಟುಗೋಲು ಹಾಕಿಕೊಂಡಿದೆ.
ಉತ್ತರ ಪ್ರದೇಶದ ಸಂತ ಕಬೀರ್‌ ನಗರ ಜಿಲ್ಲೆಯ ಖಲೀಲಾಬಾದ್‌ನಲ್ಲಿರುವ 189.75 ಚದರ ಮೀಟರ್‌ ವಿಸ್ತೀರ್ಣದ ವಸತಿ ಜಮೀನನ್ನು ಹಣ ವರ್ಗಾವಣೆ ತಡೆ ಕಾಯ್ದೆ (ಪಿಎಂಎಲ್‌ಎ) ಅಡಿಯಲ್ಲಿ ಇಡಿಯ ಲಕ್ನೋ ವಲಯ ಕಚೇರಿಯು ವಶಕ್ಕೆ ಪಡೆದಿದೆ.
ಇಡಿ ನೀಡಿದ ಮಾಹಿತಿಯಂತೆ, ಶಂಸುಲ್‌ ಹುದಾ ಖಾನ್‌ ಡಿಸೆಂಬರ್‌ 2013 ರಲ್ಲಿ ಬ್ರಿಟಿಷ್‌ ಪೌರತ್ವ ಪಡೆದು ಭಾರತೀಯ ಪೌರತ್ವವನ್ನು ಕಳೆದುಕೊಂಡಿದ್ದರು. ಆದಾಗ್ಯೂ, ಈ ಸಂಗತಿಯನ್ನು ಮರೆಮಾಚಿ ಅಜಂಗಢದ ಮುಬಾರಕ್‌ಪುರದಲ್ಲಿರುವ ಸರ್ಕಾರಿ ಅನುದಾನಿತ ಮದರಸಾದಲ್ಲಿ ಸಹಾಯಕ ಶಿಕ್ಷಕರಾಗಿ ಕೆಲಸ ಮುಂದುವರಿಸಿದ್ದರು.
2007 ರಿಂದ 2017 ರವರೆಗೆ ದಾಖಲೆಗಳಲ್ಲಿ ಸೇವೆಯಲ್ಲಿದ್ದ ಇವರಿಗೆ, ಅಲ್ಪಸಂಖ್ಯಾತ ಕಲ್ಯಾಣ ಮತ್ತು ವಕ್‌್ಫ ಇಲಾಖೆಯ ಸೂಕ್ತ ಪರಿಶೀಲನೆಯಿಲ್ಲದೆ 2017 ರಲ್ಲಿ ಸ್ವಯಂಪ್ರೇರಿತ ನಿವೃತ್ತಿ ನೀಡಲಾಗಿತ್ತು. ಖಾನ್‌ ಸರ್ಕಾರದಿಂದ ಸಂಬಳ, ಪಿಂಚಣಿ, ಜಿಪಿಎಫ್‌ ಮತ್ತು ಇತರ ಭತ್ಯೆಗಳ ರೂಪದಲ್ಲಿ ಪಡೆದ ಒಟ್ಟು 53.46 ಲಕ್ಷ ರೂ.ಗಳನ್ನು ಇಡಿ ಅಪರಾಧದ ಆದಾಯ ಎಂದು ವ್ಯಾಖ್ಯಾನಿಸಿದೆ. ಬ್ರಿಟಿಷ್‌ ಪ್ರಜೆಯಾದ ನಂತರವೂ ಖಾನ್‌ ತಮ್ಮ ಶರಣಾದ ಭಾರತೀಯ ಪಾಸ್‌‍ಪೋರ್ಟ್‌, ಪ್ಯಾನ್‌, ಆಧಾರ್‌ ಮತ್ತು ಮತದಾರರ ಗುರುತಿನ ಚೀಟಿಯನ್ನು ಬಳಸಿ ಸ್ಥಿರಾಸ್ತಿಯನ್ನು ಖರೀದಿಸಿದ್ದರು.
ಯುಪಿ ಪೊಲೀಸರು ದಾಖಲಿಸಿದ್ದ ಎಫ್‌ಐಆರ್‌ ಆಧಾರದಲ್ಲಿ ತನಿಖೆ ಕೈಗೆತ್ತಿಕೊಂಡ ಇಡಿ, ಇದೇ ಫೆ. 11 ರಂದು ಸಂತ ಕಬೀರ್‌ ನಗರದಲ್ಲಿ ನಡೆಸಿದ ಶೋಧದ ವೇಳೆ ಪತ್ತೆಯಾದ ಪ್ರಮುಖ ದಾಖಲೆಗಳ ಆಧಾರದ ಮೇಲೆ ಈ ಆಸ್ತಿ ಜಪ್ತಿ ಕ್ರಮ ಕೈಗೊಂಡಿದೆ.ಅಲ್ಲದೆ, ಖಾನ್‌ ಬ್ರಿಟಿಷ್‌ ಪ್ರಜೆಯಾಗಿದ್ದಾಗ ಪಾಕಿಸ್ತಾನದ ಹಲವು ಭಯೋತ್ಪಾದಕ ಸಂಘಟನೆಗಳೊಂದಿಗೆ ಸಂಪರ್ಕದಲ್ಲಿದ್ದರು ಹಾಗೂ ಅವರ ಸಭೆಗಳಲ್ಲಿ ಭಾಗವಹಿಸುತ್ತಿದ್ದರು ಎಂದೂ ಜಾರಿ ನಿರ್ದೇಶನಾಲಯ ಆರೋಪಿಸಿದೆ.
