ಬೆಂಗಳೂರು,ಅ.4- ಕರ್ನಾಟಕದಲ್ಲಿ ವಿಶೇಷ ತೀವ್ರ ಪರಿಷ್ಕರಣೆ ಪ್ರಕ್ರಿಯೆ ಮುಂದುವರಿದಿರುವ ನಡುವೆಯೇ, ಕರಡು ಮತದಾರರ ಪಟ್ಟಿಯಿಂದ ಹೊರಗುಳಿದಿರುವ ಮತದಾರರನ್ನು ಮತ್ತೆ ಚುನಾವಣಾ ಪಟ್ಟಿಗೆ ಸೇರಿಸಲು ವಿಶೇಷ ಮಾಪ್‌-ಅಪ್‌ ಅಭಿಯಾನ ಆರಂಭಿಸುವ ಸಿದ್ಧತೆ ನಡೆದಿದೆ.
ಮತದಾರರ ನೋಂದಣಿ ನಿರಂತರ ಪ್ರಕ್ರಿಯೆಯಾಗಿರುವುದರಿಂದ, ಹೆಸರು ಪಟ್ಟಿಯಲ್ಲಿ ಇಲ್ಲದ ಅರ್ಹ ನಾಗರಿಕರಿಗೆ ಮತ್ತೊಂದು ಅವಕಾಶ ಕಲ್ಪಿಸುವ ಉದ್ದೇಶದಿಂದ ಈ ಕ್ರಮ ಕೈಗೊಳ್ಳಲಾಗುತ್ತಿದೆ.ಇದುವರೆಗೆ ಹೆಸರು ಮರುಸೇರ್ಪಡೆಗೆ ಮುಖ್ಯವಾಗಿ ಫಾರ್ಮ್‌ -6 ಮೂಲಕ ಅರ್ಜಿ ಸಲ್ಲಿಸುವ ಅವಕಾಶವಿತ್ತು. ಸೆಪ್ಟೆಂಬರ್‌ 23ರೊಳಗೆ ಅರ್ಜಿ ಸಲ್ಲಿಸಿದವರಿಗೆ ಅಂತಿಮ ಪಟ್ಟಿಯಲ್ಲಿ ಹೆಸರು ಸೇರ್ಪಡೆಯಾಗುವ ಅವಕಾಶವಿತ್ತು.
ಆದರೆ, ಫಾರ್ಮ್‌-6 ಮತ್ತು ವಿದೇಶದಲ್ಲಿರುವ ಭಾರತೀಯ ಮತದಾರರಿಗೆ ಸಂಬಂಧಿಸಿದ ಫಾರ್ಮ್‌-6ಎ ಮೂಲಕ 7 ಲಕ್ಷಕ್ಕೂ ಸ್ವಲ್ಪ ಹೆಚ್ಚು ಅರ್ಜಿಗಳು ಮಾತ್ರ ಸಲ್ಲಿಕೆಯಾಗಿರುವುದರಿಂದ, ಇನ್ನೂ ಹಲವು ಮತದಾರರು ಪಟ್ಟಿಯಿಂದ ಹೊರಗುಳಿದಿರುವ ಸಾಧ್ಯತೆಯಿದೆ.ಮ್ಯಾಪ್‌-ಅಪ್‌ ಅಭಿಯಾನ ಜಾರಿಯಾದರೆ, ಎಸ್‌‍ಐಆರ್‌ ವೇಳೆ ಮತದಾರರ ಪಟ್ಟಿಯಿಂದ ಹೆಸರು ಹೊರಗುಳಿದಿರುವ ಅರ್ಹ ನಾಗರಿಕರಿಗೆ ತಮ ಹೆಸರನ್ನು ಮರುಸೇರ್ಪಡೆಗೊಳಿಸಿಕೊಳ್ಳಲು ಮಹತ್ವದ ಅವಕಾಶ ದೊರೆಯಲಿದೆ. ಚುನಾವಣಾ ಪ್ರಕ್ರಿಯೆಯಲ್ಲಿ ಅರ್ಹ ಮತದಾರರು ಯಾರೂ ಹೊರಗುಳಿಯದಂತೆ ನೋಡಿಕೊಳ್ಳುವುದು ಈ ಅಭಿಯಾನದ ಪ್ರಮುಖ ಉದ್ದೇಶವಾಗಿದೆ.
ಮ್ಯಾಪ್‌-ಅಪ್‌ ಅಭಿಯಾನದಲ್ಲಿ ಬೂತ್‌ ಮಟ್ಟದ ಅಧಿಕಾರಿಗಳು ಗೈರುಹಾಜರಾದ, ಸ್ಥಳಾಂತರಗೊಂಡ, ಮೃತಪಟ್ಟ ಅಥವಾ ನಕಲಿ ಮತದಾರರ ಪಟ್ಟಿಯಲ್ಲಿ ಗುರುತಿಸಲಾದ ವ್ಯಕ್ತಿಗಳ ಪೈಕಿ ಅರ್ಹ ಮತದಾರರನ್ನು ಸಂಪರ್ಕಿಸಿ, ಅಗತ್ಯವಿದ್ದಲ್ಲಿ ಫಾರ್ಮ್‌-6 ಸಲ್ಲಿಸಲು ನೆರವು ನೀಡುವ ಸಾಧ್ಯತೆಯಿದೆ. ಅಗತ್ಯವಿರುವಲ್ಲಿ ಒಬ್ಬ ಬಿಎಲ್‌ಒ ಮತ್ತೊಬ್ಬ ಬಿಎಲ್‌ಒ ಸಹಾಯ ಪಡೆಯಲು ಅವಕಾಶ ಕಲ್ಪಿಸುವ ಬಗ್ಗೆಯೂ ಚರ್ಚೆ ನಡೆದಿದೆ.
ಮತದಾರರನ್ನು ನೇರವಾಗಿ ತಲುಪಿ ನೋಂದಣಿ ಪ್ರಕ್ರಿಯೆಗೆ ನೆರವಾಗುವ ಉದ್ದೇಶದಿಂದ ಮ್ಯಾಪ್‌-ಅಪ್‌ ಅಭಿಯಾನ ನಡೆಸಲು ಚುನಾವಣಾ ಅಧಿಕಾರಿಗಳು ಚಿಂತನೆ ನಡೆಸಿದ್ದಾರೆ.
ರಾಜ್ಯದ 60,923 ಬೂತ್‌ ಮಟ್ಟದ ಅಧಿಕಾರಿಗಳ ಪೈಕಿ ಬಹುತೇಕರು ಎಸ್‌‍ಐಆರ್‌ನ ಪೂರ್ವಸಿದ್ಧತಾ ಕಾರ್ಯಗಳಿಂದ ಈಗ ಮುಕ್ತರಾಗಿದ್ದು, ಹೊಸ ಅಭಿಯಾನದಲ್ಲಿ ಅವರನ್ನು ಬಳಸಿಕೊಳ್ಳುವ ಸಾಧ್ಯತೆಯಿದೆ.
ಮುಖ್ಯ ಚುನಾವಣಾಧಿಕಾರಿ ವಿ. ಅನ್ಬು ಕುಮಾರ್‌ ಅವರ ಪ್ರಕಾರ, ಈ ಕುರಿತು ರಾಜಕೀಯ ಪಕ್ಷಗಳೊಂದಿಗೆ ಸಭೆ ಸೇರಿದಂತೆ ಪ್ರಮುಖ ಸಭೆಗಳನ್ನು ನಡೆಸಲಾಗುತ್ತಿದ್ದು, ಚುನಾವಣಾ ಆಯೋಗದ ಮಾರ್ಗಸೂಚಿಗಳು ಬಂದ ಬಳಿಕ ಪ್ರಕ್ರಿಯೆ ಸ್ಪಷ್ಟವಾಗಲಿದೆ. ಅಕ್ಟೋಬರ್‌ 1ರಂದು ಚುನಾವಣಾ ಆಯೋಗವೂ ಮತದಾರರ ನೋಂದಣಿ ನಿರಂತರ ಪ್ರಕ್ರಿಯೆ ಎಂದು ಸ್ಪಷ್ಟಪಡಿಸಿದೆ.
ಈ ಹಿನ್ನೆಲೆಯಲ್ಲಿ, ನೋಂದಾಯಿಸಿಕೊಳ್ಳದವರು ಅಥವಾ ಮತದಾರರ ಪಟ್ಟಿಯಿಂದ ಹೆಸರು ತೆಗೆದುಹಾಕಲ್ಪಟ್ಟವರು ಯಾವುದೇ ಸಮಯದಲ್ಲಿ ಅರ್ಜಿ ಸಲ್ಲಿಸಬಹುದು. ಇಂತಹ ಮತದಾರರನ್ನು ಗುರುತಿಸಿ, ಅವರಿಗೆ ನೋಂದಣಿ ಪ್ರಕ್ರಿಯೆಯಲ್ಲಿ ನೆರವಾಗುವುದೇ ವಿಶೇಷ ಅಭಿಯಾನದ ಉದ್ದೇಶ ಎಂದು ಆಯೋಗ ತಿಳಿಸಿದೆ.
ಎಸ್‌‍ಡಿಡಿಒ ಪಟ್ಟಿಯಲ್ಲಿರುವವರಿಗೂ ಫಾರ್ಮ್‌-6
ಎಸ್‌‍ಐಆರ್‌ ಸಂದರ್ಭದಲ್ಲಿ ಗೈರುಹಾಜರು, ಸ್ಥಳಾಂತರಗೊಂಡ, ಮೃತಪಟ್ಟ ಅಥವಾ ನಕಲಿ ಎಂದು ಗುರುತಿಸಲಾದ ಮತದಾರರನ್ನು ಒಳಗೊಂಡ ಎಸ್‌‍ಡಿಡಿಒ ಪಟ್ಟಿಯ ಬಗ್ಗೆ ವಿಶೇಷ ಗಮನ ಹರಿಸಲಾಗುತ್ತಿದೆ.
ಇಂತಹ ಪಟ್ಟಿಯಲ್ಲಿರುವ ಅರ್ಹ ಮತದಾರರನ್ನು ಸಂಪರ್ಕಿಸಿ, ಅವರು ನಿಜವಾಗಿಯೂ ಮತದಾರರಾಗಲು ಅರ್ಹರಾಗಿದ್ದರೆ ಫಾರ್ಮ್‌-6 ಸಲ್ಲಿಸಲು ನೆರವು ನೀಡುವ ಉದ್ದೇಶ ಅಭಿಯಾನದ ಪ್ರಮುಖ ಭಾಗವಾಗಬಹುದು. ಹೀಗಾಗಿ ಅಧಿಕೃತ ಮಾರ್ಗಸೂಚಿಗಳು ಹಾಗೂ ನೆಲಮಟ್ಟದ ಅನುಷ್ಠಾನದ ನಡುವೆ ಸಮನ್ವಯ ಸಾಧಿಸುವುದು ಮುಂದಿನ ಸವಾಲಾಗಿದೆ.
ಅಕ್ಟೋಬರ್‌ 1ರ ಇಸಿಐ ಸೂಚನೆ ಮಹತ್ವದ್ದು
ಅಕ್ಟೋಬರ್‌ 1ರಂದು ಚುನಾವಣಾ ಆಯೋಗ ನೀಡಿದ ಸೂಚನೆಯಲ್ಲಿ ಮತದಾರರ ನೋಂದಣಿ ನಿರಂತರ ಪ್ರಕ್ರಿಯೆ ಎಂಬುದನ್ನು ಪುನರುಚ್ಚರಿಸಲಾಗಿದೆ. ಇದರಿಂದ, ನೋಂದಾಯಿಸಿಕೊಳ್ಳದ ಅರ್ಹ ವ್ಯಕ್ತಿಗಳು ಅಥವಾ ಪಟ್ಟಿಯಿಂದ ಹೆಸರು ತೆಗೆದುಹಾಕಲ್ಪಟ್ಟವರು ನಂತರವೂ ಅರ್ಜಿ ಸಲ್ಲಿಸಲು ಕಾನೂನುಬದ್ಧ ಅವಕಾಶವಿದೆ ಎಂಬುದು ಸ್ಪಷ್ಟವಾಗಿದೆ.
ಈ ಹಿನ್ನೆಲೆಯಲ್ಲಿ ಮ್ಯಾಪ್‌-ಅಪ್‌ ಅಭಿಯಾನ ಕೇವಲ ಹೆಸರುಗಳ ಮರುಸೇರ್ಪಡೆಗೆ ಸೀಮಿತವಾಗದೆ, ಅರ್ಹ ಮತದಾರರನ್ನು ಗುರುತಿಸಿ ಅವರಿಗೆ ನೋಂದಣಿ ಪ್ರಕ್ರಿಯೆಯಲ್ಲಿ ನೆರವಾಗುವ ಪ್ರಯತ್ನವಾಗಲಿದೆ. ಫಾರ್ಮ್‌-6 ಮೂಲಕ ಸೇರ್ಪಡೆಗೊಳ್ಳುವ ಹೆಸರುಗಳ ವಿವರಗಳನ್ನು ರಾಜಕೀಯ ಪಕ್ಷಗಳಿಗೂ ನೀಡುವ ವ್ಯವಸ್ಥೆ ಇರಲಿದೆ. ಪ್ರಕ್ರಿಯೆ ಪೂರ್ಣಗೊಂಡ ಬಳಿಕ ಅಂತಿಮ ಮತದಾರರ ಪಟ್ಟಿಯನ್ನೂ ಪಕ್ಷಗಳಿಗೆ ಒದಗಿಸಲಾಗುತ್ತದೆ.
ಮುಂದಿನ ಹಂತದಲ್ಲಿ ಏನಾಗಬಹುದು?
ಎಸ್‌‍ಐಆರ್‌ ಪ್ರಕ್ರಿಯೆಯಲ್ಲಿ ಹೆಸರು ಕಾಣೆಯಾಗಿರುವುದೇ ಮತದಾನದ ಹಕ್ಕು ಶಾಶ್ವತವಾಗಿ ಕಳೆದುಹೋಯಿತು ಎಂಬ ಅರ್ಥವಲ್ಲ. ಅರ್ಹತೆ ಹೊಂದಿರುವ ನಾಗರಿಕರಿಗೆ ಮತದಾರರ ಪಟ್ಟಿಗೆ ಸೇರ್ಪಡೆಗೊಳ್ಳಲು ಕಾನೂನುಬದ್ಧ ವ್ಯವಸ್ಥೆ ಮುಂದುವರಿಯುತ್ತದೆ. ಈಗ ಪ್ರಸ್ತಾಪಿಸಲಾಗುತ್ತಿರುವ ಱಮಾಪ್‌-ಅಪ್‌ೞ ಅಭಿಯಾನವು ವಿಶೇಷವಾಗಿ ಎಸ್‌‍ಐಆರ್‌ ಸಂದರ್ಭದಲ್ಲಿ ಪಟ್ಟಿಯಿಂದ ಹೊರಗುಳಿದರೂ ಇನ್ನೂ ಮತದಾರರಾಗಿ ನೋಂದಾಯಿಸಿಕೊಳ್ಳದವರನ್ನು ತಲುಪುವ ಪ್ರಯತ್ನವಾಗಲಿದೆ.
ಹೀಗಾಗಿ 1.08 ಕೋಟಿ ಹೆಸರುಗಳು ಕರಡು ಪಟ್ಟಿಯಿಂದ ಹೊರಗುಳಿದಿರುವುದು, ಕೇವಲ 7 ಲಕ್ಷಕ್ಕೂ ಹೆಚ್ಚು ಫಾರ್ಮ್‌-6/6ಎ ಅರ್ಜಿಗಳು ಸಲ್ಲಿಕೆಯಾಗಿರುವುದು ಮತ್ತು 43.8 ಲಕ್ಷ ನೋಟಿಸ್‌‍ಗಳ ಪೈಕಿ 35.6 ಲಕ್ಷ ವಿಚಾರಣೆ ಪೂರ್ಣಗೊಂಡಿರುವುದು ಈ ಮೂರು ಅಂಶಗಳು ಕರ್ನಾಟಕದ ಎಸ್‌‍ಐಆರ್‌ ಪ್ರಕ್ರಿಯೆಯ ಮುಂದಿನ ಹಂತವನ್ನು ನಿರ್ಧರಿಸುವ ಪ್ರಮುಖ ಅಂಶಗಳಾಗಿವೆ.
