ವಿಶ್ವಸಂಸ್ಥೆ, ಆ.26 (ಪಿಟಿಐ)- ಆಹಾರ, ರಸಗೊಬ್ಬರ ಹಾಗೂ ಇಂಧನದ ನಿರಂತರ ಸಾಗಣೆಗೆ ಸುರಕ್ಷಿತ ಮತ್ತು ಊಹಿಸಬಹುದಾದ ಕಡಲ ವ್ಯಾಪಾರ ಮಾರ್ಗಗಳು ಅತ್ಯಗತ್ಯವಾಗಿದ್ದು, ನಿರ್ಣಾಯಕ ಸಮುದ್ರ ಮಾರ್ಗಗಳು ಹಾಗೂ ಕಡಲ ಮೂಲಸೌಕರ್ಯವನ್ನು ರಕ್ಷಿಸಲು ಅಂತರರಾಷ್ಟ್ರೀಯ ಸಮುದಾಯ ಸಾಮೂಹಿಕವಾಗಿ ಕಾರ್ಯನಿರ್ವಹಿಸಬೇಕು ಎಂದು ಭಾರತ ಕರೆ ನೀಡಿದೆ.
ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಉನ್ನತ ಮಟ್ಟದ ಮುಕ್ತ ಚರ್ಚೆಯಲ್ಲಿ ಮಾತನಾಡಿದ ವಿಶ್ವಸಂಸ್ಥೆಯಲ್ಲಿನ ಭಾರತದ ಖಾಯಂ ಪ್ರತಿನಿಧಿ ಹರೀಶ್ ಪರ್ವತನೇನಿ, “ಆಹಾರ ಅಭದ್ರತೆಯು ಸಶಸ್ತ್ರ ಸಂಘರ್ಷದ ಅತ್ಯಂತ ಗಂಭೀರ ಮಾನವೀಯ ಪರಿಣಾಮಗಳಲ್ಲಿ ಒಂದಾಗಿದೆ. ಇಂದಿನ ಸಂಘರ್ಷಗಳು ಹಗೆತನ ನಡೆಯುವ ತಕ್ಷಣದ ಪ್ರದೇಶವನ್ನು ಮೀರಿಯೂ ಪರಿಣಾಮ ಬೀರುತ್ತಿವೆ” ಎಂದು ಹೇಳಿದರು.
‘ಬೆಂಕಿಯಡಿಯಲ್ಲಿ ಆಹಾರ: ಜಾಗತಿಕ ಮತ್ತು ಸ್ಥಳೀಯ ಆಹಾರ ಬಿಕ್ಕಟ್ಟುಗಳನ್ನು ತಗ್ಗಿಸುವಲ್ಲಿ ಭದ್ರತಾ ಮಂಡಳಿಯ ಪಾತ್ರ’ ಎಂಬ ವಿಷಯದ ಕುರಿತು ನಡೆದ ಚರ್ಚೆಯಲ್ಲಿ ಅವರು ಮಾತನಾಡಿದರು.
ಇಂಧನ ಮಾರುಕಟ್ಟೆಗಳು, ರಸಗೊಬ್ಬರ ಪೂರೈಕೆ, ಕಡಲ ಸಾರಿಗೆ, ಮಾನವೀಯ ಲಾಜಿಸ್ಟಿಕ್ಸ್ ಮತ್ತು ಕೃಷಿ ವ್ಯಾಪಾರಕ್ಕೆ ಉಂಟಾಗುವ ಅಡಚಣೆಗಳು ಪ್ರಾದೇಶಿಕ ಸಂಘರ್ಷಗಳು ಜಾಗತಿಕ ಆಹಾರ ಭದ್ರತೆಗೆ ಹೇಗೆ ಬೆದರಿಕೆಯೊಡ್ಡುತ್ತವೆ ಎಂಬುದನ್ನು ತೋರಿಸಿವೆ. ಇದರ ಹೊರೆ ಆಮದು ಅವಲಂಬಿತ ಅಭಿವೃದ್ಧಿಶೀಲ ರಾಷ್ಟ್ರಗಳ ಮೇಲೆ ಅಸಮಾನವಾಗಿ ಬೀಳುತ್ತಿದೆ ಎಂದು ಅವರು ಹೇಳಿದರು.
ಸಂಘರ್ಷಗಳ ಮಾನವೀಯ ಪರಿಣಾಮಗಳನ್ನು ತಗ್ಗಿಸುವುದು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ತಕ್ಷಣದ ಆದ್ಯತೆಯಾಗಬೇಕು ಎಂದು ಭಾರತ ಒತ್ತಿ ಹೇಳಿದೆ. ಇದಕ್ಕಾಗಿ ಸುರಕ್ಷಿತ, ತ್ವರಿತ ಮತ್ತು ಅಡೆತಡೆಯಿಲ್ಲದ ಮಾನವೀಯ ನೆರವಿಗೆ ಅವಕಾಶ ಕಲ್ಪಿಸುವುದು, ಅಗತ್ಯವಿರುವ ಕಡೆ ಸಂಘರ್ಷ ನಿವಾರಣಾ ವ್ಯವಸ್ಥೆಗಳನ್ನು ಬೆಂಬಲಿಸುವುದು ಹಾಗೂ ನಿರ್ಬಂಧಗಳ ಆಡಳಿತ ಸೇರಿದಂತೆ ಭದ್ರತಾ ಮಂಡಳಿಯ ಕ್ರಮಗಳಿಂದ ಮಾನವೀಯ ನೆರವು ಅಥವಾ ಕಾನೂನುಬದ್ಧ ಆಹಾರ ಮತ್ತು ಕೃಷಿ ವ್ಯಾಪಾರಕ್ಕೆ ಅಜಾಗರೂಕತೆಯಿಂದ ಅಡ್ಡಿಯಾಗದಂತೆ ನೋಡಿಕೊಳ್ಳುವುದು ಅಗತ್ಯ ಎಂದು ಪರ್ವತನೇನಿ ಹೇಳಿದರು.
ಅಂತರರಾಷ್ಟ್ರೀಯ ಕಾನೂನಿಗೆ ಅನುಗುಣವಾಗಿ ವಾಣಿಜ್ಯ ಸಾಗಣೆಯ ಸುರಕ್ಷತೆ ಹಾಗೂ ಸಂಚಾರ ಸ್ವಾತಂತ್ರ್ಯವನ್ನು ಸಂರಕ್ಷಿಸುವ ಅಗತ್ಯವನ್ನು ಅವರು ಒತ್ತಿಹೇಳಿದರು.
“ಆಹಾರ, ರಸಗೊಬ್ಬರ, ಇಂಧನ ಮತ್ತು ಇತರ ಅಗತ್ಯ ಸರಕುಗಳ ಅಡೆತಡೆಯಿಲ್ಲದ ಸಾಗಣೆಗೆ ಸುರಕ್ಷಿತ ಮತ್ತು ಊಹಿಸಬಹುದಾದ ಸಮುದ್ರ ವ್ಯಾಪಾರ ಮಾರ್ಗಗಳು ಅನಿವಾರ್ಯ. ಸಂಘರ್ಷದ ಸಂದರ್ಭದಲ್ಲಿ ವಾಣಿಜ್ಯ ಸಾಗಣೆಗೆ ಉಂಟಾಗುವ ಅಡಚಣೆಗಳು ತಕ್ಷಣದ ಪ್ರದೇಶವನ್ನು ಮೀರಿ ಪರಿಣಾಮ ಬೀರಬಹುದು. ಇದರಿಂದ ಆಹಾರ ಆಮದು ಮಾಡಿಕೊಳ್ಳುವ ಅಭಿವೃದ್ಧಿಶೀಲ ರಾಷ್ಟ್ರಗಳು ಮತ್ತು ಮಾನವೀಯ ಕಾರ್ಯಾಚರಣೆಗಳು ಅಸಮಾನವಾಗಿ ಬಾಧಿತವಾಗುತ್ತವೆ” ಎಂದು ಅವರು ಹೇಳಿದರು.
ಆದ್ದರಿಂದ ನಿರ್ಣಾಯಕ ಸಮುದ್ರ ಮಾರ್ಗಗಳು ಮತ್ತು ಕಡಲ ಮೂಲಸೌಕರ್ಯವನ್ನು ರಕ್ಷಿಸಲು ಅಂತರರಾಷ್ಟ್ರೀಯ ಸಮುದಾಯ ಸಾಮೂಹಿಕವಾಗಿ ಕಾರ್ಯನಿರ್ವಹಿಸಬೇಕು. ಕಾನೂನುಬದ್ಧ ವಾಣಿಜ್ಯ ಹಾಗೂ ಮಾನವೀಯ ಸಾಗಣೆಗಳು ಅನಗತ್ಯ ಅಡಚಣೆಗಳಿಲ್ಲದೆ ಮುಂದುವರಿಯುವುದನ್ನು ಖಚಿತಪಡಿಸಿಕೊಳ್ಳಬೇಕು ಎಂದು ಅವರು ಕರೆ ನೀಡಿದರು.
ಚರ್ಚೆಯಲ್ಲಿ ಮಾತನಾಡಿದ ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೊ ಗುಟೆರೆಸ್, 2025ರಲ್ಲಿ ಎರಡನೇ ಮಹಾಯುದ್ಧದ ನಂತರದ ಅತ್ಯಧಿಕ ಸಂಖ್ಯೆಯ ಸಶಸ್ತ್ರ ಸಂಘರ್ಷಗಳು ನಡೆದಿದ್ದು, ಕನಿಷ್ಠ 266 ಮಿಲಿಯನ್ ಜನರು ತೀವ್ರ ಆಹಾರ ಅಭದ್ರತೆಯನ್ನು ಎದುರಿಸಿದ್ದರು ಎಂದು ಹೇಳಿದರು.
2025ರಲ್ಲಿ ಈ ಶತಮಾನದಲ್ಲೇ ಮೊದಲ ಬಾರಿಗೆ ಸುಡಾನ್ ಮತ್ತು ಗಾಜಾದಲ್ಲಿ ಎರಡು ಕ್ಷಾಮಗಳು ಏಕಕಾಲದಲ್ಲಿ ದೃಢಪಟ್ಟಿದ್ದು, ಇದನ್ನು “ನಾಚಿಕೆಗೇಡಿನ ಮೈಲಿಗಲ್ಲು” ಎಂದು ಗುಟೆರೆಸ್ ಬಣ್ಣಿಸಿದರು.
ವಿಶ್ವಸಂಸ್ಥೆಯ ಇತ್ತೀಚಿನ ‘ಹಸಿವಿನ ಹಾಟ್ಸ್ಪಾಟ್’ ವರದಿಯ ಪ್ರಕಾರ, 13 ಹಸಿವಿನ ಹಾಟ್ಸ್ಪಾಟ್ಗಳ ಪೈಕಿ 12ರಲ್ಲಿ ಸಂಘರ್ಷ ಮತ್ತು ಹಿಂಸಾಚಾರವೇ ಪ್ರಮುಖ ಕಾರಣಗಳಾಗಿವೆ ಎಂದು ಅವರು ತಿಳಿಸಿದರು.
ಇರಾನ್ ವಿರುದ್ಧದ ಅಮೆರಿಕ-ಇಸ್ರೇಲ್ ಯುದ್ಧ ಮುಂದುವರಿದಿರುವ ಹಿನ್ನೆಲೆಯಲ್ಲಿ ಹಾರ್ಮುಜ್ ಜಲಸಂಧಿಯ ಮಹತ್ವವನ್ನು ಉಲ್ಲೇಖಿಸಿದ ಗುಟೆರೆಸ್, ಜಾಗತಿಕ ತೈಲ ಪೂರೈಕೆಯ ಸುಮಾರು ಐದನೇ ಒಂದು ಭಾಗ ಹಾಗೂ ಜಾಗತಿಕ ರಸಗೊಬ್ಬರ ವ್ಯಾಪಾರದ ಮೂರನೇ ಒಂದು ಭಾಗ ಈ ಮಾರ್ಗದ ಮೂಲಕ ಸಾಗುತ್ತದೆ ಎಂದು ಹೇಳಿದರು.
ನಿರ್ಬಂಧಗಳು ಮತ್ತು ಮಾರ್ಗಗಳ ಮುಚ್ಚುವಿಕೆಯಿಂದ ಸರಕುಗಳ ಬೆಲೆ ಏರಿಕೆಯಾಗಿದ್ದು, ಲಭ್ಯತೆ ಕುಸಿದಿದೆ. ಕೆಂಪು ಸಮುದ್ರದಲ್ಲಿ ವಾಣಿಜ್ಯ ಹಡಗುಗಳ ಮೇಲಿನ ದಾಳಿಗಳು ಆಹಾರ ಸೇರಿದಂತೆ ಇತರ ಸರಕುಗಳ ಪೂರೈಕೆ ಸರಪಳಿಗೆ ಮತ್ತಷ್ಟು ಬೆದರಿಕೆಯೊಡ್ಡುತ್ತಿವೆ ಎಂದು ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಹೇಳಿದರು.
