ಸೋಲುಖುಂಬು, ನ.3- ನೇಪಾಳದ ಸೋಲುಖುಂಬು ಜಿಲ್ಲೆಯಲ್ಲಿ ಇಂದು ಬೆಳಗ್ಗೆ ಲ್ಯಾಂಡಿಂಗ್ ವೇಳೆ ಎರಡು ಹೆಲಿಕಾಪ್ಟರ್‌ಗಳು ಪರಸ್ಪರ ಡಿಕ್ಕಿ ಹೊಡೆದಿವೆ. ಘಟನೆಯಲ್ಲಿ ಭಾರತೀಯ ಪ್ರಜೆಯೊಬ್ಬರು ಮೃತಪಟ್ಟಿದ್ದು, ಮತ್ತೊಬ್ಬ ಪ್ರಯಾಣಿಕ ಗಾಯಗೊಂಡಿದ್ದಾರೆ.ಖುಂಬು ಪಸಾಂಗ್‌ ಲಾಮು ಗ್ರಾಮೀಣ ಪುರಸಭೆಯ ಫೆರಿಚೆ ಪ್ರದೇಶದಲ್ಲಿ ಬೆಳಗ್ಗೆ ಸುಮಾರು 8.11ರ ವೇಳೆಗೆ ಈ ಅಪಘಾತ ಸಂಭವಿಸಿದೆ.
ಏರ್‌ ಡೈನಾಸ್ಟಿ ಮತ್ತು ಫಿಶ್‌ಟೇಲ್‌ ಏರ್‌ ಸಂಸ್ಥೆಗಳಿಗೆ ಸೇರಿದ ಹೆಲಿಕಾಪ್ಟರ್‌ಗಳು ಇಳಿಯುವ ಪ್ರಕ್ರಿಯೆಯಲ್ಲಿದ್ದಾಗ ಡಿಕ್ಕಿಯಾಗಿವೆ ಎಂದು ಜಿಲ್ಲಾ ಪೊಲೀಸರು ತಿಳಿಸಿದ್ದಾರೆ.ಅಪಘಾತದಲ್ಲಿ ಮೃತಪಟ್ಟ ಭಾರತೀಯ ಪ್ರಜೆಯನ್ನು ವಸಂತ್‌ ಕುಮಾರ್‌ ಬಲರಾಮರಾಮಡು (47) ಎಂದು ಗುರುತಿಸಲಾಗಿದೆ. ಅವರು ಫಿಶ್‌ಟೇಲ್‌ ಏರ್‌ ಸಂಸ್ಥೆಯ ಹೆಲಿಕಾಪ್ಟರ್‌ನಲ್ಲಿ ಪ್ರಯಾಣಿಸುತ್ತಿದ್ದರು ಎಂದು ಪೊಲೀಸ್‌ ಇನ್‌ಸ್ಪೆಕ್ಟರ್‌ ಮೌಸಮ್‌ ತಮಾಂಗ್‌ ತಿಳಿಸಿದ್ದಾರೆ.
ಗಾಯಗೊಂಡಿರುವ ಮತ್ತೊಬ್ಬ ಪ್ರಯಾಣಿಕನಿಗೆ ಪ್ರಾಥಮಿಕ ಚಿಕಿತ್ಸೆ ನೀಡುವ ಉದ್ದೇಶದಿಂದ ಪ್ರಭು ಏರ್‌ನ ಹೆಲಿಕಾಪ್ಟರ್‌ ಮೂಲಕ ಲುಕ್ಲಾಗೆ ಸ್ಥಳಾಂತರಿಸಲಾಗಿದೆ. ಏರ್‌ ಡೈನಾಸ್ಟಿ ಹೆಲಿಕಾಪ್ಟರ್‌ನ ಪೈಲಟ್‌ ರವೀಂದ್ರ ಪ್ರಜಾಪತಿ ಗಾಯಗೊಂಡಿದ್ದಾರೆ. ಫಿಶ್‌ಟೇಲ್‌ ಏರ್‌ ಹೆಲಿಕಾಪ್ಟರ್‌ ಅನ್ನು ಕ್ಯಾಪ್ಟನ್‌ ಪ್ರಜ್ವಲ್‌ ಕೆ.ಸಿ. ಚಲಾಯಿಸುತ್ತಿದ್ದರು ಎಂದು ವರದಿ ತಿಳಿಸಿದೆ. ರಕ್ಷಣಾ ಕಾರ್ಯಾಚರಣೆಗೆ ಸಿಮ್ರಿಕ್‌ ಏರ್‌ನ ಹೆಲಿಕಾಪ್ಟರ್‌ ಕೂಡ ಸ್ಥಳಕ್ಕೆ ಧಾವಿಸಿದೆ.
ಎವರೆಸ್ಟ್‌ ಚಾರಣಿಗರ ಪ್ರಮುಖ ತಾಣ
ಫೆರಿಚೆ ಎವರೆಸ್ಟ್‌ ಪರ್ವತ ಪ್ರದೇಶದಲ್ಲಿರುವ ಪ್ರಮುಖ ವಸತಿ ತಾಣವಾಗಿದೆ. ಎವರೆಸ್ಟ್‌ ಬೇಸ್‌ ಕ್ಯಾಂಪ್‌ಗೆ ತೆರಳುವ ಚಾರಣಿಗರು ಮತ್ತು ಪರ್ವತಾರೋಹಿಗಳು ಈ ಮಾರ್ಗವಾಗಿ ಸಂಚರಿಸುತ್ತಾರೆ. ಲುಕ್ಲಾ ಸೇರಿದಂತೆ ಸುತ್ತಮುತ್ತಲಿನ ಪ್ರದೇಶಗಳಿಂದ ಪ್ರವಾಸಿಗರನ್ನು ಸಾಗಿಸಲು ಹೆಲಿಕಾಪ್ಟರ್‌ ಸೇವೆಗಳನ್ನು ಹೆಚ್ಚಾಗಿ ಬಳಸಲಾಗುತ್ತದೆ. ನೇಪಾಳದ ಪರ್ವತ ಪ್ರದೇಶಗಳಲ್ಲಿ ಎತ್ತರ, ಹವಾಮಾನದಲ್ಲಿನ ತ್ವರಿತ ಬದಲಾವಣೆ, ಕಡಿಮೆ ಗೋಚರತೆ ಹಾಗೂ ಸೀಮಿತ ಲ್ಯಾಂಡಿಂಗ್ ಸ್ಥಳಗಳು ಹೆಲಿಕಾಪ್ಟರ್‌ ಸಂಚಾರಕ್ಕೆ ಸವಾಲಾಗಿವೆ.