ಕೈರೋ,ಏ.19- ಅಮೆರಿಕದ ಬಂದರುಗಳ ನಿರ್ಬಂಧದ ವಿರುದ್ಧ ಪ್ರತಿಕ್ರಿಯೆಯಾಗಿ, ಇರಾನ್ ಮತ್ತೆ ಹಾರ್ಮುಜ್ ಸಮುದ್ರ ಜಲಸಂಧಿಯನ್ನು ಮುಚ್ಚಿ, ಅಲ್ಲಿ ಸಾಗಲು ಪ್ರಯತ್ನಿಸಿದ ಹಡಗುಗಳ ಮೇಲೆ ಗುಂಡಿನ ದಾಳಿ ನಡೆಸಿದ್ದರಿಂದ ಉದ್ವಿಗ್ನತೆ ಮತ್ತಷ್ಟು ಹೆಚ್ಚಿದೆ.
ಅಮೆರಿಕ ತನ್ನ ನಿರ್ಬಂಧವನ್ನು ಹಿಂಪಡೆಯುವವರೆಗೆ ಈ ಸಮುದ್ರ ಸಂಕುಲ ಮುಚ್ಚಿರುತ್ತದೆ ಎಂದು ಇರಾನ್ ಕ್ರಾಂತಿಕಾರಿ ಗಾರ್ಡ್ ನೌಕಾಪಡೆ ತಿಳಿಸಿದೆ. ಪರ್ಷಿಯನ್ ಗಲ್್ಫ ಮತ್ತು ಓಮನ್ ಸಮುದ್ರದ ನಿಲ್ದಾಣದಲ್ಲಿರುವ ಯಾವುದೇ ಹಡಗು ಚಾಲನೆ ಮಾಡಬಾರದು. ಹಾರ್ಮುಜ್ ಸಮುದ್ರ ಜಲಸಂಧಿಯತ್ತ ಸಮೀಪಿಸುವುದನ್ನು ಶತ್ರುವಿಗೆ ಸಹಕಾರವೆಂದು ಪರಿಗಣಿಸಲಾಗುತ್ತದೆ ಮತ್ತು ಗುರಿಯಾಗುತ್ತದೆ ಎಂದು ಎಚ್ಚರಿಸಿದೆ.
ಪ್ರಪಂಚದ ಒಟ್ಟು ತೈಲ ಸಾಗಣೆಯ ಸುಮಾರು ಐದನೇ ಒಂದು ಭಾಗ ಈ ಮಾರ್ಗದ ಮೂಲಕ ಸಾಗುತ್ತದೆ. ಈ ಮಾರ್ಗದಲ್ಲಿ ಹೊಸ ದಾಳಿಗಳು ಜಾಗತಿಕ ಇಂಧನ ಸಂಕಷ್ಟವನ್ನು ಮತ್ತಷ್ಟು ಗಂಭೀರಗೊಳಿಸುವ ಸಾಧ್ಯತೆಯಿದೆ ಹಾಗೂ ದೇಶಗಳನ್ನು ಮತ್ತೆ ಸಂಘರ್ಷದ ದಿಕ್ಕಿನಲ್ಲಿ ತಳ್ಳಬಹುದು.
ಸೂಕ್ಷ್ಮ ಯುದ್ಧ ವಿರಾಮ ಒಪ್ಪಂದ ಬುಧವಾರಕ್ಕೆ ಕೊನೆಗೊಳ್ಳಲಿದ್ದು, ಇರಾನ್ ಹೇಳುವಂತೆ ಅಮೆರಿಕದಿಂದ ಹೊಸ ಪ್ರಸ್ತಾವನೆಗಳು ಬಂದಿವೆ. ಪಾಕಿಸ್ತಾನದ ಮಧ್ಯವರ್ತಿತ್ವದಲ್ಲಿ ಮತ್ತೊಂದು ನೇರ ಮಾತಕತೆ ನಡೆಸಲು ಪ್ರಯತ್ನಗಳು ನಡೆಯುತ್ತಿವೆ. ಇದಕ್ಕೂ ಮೊದಲು, ಇರಾನ್ ಸಂಯುಕ್ತ ಸೇನಾ ಕಮಾಂಡ್ ಹಾರ್ಮುಜ್ ಸಮುದ್ರ ಸಂಕುಲದ ನಿಯಂತ್ರಣ ಮತ್ತೆ ನಮ ವಶಕ್ಕೆ ಬಂದಿದೆ ಎಂದು ಹೇಳಿತ್ತು.
ಬ್ರಿಟಿಷ್ ಸೇನೆಯ ಯುನೈಟೆಡ್ ಕಿಂಗ್ಡಮ್ ಮೆರಿಟೈಮ್ ಟ್ರೇಡ್ ಆಪರೇಷನ್್ಸಕೇಂದ್ರದ ಪ್ರಕಾರ, ಕ್ರಾಂತಿಕಾರಿ ಗಾರ್ಡ್ ದೋಣಿಗಳು ಒಂದು ಟ್ಯಾಂಕರ್ ಮೇಲೆ ಗುಂಡಿನ ದಾಳಿ ನಡೆಸಿದ್ದು, ಮತ್ತೊಂದು ಕಂಟೈನರ್ ಹಡಗಿಗೆ ಅಪರಿಚಿತ ವಸ್ತು ತಗುಲಿ ಕೆಲವು ಕಂಟೈನರ್ಗಳಿಗೆ ಹಾನಿಯಾಗಿದೆ.
ಭಾರತದ ವಿದೇಶಾಂಗ ಸಚಿವಾಲಯವು ಎರಡು ಭಾರತೀಯ ಧ್ವಜದ ವ್ಯಾಪಾರ ಹಡಗುಗಳ ಮೇಲೆ ನಡೆದ ಗುಂಡಿನ ದಾಳಿಯನ್ನು ಗಂಭೀರ ಘಟನೆ ಎಂದು ಪರಿಗಣಿಸಿ, ನವದೆಹಲಿಯಲ್ಲಿನ ಇರಾನ್ ರಾಯಭಾರಿಯನ್ನು ಕರೆಸಿಕೊಂಡು ಘಟನೆ ಬಗ್ಗೆ ವಿವರಿಸಲಾಗಿದೆ.
ವಿಶೇಷವಾಗಿ, ಈ ಹಿಂದೆ ಕೆಲವು ಭಾರತಮುಖಿ ಹಡಗುಗಳಿಗೆ ಇರಾನ್ ಅನುಮತಿ ನೀಡಿದ್ದ ನಂತರವೂ ಈ ಘಟನೆ ನಡೆದಿದೆ.
ಯುದ್ಧ ಜಾಗತಿಕ ಆರ್ಥಿಕತೆಯ ಮೇಲೆ ದೊಡ್ಡ ಪರಿಣಾಮ ಬೀರುವುದರ ಜೊತೆಗೆ ಅಮೆರಿಕ ಅಧ್ಯಕ್ಷ ಡೊನಾಲ್್ಡ ಟ್ರಂಪ್ ಮೇಲೆ ರಾಜಕೀಯ ಒತ್ತಡ ತರುತ್ತದೆ.ಅಮೆರಿಕದ ದೃಷ್ಟಿಯಿಂದ, ಈ ನಿರ್ಬಂಧ ಇರಾನ್ನ ಈಗಾಗಲೇ ದುರ್ಬಲಗೊಂಡ ಆರ್ಥಿಕತೆಯನ್ನು ಇನ್ನಷ್ಟು ಕುಗ್ಗಿಸಬಹುದು. ಇರಾನ್ನ ಹೊಸ ಪರಮೋನ್ನತ ನಾಯಕ ಆಯತೊಲ್ಲಾ ಮೊಜ್ತಬಾ ಖಮೇನಿ ಇದಕ್ಕೆ ಕಠಿಣ ಹೇಳಿಕೆ ನೀಡಿ, ನಮ ನೌಕಾಪಡೆ ಶತ್ರುಗಳಿಗೆ ಕಹಿ ಸೋಲು ನೀಡಲು ಸಿದ್ಧವಾಗಿದೆ ಎಂದು ಹೇಳಿದ್ದಾರೆ.
ಇಸ್ರೇಲ್ ಮತ್ತು ಲೆಬನಾನ್ನ ಹೆಜ್ಬೊಲ್ಲಾ ಸಂಘಟನೆ ನಡುವೆ 10 ದಿನಗಳ ಯುದ್ಧ ವಿರಾಮ ಘೋಷಣೆಯಾದ ನಂತರ, ಇರಾನ್ ವಾಣಿಜ್ಯ ಹಡಗುಗಳಿಗೆ ಸಮುದ್ರಸಂಕುಲವನ್ನು ತೆರೆಯುವುದಾಗಿ ಘೋಷಿಸಿತ್ತು. ಇದರಿಂದ ತೈಲ ಬೆಲೆಗಳು ಕುಸಿದಿದ್ದವು. ಆದರೆ, ಡೊನಾಲ್್ಡ ಟ್ರಂಪ್ ಅಮೆರಿಕದ ನಿರ್ಬಂಧ ಪೂರ್ಣ ಪ್ರಮಾಣದಲ್ಲಿ ಮುಂದುವರಿಯುತ್ತದೆ ಎಂದು ಹೇಳಿದ್ದಾರೆ.
ಇರಾನ್ ಒಪ್ಪಂದಕ್ಕೆ ಬರುವವರೆಗೆ ಅದು ಮುಂದುವರಿಯುತ್ತದೆ ಎಂದರು. ಪಾಕಿಸ್ತಾನದಲ್ಲಿ ನಡೆದ ನೇರ ಮಾತುಕತೆ ಫಲಿತಾಂಶವಿಲ್ಲದೆ ಮುಗಿದ ನಂತರ ಈ ನಿರ್ಬಂಧ ಹೇರಲಾಗಿತ್ತು. ಅಮೆರಿಕ ಸೆಂಟ್ರಲ್ ಕಮಾಂಡ್ ಹೇಳುವಂತೆ ನಿರ್ಬಂಧದ ಬಳಿಕ ಅಮೆರಿಕ ಪಡೆಗಳು 23 ಹಡಗುಗಳನ್ನು ಹಿಂದಕ್ಕೆ ಕಳುಹಿಸಿವೆ.
ಇರಾನ್ ಉಪ ವಿದೇಶಾಂಗ ಸಚಿವ ಸಯೀದ್ ಖತೀಬ್ಜಾದೆ ಅವರು ಅಮೆರಿಕದ ತಪ್ಪು ಲೆಕ್ಕಾಚಾರಗಳು ಜಾಗತಿಕ ಆರ್ಥಿಕತೆಯನ್ನು ಅಪಾಯಕ್ಕೆ ತಳ್ಳುತ್ತಿವೆ ಎಂದು ಹೇಳಿದ್ದಾರೆ. ಇರಾನ್ನ ಸುಪ್ರೀಂ ನ್ಯಾಷನಲ್ ಸೆಕ್ಯುರಿಟಿ ಕೌನ್ಸಿಲ್ ಈ ನಿರ್ಬಂಧವನ್ನು ಯುದ್ಧ ವಿರಾಮ ಉಲ್ಲಂಘನೆ ಎಂದು ಕರೆದಿದೆ.
ಕ್ರಾಂತಿಕಾರಿ ಗಾರ್ಡ್ ನೌಕಾಪಡೆಯು ಯಾವುದೇ ಹಡಗು ಸಂಚಾರಕ್ಕೂ ಅವಕಾಶವಿಲ್ಲ ಎಂದು ಸ್ಪಷ್ಟಪಡಿಸಿದೆ. ಈ ಬೆಳವಣಿಗೆಗಳು ಪಾಕಿಸ್ತಾನದ ವಿದೇಶಾಂಗ ಸಚಿವ ಇಶಾಕ್ ದರ್ ಅಮೆರಿಕ ಮತ್ತು ಇರಾನ್ ನಡುವೆ ಭಿನ್ನಾಭಿಪ್ರಾಯಗಳನ್ನು ನಿವಾರಿಸಲು ಪ್ರಯತ್ನಿಸುತ್ತಿದ್ದೇವೆ ಎಂದು ಹೇಳಿದ ಕೆಲವೇ ಗಂಟೆಗಳ ಬಳಿಕ ಸಂಭವಿಸಿವೆ. ಮುಂದಿನ ವಾರದ ಆರಂಭದಲ್ಲಿ ಮತ್ತೊಂದು ಸುತ್ತಿನ ಮಾತುಕತೆಗೆ ಪಾಕಿಸ್ತಾನ ಆತಿಥ್ಯ ವಹಿಸುವ ನಿರೀಕ್ಷೆಯಿದೆ.